— རྒྱ་ནག་གི་བཅའ་སྡོད་སློབ་གྲྭ་དང་མི་རབས་ཤིག་གི་བློ་ཁ་སྒྱུར་བ།
བསྟན་འཛིན་རྡོ་རྗེ་དང་རྒྱལ་ལོ་གཉིས་ཀྱིས་བརྩམས།
ཆོས་རྒྱལ་སྐྱབས་ཀྱིས་བསྒྱུར།
ཟླ་བ་ ༡༡ ཚེས་ ༢༨ ཉིན།
རྒྱ་ནག་གིས་ཤིན་ཅང་ནུབ་ཕྱོགས་ཀྱི་ཡུ་གུར་ཁ་ཆེ་བ་རྣམས་ལ་ལ་གདུག་རྩུབ་ཆེན་པོས་མནར་གཅོད་གཏོང་བཞིན་པའི་གནད་དོན་ཐད་ ཉེ་བའི་ལོ་ཤས་ནང་འཛམ་གླིང་ཁྱོན་ཡོངས་སུ་དོ་སྣང་ཤུགས་ཆེན་ཐོབ་ཡོད། འགྲོ་བ་མིའི་ཐོབ་ཐང་ཚོགས་པ་ཁག་གིས་ཡུ་གུར་བ་ས་ཡ་གཅིག་བཀག་ཉར་བཙོན་ཁང་དུ་གོ་རིམ་ལྡན་པའི་ཐོག་ནས་བཀག་ཉར་བྱས་པ་དང་། རྒྱ་ནག་གཞུང་གིས་ཡུ་གུར་བའི་རིག་གཞུང་དང་ཁ་ཆེའི་ཆོས་ལུགས་ཀྱི་ཉམས་ལེན་ལ་གཉའ་གནོན་བྱེད་བཞིན་པར་སྐྱོན་བརྗོད་བྱས་ཡོད། འོན་ཀྱང་། གཉའ་གནོན་འོག་ཚུད་པའི་མི་རིགས་གཞན་ཞིག་གི་དཀའ་སྡུག་གི་གནས་སྟངས་ནི། ཁོ་ཚོའི་མཐོང་ལམ་ནས་ཡལ་འགྲོ་གི་ཡོད། བོད་ནང་དུའང་རྒྱ་ནག་གཞུང་གིས་མི་རིགས་ཁྱད་པར་བ་ཞིག་གི་ངོ་བོ་རྩ་མེད་དུ་གཏོང་བའི་ལས་འགུལ་ཞིག་མགོ་བརྩམས་ཡོད། བོད་ནང་དུ་སྤྱོད་པའི་ཁོ་ཚོའི་ལག་ཆ་གཙོ་བོ་ནི་བཙོན་པའི་ར་བ་ཞིག་མ་ཡིན་པར། དེ་ལས་གཞི་རྒྱ་ཆེ་བའི་གཏན་འཇགས་སློབ་གྲྭ་ཡིན།
བོད་མཐོ་སྒང་དུ་བོད་ཕྲུག་ས་ཡ་གཅིག་ལ་ཉེ་བ་རྒྱ་ནག་གཞུང་གིས་འཛིན་སྐྱོང་བྱེད་བཞིན་པའི་གཏན་འཇགས་སློབ་གྲྭ་ཁག་ཏུ་འཚོ་སྡོད་བྱེད་ཀྱི་ཡོད། རྒྱ་ནག་གཞུང་གིས་བོད་ཕྲུག་རྣམས་ལ་ཆབ་སྲིད་རང་བཞིན་ཅན་གྱི་སློབ་ཚན་ཞིག་འཁྲིད་བཞིན། རང་གི་ཕ་སྐད་དང་ཁ་ཐག་རིང་དུ་གཏོང་བ་དང་། ཆོས་དང་རིག་གཞུང་གི་འབྲེལ་བ་གཅོད་ཐབས་བྱེད་པ། བོད་མིའི་ངོ་བོ་རྒྱ་མིའི་ངོ་བོར་སྒྱུར་བའི་ཐབས་ཤེས་འཐེན་བཞིན་ཡོད། ལོ་བཞི་ཅན་གྱི་ཕྲུ་གུ་ནས་བཟུང་ཕ་མ་དང་ཁ་འབྲལ་དུ་བཅུག་སྟེ། བཙན་ཤེད་ཤུགས་ཆེན་པོ་བཀོལ་ནས་སློབ་འཇུག་བྱེད་པའི་ཐབས་ལམ་ལ་བརྟེན་ཡོད།
འདི་འདྲའི་ཛ་དྲག་གི་གནས་ཚུལ་དེ་ཨ་རི་དང་། ཁེ་ན་ཌ། དེ་བཞིན་མཉམ་འབྲེལ་རྒྱལ་ཚོགས་བཅས་སུ་གྲོས་ཚོགས་ཉན་ཞིབ་དང་གཞུང་འབྲེལ་གྱི་འདྲི་རྩད་རིམ་པོ་མང་པོ་བྱུང་ཡོད། “ཉེ་བའི་ལོ་ཤས་ནང་བོད་ཕྲུག་ཚོ་སློབ་འཇུག་བྱེད་སར་དམིགས་པའི་གཏན་འཇགས་སློབ་གྲྭའི་ལམ་ལུགས་དེ་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཚད་གཞི་དང་འགལ་བ་ཞིག་ཡིན་པ་དང་། བོད་མི་རྣམས་རྒྱ་མིའི་རིག་གཞུང་ནང་འཇུག་ཐབས་སུ་དམིགས་པའི་ལས་གཞི་ཆེན་པོ་ཞིག་ཏུ་གྱུར་པར་སྣང་བས་ང་ཚོར་བློ་འཚབ་ཆེན་པོ་བྱུང་།” ཞེས་ལོ་འདིའི་ལོ་མགོར་མཉམ་འབྲེལ་རྒྱལ་ཚོགས་ཀྱི་མཁས་པ་སྐོར་ཞིག་གིས་གསལ་བསྒྲགས་བྱས་ཡོད། ད་ལོའི་ཕྱི་ཟླ་༨ པའི་ནང་། ཨ་རིའི་ཕྱི་སྲིད་དྲུང་ཆེ་ཨན་ཊོ་ནིའུ་བྷི་ལིན་ཁིང་གིས་ལས་གཞི་འདི་ལག་བསྟར་བྱེད་མཁན་རྒྱ་མིའི་དཔོན་རིགས་ཚོར་མཐོང་མཆན་ཆོག་མཆན་མི་སྤྲོད་པའི་བཀའ་རྒྱ་བཏང་ཡོད།
