བྱང་ཀོ་རི་ཡས་དྲག་པོའི་སྟོབས་ཤུགས་རྒྱ་སྐྱེད་ཀྱི་ཡོད་འདུག

བྱང་ཀོ་རི་ཡའི་མགོ་ཁྲིད་ཀིམ་ཇོང་ཨན་ (Kim Jong Un) གྱིས་ཡུལ་དེའི་དམག་སྤྱི་ཆེན་མོ་ཞིག་ཕྱིར་འབུད་བཏང་སྟེ་དམག་རྒྱག་པར་གྲ་སྒྲིག་བྱ་དགོས་པའི་བཀའ་བཏང་ཡོད་འདུག

North Korean leader Kim Jong Un leads a meeting of the Central Military Commission in Pyongyang, North Korea, on Wednesday.

དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། བྱང་ཀོ་རི་ཡའི་མགོ་ཁྲིད་ཀིམ་ཇོང་ཨན་ (Kim Jong Un) གྱིས་བྱང་ཀོ་རི་ཡའི་དམག་སྤྱི་ཆེན་མོ་པག་སུ་ཨིལ་ (Pak Su-il) ཕྱིར་འབུད་བཏང་སྟེ། ཁོའི་ཚབ་ཏུ་ཡུལ་དེའི་རྒྱལ་སྲུང་བློན་ཆེན་རི་ཡོང་གྷིལ་ (Ri Yong-gil) ཞེས་པ་བསྐོ་གཞག་བྱས་ཡོད་འདུག ད་ལྟའི་ཆར་དམག་སྤྱི་ཆེན་མོ་དེ་ཕྱིར་འབུད་བཏང་བའི་རྒྱུ་མཚན་སོགས་ཁ་གསལ་མེད་ཀྱང་། དམག་སྤྱི་ཆེན་མོ་འཕོ་འགྱུར་བཏང་བ་དེ་དབང་ཆ་རྩོད་ལེན་དང་འབྲེལ་བ་ཡོད་སྲིད་སྐོར་བརྗོད་ཀྱི་འདུག

དབུས་དམག་སྤྱི་ལས་ཁུངས་ཀྱི་ཚོགས་འདུའི་སྟེང་། བྱང་ཀོ་རི་ཡའི་མགོ་ཁྲིད་ཀིམ་ཇོང་ཨན་གྱིས། བྱང་ཀོ་རི་ཡའི་དམག་མི་རྣམས་ཀྱིས་དམག་རྒྱག་པར་གྲ་སྒྲིག་བྱ་དགོས་པ་དང་། མེ་ཤུགས་འཕུར་མདའ་དང་མེ་སྒྱོགས་སོགས་གོ་མཚོན་མང་དུ་གཏང་དགོས་པ་མ་ཟད། དམག་དཔུང་རྒྱ་བསྐྱེད་དེ་གོ་མཚོན་གསར་པ་བེད་སྤྱོད་བྱས་ནས་དམག་སྦྱོང་སྔར་ལས་མང་དུ་གཏོང་དགོས་སྐོར་བཀའ་བསྒྲགས་ཡོད་འདུག བདུན་ཕྲག་སྔོན་མའི་ནང་བྱང་ཀོ་རི་ཡའི་མགོ་ཁྲིད་ཀིམ་གྱིས་རྒྱལ་ཁབ་དེའི་གོ་མཚོན་གྱི་བཟོ་གྲྭ་དང་གོ་མཛོད་ཁག་ཏུ་ལྟ་སྐོར་དུ་ཕྱིན་ཏེ། གོ་མཚོན་ཐོན་སྐྱེད་ཇེ་མང་དུ་གཏོང་དགོས་པ་མ་ཟད། གོ་མཛོད་རྒྱ་སྐྱེད་གཏོང་དགོས་སྐོར་བརྗོད་འདུག

