རྒྱལ་སྤྱིའི་འབྲེལ་ལམ་བསྟི་གནས་ཁང་གིས་རྒྱ་ནག་གཞུང་གིས་ཕྱི་རྒྱལ་གྱི་གསར་ཁང་མང་པོར་འབྲེལ་བ་བཙུགས་ནས་གནས་ཚུལ་སྦེད་སྐུང་དང་རྫུན་བཟོ་སོགས་བྱེད་ཀྱི་ཡོད་པའི་སྙན་ཐོ་བཏོན་འདུག
དེ་རིང་ཨ་རིའི་རྒྱལ་སྲིད་ལས་ཁུངས་ཀྱི་རྒྱལ་སྤྱིའི་འབྲེལ་ལམ་བསྟི་གནས་ཁང་(Global Engagement Center) གིས་རྒྱ་ནག་གཞུང་གིས་རྒྱལ་སྤྱིའི་ནང་གི་གཞུང་སྒེར་གྱི་ཚོགས་སྡེ་མང་དག་ཅིག་ལ་གནོན་ཤུགས་སྤྲད་ནས། གནས་ཚུལ་སྦེད་སྐུང་དང་རྒྱ་ནག་དམར་ཤོག་གི་ལངས་ཕྱོགས་སོགས་དྲིལ་བསྒྲགས་བྱས་ཏེ། རྒྱལ་སྤྱིའི་གནས་ཚུལ་དངོས་ལ་དོ་ཕོག་ག་ཚོད་བཟོ་ཡི་ཡོད་མེད་ཐད་ཀྱི་ཤོག་ངོས་༥༨ ཅན་གྱི་དམིགས་བསལ་སྙན་ཐོ་ཞིག་འདོན་སྤེལ་གནང་བའི་ནང་། རྒྱ་ནག་གཞུང་གིས་རྒྱ་ནག་དམར་ཤོག་སྲིད་གཞུང་གི་ཁེ་ཕན་ཆེད། གནས་ཚུལ་རྫུན་བཟོ་དང་དྲིལ་བསྒྲགས་བྱས་པ་མ་ཟད། རྒྱ་ནག་གཞུང་གི་ཁེ་ཕན་བསྐྲུན་ཐབས་དང་། ལྷག་པར་སྤྱི་ཚོགས་དྲ་ལམ་སོགས་སུ་མི་སྣ་ཆེད་མངགས་བྱས་ཏེ། ཕྱི་རྒྱལ་གྱི་གསར་ཁང་ཁག་ལ་སྐྱོན་འཛུགས་བྱེད་དུ་འཇུག་གི་ཡོད་སྐོར་སོགས་གསལ་འདུག
རྒྱལ་སྤྱིའི་འབྲེལ་ལམ་བསྟི་གནས་ཁང་གིས་སྤེལ་བའི་སྙན་ཐོའི་ནང་། འདས་པའི་ལོ་ཤས་རིང་རྒྱ་ནག་གཞུང་གིས་ཁུངས་ལུང་མེད་པའི་གནས་ཚུལ་རྫུན་མ་དང་གཡོ་ཁྲམ་གྱི་ཐོག་ནས་རྒྱལ་སྤྱིའི་ནང་རྒྱ་ནག་དམར་ཤོག་སྲིད་གཞུང་གི་ཤུགས་རྐྱེན་དང་དབང་ཐང་རྒྱས་ཐབས་བྱེད་ཀྱི་ཡོད་ཅིང་། ལྐོག་ནས་རྒྱལ་སྤྱིའི་ནང་གི་གསར་ལམ་ཁག་ཉོས་པ་མ་ཟད། ས་གནས་ས་ཐོག་གི་གསར་ཁང་སོགས་ལ་གན་རྒྱ་བཞག་པ་དང་སྦྱིན་བདག་སོགས་བྱས་ཏེ། ཐབས་ཇུས་མཁས་པོའི་ཐོག་ནས་གསར་ལམ་ཁག་ལ་གནོན་ཤུགས་སྤྲད་ནས། རྒྱ་ནག་གཞུང་གི་ལྟ་བ་དང་མཐུན་པའི་གནས་ཚུལ་རྫུན་བཟོ་དང་འགྲེམས་སྤེལ་བྱེད་ཀྱི་ཡོད་པ་མ་ཟད། གསར་ལམ་དེ་དག་བརྒྱུད་ནས་རྒྱལ་སྤྱིའི་ནང་གི་ཚོགས་སྡེ་སོགས་ལ་གནོན་ཤུགས་སྤྲོད་ཀྱི་ཡོད་སྐོར་དང་། རྒྱ་ནག་གཞུང་གིས་ཆེད་དུ་དྲ་ལམ་ཁག་ཏུ་དམར་ཤོག་གི་ལྟ་བ་དྲིལ་བསྒྲགས་བྱེད་ཆེད་ལས་མི་དང་། འཕྲུལ་བཟོས་མི་སོགས་བཞག་ནས། རྒྱལ་སྤྱིའི་ཊི་ཝེ་ཊར་གཙོས་སྤྱི་ཚོགས་དྲ་ལམ་ཁག་ཏུ་རྒྱ་ནག་གཞུང་ལ་སྐྱོན་བརྗོད་བྱེད་མཁན་ཚོར་སྐར་ལྔའི་དྲག་དམག་གིས་རུབ་རྡུང་གཏོང་གི་ཡོད་པའི་ཁར། རྒྱ་ནང་གི་གསར་ལམ་ཁག་གཙོས་རྒྱ་ནག་དང་འབྲེལ་བའི་གསར་ལམ་ཁག་ཏུ། “བོད་རང་བཙན་དང་།” “དམངས་གཙོའི་ཡོ་ལང་།” “ཐའེ་ཝན་གྱི་རང་དབང་ཡུན་རིང་བརྟན་”སོགས་ནག་བསུབས་དང་། རྒྱ་ནག་ནས་བཏོན་པའི་གློག་ཆས་དེ་དག་ལས་ཀྱང་ཐ་སྙད་དེ་དག་ནག་བསུབས་སུ་བཏང་ཡོད་སྐོར་སོགས་གསལ་འདུག
སྙན་ཐོའི་ནང་། རྒྱ་ནག་གིས་བཏོན་པའི་ཁ་པར་གཙོས་གློག་ཆས་རིགས་མང་པོ་ཞིག་རྒྱལ་ཁབ་གཞན་དུ་བཙོང་ནས། གློག་ཆས་དེ་དག་ལས་རྒྱལ་ཁབ་ཀྱི་གསང་བ་དང་། ཚོགས་པ་སྒྲིག་འཛུགས། ཐ་ན་མི་སྒེར་གྱི་གསང་བ་སོགས་རྐུ་ཁྱེར་བྱེད་ཀྱི་ཡོད་པ་མ་ཟད། གཞུང་སྒེར་མང་པོ་ཞིག་གི་དྲ་རྒྱ་དང་། གློག་འཕྲིན་སོགས་སུ་དྲ་འབུ་མངགས་གཏོང་བྱས་ཏེ། གསང་བའི་ངང་ནས་ལས་དོན་བྱེད་ཕྱོགས་སོགས་ཀྱི་ཐད་ལ་ལྟ་ཞིབ་དང་ཚོད་འཛིན། དེ་བཞིན་དེང་གི་ཆར་ཉུང་མཐར་ཡང་རྒྱལ་ཁབ་བཅོ་བརྒྱད་ཙམ་གྱི་ནང་རྒྱ་ནག་གིས་བཟོས་པའི་ཧ་ཝེ་ཁ་པར་བཀོལ་སྤྱོད་བྱེད་ཀྱི་ཡོད་སྟབས། ཁ་པར་དེ་དག་ལས་གཞུང་སྒེར་མང་པོ་ཞིག་གི་ལས་དོན་དང་རྒྱ་ནག་དམར་ཤོག་ལ་འགལ་ཟླ་ལང་མཁན་ཚོར་ལྟ་རྟོག་དང་སོ་ཉུལ་བྱེད་ཀྱིན་ཡོད་སྐོར་དང་། རྒྱ་ནག་གཞུང་གིས་རྒྱ་ནང་གཙོས་གྲངས་ཉུང་མི་རིགས་ཀྱི་ས་གནས་ཁག་ཏུ་རྒྱལ་སྤྱིའི་གསར་ལམ་ཁག་གི་གནད་དོན་མང་པོ་སྦེད་སྐུང་དང་། ཕྱིའི་རྒྱལ་ཁབ་ཁག་གི་གནས་ཚུལ་མང་པོ་ཞིག་རྒྱ་ནང་དུ་བཀག་སྡོམ་བྱས་ཡོད་སྟབས། རྒྱ་ནག་གི་མི་མང་པོ་ཞིག་ལ་རྒྱལ་སྤྱིའི་གནས་ཚུལ་ཐད་གོ་རྟོགས་གང་ཡང་མེད་སྐོར་སོགས་གསལ་འདུག
