དེ་རིང་༧གོང་ས་རྒྱལ་བ་རིན་པོ་ཆེ་མཆོག་འབྲས་ལྗོངས་སུ་ཞབས་སོར་བདེ་བར་འཁོད།

སྒང་ཏོག་ཏུ་ཡོད་པའི་གསོལ་མགྲོན་ཁང་ཞིག་ཏུ་༧གོང་ས་རྒྱལ་བ་རིན་པོ་ཆེ་མཆོག་ནས་༧སྐུའི་གཅེན་པོ་བཀའ་ཟུར་རྒྱལ་ལོ་དོན་གྲུབ་མཆོག་ལ་མཇལ་ཁ་བསྩལ་གནང་འདུག

པར་འགྲེལ། His Holiness the Dalai Lama getting down from the helicopter on arrival in Gangtok, Sikkim, India on December 11, 2023. Photo by Tenzin Choejor

དེ་རིང་ཕྱི་ཚེས་ ༡༡ ཉིན་གྱི་སྔ་དྲོའི་ཆུ་ཚོད་ ༡༠།༤༥ ཐོག་༧གོང་ས་རྒྱལ་བ་རིན་པོ་ཆེ་མཆོག་རྒྱ་གར་བྱང་ཤར་འབྲས་ལྗོངས་སུ་ཞབས་སོར་བདེ་བར་འཁོད་གནང་མཛད་ཡོད་པ་དང་། སྐབས་དེར་འབྲས་ལྗོངས་མངའ་སྡེའི་སྤྱི་ཁྱབ་བློན་ཆེན་པི་རེམ་སིང་རྟ་མང་ (Prem Singh Tamang) མཆོག་དང་འབྲས་ལྗོངས་མངའ་སྡེའི་གྲོས་ཚོགས་ཀྱི་དགེ་འདུན་པའི་འཐུས་མི་བླ་མ་བསོད་ནམས་ལགས། སྤྱི་ཁྱབ་དྲུང་ཆེ་པཱ་ཌག་ (V.B. Pathak) ལགས་སོགས་ཀྱི་དབུས་གཞུང་འབྲེལ་གནད་ཡོད་མི་སྣ་རྣམས་དང་། འབྲས་ལྗོངས་མངའ་སྡེ་གཞུང་དང་། ས་གནས་གཞུང་དང་གཞུང་འབྲེལ་མ་ཡིན་པའི་ཚོགས་སྡེ་ཁག ས་ཁུལ་དེར་ཡོད་པའི་དགོན་སྡེ་ཁག་གི་སྐུ་ཚབ། དེ་བཞིན་ས་གནས་བོད་མི་དང་ཡུལ་མི་སེར་སྐྱ་ཕོ་མོ་སྟོང་ཕྲག་མང་པོས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད་འདུག

དེ་རིང་སྔ་དྲོ་༧གོང་ས་རྒྱལ་བ་རིན་པོ་ཆེ་མཆོག་རྒྱ་གར་གྱི་རྒྱལ་ས་ལྡི་ལི་ནས་མཁའ་ལམ་བརྒྱུད་ནུབ་བྷེང་གྷལ་གྱི་བྷག་ཌོག་ར་ (Bagdogra) ཡི་གནམ་ཐང་དུ་ཞབས་སོར་འཁོད་རྗེས། ཐད་འཕུར་གནམ་གྲུའི་བརྒྱུད་བྷག་ཌོག་རའི་གནམ་ཐང་ནས་འབྲས་ལྗོངས་ཀྱི་གྲོང་ཁྱེར་སྒང་ཏོག་ (Gangtok) གི་ལུ་པིན་ (Lupin) ཞེས་པའི་དམག་སྒར་གྱི་ཐད་འཕུར་གནམ་ཐང་དུ་ཞབས་སོར་བདེ་བར་འཁོད་ཡོད་འདུག དེ་ནས་ལུ་པིན་ས་ཁུལ་ནས་སྒང་ཏོག་ཏུ་ཡོད་པའི་འབྲས་ལྗོངས་ཀྱི་གསོལ་མགྲོན་ཁང་ (Sikkim Regency) བར་དུ་ཆིབས་སྒྱུར་བསྐྱངས་གནང་མཛད་དེ། སྒང་ཏོག་ཏུ་ཡོད་པའི་གསོལ་མགྲོན་ཁང་དུ་༧གོང་ས་རྒྱལ་བ་རིན་པོ་ཆེ་མཆོག་ལ་༧སྐུའི་གཅེན་པོ་རྒྱལ་ལོ་དོན་གྲུབ་ལགས་དང་། འབྲས་ལྗོངས་མངའ་སྡེའི་སྤྱི་ཁྱབ་བློན་ཆེན་པི་རེམ་སིང་རྟ་མང་ (Prem Singh Tamang) མཆོག་གཉིས་སྣེ་ལེན་ཞུས་རྗེས། ཉིན་རྒྱབ་ཏུ་འབྲས་ལྗོངས་མངའ་སྡེའི་སྲིད་སྐྱོང་ལཀ་ཤི་མན་ (Lakshman Prasad Acharya) ལགས་ཀྱིས་༧མགོན་པོ་གང་ཉིད་མཆོག་ལ་མཇལ་འཕྲད་གནང་ཡོད་འདུག

