སི་ཨེན་ཨེན་གྱི་ལོ་ར་ཧེ་ཡི་དཔྱད་བརྗོད།
ཆོས་རྒྱལ་སྐྱབས་ཀྱིས་དབྱིན་ཡིག་ལས་བསྒྱུར།
ཕྱི་ལོ་༢༠༢༣ ལོར་རྒྱ་ནག་དཔལ་འབྱོར་མྱུར་དུ་ཉམས་གསོ་ཡོང་རྒྱུ་དང་། འཛམ་གླིང་གི་འཕེལ་རྒྱས་ཀྱི་སྒུལ་ཤུགས་རྩོད་མེད་དུ་འགྱུར་བའི་རེ་བ་བཟུང་ཡོད། ཡིན་ནའང་། རྒྱལ་སྤྱིའི་མ་དངུལ་ཐེབས་རྩ་ཚུད་པའི་སྒྲིག་འཛུགས་ཁག་གཅིག་གིས་འཛམ་གླིང་གི་ཐོན་སྐྱེད་ལ་འགོག་རྐྱེན་བཟོ་མཁན་ཞིག་ཏུ་ངོས་འཛིན་བྱས་ཤིང་བཟང་ཕྱོགས་ཀྱི་འགྱུར་བ་མེད་པར་ལུས།
མཁར་དབང་གི་ཉེན་ཁ་དང་། འཛད་སྤྱོད་ཀྱི་ཚད་གཞི་དམའ་བ། གཞོན་སྐྱེས་ལས་མེད་ཀྱི་གྲངས་འབོར་ཆེན་པོ་བཅས་ཡོད་མིན་ལ་མ་ལྟོས་པར་དཔལ་འབྱོར་རིག་པ་བ་ཕལ་མོ་ཆེས་འཛམ་གླིང་གི་དཔལ་འབྱོར་ཆེ་ཤོས་ཨང་གཉིས་པར་གྱུར་བའི་རྒྱལ་ཁབ་རྒྱ་ནག་གི་༢༠༢༣ ལོའི་གཞུང་འབྲེལ་འཕེལ་རྒྱས་ཀྱི་དམིགས་ཚད་བརྒྱ་ཆ་ལྔ་ཟིན་པའི་ཚོད་དཔག་བྱས་ཡོད།
འོན་ཀྱང་། དམིགས་ཚད་འདི་ནི་ཏོག་དབྱིབས་གཉན་རིམས་མ་བྱུང་སྔོན་གྱི་ལོ་བཅུ་ཕྲག་གཅིག་གི་རིང་གི་ལོ་རེའི་ཆ་སྙོམས་ཀྱི་འཕེལ་ཚད་བརྒྱ་ཆ་དྲུག་ལྷག་ལས་དམའ་ཞིང་། ཁོ་ཚོས་ཕྱི་ལོ ༢༠༢༤ ལོ་ནི་དེ་ལས་ཇེ་སྡུག་ཏུ་འགྲོ་བཞིན་པའི་རྣམ་པ་མངོན་གྱི་འདུག་ཅེས་བརྗོད། རྒྱ་ནག་རྒྱལ་ཁབ་ནི་འབྱུང་འགྱུར་གྱི་བགྲང་བྱ་མང་པོའི་རིང་ལ་འཕེལ་རྒྱས་མེད་པར་གནས་སྲིད།