ཨ་རིའི་གཞུང་གིས་བྱང་ཀོ་རི་ཡས་ཨུ་རུ་སུར་མེ་སྒྱོགས་དང་མེ་ཤུགས་འཕུར་མདའ་སོགས་དྲག་པོའི་གོ་མཚོན་སྤྲད་དེ་དམག་རོགས་བྱེད་ཀྱི་ཡོད་པའི་སྐྱོན་བརྗོད་བྱེད་བཞིན་ཡོད་ཀྱང་། ཨུ་རུ་སུ་དང་བྱང་ཀོ་རི་ཡ་གཉིས་ཀའི་ཕྱོགས་ནས་ངོས་ལེན་བྱས་མི་འདུག་ལ། ཟླ་འདིའི་ཕྱི་ཚེས་ ༢༡ ནས་ ༢༤ བར་ཨ་རི་དང་ལྷོ་ཀོ་རི་ཡ་གཉིས་ཀྱི་བར་ལ་དམག་སྦྱོང་བྱ་འཆར་ཡོད་པར་བརྟེན། རྒྱལ་ཁབ་སོ་སོའི་མཉམ་འབྲེལ་གྱི་དམག་སྦྱོང་དེ་ནི་རང་སྲུང་དང་ཕར་རྒོལ་བྱེད་པར་གྲ་སྒྲིག་ཅིག་ཏུ་ངོས་འཛིན་བྱེད་ཀྱི་ཡོད་པ་རེད།

བྱང་ཀོ་རི་ཡའི་ནང་དམག་དཔོན་ཚོའི་གོ་གནས་འཕོ་འགྱུར་མང་པོ་གཏོང་གི་ཡོད་ཀྱང་། འཕོ་འགྱུར་བཏང་བའི་རྒྱུ་རྐྱེན་ཐད་ལབ་གླེང་འདྲ་མིན་བྱུང་གི་ཡོད་པ་མ་ཟད། དམག་སྤྱི་འགའ་རེ་ཕྱིར་འབུད་བཏང་རྗེས་གར་སོང་ཆ་མེད་དུའང་འགྱུར་གྱི་ཡོད་འདུག ཨ་རིའི་ནང་གནས་སྡོད་དམག་དོན་དཔྱད་ཞིབ་པ་ཨེ་སི་ལེ་ (Easley) ཞེས་པ་ཞིག་གིས། བྱང་ཀོ་རི་ཡའི་མགོ་ཁྲིད་ཀྱིས་དམག་དཔོན་དེ་དག་རང་ཉིད་ལས་སྟོབས་ཤུགས་ཆེ་བ་མི་ཡོང་སླད། དམག་དཔོན་ཁ་ཤས་གོ་གནས་ནས་སྤར་བ་དང་། གནས་དབྱུང་བཏང་བ་སོགས་བྱས་ཏེ་དམག་དཔོན་དེ་དག་བརྗེ་ལེན་མང་པོ་བྱེད་ཀྱི་ཡོད་སྐོར་བརྗོད་འདུག

ཡང་ལྷོ་ཀོ་རི་ཡའི་སེ་ཅོང་ལྟེ་གནས་(Sejong Institute)ཁང་གི་ཉམས་ཞིབ་པ་རྒན་པ་ཆོང་སོང་ཆང་(Cheong Seong-chang) ཞེས་པ་ཞིག་གིས། མགོ་ཁྲིད་ཀིམ་གྱིས་དམག་དཔོན་རྣམས་ཀྱི་ནུས་པ་དང་ལས་དོན་བྱ་ཕྱོགས་ལ་བལྟས་ནས་གོ་གནས་སྤར་བ་དང་ཕྱིར་འབུད་བཏང་བ་སོགས་བརྗེ་ལེན་བྱེད་པའི་རྒྱུ་མཚན་འདྲ་མིན་ཡོད་ཀྱང་། དེ་དག་ཉེས་ཆད་ཀྱི་བྱ་སྤྱོད་ཅིག་ལ་ངོས་འཛིན་བྱ་མི་འོས་པ་ཞིག་ཡིན་སྐོར་བརྗོད་འདུག

གསར་འགོད་པ། བསྟན་འཛིན་ཕུར་བུ།