སྟོབས་ཆེན་རྒྱལ་ཁབ་བདུན་གྱིས་བོད་དོན་གླེང་སློང་གནང་།

སྟོབས་ཆེན་རྒྱལ་ཁབ་བདུན་གྱིས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐད་སེམས་འཚབ་བསྟན་པ་དང་འབྲེལ་རྒྱ་ནག་གཞུང་དང་ལྷན་དུ་བོད་དོན་མུ་མཐུད་གླེང་སློང་བྱ་རྒྱུ་ཡིན་པ་བརྗོད།

ཁ་སང་ཕྱི་ཚེས་ ༢༢ ཉིན་རྒྱལ་སྤྱིའི་བོད་དོན་ལས་འགུལ་ཁང་གིས་གནས་ཚུལ་སྤེལ་བ་ལྟར་ན། འཛམ་གླིང་གི་སྟོབས་ཆེན་རྒྱལ་ཁབ་ ༧ (G7) གྱི་མགོ་ཁྲིད་ཀྱིས། བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐད་སེམས་འཚབ་བསྟན་ཡོད་པ་མ་ཟད། མུ་མཐུད་དུ་རྒྱ་ནག་གཞུང་དང་ལྷན་དུ་སེམས་འཚབ་ཡོད་པ་གླེང་སློང་བྱ་རྒྱུ་ཡིན་སྐོར་བརྗོད་འདུག

ཟླ་འདིའི་ཕྱི་ཚེས་ ༡༩ ནས་ ༢༡ བར་ཉིན་གྲངས་གསུམ་རིང་ཉི་ཧོང་གི་གྲོང་ཁྱེར་ཧི་རོ་ཤི་མ་ (Hiroshima) ནང་འཛམ་གླིང་སྟོབས་ཆེན་རྒྱལ་ཁབ་ ༧ གྱི་ལོ་རེའི་ཚོགས་ཆེན་འཚོགས་ཏེ། བོད་དང་ཤིན་ཅང་། རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་དམིགས་བསལ་བོད་དང་ཤར་ཊུ་ཀི་སི་ཐན་ནང་རྒྱ་ནག་གིས་བཙན་སྐུལ་ངལ་རྩོལ་གྱི་སྲིད་ཇུས་ལག་བསྟར་བྱས་དང་བྱེད་བཞིན་ཡོད་པར་སེམས་འཚབ་ཡོད་པའི་སྐོར་སོགས་གླེང་སློང་བྱས་ཡོད་པ་རེད།

དེ་བཞིན་ཟླ་འདིའི་ཕྱི་ཚེས་ ༢༠ ཉིན་སྟོབས་ཆེན་རྒྱལ་ཁབ་བདུན་གྱི་དབུ་ཁྲིད་རྣམས་ཀྱིས་བསྒྲགས་གཏམ་སྤེལ་བའི་ནང་། གོ་ལའི་གནམ་གཤིས་འགྱུར་ལྡོག་དང་། རྒྱ་གཞུང་གིས་བོད་དང་ཤིན་ཅང་། ཧོང་ཀོང་སོགས་ཀྱི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པའི་གནས་སྟངས་ལ་སེམས་འཚབ་ཡོད་པ་དང་། རྒྱ་ནག་གིས་རྒྱལ་སྤྱིའི་དཔལ་འབྱོར་དང་ཚོང་འབྲེལ་ལམ་ལུགས་ལ་རྡོག་རོལ་གཏོང་བཞིན་པར་གདོང་ལེན་གནང་རྒྱུ་དང་། རྒྱ་ནག་གིས་ཐའེ་ཝན་དང་ལྷོ་རྒྱ་ནག་རྒྱ་མཚོའི་ཐོག་སྤེལ་བཞིན་པའི་བྱ་སྤྱོད་ལ་སྐྱོན་བརྗོད། ད་དུང་རྒྱ་ནག་གིས་ཨུ་རུ་སུར་གནོན་ཤུགས་སྤྲད་དེ་ཡུ་ཀེ་རེན་ནང་བཙན་འཛུལ་བྱེད་བཞིན་པ་མཚམས་འཇོག་དགོས་པའི་སྐུལ་མ་བཏང་ཡོད་འདུག འོན་ཀྱང་། ཉི་ཧོང་དུ་ཡོད་པའི་རྒྱ་ནག་གི་གཞུང་ཚབ་ཁང་གིས། འཛམ་གླིང་སྟོབས་ཆེན་རྒྱལ་ཁབ་ ༧ གྱི་བསྒྲགས་གཏམ་ལ་ངོས་ལེན་མེད་པ་དང་། རྒྱ་ནག་རྒྱལ་ནང་གི་གནད་དོན་ལ་ཐེ་ཇུས་བྱེད་ཀྱི་ཡོད་པའི་སྐྱོན་བརྗོད་བྱས་ཡོད་འདུག

ཡང་སྟོབས་ཆེན་རྒྱལ་ཁབ་བདུན་གྱི་མགོ་ཁྲིད་དག་གིས་བོད་ཀྱི་གནད་དོན་ཐོག་གླེང་སློང་དང་དོ་སྣང་བྱེད་བཞིན་པ་དང་འབྲེལ། རྒྱལ་སྤྱིའི་བོད་དོན་ལས་འགུལ་ཁང་གིས། རྒྱ་ནག་གཞུང་གིས་བོད་ནང་སྡུག་སྦྱོང་མནར་གཅོད་ཀྱི་བྱ་སྤྱོད་སྤེལ་བཞིན་པ་དང་རྒྱལ་སྤྱིའི་སྲིད་གཞུང་ཁག་གིས་དམར་ཤོག་ཚོགས་པར་སྐྱོན་བརྗོད་བྱེད་བཞིན་པ་སོགས་སྤས་སྐོང་བྱེད་ཐབས་བྱས་ནས་སྡོད་པ་ལས། བོད་རྒྱ་གྲོས་མོལ་བསྐྱར་གསོ་བྱས་ཏེ། བོད་རྒྱའི་དཀའ་རྙོག་ཞི་བའི་ལམ་ནས་སེལ་འདོད་ཡོད་པའི་༧གོང་ས་མཆོག་དང་བཙན་བྱོལ་བོད་མིའི་སྒྲིག་འཛུགས་བཟང་ཕྱོགས་ནས་ལན་འདེབས་གནང་དགོས་ཀྱི་ཡོད་སྐོར་སོགས་བརྗོད་འདུག