༢༠༢༤ ལོའི་རྒྱ་ནག་དཔལ་འབྱོར་གྱི་དཀའ་ངལ་ནི་རྒྱལ་ནང་ཐོན་སྐྱེད་ཕྱོགས་བསྡོམས་ཀྱི་འཕེལ་ཚད་མིན། དེ་ནི་ཕལ་ཆེར་བརྒྱ་ཆ་བཞི་དང་ཕྱེད་ཀ་ལས་བརྒལ་རྒྱུ་རེད། ཅེས་དབུས་དང་གཡས་ཕྱོགས་ཀྱི་ཉམས་ཞིབ་ལྟེ་གནས་ཁང་སྟེ་ཨ་རིའི་ཁེ་ལས་ཚོགས་པའི་ཉམས་ཞིབ་པ་རྒན་པ་ཌེ་རག་སི་ཁིར་སེ་སི་ཡིས་བཤད་པ་མ་ཟད། དེའི་རྗེས་ཀྱི་ཁ་ཕྱོགས་མར་ཕྱོགས་རྒྱུ་ཉག་གཅིག་ཡིན་པ་དེ་དཀའ་ངལ་རེད་ཅེས་ཟེར།
ཁོང་གིས་ཁྲོམ་རའི་གསར་བརྗེ་ཆེན་པོ་ཞིག་མེད་ན། རྒྱ་ནག་རྒྱལ་ཁབ་དེ་དཔལ་འབྱོར་རིག་པ་སྨྲ་བ་ཚོས་བརྗོད་པའི་ཡོང་འབབ་འབྲིང་པོའི་རྙི་ལ་འཁེལ་བ་ཞེས་བརྗོད་པའི་རྙི་དེའི་ནང་དུ་ཚུད་ཉེན་ཡོད་པར་གསུངས་ཤིང་། འདི་ནི་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱི་དཔལ་འབྱོར་དེ་དབུལ་ཕོངས་ཀྱི་གནས་ལས་མྱུར་དུ་ཐར་ཡང་། ཡོང་འབབ་མཐོན་པོ་ཅན་གྱི་རྒྱལ་ཁབ་ཀྱི་གནས་བབ་ལ་མ་སོན་གོང་ནས་རྙི་དེའི་ནང་དུ་ཚུད་ཀྱི་ཡོད་པ་སྟོན་གྱི་ཡོད།
ཕྱི་ལོ ༡༩༧༨ ལོར་འཛམ་གླིང་མི་མང་ལ་སྒོ་མོ་བསྐྱར་དུ་ཕྱེ་ནས་ལོ་བཅུ་ཕྲག་མང་པོའི་རིང་ལ་རྒྱ་ནག་ནི་འཛམ་གླིང་ཐོག་གི་དཔལ་འབྱོར་ཡར་རྒྱས་འགྲོ་ཚད་མགྱོགས་ཤོས་ཀྱི་རྒྱལ་ཁབ་ཁག་ལས་གཅིག་རེད། ༡༩༩༡ ལོ་ནས་ཕྱི་ལོ ༢༠༡༡ ལོ་བར་དུ་ལོ་རེར་དཔལ་འབྱོར་འཕེལ་ཚད་བརྒྱ་ཆ ༡༠ དང་ཕྱེད་ཀ་རེ་འཕར་ཡོད། རྒྱ་ནག་གི་འགོ་ཁྲིད་ཤི་ཅིན་ཕིང་གི་སྲིད་དབང་དུས་ཡུན་ནང་དཔལ་འབྱོར་འཕེལ་ཚད་དལ་དུ་ཕྱིན་ཡོད་ཀྱང་། ཕྱི་ལོ ༢༠༢༡ ལོ་བར་གྱི་ལོ་བཅུ་ཕྲག་གཅིག་གི་རིང་ལ་ཆ་སྙོམས་ཀྱི་བརྒྱ་ཆ་དྲུག་ཚེག་བདུན་ཙམ་མུ་མཐུད་གནས་ཡོད།
སི་ཁིར་སོ་སི་ཡིས་ཕྱི་ལོ་༢༠༢༠་རྩ་གྲངས་ཀྱི་ཕྱེད་ཕྱི་མའི་ནང་ཡར་རྒྱས་ཀྱི་ཚད་གཞི་དལ་དུ་འགྲོ་གི་རེད་ལ། དེ་ཡང་དཀའ་ངལ་འཕྲད་པའི་ཁང་པ་འཛུགས་སྐྲུན་གྱི་སྡེ་ཚན་ལ་ལེགས་བཅོས་དང་། མི་འབོར་ཉམས་རྒུད་དུ་འགྲོ་བ་གཉིས་ཟུང་འབྲེལ་ཐོག་ཡོང་གི་རེད།
རྒྱལ་སྤྱིའི་མ་དངུལ་ཐེབས་རྩ་ཡང་ཕུགས་ཀྱི་མདུན་ལམ་ཐད་ལ་ཡིད་མུག་པའི་རྣམ་པ་ཞིག་མངོན་ཡོད། ཕྱི་ཟླ་བཅུ་གཅིག་པའི་ནང་རྒྱ་ནག་གི་དཔལ་འབྱོར་ཡར་རྒྱས་འགྲོ་ཚད་དེ་ཕྱི་ལོ ༢༠༢༣ ལོར་བརྒྱ་ཆ ༥.༤ ལ་སླེབས་རྒྱུ་དང་། ཐོན་སྐྱེད་ཞན་པ་དང་མི་འབོར་རྒས་བཞིན་པའི་གནས་སྟངས་འོག་རིམ་བཞིན་མར་ཆག་སྟེ་ཕྱི་ལོ ༢༠༢༨ ལོར་བརྒྱ་ཆ་༣.༥ལ་སླེབས་རྒྱུ་ཡིན་པའི་ཚོད་དཔག་བྱས་ཡོད།
འགྱུར་ལྡོག་ཅི་ཞིག་བྱུང་ཡོད་དམ།
དཀའ་ངལ་མང་དག་ཅིག་གི་ནང་དུ་ལྷུང་བའི་རྒྱ་ནག་གི་དཔལ་འབྱོར་ཞག་མ་གཅིག་གི་རིང་ལ་གནས་སྟངས་འདི་འདྲ་ཞིག་ཏུ་སླེབས་པ་མ་རེད།
སི་ཤེར་སི་ཡིས་བཤད་པ་ལྟར་ན། སྲིད་འཛིན་སྔོན་མ་ཧུ་ཅིན་ཐོ་ཡི་སྲིད་གཞུང་གིས ༢༠༠༩ ལོར་འཛམ་གླིང་དཔལ་འབྱོར་ཉམས་ཉེས་ཚབས་ཆེན་གྱི་སྐབས་སུ་དཔལ་འབྱོར་འཕེལ་རྒྱས་ལ་སྐུལ་འདེད་གཏོང་ཆེད་དངུལ་ལོར་འབོར་ཆེན་བཏང་ཡོད། ཕྱི་ལོ ༢༠༡༢ ལོར་སྲིད་དབང་བཟུང་བའི་ཤི་ཅིན་ཕིང་སྲིད་གཞུང་གིས་བུ་ལོན་གཡར་འཛིན་སྟངས་འཛིན་ཡག་པོ་མ་བྱས་པས། དཔལ་འབྱོར་གྱི་ལམ་ལུགས་དཀའ་རྙོག་གི་ལམ་དུ་ཁྲིད་ཡོད།
རོ་དྷི་ཡམ་ཚོགས་པའི་རྒྱ་ནག་གི་ཁྲོམ་ར་ཞིབ་འཇུག་སྤྱི་ཁྱབ་འགན་འཛིན་ལོ་གྷན་རའེ་ཊི་ཡིས་གོང་གསལ་གནད་དོན་ཐད་མོས་མཐུན་བྱས་ནས་འདི་ལྟར་བརྗོད་ཡོད། རྒྱ་ནག་གི་དཔལ་འབྱོར་འཕེལ་ཚད་དལ་དུ་སོང་བ་ནི་སྒྲོམ་གཞིའི་རང་བཞིན་ཞིག་ཡིན་ཞིང་། འདས་པའི་ལོ་བཅུ་ཕྲག་གཅིག་གི་རིང་སྔོན་མེད་ཀྱི་བུ་ལོན་དང་མ་དངུལ་རྒྱ་སྐྱེད་མཇུག་བསྒྲིལ་བ་ལས་བྱུང་བ་རེད།