རྒྱ་ནག་གིས་བོད་པའི་གཞོན་སྐྱེས་ཚོར་བཙན་གྱིས་སློབ་གྲྭ་དེ་དག་གི་ནང་དུ་འཇུག་བཞིན་པར་ནུབ་ཕྱོགས་པ་ཚོས་ལྷག་ཏུ་སེམས་ཁྲལ་བྱ་དགོས་པ་ཞིག་རེད། གཏན་འཇགས་སློབ་གྲྭ་ཁག་ནི། དུས་རབས་བཅུ་དགུ་དང་ཉི་ཤུའི་ནང་ཨོ་སི་ཁྲུ་ལི་ཡ་དང་བྱང་ཨ་མེ་རི་ཁ་ཡི་གདོད་མའི་མི་རིགས་ཀྱི་ཕྲུ་གུ་རྣམས་ཡེ་ཤུའི་ཆོས་སྡེས་འཛིན་སྐྱོང་བྱས་པའི་གཏན་འཇགས་སློབ་གྲྭར་བཙན་འཇུག་བྱས་པ་དང་འདྲ་པོ་ཡོད། ཉེ་བའི་ལོ་ཤས་ནང་ཞིབ་འཇུག་པ་དང་གསོན་པོར་ལུས་པའི་མི་ཚོས་སློབ་གྲྭ་དེ་དག་གི་ནང་དུ་བྱུང་བའི་མནར་གཅོད་དང་དཀའ་སྡུག་གི་ཚད་གཞི་དེ་གསལ་འདོན་བྱས་ཡོད་ལ། སློབ་གྲྭ་འདི་དག་གིས་སློབ་ཕྲུག་རྣམས་གདོད་མའི་མི་རིགས་ཀྱི་རིག་གཞུང་དང་ཁྱིམ་ཚང་ལས་ལོགས་སུ་དགར་ཐབས་བྱས་ཡོད། ཨོ་སི་ཁྲུ་ལི་ཡ་དང་ཁེ་ན་ཌའི་འགོ་ཁྲིད་ཚོས་གཏན་འཇགས་སློབ་གྲྭར་བཙན་འཇུག་བྱས་པའི་རྐྱེན་གྱིས་སྡུག་བསྔལ་མྱོང་བཞིན་པའི་གདོད་མའི་མི་རིགས་ཀྱི་ཚོགས་སྡེ་ཁག་ལ་དགོངས་སེལ་ཞུས་ཡོད། རྒྱ་ནག་གི་ཕྱི་འབྲེལ་མི་སྣ་རྣམས་ཀྱིས་ནུབ་ཕྱོགས་རྒྱལ་ཁབ་ཚོས་མི་སེར་སྤེལ་བའི་སྐབས་སུ་གདོད་མའི་མི་རིགས་ལ་སྡུག་སྦྱོང་མནར་གཅོད་བཏང་བ་དེར་རྒྱུན་དུ་སྐྱོན་བརྗོད་བྱས་ཡོད། འོན་ཀྱང་། ད་ཆ་པེ་ཅིང་གིས་བོད་མི་ཚོར་མི་རིགས་དཀར་པོའི་དབང་སྒྱུར་མཁན་རྣམས་ཀྱིས་གདོད་མིའི་མི་རིགས་ལ་གང་བྱས་པ་གཅིག་པ་གཅིག་རྐྱང་ལག་བསྟར་བྱེེད་པའི་འཆར་གཞི་འདིང་བཞིན་འདུག
མི་འདྲ་བའི་ཁྱད་ཆོས་ཀྱི་ཉེན་ཁ།
ཕྱི་ལོ་ ༡༩༩༩ གོ་གྲངས་ནང་རྩོམ་ཡིག་སྤེལ་བའི་རྒྱ་ནག་གི་ཤུགས་རྐྱེན་ཆེ་བའི་ཤེས་ཡོན་པ་སྐོར་ཞིག་གིས་ཨུ་རུ་སུ་ཁ་འཐོར་དུ་སོང་བའི་རྒྱུ་མཚན་ནི་མའོ་སི་ཁོ་ནས་རང་སྐྱོང་ཡུལ་ལུང་ཁག་གི་རིག་གཞུང་དང་སྐད་ཡིག་གི་ཁྱད་ཆོས་རྣམས་ཨུ་རུ་སུའི་རང་བཞིན་དུ་སྒྱུར་མ་ཐུབ་པའི་རྐྱེན་གྱིས་རེད་ཅེས་སྐྱོན་བརྗོད་བྱས་ཡོད། ཁོང་ཚོས་རྒྱ་ནག་གིས་སྐད་ཡིག་དང་རིག་གཞུང་སྣ་མང་ཅན་གྱི་ཨུ་རུ་སུ་ཁ་འཐོར་དུ་སོང་བ་ལས་བསླབ་བྱས་ལེན་དགོས་པའི་ནན་སྐུལ་བྱས་ཡོད་པ་དང་། གྲངས་ཉུང་མི་རིགས་ལ་དམིགས་བསལ་གོ་ཡུལ་སྤྲད་པ་དེས་རྒྱ་ནག་གི་རྒྱལ་ཁབ་འཛུགས་སྐྲུན་གྱི་ལས་འཆར་ལ་འགོག་རྐྱེན་བཟོ་སྲིད་པའི་ཉེན་བརྡ་བཏང་ཡོད། ཕྱི་ལོ་ ༢༠༡༢ ལོར་ཞི་ཅིན་ཕིན་ལ་དབང་ཆ་ཐོབ་པ་དང་མཉམ་དུ་གོང་གི་བསམ་ཚུལ་དེ་དག་ལ་མཐོང་ཆེན་བྱེད་འགོ་ཚུགས་ཡོད། ཞི་ཅིན་ཕིན་གྱི་སྲིད་གཞུང་ནང་དུ། རྒྱ་ནག་གིས་སོ་སོའི་མངའ་ཁོངས་སུ་གནས་པའི་རིག་གཞུང་སྣ་མང་ཐད་ལྟ་ཚུལ་མི་ལེགས་པ་དང་མཁྲེགས་པོ་ཞིག་བཟུང་ཡོད། དབང་འཛིན་པ་ཚོས་ཁ་བྲལ་གྱི་ལྟ་བ་འཛིན་མཁན་ཚོ་གཅིག་པུར་དམིགས་པ་གཏད་པ་ཙམ་མིན་པར། ལོ་རྒྱུས་དང་ཁྲིམས་ལུགས་ཀྱི་ཐོག་ནས་མི་རིགས་རང་ཐག་རང་གཅོད་ཀྱི་ཐོབ་ཐང་རྩོད་ལེན་ཤུགས་ཆེ་ཤོས་བྱེད་པའི་མི་རིགས་ཆེན་པོ་གཉིས་ཏེ། བོད་དང་ཡུ་གུར་གྱི་ཐུན་མོང་མ་ཡིན་པའི་ཁྱད་ཆོས་མེད་པ་བཟོ་བའི་ཇུས་ངན་སྤེལ་གྱི་ཡོད། པེ་ཅིན་གྱི་རྒྱ་གཞུང་གིས་ངོ་ལོག་པ་ཚོར་ཉེས་ཆད་མ་བཏང་བར་རང་དགར་འཇོག་མྱོང་མེད་པ་མ་ཟད། ད་ཆ་མི་འདྲ་བའི་ཁྱད་ཆོས་ཤིག་ཡོད་པ་ཙམ་གྱིས་ནག་ཉེས་སུ་བརྩི་གི་ཡོད།