འདས་ལོར་འཛམ་གླིང་སྟོབས་ཆེན་རྒྱལ་ཁབ་ ༧ གྱིས་ཚོགས་འདུ་ཚོགས་ཏེ། བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ལ་སེམས་འཚབ་ཡོད་པ་དང་། རྒྱ་ནག་གཞུང་གིས་རྒྱལ་སྤྱིའི་འགྲོ་བ་མིའི་ཐོབ་ཐང་དང་རང་དབང་ལ་བརྩི་འཇོག་དགོས་པ་དང་། བོད་དང་ཤར་ཊུ་ཀི་སི་ཐན་ནང་གི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་མཚམས་འཇོག་དགོས་སྐོར་བསྒྲགས་ཡོད་ཅིང་། འདི་ལོའི་ཕྱི་ཟླ་ ༢ པའི་ནང་ཨ་རིའི་གྲོས་ཚོགས་སུ་བོད་རྒྱའི་དཀའ་རྙོག་སེལ་ཐབས་སུ་རྒྱབ་སྐྱོར་ཁྲིམས་འཆར་ (Promoting a Resolution to the Tibet-China Conflict Act) བསྐྱར་དུ་ངོ་སྤྲོད་གནང་སྟེ། ཕྱི་ལོ་ ༢༠༡༠ ནས་བོད་རྒྱའི་དཀའ་རྙོག་སེལ་བར་ཞི་བའི་གྲོས་མོལ་བྱེད་མཚམས་བཞག་པར་བརྟེན། རྒྱ་ནག་གཞུང་གིས་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་ཚབ་དང་ལྷན་དུ་ཞི་བའི་གྲོས་མོལ་བྱེད་དགོས་པའི་གནོན་ཤུགས་སྤྲོད་ཀྱི་ཡོད་འདུག

འདས་པའི་ལོ་ངོ་ ༦༠ ལྷག་གི་གོང་དུ་རྒྱ་གཞུང་གིས་བོད་ལ་བཙན་འཛུལ་བྱས་པ་ནས་བཟུང་། བོད་ནང་ཆོས་དད་རང་མོས་དང་སྨྲ་བརྗོད་ཀྱི་རང་དབང་མེད་ཁར། རྒྱ་གཞུང་གིས་གཞི་རིམ་དང་དམའ་རིམ་སློབ་གྲྭ་ནས་བོད་ཀྱི་སྐད་ཡིག་རྩ་མེད་གཏོང་སླད། བོད་ཀྱི་ས་ཁུལ་ཁག་དང་གཏན་སྡོད་སློབ་གྲྭར་རྒྱ་སྐད་བཀོལ་སྤྱོད་མི་བྱེད་ཐབས་མེད་བཟོས་ཤིང་། དམིགས་བསལ་གྱིས་བོད་ཀྱི་སྐད་ཡིག་དང་ཆོས་ལུགས་ཀྱི་ལྟེ་བའི་དགོན་སྡེ་ཁག་དང་ས་ཁུལ་གྱི་སློབ་གྲྭ་སོགས་བོད་མི་རིགས་ལ་གལ་གནད་ཆེ་བའི་རིགས་སྒོ་བརྒྱབ་ཡོད་ལ། འདས་ལོར་ཨ་རིའི་རྒྱལ་སྲིད་ལྷན་ཁང་གིས། རྒྱ་ནག་གིས་བོད་ནང་གི་བོད་མི་རྣམས་གར་སོང་ཆ་མེད་དུ་གྱུར་བ་དང་། བཙན་འཁྲིད་བཙོན་འཇུག དེ་བཞིན་སྡུག་སྦྱོང་མནར་གཅོད་གཏོང་བ། གྲྭ་བཙུན་དང་མི་ཁག་ཅིག་གིས་ཆོས་ལུགས་ཀྱི་བྱེད་སྒོ་སྤེལ་བར་བཙོན་འཇུག་བྱས་དང་བྱེད་མུས་ཡིན་པའི་སྙན་ཐོ་བཏོན་ཡོད་པ་རེད་ལ། ད་ལྟ་རྒྱ་ནག་གཞུང་གིས་བོད་ཆོལ་ཁ་གསུམ་གྱི་ཕྲུ་གུ་ས་ཡ་ ༡ ཙམ་རང་གི་ཕ་མ་དང་ཁ་བྲལ་དུ་བཅུག་ནས་གཏན་སྡོད་སློབ་གྲྭར་བཏང་སྟེ་རྒྱ་སྐད་བཀོལ་སྤྱོད་དང་རྒྱ་བསྒྱུར་གྱི་སྲིད་ཇུས་འོག་བཅུག་ཡོད་པ་དང་། ཕྱི་ལོ་ ༢༠༠༩ ནས་བཟུང་བོད་མི་ ༡༦༠ ཙམ་གྱིས་རང་ལུས་མེར་སྲེག་བཏང་ཡོད་པ་རེད།

གསར་འགོད་པ། བསྟན་འཛིན་ཕུར་བུ།