འདི་ལོའི་རྒྱ་གར་དབུས་འབྲིང་རིམ་ཤེས་ཡོན་ལྷན་ཚོགས་ཁྱབ་ཁོངས་བོད་སློབ་ཁོངས་ནས་འཛིན་རིམ་བཅུ་གཉིས་ཀྱི་སློབ་ཕྲུག་གྲངས་ ༡༠༥༥ རྒྱལ་ཡོངས་ཡིག་རྒྱུགས་ནང་མཉམ་ཞུགས་བྱས་ཏེ་སློབ་ཕྲུག་གྲངས་ ༡༠༣༨ ཀྱིས་ཡིག་རྒྱུགས་འཕྲོད་དེ་ཡིག་རྒྱུགས་འཕྲོད་པའི་བརྒྱ་ཆ་ ༩༨་༣༩ རེད་འདུག
རྒྱ་གར་དབུས་འབྲིང་རིམ་ཤེས་ཡོན་ལྷན་ཚོགས་ཁྱབ་ཁོངས་འཛིན་རིམ་བཅུ་གཉིས་དང་བཅུ་པའི་རྒྱུགས་འབྲས་རིམ་གྱིས་གསལ་བསྒྲགས་གནང་བཞིན་ཡོད་ཅིང་། བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་ཕྱོགས་བསྡོམས་ལྟར་ན། བོད་སློབ་ཁོངས་ནས་སམ་བྷོ་ཊ་བོད་སློབ་ཚོགས་པ་དང་། རྡ་ས་བོད་ཁྱིམ། མ་སུ་རི་བོད་ཁྱིམ་བཅས་ཀྱི་འཛིན་རིམ་བཅུ་གཉིས་ཀྱི་སློབ་ཕྲུག་གྲངས་ ༡༠༥༥ ཡིག་རྒྱུགས་ལ་མཉམ་ཞུགས་གནང་བའི་ནང་ནས་སློབ་ཕྲུག་གྲངས་ ༡༠༣༨ ཡིག་རྒྱུགས་འཕྲོད་དེ་འཛིན་རིམ་བཅུ་གཉིས་པའི་ཡིག་རྒྱུགས་འཕྲོད་པའི་བརྒྱ་ཆ་ ༩༨་༣༩ དང་། ཆ་སྙོམ་བརྒྱ་ཆ་ ༧༣་༡༣ ཡིན་པ་དང་། དེ་ལས་སམ་བྷོ་ཊ་བོད་སློབ་ཚོགས་པའི་ཁོངས་གཏོགས་སློབ་གྲྭ་གྲངས་ ༣ དང་། རྡ་ས་བོད་ཁྱིམ་ཁོངས་གཏོགས་སློབ་གྲྭ་གཅིག་བཅས་ནས་ཡིག་རྒྱུགས་གྲུབ་འབྲས་བརྒྱ་ཆ་བརྒྱ་ལེགས་སོན་བྱུང་། བོད་སློབ་ཁག་བརྒྱད་ཀྱི་འཛིན་རིམ་བཅུ་གཉིས་ཀྱི་སློབ་མ་ ༡༣ བསྐྱར་རྒྱུགས་དང་། སློབ་མ་ ༤ དམིགས་བསལ་ཆ་རྐྱེན་འོག་བསྐྱར་རྒྱུགས་ལ་ཞུགས་དགོས་ཀྱི་ཡོད་པ་རེད།
དེ་བཞིན་བོད་སློབ་གྲངས་ ༢༣ ནས་སློབ་མ་གྲངས་ ༡༡༡༤ འཛིན་རིམ་བཅུ་པའི་ཡིག་རྒྱུགས་ལ་མཉམ་ཞུགས་གནང་བའི་ཁོངས་སློབ་མ་གྲངས་ ༡༠༦༧ ཡིག་རྒྱུགས་འཕྲོད་དེ་ཁྱོན་ཡིག་རྒྱུགས་འཕྲོད་པའི་བརྒྱ་ཆ་༩༥་༧༩ དང་། ཆ་སྙོམ་བརྒྱ་ཆ་ ༦༡་༧༤ ཡིན། དེ་ལས་སམ་བྷོ་ཊ་བོད་སློབ་ཚོགས་པའི་ཁྱབ་ཁོངས་སློབ་གྲྭ་གྲངས་ ༥ དང་། རྡ་ས་བོད་ཁྱིམ་ཁྱབ་ཁོངས་སློབ་གྲྭ་བཞི་བཅས་ནས་ཡིག་རྒྱུགས་གྲུབ་འབྲས་བརྒྱ་ཆ་བརྒྱ་ལེགས་སོན་བྱུང་ཡོད། འཛིན་རིམ་བཅུ་པའི་ནང་བོད་སློབ་གྲངས་ ༡༤ ནས་སློབ་ཕྲུག་ ༤༧ གྱིས་བསྐྱར་རྒྱུགས་གཏོང་དགོས་ཀྱི་ཡོད་འདུག