ཏུར་ཀིའི་སྐད་ཡིག་སྨྲ་བའི་གྲངས་ཉུང་མི་རིགས་ཁ་ཆེ་འགའ་ཡོད་པའི་ནུབ་ཕྱོགས་ཀྱི་གྲོང་ཁྱེར་ཤར་ཏུར་ཀི་སི་ཐན་དུ་ཡང་ངོ་བོ་གཅིག་ཅན་གྱི་རྒྱ་ནག་ཅིག་བསྐྲུན་པའི་འཆར་སྣང་དེས་གཏོར་བརླག་གི་མཇུག་འབྲས་ཤིག་ཁྱེར་ཡོང་ཡོད། རྒྱ་ནག་གཞུང་གིས་ཉུང་མཐར་ཡང་ཡུ་གུར་གྱི་ཁ་ཆེ་ས་ཡ་གཅིག་བཀག་ཉར་བྱས་ཡོད་ལ། རྒྱ་ནག་གི་འགོ་ཁྲིད་ཚོས་ཡུ་གུར་བའི་སྤྱི་ཚོགས་ལ་སོ་ལྟ་ནན་པོ་བྱས་ཏེ། ཡུ་གུར་བ་ཚོས་ཁ་ཆེའི་ཆོས་ལུགས་ཉམས་སུ་ལེན་པར་བཀག་འགོག་བྱས་ཡོད། པེ་ཅིན་དུ་གནས་པའི་རྒྱ་ནག་གཞུང་གིས་ཨ་རིས་སྣེ་ཁྲིད་པའི་འཛམ་གླིང་ཁྱོན་ཡོངས་སུ་འཇིགས་སྐུལ་རིང་ལུགས་པར་རྒོལ་བའི་དམག་འཐབ་རྗེས་སུ། ཡུ་གུར་བ་རྣམས་འཇིགས་སྐུལ་རིང་ལུགས་པ་ཡིན་པའི་བདེན་པ་སྒྲུབ་བྱེད་ཀྱི་ལས་འགུལ་ཤུགས་ཆེན་སྤེལ་གྱི་ཡོད། འོན་ཀྱང་། བོད་ལ་མཚོན་ན་སྐད་ཆ་འདི་འོས་འཚམས་ཡོད་མ་རེད། བརྒྱ་བཤད་སྟོང་བཤད་ཀྱང་ཏཱ་ལའི་བླ་མ་ནི་ནོ་སྦེལ་ཞི་བདེ་གཟེངས་རྟགས་བཞེས་མཁན་ཞིག་ཡིན་པ་དང་། བོད་པའི་མི་རིགས་རིང་ལུགས་ཀྱི་ལས་འགུལ་ནི་མངོན་གསལ་དོད་པོའི་སྒོ་ནས་འཚེ་མེད་ཞི་བའི་ལམ་ལ་ཞུགས་ཡོད། དེར་བརྟེན། པེ་ཅིང་གིས་སོ་སོའི་དམིགས་ཡུལ་བསྒྲུབ་པར་མངོན་གསལ་དོད་པོའི་ཐོག་ནས་གདུག་རྩུབ་ཆུང་ཞིང་ཞིབ་ཚགས་ལྡན་པའི་དྲག་གནོན་གྱི་ལག་ཆ་བེད་སྤྱོད་བྱེད་བཞིན་ཡོད།
ཐབས་ལམ་དེ་ཚོའི་ཁྲོད་ནས་གལ་ཆེ་ཤོས་ནི་བོད་ཀྱི་སྐད་ཡིག་བཀོལ་སྤྱོད་ཚད་བཀག་བྱེད་པ་དེ་རེད། བོད་མིའི་ཐུན་མིན་གྱི་ཁྱད་ཆོས་ཚང་མའི་ཁྲོད་ནས་སྐད་ཡིག་ནི་མཐོ་སྒང་གི་བོད་མིའི་སྤྱི་ཚོགས་སྣ་ཚོགས་པ་དེ་དག་གཅིག་ཏུ་སྒྲིལ་བྱེད་ཆེ་ཤོས་དེ་རེད། བོད་མི་ཚོ་རྒྱ་མི་དང་མི་འདྲ་བ་ནི་ཆོས་ལུགས་དང་ཧི་མ་ལ་ཡའི་ས་བབས་ཀྱི་ཁྱད་པར་ལས་ཀྱང་སྐད་ཡིག་གིས་གསལ་པོར་མཚོན་གྱི་ཡོད། རྒྱ་ནག་གིས་གཞུང་ལམ་དང་། ཕུག་ལམ། ལྕགས་ལམ་བཅས་བཟོ་བསྐྲུན་བྱས་ནས་བོད་ཀྱི་འགོག་སྲུང་གི་ནུས་པ་ལྡན་པའི་ས་བབ་ཉམས་རྒུད་དུ་བཏང་ཡོད་ལ། རྒྱལ་ཁབ་ཀྱི་རོགས་སྐྱོར་དང་སོ་ལྟ་ཡི་ལག་ཆ་སྤུས་ལེགས་དག་ལ་བརྟེན་ནས་ནང་ཆོས་བེད་སྤྱོད་ལོག་པ་བཏང་ཡོད། དེ་ལས་ལྡོག་སྟེ། རྒྱ་ཡིག་དང་གཅིག་མཐུན་གྱི་ཆ་ཅི་ཡང་མེད་པའི་བོད་ཡིག་གི་སྐད་ཡིག་དབང་དུ་བསྡུ་ཐབས་མེད་པ་ཞིག་ཏུ་གནས་ཡོད་ལ། བོད་ཀྱི་འཚོ་བའི་ཆ་ཤས་གཞན་དང་མི་འདྲ་བར། བོད་ཀྱི་སྐད་ཡིག་ནི་འདུལ་དཀའ་ཞིང་། བེད་སྤྱོད་ལོག་པར་གཏོང་བ། རྒྱའི་ངོ་བོར་བསྒྱུར་ཐུབ་མེད། རྒྱུ་མཚན་དེ་ཉིད་ལ་བརྟེན་ནས་ཤི་ཅིན་ཕིན་དང་། “ མི་རབས་གཉིས་པའི་མི་རིགས་སྲིད་ཇུས་”ཞེས་པ་དེར་རྒྱབ་སྐྱོར་བྱེད་མཁན་གྱི་ཁྲ་བོ་དེ་དག་གི་མིག་ནང་དུ། བོད་ཀྱི་སྐད་ཡིག་ངེས་པར་དུ་རྩ་མེད་གཏོང་དགོས་པར་འདོད་པའི་རྒྱུ་མཚན་ཡང་དེ་ག་རང་རེད།
མཚོན་ཆའི་ངོ་བོར་སྤྱོད་པའི་སློབ་གསོ།
དམིགས་ཡུལ་དེ་བསྒྲུབ་པར་རྒྱ་ནག་གཞུང་གིས་བོད་ཕྲུག་ཚོར་རྒྱ་ནག་གཞུང་གི་འཛིན་སྐྱོང་འོག་ཡོད་པའི་བཅའ་སྡོད་སློབ་གྲྭ་ཁག་ཏུ་འཇུག་ཐབས་བྱས་ཡོད། ཕྱི་ལོ་ ༡༩༥༠ ནང་རྒྱ་ནག་གཞུང་གིས་བོད་དབང་སྒྱུར་བྱས་པ་ནས་བཟུང་ཆབ་སྲིད་ཀྱི་སློབ་གསོ་དང་རིག་གཞུང་གི་ཟུར་ཕུད་ནི་བོད་ནང་གི་དེང་རབས་ཀྱི་སློབ་གསོ་དང་ནམ་ཡང་ཁ་འབྲལ་ཐབས་མེད་པ་ཞིག་ཏུ་གྱུར་ཡོད། ཉེ་ཆར་བར་བོད་ནང་གི་སློབ་ཕྲུག་མང་ཆེ་བ་ཉིན་མོའི་སློབ་གྲྭར་འགྲོ་དགོས་པ་དང་། དགོང་མོ་སློབ་གྲྭ་ནས་ཕྱིར་སོ་སོའི་ཁྱིམ་དུ་ལོག་གི་ཡོད། སློབ་གྲྭ་ཁག་ཏུ་གང་བསླབས་པ་རྣམས་ཁྱིམ་གྱི་སློབ་གསོ་དང་འདྲེས་ནས་ཡང་ལྕི་ཤོར་གི་མེད། འོན་ཀྱང་། ཤི་ཅིན་ཕིན་ལ་དབང་ཆ་ཐོབ་པ་ནས་བཟུང་ས་གནས་ཀྱི་སློབ་གྲྭ་མང་ཆེ་བ་སྒོ་བརྒྱབ་སྟེ་གྲོང་སྡེ་དང་གྲོང་རྡལ་ལས་རྒྱང་ཐག་རིང་བའི་སར་གསར་འཛུགས་བྱས་པའི་བཅའ་སྡོད་སློབ་གྲྭར་ཟླ་སྒྲིལ་བཏང་ཡོད། དེ་སྔའི་ཉིན་སློབ་དང་མི་འདྲ་བར་བཅའ་སྡོད་སློབ་གྲྭར་རྒྱལ་ཁབ་ཀྱིས་སློབ་ཕྲུག་ཚོའི་དོ་སྣང་དང་ཁོར་ཡུག་ལ་སྟངས་འཛིན་བྱེད་ཐུབ། འདི་ལ་བརྟེན་ནས་རྒྱ་ནག་དམར་ཤོག་ཚོགས་པར་བོད་མི་དར་མ་གཞོན་སྐྱེས་ཚོའི་ངོ་བོ་དང་འཛམ་གླིང་ལྟ་ཚུལ་ལ་འགྱུར་བ་གཏོང་བའི་སྔར་མ་བྱུང་བའི་ནུས་སྟོབས་ཤིག་ཐོབ་ཡོད།
བཅའ་སྡོད་སློབ་གྲྭ་ཁག་གི་ལམ་ལུགས་ལ་ཞིབ་འཇུག་རྒྱས་པ་ཞིག་བོད་དོན་ལས་འགུལ་བསྟི་གནས་ཁང་གི་ ༢༠༢༡ ལོའི་སྙན་ཐོའི་ནང་ཐོན་ཡོད། སྙན་ཐོ་དེའི་ཞིབ་འཇུག་པ་ཚོས་རྒྱ་ནག་གཞུང་གི་ལོ་འཁོར་སྙན་ཐོ་དང་། བོད་རང་ནས་བྱུང་བའི་བདེན་དཔང་ཚིག་ཐོ། རྒྱ་ཡིག་ནང་གི་ཞིབ་འཇུག་རྩོམ་ཡིག་ཁག་ལ་ཁུངས་གཏུགས་ནས་བོད་ནང་གི་ལོ་དྲུག་ནས་བཅོ་བརྒྱད་བར་གྱི་བོད་པའི་སློབ་མ་ཁྲི་ ༨༠ ཙམ་བཅའ་སྡོད་སློབ་གྲྭར་སློབ་འཇུག་བྱས་ཡོད་པའི་ཚོད་དཔག་བྱས་ཡོད་པ་དང་། དེ་ནི་བོད་ནང་གི་སློབ་ཕྲུག་སྤྱི་ཡོངས་ཀྱི་བཞི་ཆ་གསུམ་ཙམ་རེད། ཧོན་འཐོར་བའི་བསྡོམས་རྩིས་འདིའི་ནང་དུ་ལོ་བཞི་ནས་དྲུག་བར་གྱི་བོད་པའི་ཕྲུ་གུ་གྲངས་འབོར་ཁྲི་ ༡༠ ལྷག་བཅའ་སྡོད་སྔོན་འགྲོའི་སློབ་གྲྭའི་ནང་ཡོད་པ་རྣམས་ཚུད་མེད། སྙན་ཐོ་དེའི་ནང་ད་དུང་པེ་ཅིང་གིས་སློབ་ཞུགས་དེ་དག་རང་མོས་ཐོག་ནས་བྱུང་བ་ཞིག་ཡིན་སྐོར་བརྗོད་པ་རྫུན་རྐུབ་བརྡོལ་བྱེད་དེ་རྒྱལ་ཁབ་ཀྱིས་ཕ་མ་རྣམས་ལ་བཙན་ཤེད་ཀྱིས་རང་གི་ཕྲུ་གུ་སློབ་གྲྭར་འཇུག་ཏུ་བཅུག་པའི་གནས་ཚུལ་ཡང་བཀོད་ཡོད། རྒྱ་ནག་གཞུང་གིས་ཕ་མ་ཚོས་བུ་ཕྲུག་རྣམས་བཙན་གྱིས་སློབ་འཇུག་བྱེད་ཆེད་དངུལ་ཆད་གཅོད་པ། རོགས་སྐྱོར་མི་སྤྲོད་པ། ཐ་ན་འཛིན་བཟུང་བཅོན་འཇུག་བྱེད་པ་སོགས་ཉེས་པ་གཏོང་གི་ཡོད།
འདས་པའི་ལོ་བཅུའི་ནང་བོད་ནང་གི་བཅའ་སྡོད་སློབ་ཆུང་དང་སྔོན་འགྲོའི་སློབ་གྲྭ་ཚང་མའི་ནང་། འཛིན་ཁང་ཕྱི་ནང་གཉིས་ཀར་ཁ་བརྡ་བྱེད་སྤྱད་ཀྱི་སྐད་ཡིག་ལ་རྒྱ་ཡིག་་བེད་སྤྱོད་བྱེད་རྒྱུ་དེ་བཙན་འགེལ་བྱས་ཡོད། ལྷ་སའི་ཉེ་འདབས་སུ་ཆགས་པའི་བཅའ་སྡོད་སློབ་འབྲིང་འགྲིམས་མྱོང་མཁན་གྱི་བོད་མི་ཞིག་ད་ལྟ་ཕྱི་རྒྱལ་དུ་འཚོ་བ་རོལ་གྱི་ཡོད་ཅིང་། ཁོང་གིས་ང་ཚོར་ལོ་རིམ་ལྔ་པའི་སློབ་གྲྭའི་ཆ་སྙོམས་ཀྱི་ཉིན་མོ་ཞིག་འགྲེལ་བརྗོད་བྱས་བྱུང་། ཞོགས་པ་ཆུ་ཚོད་དྲུག་དང་ཕྱེད་ཀ་ནས་དགོང་མོའི་ཆུ་ཚོད་དགུ་དང་ཕྱེད་ཀའི་བར་དུ། སློབ་མ་ཚོས་དུས་ཚོད་མང་ཆེ་བ་ཨང་རྩིས་དང་ཚན་རིག་ལས་རྒྱལ་གཅེས་སློབ་གསོ་དང་རྒྱ་ཡིག་སྦྱོང་བར་གཏོང་དགོས་པ་དང་། བར་གསེང་ནི་ཐུང་ཐུང་དང་སྒྲིག་ལམ་ཧ་ཅང་བཙན་པོ་རེད། མོ་རང་ལོ་ན་བཅུ་ཡས་མས་ལ་སོན་སྐབས། བོད་ཡིག་ནི་མོའི་སྐད་ཡིག་ཐོག་མ་དེ་རེད། སློབ་གྲྭར་ཞུགས་ནས་ལོ་གཅིག་མ་ཟིན་ཙམ་གྱི་རྗེས་སུ། རྒྱ་སྐད་དེ་བོད་སྐད་ཀྱི་ཚབ་ཏུ་གྱུར་ཞིང་། ད་ཆ་མོས་བོད་སྐད་བཤད་སྐབས་ཕྱི་རྒྱལ་གྱི་སྐད་ཡིག་ཅིག་བཤད་པ་ལྟར་ད་མ་དིག་ལས་བཤད་མི་ཐུབ།