ཁོང་གིས་རྒྱལ་ཁབ་ཀྱི་དངུལ་རྩའི་མ་ལག་གིས་འདས་པའི་ལོ་ཤས་རིང་གི་དངུལ་འཛིན་གྱི་འཕེལ་ཚད་དེ་འདྲ་ཞིག་སྐྲུན་ཐུབ་ཀྱི་མ་རེད། དེར་བརྟེན་པེ་ཅིང་ལ་རང་གི་དཔལ་འབྱོར་གྱི་ཁ་ཕྱོགས་སྟངས་འཛིན་བྱེད་པའི་ནུས་པ་སྔོན་ཆད་ལས་ཉུང་དུ་འགྲོ་རྒྱུ་རེད།
གནས་སྟངས་ཇེ་སྡུག་ཏུ་གཏོང་བྱེད་གཅིག་ནི། པེ་ཅིང་གིས་སྒོ་རྒྱ་བསྡམས་པའི་སྲིད་ཇུས་ཏེ་ཏོག་དབྱིབས་གཉན་རིམས་རྩ་མེད་ཀྱི་སྲིད་ཇུས་ལག་བསྟར་དང་། སྒེར་གྱི་ཁེ་ལས་ལ་དྲག་གནོན་བྱེད་རྒྱུ་ཨུ་ཚུགས་མཐར་སྐྱེལ་བྱས་པ་དེ་རེད། དེས་ཡིད་ཆེས་ལ་གནོད་སྐྱོན་ཆེན་པོ་བཏང་བར་མ་ཟད། དཔལ་འབྱོར་གྱི་གསོན་ཤུགས་ཆེ་ཤོས་ཀྱི་ཆ་ཤས་དེར་གཏོར་བརླག་བཏང་བ་རེད།
སྲིད་ཇུས་འདི་དག་གི་མཇུག་འབྲས་ནི་ད་ལོ་(༢༠༢༣)དཔལ་འབྱོར་འཕེལ་རྒྱས་དལ་དུ་སོང་བ་ལས་མཐོང་ཐུབ། ༢༠༢༣ ལོའི་ལོ་གཅིག་གི་དུས་ཡུན་མང་ཆེ་བར་དགོས་མཁོ་ཞན་སྟབས་འཛད་སྤྱོད་ཀྱི་ཚད་གཞི་དམའ་རུ་ཕྱིན་པ་དང་། དངུལ་གྱི་རིན་ཐང་ཆག་གཞིའི་ཉེན་ཁ་ཡོད།
ཁར་དབང་ཚོང་ལས་ཀྱི་ཉེན་ཁ་ཇེ་ཆེར་ཕྱིན་ཡོད། སྡོད་ཁང་ཚོང་ལས་བྲིན་ཚད་ཇེ་ཉུང་དུ་ཕྱིན་པས། གྲོང་གསེབ་ཀྱི་ལྡུམ་ར་(Country Garden)ལྟ་བུའི་འཛུགས་སྐྲུན་ཚོང་ལས་ཁང་ཡག་པོ་རྣམས་ཀྱང་འཐོར་ཞིག་ཏུ་འགྲོ་ལ་ཁད་ཀྱི་གནས་སུ་ཟགས་ཡོད། ཉེན་ཁ་འདི་ཁྲིམས་མཐུན་སྒྲིག་ཁྲིམས་འོག་མེད་པའི་དངུལ་ཁང་ཁག་ཏུ་ཁྱབ་ཅིང་། བུན་འཇལ་བྱེད་དཀའ་བའི་གནས་སུ་གྱར་བས་རྒྱལ་ཡོངས་སུ་ངོ་རྒོལ་གྱི་མེ་ལྕེ་རབ་ཏུ་མཆེད།
ཏོག་དབྱིབས་གཉན་རིམས་ཀྱི་རྐྱེན་པས་ལོ་ངོ་གསུམ་རིང་འགྲོ་གྲོན་ཆེ་རུ་སོང་བ་དང་ས་ཞིང་བཙོང་རྒྱུ་ཇེ་ཉུང་དུ་སོང་བར་བརྟེན། ས་གནས་སྲིད་གཞུང་ཁག་གིས་དཔལ་འབྱོར་གྱི་དཀའ་ངལ་ལ་གདོང་ལེན་བྱེད་བཞིན་ཡོད། གྲོང་ཁྱེར་འགའ་ཤས་ཀྱིས་བུ་ལོན་འཇལ་མི་ཐུབ་པས། གཞི་རྩའི་ཞབས་ཞུའི་རིགས་བཅད་གཏུབ་གཏོང་དགོས་བྱུང་བ་དང་། ཡང་ན་རྒན་རྒོན་ཚོར་སྨན་བཅོས་ཀྱི་ཁེ་ཕན་ཉུང་དུ་གཏོང་དགོས་བྱུང་ཡོད།
གཞོན་སྐྱེས་ཀྱི་ལས་ཤོར་གྲངས་འབོར་ནི་ཧ་ཅང་སྡུག་ཏུ་སོང་བར་བརྟེན་སྲིད་གཞུང་གིས་གྲངས་འབོར་དེ་ཕྱི་བསྒྲགས་བྱེད་མཚམས་བཞག་པ་རེད།
ཕྱི་རྒྱལ་གྱི་ཁེ་ལས་རྣམས་པེ་ཅིང་གི་ལྟ་རྟོག་ཇེ་ཆེར་འགྲོ་བཞིན་པར་དོགས་པ་སྐྱེས་ཏེ་རྒྱལ་ཁབ་ནས་ཕྱིར་འཐེན་བྱེད་བཞིན་འདུག དུས་མཚམས་གསུམ་པའི་ནང་རྒྱ་ནག་ནང་ཕྱི་རྒྱལ་གྱི་ཐད་ཀར་མ་དངུལ་འཛུགས་པའི་ཚད་གཞི་དེ་ ༡༩༩༨ ལོའི་རྗེས་སུ་ཐོག་དང་པོར་ཕྱིར་འཐེན་བྱེད་མཁན་གྱི་གྲངས་ཀ་དེ་མ་འཛུགས་བྱེད་མཁན་གྱི་གྲངས་ཀ་ལས་བརྒལ་ཡོད།
ཕྱི་ཟླ་དགུ་པའི་ནང་ཧྲང་ཧེ་རུ་ཡོད་པའི་ཨ་རིའི་ཚོང་དོན་ལྷན་ཁང་གིས་ཞིབ་འཇུག་བྱས་པ་ལྟར་ན། ཉམས་ཞིབ་ཀྱི་བཅར་འདྲིའི་ནང་མཉམ་ཞུགས་བྱེད་མཁན་བརྒྱ་ཆ་ལྔ་བཅུ་ང་གཉིས་ཀྱིས་མ་གཏོགས་རང་གི་ཚོང་ལས་ཀྱི་མ་འོངས་པའི་ལོ་ལྔའི་མདུན་ལམ་ལ་རེ་བཟང་ཕུགས་བཅོལ་བྱས་མེད་པ་དང་། འདི་ནི་ཞིབ་འཇུག་དེ་ཕྱི་ལོ་༡༩༩༩ ལོ་འགོ་འཛུགས་བྱས་པ་ནས་བཟུང་ཆེས་དམའ་ཤོས་ཀྱི་ཚད་གཞི་དེ་ཡིན།
རྒྱ་ནག་ཉི་ཧོང་ལྟར་ཆགས་ཀྱི་རེད་དམ།
