༧གོང་ས་མཆོག་གིས་འགྲོ་བ་མི་གཅིག་གྱུར་གྱི་བསམ་བློའི་ཐོག་ནས་ང་ཚོའི་གཞིས་ཁྱིམ་ཁོ་ནར་གྱུར་བའི་སའི་གོ་ལ་འདི་སྲུང་སྐྱོབ་བྱེད་དགོས་ཞེས་གསུངས།
དེ་རིང་ཕྱི་ཚེས་ ༦ ཉིན་དབྱིན་ཇིའི་རྒྱལ་ས་ལི་ཊོན་དུ་རྒྱལ་པོ་ཆཱར་ལེ་སི་གསུམ་པའི་རྒྱལ་ཁྲི་མངའ་གསོལ་གྱི་མཛད་སྒོ་འཚོག་གི་ཡོད་པ་ལྟར། དེ་རིང་༧གོང་ས་རྒྱལ་བ་རིན་པོ་ཆེ་མཆོག་གིས་རྒྱལ་སྲིད་ཁྲི་འདོན་མཛད་སྒོར་འཚམས་འདྲིའི་གསུང་འཕྲིན་ཞིག་བསྩལ་བའི་ནང་། ཉིད་ཀྱི་སྐུ་ཚེ་ཡུན་རིང་བརྟན་པ་དང་དབྱིན་ཇིའི་མི་མང་བདེ་སྐྱིད་ཀྱི་དཔལ་ལ་རོལ་ཞིང་ལེགས་འཕེལ་ཡོང་བར་ཤོག
ལོ་མང་རིང་སྐུ་ཉིད་དང་ལྷན་དུ་གྲོགས་པོའི་མཛའ་བརྩེར་རོལ་བའི་སྐལ་བ་ལྡན་བྱུང་བས། ཁྱེད་ཀྱིས་མུ་མཐུད་འོས་འགན་འདི་སེམས་བཟང་བརྩེ་སེམས་དང་བཅས་ཏེ་གཞན་ཕན་གྱི་ལས་ལ་བརྩོན་པར་ངོས་ལ་གདེང་ཚོད་ཡོད། དེང་སྐབས་རྒྱལ་སྤྱིའི་སྤྱི་ཚོགས་འདི་དཀའ་ཁག་ཆེ་བའི་དུས་སྐབས་ཤིག་ན་ཡོད། ང་ཚོས་ངེས་པར་དུ་ཐུན་མོང་གི་འབད་བརྩོན་ལ་བརྟེན་ནས། བྱམས་སྙིང་རྗེ་དང་ཞི་བདེའི་འཛམ་གླིང་ཞིག་བསྐྲུན་ཐུབ་དགོས། དེ་ཡང་དཔེར་ན་དབུལ་ཕྱུག་གི་དཀའ་ངལ་སེལ་རྒྱུ་དང་། འགྲོ་བ་མི་གཅིག་གྱུར་གྱི་བསམ་བློའི་ཐོག་ནས་ང་ཚོའི་གཞིས་ཁྱིམ་ཁོ་ནར་གྱུར་བའི་སའི་གོ་ལ་འདི་སྲུང་སྐྱོབ་བྱེད་དགོས། ཞེས་གསུངས།
མཇུག་ཏུ་གསུང་འཕྲིན་ནང་། ངོས་ནས་ཁྱེད་དབྱིན་ཇིའི་མི་མང་གི་རེ་བ་དང་མངོན་འདོད་སྒྲུབ་པའི་དཀའ་ཁག་ཡོད་ཚད་ལས་རྒྱལ་བ་དང་། འཛམ་གླིང་ནང་དམག་འཁྲུག་མེད་ཅིང་ཞི་བདེ་ཅན་དུ་བསྒྱུར་བར་རམ་འདེགས་ཐུབ་པའི་རེ་སྨོན་ཞུ་ཡི་ཡོད། ཅེས་གསུངས་འདུག
ཡང་། དེ་རིང་དབྱིན་ཡུལ་སྐུ་ཚབ་དོན་གཅོད་ལས་ཁུངས་ཀྱིས། དབྱིན་ཇིའི་རྒྱལ་པོའི་ཁྲི་འདོན་མཛད་སྒོར་འཚམས་འདྲི་ཞུས་པའི་ནང་། དབྱིན་ཡུལ་གྱི་རྒྱལ་པོ་ཆཱལ་སེ་གསུམ་པ་མཆོག་དང་བཙུན་མོ་ཁཱ་མི་ལཱ་རྣམ་གཉིས་ཀྱི་ཁྲི་འཛིན་ཡུན་རིང་གནས་ཤིང་མཛད་འཕྲིན་རྒྱས་པའི་བཀྲ་ཤིས་སྨོན་འདུན་ཞུ། ཞེས་བརྗོད་འདུག
བྷི་བྷི་སི་གསར་ཁང་གི་གནས་ཚུལ་ལྟར་ན། དེ་རིང་དབྱིན་ཇིའི་རྒྱལ་པོའི་ཁྲི་འདོན་མཛད་སྒོར་འཛམ་གླིང་རྒྱལ་ཁབ་ ༡༠༠ ཡི་དབུ་འཁྲིད་ཁག་གིས་མཉམ་ཞུགས་གནང་གི་ཡོད་ཅིང་། མཛད་སྒོའི་དུས་ཡུན་ཆུ་ཚོད་གཉིས་དང་མཉམ་ཞུགས་བྱེད་མཁན་ཁྱོན་མགྲོན་པོ་ ༢༣༠༠ ཡོད་པ་རེད། འདས་ལོར་དབྱིན་ཇིའི་རྒྱལ་མོ་ཨིལ་རྫ་བྷ་ཐི་(Elizabeth)མཆོག་འདས་གྲོངས་སུ་ཕྱིན་པ་དང་། ད་རེས་དབྱིན་ཇིའི་རྒྱལ་རྒྱུད་དུ་ལོ་ངོ་ ༧༠ རྗེས་ནས་རྒྱལ་སྲིད་ཁྲི་འདོན་གྱི་མཛད་སྒོ་བསྡུ་ཡི་ཡོད་ཅིང་། རྒྱལ་སྲས་ཆཱར་ལེ་སི་གསུམ་པ་ནི་དབྱིན་ཇིའི་རྒྱལ་པོ་ཐེངས་ ༤༠ པ་དེ་ཆགས་ཀྱི་འདུག
གསར་འགོད་པ། སྐལ་བཟང་སྦྱིན་པ།