ཕལ་ཆེར་ལོ་ངོ་བཅུ་ཕྲག་གཅིག་གི་སྔོན་ལ་བོད་པ་ཚོར་རིག་གཞུང་གི་རྨང་གཞི་ཅན་གྱི་སློབ་སྦྱོང་གི་ལམ་ཁ་མང་བ་ཡོད་དེ། ཁ་ཤས་ཉིན་མོའི་སློབ་གྲྭ་དང་སྒེར་བཙུགས་སློབ་གྲྭ་འགྲིམས་ཤིང་། ཁ་ཤས་༧གོང་ས་ཏཱ་ལའི་བླ་མའི་གཟིགས་སྐྱོང་འོག་ཡོད་པའི་སློབ་གྲྭ་འགྲིམས་ཆེད་རྒྱ་གར་ལ་ལྐོག་ཏུ་འགྲོ་གི་ཡོད། འོན་ཀྱང་། རྒྱ་ནག་གིས་ཕྱི་ལོ་ ༢༠༡༢ ནས་བཟུང་བོད་ཀྱི་ས་གནས་དང་སྒེར་གྱི་སློབ་གྲྭ་རྣམས་སྒོ་བརྒྱབ་པ་དང་། ཕྱི་ལོ་ ༢༠༠༦ ནས་ ༢༠༠༩ བར་བོད་ཀྱི་ས་མཚམས་དམ་པོར་བསྡམས་པར་བརྟེན་གདམ་ཀ་དེ་དག་མེད་པར་གྱུར་ཡོད།
སྐད་ཡིག་རྩ་མེད་གཏོང་བ།
ད་ལོའི་ལོ་མགོར་མཉམ་འབྲེལ་རྒྱལ་ཚོགས་ཀྱི་དཔལ་འབྱོར་དང་། སྤྱི་ཚོགས། རིག་གཞུང་ཐོབ་ཐང་ཚོགས་ཆུང་གིས་རྒྱ་ནག་སྐོར་གྱི་དུས་བཀག་སྙན་ཐོ་བསྐྱར་ཞིབ་ཐེངས་གསུམ་པ་བྱེད་སྐབས། རྒྱ་ནག་གི་འགོ་ཁྲིད་ཚོས་འོས་འགན་བཅའ་སྡོད་སློབ་གྲྭའི་སྲིད་བྱུས་སྐོར་ལ་དྲིས་ལན་བཏབ་སྟེ། བོད་ཀྱི་གྲོང་གསེབ་ཁུལ་དུ་སློབ་གྲྭ་མེད་སྐོར་བཤད་བྱུང་ལ། ཁོ་ཚོས་ས་གནས་སློབ་གྲྭ་རྣམས་རྩ་མེད་བཟོས་པ་དེ་གཏིང་བརྗེད་བྱས་འདུག རྒྱ་ནག་གི་ས་ཁུལ་གཞན་ལའང་བཅའ་སྡོད་སློབ་གྲྭའི་ལམ་ལུགས་དེ་ཡོད་ནའང་། བཅའ་སྡོད་བྱེད་མཁན་གྱི་བོད་པའི་སློབ་མའི་ཁ་གྲངས་(བརྒྱ་ཆ་༧༨) དེ་རྒྱ་མིའི་སློབ་མ་ཚོའི་ཁ་གྲངས་(བརྒྱ་ཆ་༢༢) ལས་རྦད་དེ་མང་བ་རེད། འདི་ནི་སྟེས་དབང་གིས་བྱུང་བ་ཞིག་མ་རེད། ༢༠༢༥ ལོར་རྒྱ་ནག་གཞུང་གིས་གཞུང་འབྲེལ་ཐོག་ནས་འབྲེལ་ཡོད་དཔོན་རིགས་ཚོར། “གྲངས་ཉུང་མི་རིགས་ས་ཁུལ་དུ་བཅའ་སྡོད་སློབ་གྲྭ་ཇེ་མང་དུ་གཏོང་བའི་” རེ་སྐུལ་དང་། “གྲངས་ཉུང་མི་རིགས་ཀྱི་བྱིས་པ་ཡོད་ཚད་སློབ་གྲྭར་འཚོ་གནས་དང་། སློབ་སྦྱོང་། འཆར་ལོངས་བྱུང་ཐུབ་པ་”ལག་ལེན་དུ་བསྟར་དགོས་པའི་བཀའ་བཏང་ཡོད།
རྒྱ་ནག་གི་དཔོན་རིགས་ཚོས་བོད་ཡིག་ལ་ཚན་རིག་དང་ཨང་རྩིས་སློབ་ཁྲིད་བྱེད་པའི་ཐ་སྙད་འདང་ངེས་མེད་ལུགས་བརྗོད་དེ་རྒྱ་ཡིག་སློབ་ཁྲིད་ཀྱི་བརྒྱུད་ལམ་དུ་བེད་སྤྱོད་བྱེད་ཀྱི་ཡོད་ཅེས་ལན་བཏབ་བྱུང་། སྐད་ཆ་འདི་ནི་རྫུན་གཏམ་ཡིན་པ་མ་ཟད། དོན་དངོས་དང་འགལ་བ་ཞིག་ཀྱང་ཡིན། སྐད་ཡིག་ཅིག་ལ་བརྟེན་ནས་སློབ་ཚན་གསར་པ་སློབ་ཁྲིད་བྱེད་སྐབས་དགོས་ངེས་ཀྱི་ཆེད་སྦྱོང་གི་ཐ་སྙད་འདང་ངེས་མེད་པ་ནི་རྒྱུན་ལྡན་ཞིག་ཡིན་ཞིང་། དེ་འདྲའི་དཀའ་ངལ་ནི་མིང་བརྡ་གསར་པ་བཟོ་བ་དང་ཡང་ན་གཡར་པོ་བརྒྱབ་པ་སོགས་ལ་བརྟེན་ནས་ལས་སླ་པོར་སེལ་ཐུབ་ཀྱི་ཡོད། དོན་དངོས་ཐོག་དུས་རབས་གཅིག་ཙམ་གྱི་གོང་དུ་རྒྱ་ནག་གི་སློབ་གྲྭའི་ནང་སྤྱི་ཚོགས་རིག་པ་དང་རང་བྱུང་ཚན་རིག་ལྟ་བུའི་རིག་ཚན་གསར་པ་སླེབས་སྐབས། ཉི་ཧོང་དང་དབྱིན་ཡིག་གི་མིང་བརྡ་སྟོང་ཕྲག་མང་པོ་གཡར་པོ་བརྒྱབ་ནས་བེད་སྤྱོད་བྱས་ཡོད། དེ་ལས་ཀྱང་གལ་གནད་ཆེ་བ་ནི། ཕྱི་ལོ་༢༠༡༠་བར་དུ་ཨང་རྩིས་དང་། རྫས་འགྱུར་རིག་པ། སྐྱེ་དངོས་རིག་པ། ས་ཁམས་རིག་པ་བཅས་བོད་ཡིག་ནང་སློབ་ཁྲིད་བྱས་པ་དང་། རྗེས་སུ་བོད་ཡིག་ལ་བརྟེན་ནས་སློབ་ཚན་ཁྲིད་པའི་ལམ་ལུགས་དེ་རྒྱ་ཡིག་ལ་བརྟེན་ནས་སློབ་ཚན་ཁྲིད་པའི་ལམ་ལུགས་སུ་སྒྱུར་འགོ་ཚུགས་པ་དང་དེ་མུ་མཐུད་ལག་བསྟར་བྱེད་མུས་ཡིན།
