སུ་ཝེ་ཌན་གྱི་གྲོས་ཚོགས་བོད་དོན་རྒྱབ་སྐྱོར་ཚོགས་པས་སུ་ཝེ་ཌན་གྲོས་ཚོགས་སུ་བོད་དོན་དང་འབྲེལ་བའི་གྲོས་གཞི་གྲོས་འཆར་ཁག་གསུམ་ཕུལ་ནས་བོད་དོན་ལ་མུ་མཐུད་རྒྱབ་སྐྱོར་གནང་དགོས་པའི་རེ་སྐུལ་ཞུས་འདུག
Swedish Parliamentary Friendship Group meets His Holiness the Dalai Lama , Dharamshala, India . September 2023. Photo :CTA
དེ་རིང་ཕྱི་ཚེས ༥ ཉིན་དབུས་བོད་མིའི་སྒྲིག་འཛུགས་ཀྱི་དབྱིན་ཡིག་དྲ་རྒྱར་སྤེལ་བའི་གནས་ཚུལ་ལྟར་ན། སུ་ཝེ་ཌན་གྱི་གྲོས་ཚོགས་བོད་དོན་རྒྱབ་སྐྱོར་ཚོགས་པས་ཡུལ་དེའི་གྲོས་ཚོགས་འཐུས་མི་རྣམས་ཀྱིས་བོད་དོན་ཤེས་རྟོགས་དང་སུ་ཝེ་ཌན་ནང་བོད་དོན་རྒྱབ་སྐྱོར་སྔར་ལྷག་ཡོང་སླད། བོད་དོན་དང་འབྲེལ་བའི་གྲོས་གཞི་གྲོས་འཆར་ཁག་གསུམ་སུ་ཝེ་ཌན་གྲོས་ཚོགས་སུ་ཕུལ་ཡོད་འདུག
སུ་ཝེ་ཌན་གྲོས་ཚོགས་སུ་ཕུལ་བའི་གྲོས་ཆོད་ཨང་ ༡༥༢༩ དང་། ༢༢༠༧། ༢༤༠༢ བཅས་ཀྱི་ནང་། ༧གོང་ས་རྒྱལ་བ་རིན་པོ་ཆེ་མཆོག་གི་ཡང་སྲིད་ཀྱི་གནད་དོན་དང་། སུ་ཝེ་ཌན་གཞུང་གིས་རྒྱ་ནག་གཞུང་གིས་བཙན་གྱིས་བོད་ཕྲུག་རྣམས་བཅའ་སྡོད་སློབ་གྲྭར་བཅུག་པ་དང་། བོད་ཀྱི་སྐུ་ཚབ་ལྷན་བོད་རྒྱའི་གྲོས་མོལ་སླར་གསོ་ཚུད་པའི་རྒྱ་ནག་གཞུང་གིས་བོད་ནང་གི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་གིན་ཡོད་པའི་གནད་དོན། དེ་བཞིན་སུ་ཝེ་ཌན་གཞུང་གིས་ཡུ་རོབ་མཐུན་ཚོགས་ནས་བོད་དོན་དམིགས་བསལ་འབྲེལ་མཐུད་པ་བསྐོ་བར་མཉམ་ལས་དང་རྒྱབ་སྐྱོར་བྱ་རྒྱུ་བཅས་འཁོད་ཡོད་འདུག
འདི་ལོའི་ཕྱི་ཟླ་༩ པའི་མགོ་སྟོད་ལ་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་དང་ལོན་ཌོན་དོན་གཅོད་ཁང་གཉིས་ཀྱི་གོ་སྒྲིག་འོག སུ་ཝེ་ཌན་གྲོས་ཚོགས་འཐུས་མིའི་སྐུ་ཚབ་ཚོགས་ཆུང་གི་སྣེ་འཁྲིད་མཁན་ལྕམ་མར་གྷི་རེ་ཏཱ་ (Margarete Cederfelt) མཆོག་གིས་སུ་ཝེ་ཌན་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་འཐུས་མི་རྣམས་བཞུགས་སྒར་དྷ་སར་འཁྲིད་ཕེབས་ནས། ༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུས་ཡོད་པ་མ་ཟད། ཕྱི་ཟླ་ ༩ ཚེས་ ༢ ཉིན་ཏེ་བོད་མིའི་དམངས་གཙོའི་ཉིན་མོ་ཐེངས་ ༦༣ པའི་གཞུང་འབྲེལ་མཛད་སྒོར་མཉམ་ཞུགས་གནང་ཡོད་པ་རེད།
ཡང་འདི་ལོའི་ཕྱི་ཟླ ༩ ཚེས་ ༣ ཉིན་གངས་སྐྱིད་སྲིད་སྐྱོང་ཚོགས་ཁང་དུ། སུ་ཝེ་ཌན་གྲོས་ཚོགས་འཐུས་མིའི་སྐུ་ཚབ་ཚོགས་ཆུང་གིས་བོད་མིར་གདུང་སེམས་མཉམ་སྐྱེད་མཚོན་ཆེད་གསར་འགོད་གསལ་བསྒྲགས་གནང་སྐབས། སུ་ཝེ་ཌན་གྲོས་ཚོགས་འཐུས་མིའི་སྐུ་ཚབ་ཚོགས་ཆུང་གི་སྣེ་འཁྲིད་མཁན་ལྕམ་སྐུ་མར་གྷི་རེ་ཏཱ་ (Margarete Cederfelt) ལགས་ཀྱིས། ༧གོང་ས་རྒྱལ་བ་རིན་པོ་ཆེ་མཆོག་ནས་ང་ཚོ་ཚང་མ་འགྲོ་བ་མིའི་རིགས་གཅིག་གྱུར་ཡིན་པར་བརྟེན། ང་ཚོ་ཚང་མས་འཛམ་གླིང་ཞི་བདེ་ཡོང་བར་འབད་བརྩོན་བྱ་དགོས་སྐོར་སོགས་ལམ་སྟོན་གནང་སོང་། དེ་གལ་ཆེན་པོ་ཞེ་དྲགས་རེད་འདུག ང་ཚོས་མུ་མཐུད་དུ་བོད་དོན་ཐོག་ལ་རྒྱབ་སྐྱོར་བྱ་རྒྱུ་ཡིན། ཞེས་གསུངས་ཡོད་པ་རེད།
དེ་བཞིན་འདི་ལོའི་ཕྱི་ཟླ་ ༦ ནང་ལོན་ཌོན་སྐུ་ཚབ་དོན་གཅོད་ཁང་དང་སུ་ཝེ་ཌན་གྲོས་ཚོགས་བོད་དོན་རྒྱབ་སྐྱོར་ཚོགས་པ་གཉིས་ཀྱི་གོ་སྒྲིག་འོག སུ་ཝེ་ཌན་གྲོས་ཚོགས་སུ་བོད་ཀྱི་རང་བྱུང་ཁོར་ཡུག་དང་། བོད་རྒྱ་གཉིས་ཀྱི་སེལ་མ་ཐུབ་པའི་དཀའ་རྙོག་ཅེས་པའི་བརྗོད་གཞིའི་ཐོག་གཏམ་བཤད་ཀྱི་ལས་རིམ་ཞིག་ཀྱང་གོ་སྒྲིག་གནང་ཡོད་འདུག
གསར་འགོད་པ། དཔལ་ལྡན།
རྩོམ་སྒྲིག་པ། པདྨ་མཚོ།
