བོད་ཀྱི་གློག་བརྙན་གཅིག་དང་བཞི་རྒྱ་ནག་རྒྱལ་ཡོངས་སུ་བསྟན་རྒྱུ་ཡིན་འདུག 

ཟླ་འདིའི་ཕྱི་ཚེས་ ༢༧ ཉིན་ནས་འཇིགས་མེད་འཕྲིན་ལས་ལགས་ཀྱིས་བཟོ་བསྐྲུན་བྱས་པའི་བོད་ཀྱི་གློག་བརྙན་གཅིག་དང་བཞི་(one and Four) ཞེས་པ་དེ་རྒྱ་ནག་རྒྱལ་ཡོངས་སུ་སྟོན་འཆར་ཡོད་འདུག

ཉེ་ལམ་བོད་ནང་གི་དྲ་ལམ་ཁག་ཏུ་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༢༧ ཉིན་ནས་བོད་ཀྱི་གློག་བརྙན་འཁྲབ་ཁྲིད་པ་གྲགས་ཅན་རྒན་པདྨ་ཚེ་བརྟན་ལགས་ཀྱི་བུ་འཇིགས་མེད་འཕྲིན་ལས་ལགས་ཀྱིས་བཟོ་བསྐྲུན་བྱས་པའི་བོད་ཀྱི་གློག་བརྙན་གཅིག་དང་བཞི་(one and Four) ཞེས་པ་རྒྱ་ནག་རྒྱལ་ཡོངས་སུ་བསྟན་རྒྱུ་ཡིན་པའི་གསལ་བསྒྲགས་བྱས་ཡོད་འདུག

གློག་བརྙན་དེའི་ནང་བོད་ནས་བྱུང་བའི་ཁུངས་མེད་དང་། དོགས་གཞི་རང་བཞིན་ཅན་གྱི་དོན་རྐྱེན་ཞིག་གཏམ་རྒྱུད་ཀྱི་ལམ་ནས་བརྗོད་ཐབས་བྱས་ཡོད་དེ། ནགས་ཚལ་སྤྱི་གླིང་ཞིག་གི་ནང་དུ་གར་ཡོང་མི་ཤེས་པའི་མི་གསུམ་བསླེབས་ཡོད་པ་དང་། ནགས་ཚལ་སྤྱི་གླིང་དེའི་ལྟ་སྲུང་བ་དེའང་ཅི་ཡིན་འདི་ཡིན་མེད་པར་ཇག་པའི་ལས་ལ་ཞུགས་པའི་འཇིགས་རུང་གི་གཏམ་རྒྱུད་ཅིག་ཡིན་འདུག་ལ།  གཅིག་དང་བཞི་ཞེས་པའི་གློག་བརྙན་དེ་ཕྱི་ལོ་ ༢༠༢༡ ཟླ་ ༡༠ ཚེས་ ༣༠ ནས་ཟླ་ ༡༡ ཚེས་ ༨ བར་ཉི་ཧོང་དུ་འཚོགས་པའི་ཊོག་ཡོའི་རྒྱལ་སྤྱིའི་གློག་བརྙན་དུས་སྟོན་ཐེངས་སོ་བཞི་པའི་( 34th  Tokyo International Film Festival ) སྟེང་དང་།  འདས་ལོའི་ཕྱི་ཟླ་ ༧ ཚེས་ ༡༦ ཉིན་གྱི་དགོང་མོར་ ༢༠༢༢ ལོའི་ཨ་རིའི་ནེའུ་ཡོག་གློག་བརྙན་དུས་སྟོན་ཐེངས་ཉི་ཤུ་པའི་ ( 20th Anniversary New York Film Festival) ཐོག་ཏུའང་བསྟན་ཡོད་པ་རེད།

ཉེ་ལམ་བོད་ཀྱི་གློག་བརྙན་གཅིག་དང་བཞི་ཡི་སྐར་མ་གཅིག་དང་སྐར་ཆ་ཞེ་གཅིག་ཅན་གྱི་ཁྱབ་བསྒྲགས་ཤིག་དྲ་ལམ་དུ་སྤེལ་ཡོད་ཅིང་། དེར་གསར་འགོད་པས་རྒྱུས་ལོན་བྱས་པ་བརྒྱུད། གློག་བརྙན་དེའི་རྒྱབ་ལྗོངས་ཀྱི་སྒྲ་སྒྲིག་སྦྱོར་དང་བརྙན་ལེན་སྟངས། དེ་བཞིན་འཁྲབ་སྟོན་བྱེད་སྟངས། ལྷག་པར་དུ་གློག་བརྙན་གྱི་ཚོན་མདངས་ལ་དམིགས་བསལ་གྱིས་ཁྱད་ཆོས་ཤིག་འཛོམས་ཡོད་པ་མ་ཟད།  ཁྱབ་བསྒྲགས་དེའི་ཁྲོད་ཀྱི་གློག་བརྙན་སྒྲིག་སྦྱོར་དང་གཏམ་རྒྱུད་ཀྱི་ཀྱོག་མཚམས་གསལ་སྟོན་བྱེད་སྟངས་སོགས་ལ་བལྟས་ཚེ། གློག་བརྙན་དེའི་ཁྲོད་ནས་བོད་ཀྱི་དེང་རབས་གློག་བརྙན་བཟོ་བསྐྲུན་གྱི་ཐད་ཐོད་བརྒལ་ཆེན་པོ་ཞིག་ཕྱིན་པ་གསལ་སྟོན་བྱ་ཐུབ་པའི་སྣང་བ་ཞིག་བྱུང་།

འདས་ལོར་གནའ་མཁར་ཟི་ལིང་དུ་འཚོགས་པའི་རྒྱ་ནག་རྒྱལ་ཡོངས་རང་བཞིན་གྱི་ཧྥར་སི་ན་གཞོན་གློག་བརྙན་དུས་སྟོན་སྐབས་ ༡༦ (16th FIRST Youth Film Festival) པའི་མཇུག་སྡོམ་མཛད་སྒོའི་ཐོག ཕྱི་ལོ་ ༢༠༢༢ ལོའི་ཧྥ་སི་ན་གཞོན་གློག་བརྙན་དུས་སྟོན་སྐབས་ ༡༦ པའི་བོད་ཀྱི་གློག་བརྙན་གཅིག་དང་བཞི་ཡི་འཁྲབ་ཁྲིད་པ་འཇིགས་མེད་འཕྲིན་ལས་ལགས་སུ་འཁྲབ་ཁྲིད་པ་ཡག་ཤོས་དང་།  སྦྱིན་པ་ལགས་སུ་འཁྲབ་སྟོན་པ་ཡག་ཤོས་ཀྱི་གཟེངས་བསྟོད་བྱ་དགའ། དེ་བཞིན་བོད་ཀྱི་གློག་བརྙན་གཅིག་དང་བཞི་ལ་འཁྲབ་གཞུང་གི་འགྲེལ་བརྗོད་ཡག་ཤོས་དང་། གློག་བརྙན་ཡག་ཤོས་བཅས་ཀྱི་བྱ་དགའ་ཡང་ཐོབ་ཡོད་འདུག

བོད་ཀྱི་གློག་བརྙན་གཅིག་དང་བཞི་ནི་རྩོམ་པ་པོ་འཇམ་དབྱངས་ཚེ་རིང་ལགས་ཀྱིས་བརྩམས་པའི་གཅིག་དང་བཞི་ཞེས་པའི་བརྩམས་སྒྲུང་དེར་གཞི་བཅོལ་ནས་ཕབ་སྐྲུན་བྱས་པ་ཞིག་ཡིན་ཞིང་། གློག་བརྙན་དེ་ཕྱི་ལོ་  ༢༠༡༩ ལོའི་ཟླ་ ༡༢ ནས་ཕབ་སྐྲུན་བྱེད་མགོ་བཙུགས་ཡོད་པ་དང་། ནད་ཡམས་ཀྱི་རྐྱེན་གྱིས་བརྙན་ལེན་ཕབ་སྒྲིག་བྱེད་ཐུབ་མེད་ཀྱང་། ཕྱི་ལོ་ ༢༠༢༠ ལོའི་ལོ་མཇུག་ཏུ་ཡང་བསྐྱར་གློག་བརྙན་ཕབ་སྐྲུན་གྱི་ལས་གཞི་མགོ་བཙུགས་ཏེ། ལོ་དེའི་མཇུག་ཏུ་གློག་བརྙན་ཕབ་སྒྲིག་གི་ལས་གཞི་ཚང་མ་གྲུབ་ཡོད་འདུག་ལ། གློག་བརྙན་དེར་བོད་ཀྱི་གློག་བརྙན་འཁྲབ་འཁྲིད་པ་གྲགས་ཅན་པདྨ་ཚེ་བརྟན་གྱིས་ལམ་སྟོན་གནང་ཡོད་ཅིང་། གློག་བརྙན་དེའི་བརྙན་ལེན་པའང་པདྨ་ཚེ་བརྟན་གྱི་བརྙན་ལེན་པ་ལིས་སུང་ཡེ་ཟེར་བ་དེ་ཡིན་འདུག

གསར་འགོད་པ། དཔལ་ལྡན།

རྩོམ་སྒྲིག་པ། སྐལ་བཟང་སྦྱིན་པ།