བོད་སྐད་ཉམས་པ་དེས་སྡེ་ཁུལ་དང་ཁྱིམ་ཚང་ལ་དངོས་འབྲེལ་གྱི་ཤུགས་རྐྱེན་ཆེན་པོ་ཞིག་ཐེབས་ཀྱི་ཡོད། ཕྲུ་གུ་རྣམས་རང་ཁྱིམ་དུ་འཚར་ལོངས་མི་བྱེད་པར་སློབ་གྲྭའི་རྒྱུས་མངའ་མེད་པའི་ཁོར་ཡུག་ཏུ་འཚར་ལོངས་བྱུང་བ་ཡིན་ན། བོད་མིའི་འཚོ་བའི་རྨང་གཞིའི་སྒྲོམ་གཞི་ཉམས་དམས་སུ་འགྲོ་གི་རེད། ཞིབ་འཇུག་པ་རྣམས་ཀྱིས་སྐད་ཡིག་བརྗེ་སྒྱུར་རིག་གནས་ཉམས་རྒུད་དུ་འགྲོ་བཞིན་པའི་མཇུག་འབྲས་སྔ་མོ་ནས་མཐོང་ཡོད། བོད་མི་དར་མ་ཚོས་བོད་སྐད་ཤོད་ཐུབ་པའི་ནུས་པ་མགྱོགས་མྱུར་ངང་ཉམས་བཞིན་ཡོད་ཅིང་། ནུས་པ་དེ་ཉམས་པའི་དབང་གིས་ཁོ་ཚོའི་འཚོ་བའི་འཕེལ་རིམ་གྱི་ཁ་ཕྱོགས་བརླག་གིན་ཡོད། ཉེ་ཆར་བོད་ནང་ལྟ་སྐོར་དུ་བསྐྱོད་པའི་ངའི་གྲོགས་པོ་ཞིག་གིས། ལོ་ན་བཅུ་ལས་མ་བརྒལ་བའི་ཕྲུ་གུ་རྣམས་དང་ཐུག་འཕྲད་བྱུང་བའི་ཁྲོད་དུ་བོད་སྐད་ཤོད་ཐུབ་མཁན་གཅིག་ཀྱང་མི་འདུག་ཟེར།
རྩོམ་ཡིག་འདི་འབྲི་མཁན་གཉིས་ཀྱི་ཁྲོད་ནས་སྐུ་ཞབས་རྒྱལ་ལོ་ལགས་ཕྱི་ལོ་ ༢༠༡༥ ནས་ ༢༠༢༠ བར་བོད་ནང་དུ་ཤེས་ཡོན་སྤྱི་ཚོགས་རིག་པའི་ལས་དོན་གཉེར་བ་དང་། བོད་ནང་གི་བཅའ་སྡོད་སྔོན་འགྲོའི་སློབ་གྲྭ་ལྔ་བཅུ་ཙམ་ལ་གཟིགས་སྐོར་དུ་ཕེབས་ནས་དོན་རྐྱེན་འདི་དངོས་སུ་མཐོང་ཡོད། བོད་ཕྲུག་མང་པོས་རང་གི་ཕ་མ་དང་འབྲེལ་བ་བཟང་པོ་ཞིག་འཛུགས་པར་དཀའ་ངལ་འཕྲད་བཞིན་འདུག སློབ་གྲྭའི་གུང་གསེང་སྐབས་རང་ཁྱིམ་དུ་སྡོད་སྐབས། ཕྲུ་གུ་རྣམས་ཀྱིས་རང་གི་ཕ་མ་དང་བཟའ་མི་གཞན་ལ་འབྲེལ་བ་བྱེད་པར་གཡོལ་ཐབས་བྱེད་ཀྱི་ཡོད། ཕྲུ་གུ་ཚོས་ནང་ཁུལ་དུ་རྒྱ་སྐད་ཁོ་ན་བཤད་ཀྱི་ཡོད། བཅའ་སྡོད་སློབ་གྲྭས་སློབ་མ་དང་བོད་ཀྱི་རིག་གཞུང་དབར་ཙམ་མིན་པར། སློབ་མ་དང་ཁོ་ཚོའི་ནང་མིའི་དབར་ལ་གྱང་ཞིག་བརྩེགས་བཞིན་ཡོད།
དེ་ནི་སློབ་གྲྭ་དེ་དག་གི་དམིགས་ཡུལ་གཙོ་བོ་ཞིག་ཡིན། ལོ་ངོ་བཅུ་ཕྲག་མང་པོའི་གོང་དུ་བྱང་ཨ་མེ་རི་ཁ་དང་ཨོ་སི་ཁྲུ་ལི་ཡའི་ནང་གི་བཅའ་སྡོད་སློབ་གྲྭ་རྣམས་ཀྱིས་གདོད་མའི་མི་རིགས་ཀྱི་ཕྲུ་གུ་རྣམས་རང་ཁྱིམ་དང་ཚོགས་སྡེ་ནས་ཕྱིར་བཏོན་ཏེ་སློབ་གྲྭར་བཅུག་པ་ལྟར། བོད་ནང་གི་བཅའ་སྡོད་སློབ་གྲྭ་འདི་དག་ནི་རིག་གཞུང་དང་སྐད་ཡིག་དེ་མི་རབས་ནས་མི་རབས་ལ་བརྒྱུད་སྤྲོད་བྱེད་པར་འགོག་རྐྱེན་བཟོ་བའི་ཆེད་དུ་བཞེངས་སྐྲུན་བྱས་པ་ཞིག་ཡིན། སྲོལ་རྒྱུན་གྱི་སྤྱི་ཚོགས་མང་པོ་ཞིག་གི་ནང་དུ་སྤོ་བོ་དང་རྨོ་མོ་ཡིས་བྱིས་པའི་སེམས་ཁམས་ཡར་རྒྱས་དང་འཇིག་རྟེན་ལྟ་ཚུལ་ལ་འགྱུར་བ་གཏོང་བའི་ཐད་ནས་གལ་ཆེའི་ནུས་པ་འདོན་བཞིན་ཡོད། འོན་ཀྱང་། བཅའ་སྡོད་སློབ་གྲྭའི་ནང་དུ་སློབ་ཕྲུག་ཚོའི་མ་སྐད་བེད་མེད་བཟོས་པར་བརྟེན། སློབ་ཕྲུག་ཚོས་སྤོ་བོ་དང་རྨོ་མོར་སྐད་ཆ་ཤོད་མི་ཐུབ་པ་བཟོས་ཡོད། སློབ་ཕྲུག་ཚོ་སོ་སོའི་ཕ་མ་དང་། སྤོ་བོ། རྨོ་མོ་བཅས་ལས་འཆར་གཞི་ལྡན་པའི་ངང་ནས་ལོགས་སུ་བཏོན་ན། སེམས་ཁམས་དང་འཚར་ལོངས་ཐད་གནོད་སྐྱོན་འབྱུང་བ་ཙམ་མིན་པར། རིག་གཞུང་རྩ་མེད་དུ་འགྲོ་བའི་སྤྱི་ཡོངས་ཀྱི་སེམས་ཁམས་ཀྱི་དཀའ་ངལ་ཆེན་པོ་ཞིག་འཕྲད་དུ་འཇུག་ངེས་རེད།
ཕམ་ཁ་ཉོས་པ་ཁས་ལེན།