ཡང་སྙན་ཐོའི་ནང་། འདས་པའི་ལོ་ཤས་རིང་རྒྱ་ནག་གཞུང་གིས་ཨ་སྒོར་ཐེར་འབུམ་མང་པོ་ཞིག་བཏང་ནས། ཕྱི་ནང་གི་གནས་ཚུལ་མང་པོ་ཞིག་རྫུན་བཟོ་སོགས་བྱས་ཏེ། རྒྱ་ནག་དམར་ཤོག་ཚོགས་པའི་ཁེ་ཕན་ཁོ་ན་སྲུང་སྐྱོབ་བྱེད་ཐབས་བྱས་ཡོད་ཅིང་། ལྷག་པར་དྲ་ལམ་དང་གསར་ལམ་ཁག་ཏུ་རྒྱ་ནག་མགོ་ཁྲིད་ཁག་གིས་བཙན་གཡེམ་དང་། ཆགས་སྲེད་ཀྱི་དོན་རྐྱེན། དེ་བཞིན་ཉེས་མེད་ཉེས་འཛུགས་བྱས་པའི་གནད་དོན་ཚང་མ་སྐུང་བ་མ་ཟད། རྒྱ་ནག་གི་སྐར་ལྔའི་དྲག་དམག་དང་ལས་མི་ཚོས་ཆེད་དུ་རྒྱལ་ཁབ་ཕན་ཚུན་བར་དཀྲུག་ཤིང་དང་། རྒྱལ་ཁབ་གཞན་གྱི་མི་རུ་བརྫུས་ནས་གསང་བ་རྐུ་ཁྱེར་སོགས་བྱས་ཏེ། རྒྱལ་སྤྱིའི་གསར་འགྱུར་དང་དངོས་ཡོད་ཀྱི་གནས་ཚུལ་ལ་དོ་ཕོག་ཆེན་པོ་བཏང་ཡོད་སྟབས། རྒྱ་ནག་གཞུང་གི་གསར་ཁང་མང་པོ་ཞིག་ལ་རོགས་རམ་དང་། གན་རྒྱ་བཞག་པ་དེས། མ་འོངས་པར་རྒྱལ་སྤྱིའི་གསར་ལམ་དེ་དག་ཀྱང་རྒྱ་ནག་གི་ལྟ་བ་དྲིལ་བསྒྲགས་བྱ་སའི་གླེང་སྟེགས་སུ་འགྱུར་ཉེན་ཡོད་སྐོར་གསལ་འདུག
སྤྱིར་རྒྱ་ནག་གཞུང་གིས་ཕྱོགས་ཡོངས་ནས་བོད་མི་གཙོས་གྲངས་ཉུང་མི་རིགས་མང་པོ་ཞིག་ལ་དྲ་ལམ་ནས་སོ་ཉུལ་དང་ལྟ་སྲུང་ནན་མོ་བྱས་ཏེ། བོད་མི་མང་པོ་ཞིག་ལ་ནག་ཉེས་གཡོགས་ནས་འཛིན་བཟུང་བཀག་ཉར་དང་། རྒྱལ་ཁབ་གཞན་གྱི་གསང་བ་རྐུ་ཁྱེར། གནས་ཚུལ་རྫུན་བཟོ། དེ་བཞིན་དྲ་ལམ་ནས་སྐར་ལྔའི་དྲག་དམག་གིས་རྩོམ་པ་པོ་དང་། མཁས་པ། ཉམས་ཞིབ་པ་སོགས་ལ་རུབ་རྡུང་གཏོང་མུས་ཡིན་པ་རེད།
གསར་འགོད་པ། དཔལ་ལྡན།
རྩོམ་སྒྲིག་པ། པདྨ་མཚོ།