His Holiness the Dalai Lama’s second eldest brother Honorable Kasur Gyalo Dhondup together with His Holiness on his arrival at his hotel in Gangtok, Sikkim, India on December 11, 2023. Photo by Tenzin Choejor

༧མགོན་པོ་གང་ཉིད་ཀྱི་མཛད་འཆར་ལྟར་ན། སང་ཉིན་ཕྱི་ཚེས་ ༡༢ ཉིན་གྱི་སྔ་དྲོར་འབྲས་ལྗོངས་མངའ་སྡེ་གཞུང་ནས་ཇི་ལྟར་གསོལ་བ་བཏབ་པ་ལྟར། ༧གོང་ས་རྒྱལ་བ་རིན་པོ་ཆེ་མཆོག་ནས་ཉིན་གཅིག་རིང་སྒང་ཏོག་འབྲས་ལྗོངས་དཔལ་འབྱོར་རྩེད་ཐང་དུ་རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མའི་གསུང་ཆོས་བཀའ་དྲིན་བསྩལ་རྒྱུ་དང་། ཟླ་འདིའི་ཕྱི་ཚེས་ ༡༤ ཉིན་གྱི་སྔ་དྲོར་༧གོང་ས་རྒྱལ་བ་རིན་པོ་ཆེ་མཆོག་ནས་ནུབ་བྷང་གྷལ་ས་ལུ་སྒར་དུ་ཡོད་པའི་སྲད་རྒྱུད་གྲྭ་ཚང་དུ་སེམས་བསྐྱེད་ཀྱི་ཆོས་འབྲེལ་བཀའ་དྲིན་བསྩལ་རྒྱུ་ཡིན་འདུག

ཡང་མཛད་འཆར་ལྟར་ན། ཟླ་འདིའི་ཕྱི་ཚེས་ ༢༠ ཉིན་གྱི་སྔ་དྲོར་གནས་མཆོག་རྡོ་རྗེ་གདན་དུ་ཉིན་གསུམ་རིང་དགའ་ལྡན་ཕོ་བྲང་ཡིག་ཚང་དང་། རྒྱལ་སྤྱིའི་ནང་པའི་མཐུན་ཚོགས། དགའ་ལྡན་ཕོ་བྲང་གི་ལྷོ་ཤར་ཨེ་ཤ་ཡའི་འབྲེལ་མཐུད་ལས་ཁུངས་བཅས་ནས། ལེགས་སྦྱར་དང་པཱ་ལིའི་ཆོས་བརྒྱུད་དབར་དུས་མཐུན་གྱི་འབྲེལ་ཟམ། དེང་གི་འཛམ་གླིང་དུ་ནང་ཆོས་ཀྱི་བགྲོ་གླེང་ (Bridging Traditions, Embracing Modernity: A Dialogue on the Buddha’s Teaching in Today’s World) ཞེས་རྒྱལ་སྤྱིའི་བགྲོ་གླེང་ཚོགས་འདུ་ཞིག་གོ་སྒྲིག་ཞུ་གཏན་འཁེལ་བ་ལྟར། ༧གོང་ས་རྒྱལ་བ་རིན་པོ་ཆེ་མཆོག་དབུ་འབྱེད་མཛད་སྒོར་ཆིབས་བསྒྱུར་བཀའ་དྲིན་བསྐྱང་རྒྱུ་དང་། ཕྱི་ཚེས་ ༢༣ ཉིན་གནས་མཆོག་རྡོ་རྗེ་གདན་གྱི་བྱང་ཆུབ་མཆོད་རྟེན་ཆེན་མོའི་རྟེན་གཙོ་ཐུབ་དབང་སྐུ་མདུན་དུ་༧གོང་ས་རྒྱལ་བ་རིན་པོ་ཆེ་མཆོག་དབུ་བཞུགས་ཐོག་རྒྱལ་སྤྱིའི་ནང་པའི་གླེང་སྟེགས་ཀྱི་ཚོགས་ཞུགས་པ་ཡོངས་ནས་འཛམ་གླིང་ཞི་བདེའི་སྨོན་ལམ་འཚོག་རྒྱུ། ཕྱི་ཚེས་ ༢༩ ནས་ ༣༡ བར་ཉིན་གྲངས་གསུམ་རིང་༧གོང་ས་རྒྱལ་བ་རིན་པོ་ཆེ་མཆོག་ནས་གནས་མཆོག་རྡོ་རྗེ་གདན་གྱི་དུས་དབང་གསུང་ཆོས་ར་བར་ཆོས་འབྲེལ་བཀའ་དྲིན་སྩལ་རྒྱུ་དང་། ཕྱི་ལོ་ ༢༠༢༤ ཟླ་ ༡ ཚེས་ ༡ ཉིན་གནས་མཆོག་རྡོ་རྗེ་གདན་གྱི་དུས་འཁོར་དབང་ཆེན་གསུང་ཆོས་ར་བར་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་བཅས་ཡིན་འདུག

གསར་འགོད་པ། བསྟན་འཛིན་ཕུར་བུ།

རྩོམ་སྒྲིག་པ། པདྨ་མཚོ།