བོད་ནང་འབྱུང་བཞིན་པའི་གནས་ཚུལ་རྣམས་ནི་རྒྱལ་སྤྱིའི་ཁྲིམས་ལུགས་དང་རྩ་འགལ་དུ་སོང་བ་ཙམ་མ་ཡིན་པར། རྒྱ་ནག་གཞུང་གིས་བོད་ལ་བཞག་པའི་ཁས་ལེན་ཡང་རྩིས་མེད་དུ་བཏང་བ་ཞིག་རེད། ཕྱི་ལོ་ ༡༩༥༡ ལོར་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་བོད་གཞུང་དང་གྲོས་མཐུན་དོན་ཚན་བཅུ་བདུན་ལ་མིང་རྟགས་འགོད་སྐབས། རྒྱ་ནག་གཞུང་གིས་དད་མོས་དང་། རིག་གཞུང་། སྐད་ཡིག་བཅས་ཀྱི་ཐད་ནས་བོད་ཀྱི་རང་སྐྱོང་སྤྲོད་ལ་བརྩི་བཀུར་བྱེད་པའི་ཁས་ལེན་བྱས་ཡོད། ༡༩༨༤ ལོར་པེ་ཅིན་གྱིས་ས་གནས་མི་རིགས་རང་སྐྱོང་གི་ཁྲིམས་ལུགས་གཏན་འབེབས་བྱས་ཏེ། “གྲང་ཉུང་མི་རིགས་ཀྱི་སློབ་ཕྲུག་རྣམས་སློབ་བསྡུ་བྱེད་པའི་ཤེས་ཡོན་བསྟི་གནས་རྣམས་ཀྱིས་གང་ཡོང་ཅི་ཡོང་སྒོས་མི་རིགས་དེའི་སྐད་ཡིག་བེད་སྤྱོད་གཏོང་བ་དང་། སྐད་ཡིག་དེ་སློབ་ཁྲིད་བྱེད་ཆེད་བེད་སྤྱོད་གཏོང་དགོས།” ཞེས་སྐད་ཡིག་དང་རིག་གཞངུ་གི་རང་སྐྱོང་རྩ་དོན་ཁས་ལེན་བྱས་ཡོད།
ཁས་ལེན་འདི་དག་ནི་རྒྱ་ནག་གི་འགོ་ཁྲིད་ཚོས་བོད་མི་ཚོས་མཐར་ཐུག་དམར་པོའི་རིང་ལུགས་ཀྱི་ལྟ་བ་ཁྱད་དུ་འཕགས་པ་དེ་ཁས་ལེན་པ་དང་། ཧན་མི་རིགས་ཀྱི་ཞི་བའི་སྲིད་དབང་ལ་མགོ་བསྒུར་རྒྱུ་ཡིན་པའི་གདེང་ཚོད་ཡོད་པའི་དུས་སྐབས་ཤིག་ལ་བཞག་ཡོད། པེ་ཅིན་གྱིས་བོད་མི་ཚོས་དེང་རབས་ཅན་དང་དཔལ་འབྱོར་ཡར་རྒྱས་ཀྱི་འབྲས་བུ་ལ་ལོངས་སུ་སྤྱད་རྗེས། བོད་མི་ཚོས་ནང་ཆོས་ཀྱི་རིན་ཐང་དང་རང་གི་སྲོལ་རྒྱུན་གྱི་ངོ་བོ་དེ་དོར་ཏེ། རང་མོས་ངང་ནས་དམར་ཤོག་ཚོགས་པ་དང་མེས་རྒྱལ་ལ་དགའ་བསུ་ཞུ་རྒྱུ་ཡིན་པའི་ཚོད་རྩིས་བྱས་ཡོད། ཡིན་ན་ཡང་། རང་མོས་ངང་རྒྱ་ནག་ཅན་དུ་འགྱུར་བའི་རྣམ་གཞག་འདི་དངོས་ཡོད་གནས་ཚུལ་དང་གདོང་ཐུག་བརྒྱབ་ནས་རེ་བ་ནང་བཞིན་བྱུང་མེད། དཔེར་ན། ཕྱི་ལོ་ ༢༠༠༨ ལ་བོད་མི་ཚོས་རྒྱ་ནག་གི་དབང་སྒྱུར་ལ་ངོ་རྒོལ་གྱིས་སྲང་ལམ་ཁག་ཏུ་གྱེན་ལངས་བྱས་པ་དང་། དེ་ནས་རང་ལུས་མེར་སྲེག་བཏང་བ་སོགས་བོད་མི་ཚོས་རང་གི་སྲོལ་རྒྱུན་གྱི་ངོ་བོ་དང་ཆོས་ཀྱི་ཤུལ་ནོར་རྣམས་ཤི་འཐམ་རོ་འཐམ་བྱས་ནས་བསྡད།
སྲིད་འཛིན་ཞི་ཅིན་ཕིན་གྱི་དབང་འོག་ཏུ་རྒྱ་ནག་གིས་བོད་མིའི་རིག་གཞུང་དང་སྐད་ཡིག་རྩ་མེད་གཏོང་ཐབས་ཀྱི་སྲིད་ཇུས་བཙན་པོ་ཞིག་ལག་བསྟར་བྱེད་བཞིན་པ་ནི་སོ་སོའི་ཕམ་ཉེས་ངོས་ལེན་བྱས་པ་ཞིག་རེད། པེ་ཅིན་གྱིས་སྔོན་འགྲོ་སློབ་གྲྭ་དང་སློབ་གྲྭ་ཁག་གོ་མཚོན་གྱིས་བཀོལ་སྤྱོད་བྱས་ནས་བོད་པའི་ཕྲུ་གུ་རྣམས་རྒྱ་མིའི་འབངས་མི་ལ་སྒྱུར་ཐབས་བྱེད་བཞིན་པ་ནི། ཡར་རྒྱས་དང་འཛུགས་སྐྲུན་གྱི་དབང་ཤུགས་ལ་བརྟེན་ནས་བོད་མིའི་ཡིད་སེམས་འགུགས་མ་ཐུབ་པ་ཤུགས་སུ་ཁས་བླངས་པ་ཞིག་རེད། ཕམ་ཉེས་འདི་ནི་འཛམ་གླིང་ལོ་རྒྱུས་ཀྱི་ནང་དུ་འཁོད་པའི་མི་སེར་སྤེལ་བའི་བཅའ་སྡོད་སློབ་གྲྭའི་སྒྲིག་འཛུགས་དེ་ད་ཆ་བོད་ནང་དུ་ཐོན་པའི་ལག་བསྟར་བྱེད་འགོ་ཚུགས་པའི་མཐར་ཐུག་གི་རྒྱུ་མཚན་དེ་རེད།