རྒྱ་ནག་ཡར་རྒྱས་འགྲོ་རྒྱུ་ཇེ་དལ་དུ་འགྲོ་བཞིན་པའི་སྐབས་འདིར་དཔལ་འབྱོར་རིག་པ་བ་ཁ་ཤས་ཀྱིས་ཉི་ཧོང་དང་བསྡུར་ཡོད། ཉི་ཧོང་གིས་ཕྱི་ལོ ༡༩༩༠ འགོ་སྟོད་དུ་མཁར་དབང་ཉོ་ཚོང་གི་ལྦུ་བ་རྡོལ་བ་ནས་བཟུང་ལོ་ངོ་བཅུ་ཕྲག་གཉིས་རིང་ཡར་རྒྱས་འགྲོ་རྒྱུ་མཚམས་ཆད་པ་དང་དཔལ་འབྱོར་ཉམས་རྒུད་དུ་ཕྱིན་ཡོད། ཡིན་ནའང་། སི་ཁིར་སོ་སི་ཡིས་མ་མཐའ་ཡང་གནས་ཚུལ་དེ་འདྲ་འཕྲལ་མ་ཉིད་དུ་འབྱུང་གི་མ་རེད་ཟེར།
ཁོང་གིས་ཕྱི་ལོ ༢༠༢༠ རྩ་གྲངས་ནང་གི་ལོ་ལྷག་མ་དེ་དག་དཔལ་འབྱོར་ཉམས་རྒུད་ཀྱི་བགྲང་བྱ་གཅིག་ལྟར་ཆགས་ཀྱི་མ་རེད། རྒྱ་ནག་གི་རྒྱལ་ནང་ཐོན་སྐྱེད་ཕྱོགས་བསྡོམས་དེ་ཨང་ཀི་ཀླད་ཀོར་ལས་བརྒལ་རྒྱུ་ཡིན་པར་གསུངས།
ཕུགས་རྒྱང་རིང་པོའི་ཆ་ནས་བཤད་ན་དཔལ་འབྱོར་གྱི་དཀའ་ངལ་ཆེ་ཤོས་ནི་མི་འབོར་གྱི་གྲངས་འབོར་ཡིན་ངེས། ན་ནིང་རྒྱ་ནག་གི་མི་འབོར་ཐེར་འབུམ་༡.༤༡༡ ལ་ལྷུང་ཡོད་ལ། འདི་ནི་ཕྱི་ལོ ༡༩༦༡ ལོ་ནས་བཟུང་མི་འབོར་ཉུང་འཕྲི་ཐེངས་དང་པོ་དེ་ཡིན།
བུད་མེད་ཅིག་ལ་མི་ཚེ་ཧྲིལ་པོར་ཕྲུ་གུ་སྐྱེ་བའི་ཆ་སྙོམས་གྲངས་ཀ་ཡང་ལོ་གཉིས་ཀྱི་གོང་དུ་གྲངས་ཀ ༡.༣༠ ཡོད་པ་དེ་ནས་ན་ནིང་གྲངས་ཀ ༡.༠༩ ལ་ལྷུང་ཡོད། དེ་ནི་རྒྱ་ནག་གི་ཕྲུ་གུ་སྐྱེ་བའི་གྲངས་ཀ་དེ་ད་ཆ་ལོ་ན་མཐོ་བའི་མི་འབོར་ཅན་གྱི་རྒྱལ་ཁབ་ཅིག་ཏུ་གྲགས་པའི་ཉི་ཧོང་གི་གྲངས་ཚད་ལས་ཀྱང་དམའ་བ་མཚོན་གྱི་ཡོད།