ཕྱི་ལོ་ ༢༠༢༣ ལོའི་འཛིན་རིམ་བཅུ་གཉིས་ཀྱི་རྒྱུགས་
དེ་བཞིན་དགའ་ལྡན་ཕོ་བྲང་གི་བྱ་དགའ་ཐོབ་མཁན་སློབ་ཕྲུག་བཅུ་ནི། སྒྱུ་རྩལ་སྡེ་ཚན་ནས་དྷ་སྟེང་བོད་ཁྱིམ་སློབ་གྲྭའི་སློབ་མ་བསྟན་འཛིན་འཛོམས་སྐྱིད་ལགས་ལ་བརྒྱ་ཆ་ ༩༦་དང་། མ་སུ་རི་བོད་ཁྱིམ་གྱི་སློབ་མ་བསྟན་འཛིན་བདེ་སྐྱིད་ལགས་ལ་བརྒྱ་ཆ་ ༩༥.༤། དྷ་སྟེང་བོད་ཁྱིམ་སློབ་གྲྭའི་སློབ་མ་བསྟན་འཛིན་ཡར་འཕེལ་ལགས་ལ་བརྒྱ་ཆ་ ༩༦། མ་སུ་རི་བོད་ཁྱིམ་སློབ་གྲྭའི་སློབ་མ་བསྟན་འཛིན་བདེ་སྐྱིད་ལགས་བརྒྱ་ཆ་ ༩༥.༤། དྷ་སྟེང་བོད་ཁྱིམ་སློབ་གྲྭའི་སློབ་མ་ཉི་མ་མཚམས་གཅོད་ལགས་ལ་བརྒྱ་ཆ་ ༩༥.༢ རེད་འདུག
ཚན་རིག་སྡེ་ཚན་ནས་སེ་ལ་ཀུའི་བོད་ཁྱིམ་སློབ་གྲྭའི་སློབ་མ་བསྟན་འཛིན་གཡུ་སྒྲོན་ལགས་ལ་བརྒྱ་ཆ་ ༩༣.༨ དང་། མོན་གྷོ་སཾ་བྷོ་ཊ་གཏན་སློབ་ཀྱི་སློབ་མ་འཆི་མེད་བསྟན་འཛིན་དབྱངས་འཛོམས་ལགས་བརྒྱ་ཆ་ ༩༣.༦། མོན་གྷོ་སཾ་བྷོ་ཊ་གཏན་སློབ་ཀྱི་སློབ་མ་བསྟན་འཛིན་འཕྲིན་ལས་ལགས་ལ་བརྒྱ་ཆ་ ༩༢.༢ རེད་འདུག
ཚོང་ལས་སྡེ་ཚན་ནས་སྦེལ་ཀོབ་བོད་ཁྱིམ་སློབ་གྲྭའི་སློབ་མ་བསྟན་འཛིན་སྐལ་བཟང་ལགས་ལ་བརྒྱ་ཆ་ ༩༦.༤ དང་། སྦེལ་ཀོབ་བོད་ཁྱིམ་སློབ་གྲྭའི་སློབ་མ་བསྟན་འཛིན་མཁའ་འགྲོ་ལགས་ལ་བརྒྱ་ཆ་ ༩༢.༢། མ་སུ་རི་བོད་ཁྱིམ་གྱི་སློབ་མ་བསྟན་འཛིན་དཔལ་ལྡན་ལགས་ལ་བརྒྱ་ཆ་ ༩༢.༢ རེད་འདུག
བོད་མིའི་སྒྲིག་འཛུགས་ཤེས་རིག་ལས་ཁུངས་ནས་བོད་སློབ་ཁག་གི་སློབ་ཕྲུག་རྣམས་ནས་རྒྱ་གར་དབུས་འབྲིང་རིམ་ཤེས་ཡོན་ལྷན་ཚོགས་ཀྱི་ཡིག་རྒྱུགས་ཆེན་མོར་གྲུབ་འབྲས་ལེགས་སོན་བྱུང་བར་འཚམས་འདྲི་དང་སྦྲགས། འབྲེལ་ཡོད་དགེ་རྒན་དང་། སློབ་སྤྱི། ཕ་མ་རྣམས་ལ་བསྔགས་བརྗོད་ཞུ། ཡིག་རྒྱུགས་གྲུབ་འབྲས་ལེགས་སོན་མ་བྱུང་བའི་སློབ་མ་ཚོས་སེམས་ཤུགས་མ་ཆག་པར་འབད་བརྩོན་ཧུར་སྐྱེད་གནང་དགོས་པའི་རེ་སྐུལ་གནང་འདུག
