ཟླ་འདིའི་ཕྱི་ཚེས ༡ ནས་ ༡༡ བར་ཉིན་གྲངས་བཅུ་གཅིག་རིང་རྒྱལ་ཡུམ་ཆེན་མོའི་རྗེས་དྲན་རྐང་སྤོལ་རྩེད་འགྲན་དེ་དྷ་སའི་ཁུལ་དུ་བསྡུས་ཡོད་པ་ལྟར། དེ་རིང་དྷ་ས་རུ་ཁག་དང་དོན་གྲུབ་གླིང་རུ་ཁག་གཉིས་བར་མཐའ་མའི་རྟིང་རྩོད་འགྲན་སྡུར་བྱས་པའི་ཁྲོད། དྷ་སའི་རུ་ཁག་གིས་སྤོ་ལོ་གཉིས་བླུགས་ནས་འདི་ལོའི་རྒྱལ་ཡུམ་ཆེན་མོའི་རྗེས་དྲན་རྐང་སྤོལ་འགྲན་སྡུར་གྱི་གསེར་གྱི་བུམ་པ་དང་། ཧིན་སྒོར་འབུམ་གཉིས་བཀྱགས་སོང་།
དེ་བཞིན་འདི་ལོའི་རྐང་སྤོལ་རྩེད་འགྲན་གྱི་གོ་རིམ་ཁྲོད། བོད་ཀྱི་ཟློས་གར་རུ་ཁག་གི་རྩེད་མོ་བ་བསྟན་འཛིན་ལྷག་པ་ལགས་སུ་སྤོ་ལོ་མང་ཤོས་བླུག་མཁན་གྱི་བྱ་དགའ་དང་། དོན་གྲུབ་གླིང་གི་སྒོ་ར་བ་བསྟན་འཛིན་རབ་དགའ་ལགས་སུ་སྒོ་ར་བ་ཡག་ཤོས། དྷ་ས་རུ་ཁག་གི་རྩེད་འགྲན་པ་བསྟན་འཛིན་ཚེ་རིང་ལགས་སུ་རྩེད་འགྲན་པ་ལེགས་ཤོས། དེ་བཞིན་བོད་ཁྱིམ་རུ་ཁག་ལ་བཟང་སྤྱོད་ཡག་ཤོས་ཀྱི་རུ་ཁག་བཅས་ཀྱི་བྱ་དགའ་ཐོབ་སོང་།
ཟླ་འདིའི་ཕྱི་ཚེས ༡ ནས་ ༡༡ བར་འདི་ལོའི་རྒྱལ་ཡུམ་ཆེན་མོའི་རྗེས་དྲན་རྐང་སྤོལ་རྩེད་འགྲན་དེ་དྷ་སར་འཚོགས་ཡོད་ཅིང་། རྩེད་འགྲན་ནང་ཨོ་གླིང་དང་། ཡུ་རོབ། བལ་ཡུལ། ལ་དྭགས་སོགས་ནས་རྩེད་འགྲན་རུ་ཁག་ ༡༦ གིས་མཉམ་ཞུགས་བྱས་ཏེ། ཉིན་གྲངས་བཅུ་གཅིག་རིང་རྩེད་འགྲན་མང་དག་ཅིག་བྱས་ཡོད་འདུག
བོད་རྒྱལ་ཡོངས་རྩེད་རིགས་ཚོགས་པས་གོ་སྒྲིག་གནང་བཞིན་པའི་རྒྱལ་ཡུམ་ཆེན་མོའི་དྲན་རྟེན་གསེར་གྱི་གཟེངས་རྟགས་རྐང་སྤོལ་འགྲན་སྡུར་ནི། ཕྱི་ལོ་ ༡༩༨༡ ལོར་བོད་ཕྲུག་ཁྱིམ་སྡེའི་རྩིས་དཔོན་ཟུར་པ་ཇོ་བོ་ཚེ་རིང་ལགས་ཀྱིས་གསར་འཛུགས་གནང་ཡོད་པ་དང་། རྩེད་འགྲན་འདི་ལོ་ལྟར་ཚོགས་ཀྱི་ཡོད་པ་རེད། འོན་ཀྱང་། ཕྱི་ལོ་ ༢༠༢༠ ལོར་ཏོག་དབྱིབས་གཉན་རིམས་ཀྱི་རྐྱེན་གྱིས་རྒྱལ་ཡུམ་ཆེན་མོའི་དྲན་རྟེན་གསེར་གྱི་གཟེངས་རྟགས་རྐང་སྤོལ་འགྲན་སྡུར་འཚོགས་ཐུབ་མི་འདུག
རྒྱལ་ཡུམ་ཆེན་མོའི་རྩེད་འགྲན་དེ་ཕྱི་ལོ་ ༢༠༡༢ ལོར་དྷ་རམ་ས་ལ་དང་ ༢༠༡༣ ལོར་ཧོན་སུར་རབ་རྒྱས་གླིང་། ༢༠༡༤ ལོར་དོན་གྲུབ་གླིང་(Clementown)། ༢༠༡༥ ལོར་དྷ་རམ་ས་ལ། ༢༠༡༦ ལོར་མོན་གྷོ། ༢༠༡༧ ལོར་ཀོ་ལི་གྷལ་དོན་ལྡན་གླིང་། ༢༠༡༨ ལོར་སྦེལ་ཀོབ་བདེ་སླར་གཞིས་ཆགས། ༢༠༡༩ ལོར་དྷ་རམ་ས་ལ། ༢༠༢༡ ལོར་དོན་གྲུབ་གླིང་དང་། ཕྱི་ལོ་ ༢༠༢༢ ལོར་སྤོན་ཊ་ཆོལ་གསུམ་གཞིས་ཆགས་སུ་འཚོགས་ཡོད་ཅིང་། འདི་ལོའི་རྒྱལ་ཡུམ་ཆེན་མོའི་རྗེས་དྲན་གསེར་གྱི་རྟགས་མའི་རྩེད་འགྲན་དེ་དྷ་སར་འཚོགས་ཡོད་པ་རེད།
གསར་འགོད་པ། དཔལ་ལྡན།