མི་འབོར་གྱིས་དཔལ་འབྱོར་འཕེལ་རྒྱས་ཀྱི་ནུས་པར་ཤུགས་རྐྱེན་ཆེན་པོ་ཞིག་ཐེབས་ཐུབ། ངལ་རྩོལ་གྱི་ནུས་པ་ཉུང་དུ་ཕྱིན་པ་དང་འཕྲོད་བསྟེན་དང་སྤྱི་ཚོགས་ཀྱི་འགྲོ་གྲོན་ཆེ་རུ་ཕྱིན་པ་དེས་དཔལ་འབྱོར་གྱི་གྱོང་གུད་ཆེ་རུ་གཏོང་བ་དང་བུ་ལོན་འབོར་ཆེན་འཇལ་དགོས་པའི་རྐྱེན་བྱེད་སྲིད།
ལས་མི་ཉུང་དུ་ཕྱིན་ན་གསོག་དངུལ་གྱི་གྲངས་ཀ་ཇེ་ཉུང་དུ་འགྲོ་སྲིད་ལ། དེ་ལ་བརྟེན་ནས་སྐྱེད་ཀའི་ཚད་གཞི་མཐོ་རུ་འགྲོ་བ་དང་མ་འཛུགས་ཀྱི་ཚད་གཞི་ཇེ་ཉུང་དུ་འགྲོ་སྲིད། དཔེར་ན། མ་འོངས་པར་སྡོད་ཁང་ཉོ་མཁན་ཇེ་ཉུང་དུ་འགྲོ་སྲིད།
སི་ཁིར་སོ་སི་ཡིས་བཤད་པ་ལྟར་ན། ཕྱི་ལོ་༢༠༤༠ ཞེ་གྲངས་ནང་མི་འབོར་ཇེ་ཉུང་དུ་ཕྱིན་པས་ཕུང་གསོག་འཕེལ་རྒྱས་ཡོང་མི་སྲིད་པ་ཆགས་རྒྱུ་ཡིན་པ་དང་། སྲིད་ཇུས་ལ་འགྱུར་བ་ཤུགས་ཆེན་མ་བཏང་བར་རྒྱ་ནག་ལ་ཕྱིར་ལྡོག་གི་གོ་སྐབས་མེད་པ་མ་ཟད། ཕྱི་ལོ ༢༠༣༠ སོ་གྲངས་ནང་གི་གནས་སྟངས་དེ་ཕྱི་ལོ ༢༠༢༠ རྩ་གྲངས་ལས་སྡུག་པ་ཆགས་རྒྱུ་ཡིན་པར་བཤད།
ཞི་ཅིན་ཕིང་གིས་ཁ་ཕྱོགས་གསར་པ་ཞིག་བསྐྲུན་ཐུབ་བམ།
ཟླ་བ་འདིའི་ནང་རྒྱ་ནག་གཞུང་གི་འགོ་ཁྲིད་རྣམས་ལྷན་འཛོམས་ཀྱིས་ལོ་རྗེས་མའི་དཔལ་འབྱོར་དམིགས་ཡུལ་དང་སྲིད་ཇུས་སྐོར་གྲོས་བསྡུར་བྱས་པ་དང་། ཁོ་ཚོས་གཞུང་གི་སྲིད་ཇུས་དང་དངུལ་སྒོར་དང་འབྲེལ་བའི་རོགས་སྐྱོར་ཤུགས་ཆེར་གཏོང་རྒྱུ་ཡིན་པའི་བརྡ་བསྟན་པ་རེད། ཐ་ན་རྒྱ་ནག་གཞུང་གི་འགོ་ཁྲིད་ཚོས་ཀྱང་དཔལ་འབྱོར་གྱི་དྲིལ་བསྒྲགས་དང་མང་ཚོགས་ལ་ལམ་སྟོན་ཤུགས་ཆེར་གཏོང་རྒྱུའི་ཁས་ལེན་བྱས་ཡོད།