ཉེ་བའི་ཟླ་ཤས་རིང་པེ་ཅིང་གིས་བཅའ་སྡོད་སློབ་གྲྭའི་སྲིད་བྱུས་དེ་དཀར་པོ་དཀར་རྐྱང་བཟོ་ཐབས་བྱེད་བཞིན་ཡོད། རྒྱ་ནག་གཞུང་གི་མགྲིན་ཚབ་གསར་ཤོག་གོ་ལ་གསར་འགྱུར་དང་རྒྱ་ནག་གི་ཉིན་རེའི་ཚགས་པར་གཉིས་ཀའི་ནང་གསལ་ལ་འོད་མདངས་འཚེར་བའི་བརྙན་པར་མང་པོ་དང་ལྷན་དུ་ལོ་རྒྱུས་ལྡན་པའི་བྱང་ཨ་མེ་རི་ཀའི་བཅའ་སྡོད་སློབ་གྲྭ་དང་བསྡུར་ན་ཁྱད་པར་ཡོད་པ་ལྟར་བོད་ནང་གི་བཅའ་སྡོད་སློབ་གྲྭ་ཁག་ལ་རྒྱབ་སྐྱོར་བྱེད་པའི་གནས་ཚུལ་གཅིག་རྗེས་གཉིས་མཐུད་དུ་སྤེལ་ཡོད། འདི་ནི་པེ་ཅིང་གིས་ཉེན་ཁ་ཞིག་ཚོར་བཞིན་ཡོད་པའི་རྟགས་མཚན་གསལ་པོ་རེད་ལ། ལྷག་པར་དུ་ཏོག་དབྱིབས་གཉན་རིམ་ལ་གདོང་ལེན་བྱེད་ཕྱོགས་དང་། ཕྱི་འབྲེལ་གྱི་སྲིད་ཇུས་དྲག་པོ། ད་དུང་ཉེ་བའི་ཆར་རྒྱ་ནག་གི་དཔལ་འབྱོར་ཉམས་ཉེས་འགྲོ་བཞིན་པའི་གནས་སྟངས་ལ་གཞིགས་ཏེ་རྒྱལ་སྤྱིའི་ཐོག་གི་རྒྱ་ནག་གི་གོ་བབ་དང་རྒྱལ་ནང་གི་ཁྲིམས་མཐུན་རང་བཞིན་དེ་ཉམས་རྒུད་འགྲོ་བཞིན་པར་དོ་སྣང་བྱེད་བཞིན་པའི་སྒང་རེད། པེ་ཅིན་ལ་རྒྱལ་སྤྱིའི་གནོན་ཤུགས་འཕོག་སླ་བོ་ཡིན་སྲིད་པས་ལས་འགུལ་གྱི་ནུས་པ་འདོན་པའི་དུས་ལ་བབས་འདུག
རྒྱལ་ཁབ་རྣམས་ཀྱིས་ངེས་པར་དུ་མི་སེར་སྤེལ་བའི་བཅའ་སྡོད་སློབ་གྲྭའི་ལམ་ལུགས་ལ་སྐྱོན་བརྗོད་བྱེད་དགོས་པ་དང་། ལྷག་པར་དུ་ཡོང་ལ་ཉེ་བའི་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཀྱིས་རྒྱ་ནག་གི་དུས་འཁོར་བསྐྱར་ཞིབ་ལྟ་བུའི་ཐབས་ཇུས་ཀྱི་ཆ་ནས་གལ་ཆེན་དུ་བརྩི་བའི་གོ་སྐབས་ལ་བསྒྲགས་གཏམ་ཤུགས་ཆེན་སྤེལ་དགོས། འདི་ནི་ཕྱི་སྲིད་ལས་ཁུངས་ཀྱི་བསྒྲགས་གཏམ་དང་མཉམ་དུ་བསྐྱར་ཟློས་བྱེད་དགོས་ཤིང་། ཕྱི་ཟླ་༨ ནང་བྷིལ་ལིན་ཁན་གྱིས་བྱས་པ་ལྟར་རྒྱ་ནག་གི་འབྲེལ་ཡོད་དཔོན་རིགས་ཚོར་འགྲིམ་འགྲུལ་བཀག་སྡོམ་དང་། སྲིད་ཇུས་ངན་པ་འདི་འདིང་མཁན་ལ་་ཉེས་ཆད་གཅོད་དགོས། མཐའ་མར་རྒྱལ་ཁབ་རྣམས་ཀྱིས་རྒྱ་ནག་གིས་བོད་ཀྱི་ངོ་བོ་དང་རིག་གཞུང་མེད་པར་གཏོང་བའི་ལས་འགུལ་ལ་ཐུན་མོང་གི་ཡ་ལན་ཤུགས་ཆེ་རུ་གཏོང་བར་མཉམ་ལས་བྱེད་དགོས། ལྷག་པར་དུ་ཨོ་སི་ཁྲུ་ལི་ཡ་དང་། ཁེ་ན་ཌ། ཨ་རི་བཅས་ཀྱིས་གདོད་མའི་མི་རིགས་ཀྱི་རིག་གཞུང་རྩ་མེད་གཏོང་ཆེད་སློབ་གསོ་མཚོན་ཆ་རུ་བེད་སྤྱོད་བཏང་བའི་ལོ་རྒྱུས་ཡོད་པས། དུས་རབས་ཉེར་གཅིག་པའི་མི་སེར་སྤེལ་བའི་སྲིད་ཇུས་འདིར་སྐྱོན་བརྗོད་བྱེད་པའི་འགན་ཁུར་དམིགས་བསལ་བ་ཞིག་ཡོད། ཁོ་ཚོས་ཉེ་ཆར་རང་ཉིད་ཀྱི་འདས་དོན་སྐྱུར་མོའི་ནོར་འཁྲུལ་ངོས་ལེན་བྱེད་པ་དེས་རྒྱ་ནག་ལ་ནོར་འཁྲུལ་གཅིག་པ་མི་བཟོ་བར་ཉེན་བརྡ་གཏོང་བའི་ནུས་པ་སྤྲད་ཡོད། གལ་ཏེ་ཕྱི་འབྲེལ་གྱི་ཐེ་བྱུས་དང་། ཕྱོགས་དུ་མའི་གནོན་ཤུགས། དམིགས་འབེན་ཅན་གྱི་ཉེས་ཆད་བཅས་དུས་སྐབས་ཏག་ཏག་ཅིག་ལ་འཛོམས་ཚེ། བོད་ནང་བཅའ་སྡོད་སློབ་གྲྭའི་སྲིད་བྱུས་དེ་སྟངས་འཛིན་དང་གོ་ལྡོག་བཟོ་ཐུབ།
རྩོམ་པ་པོ།
བསྟན་འཛིན་རྡོ་རྗེ་ནི་བོད་དོན་ལས་འགུལ་བསྟི་གནས་ཁང་གི་ཞིབ་འཇུག་པ་རྒན་པ་དང་། འཐབ་བྱུས་མཁས་པ། ཀོ་ལུམ་སྦི་ཡ་སློབ་གྲྭ་ཆེན་མོའི་སྲིད་དོན་ཚན་རིག་སྡེ་ཚན་གྱི་འབུམ་རམས་པའི་སློབ་མ་ཡིན།
རྒྱལ་ལོ་ལགས་ནི་ཡུན་ནན་དགེ་ཐོན་སློབ་གྲྭ་ཆེན་མོའི་དགེ་རྒན་ཆེན་མོ་ཟུར་པ་ཡིན་པ་དང་། བོད་མིའི་སྤྱི་ཚོགས་ཀྱི་སྒྲོམ་གཞི་སྟེ། སྤྱི་ཚོགས་དང་ཆོས་ལུགས་ཀྱི་རྣམ་གཞག་དང་འབྲེལ་བའི་སློབ་གསོ་ཞེས་པའི་དཔེ་དེབ་ཀྱི་རྩོམ་པ་པོ་ཡིན།