རྒྱ་ནག་གཞུང་གིས་ལོ་རྗེས་མའི་དཔལ་འབྱོར་གྱི་དམིགས་འབེན་སླར་ཡང་བརྒྱ་ཆ་ལྔ་ཡས་མས་ཤིག་ལ་འཛིན་སྲིད་པའི་སྐོར་རྒྱ་ནག་གཞུང་གིས་གསར་འགྱུར་བརྒྱུད་ལམ་ཁག་ནས་བཤད་འདུག འདི་ནི་རང་དབང་སྡེ་ཁག་ཚོའི་སྔོན་དཔག་དང་བསྡུར་ན་དམིགས་ཡུལ་ཆེན་པོ་ཞིག་ཏུ་མཐོང་གི་འདུག གཞུང་འབྲེལ་གྱི་དམིགས་འབེན་དེ་རྒྱ་ནག་གཞུང་གིས་ལོ་རེའི་མི་དམངས་འཐུས་ཚོགས་སྐབས་ཏེ་ཕྱི་ཟླ་གསུམ་པའི་ནང་གསལ་བསྒྲགས་བྱེད་ཀྱི་རེད། ཡིན་ནའང་། གོམ་པ་སྤོ་ཚུལ་དེས་སྒྲོམ་གཞིའི་དཀའ་ངལ་རྣམས་སེལ་བར་ཕལ་ཆེར་ཕན་ཐོགས་མེད།
མ་རྩ་རིང་ལུགས་ཀྱི་དཔལ་འབྱོར་ཞེས་པའི་ཉམས་ཞིབ་ཁང་གི་རྒྱ་ནག་དཔལ་འབྱོར་གྱི་ཉམས་ཞིབ་འགན་འཛིན་ཇུ་ལི་ཡན་ཨེ་ཝན་སི་ཕི་རི་ཆརྜ་ཡིས་བཤད་པ་ལྟར་ན།
སྲིད་ཇུས་འདིང་མཁན་ཚོས་དཔལ་འབྱོར་ལ་སྐུལ་སློང་ཅུང་ཙམ་དང་མི་མང་གི་བསམ་བློའི་འཁྱེར་སོ་ལ་འགྱུར་བ་ཐེབས་ན། དཔལ་འབྱོར་སླར་ཡང་འཕེལ་རྒྱས་ཀྱི་ལམ་བུར་ཞུགས་ཐུབ་རྒྱུ་ཡིན་པར་ཡིད་ཆེས་བྱེད་ཀྱི་ཡོད་པ་དང་། ད་དུང་གཞུང་ཞབས་པ་ཚོས་ཀྱང་མངོན་འདོད་ཆེ་བའི་འཕེལ་རྒྱས་ཀྱི་དམིགས་ཡུལ་ཞིག་བཟུང་ན་ཡིད་ཆེས་གོང་འཕེལ་དུ་འགྲོ་བར་ཕན་ཐོགས་ཡོང་བའི་རེ་བ་བྱེད་ཀྱི་ཡོད་པར་སྣང་ཞེས་གསུངས།
གནས་ཚུལ་འདི་ལ་བདེན་པའི་ཆ་ཅུང་ཙམ་ཡོད་ནའང་། ང་ཚོས་བསམ་པར་རྒྱ་ནག་དཔོན་རིགས་ཚོས་རྒྱ་ནག་གི་དཔལ་འབྱོར་འཕེལ་ཚད་དལ་དུ་ཕྱིན་པ་ནི་སྒྲོམ་གཞིའི་རང་བཞིན་ཞིག་ཡིན་པ་དང་། ལས་སླ་པོར་ཟློག་ཐབས་མེད་པ་ཞིག་ཡིན་པའི་ཚད་གཞིའི་ཐད་ཚོད་དཔག་བྱེད་རྒྱུ་དམའ་དྲགས་འདུག་བསམ་གྱི་ཡོད།
དཔལ་འབྱོར་འཕེལ་ཚད་དལ་དུ་སོང་བ་མང་ཆེ་བ་ནི་ཐོན་སྐྱེད་དང་ཡོང་འབབ་འཕེལ་རྒྱས་ཀྱི་སྒྲོམ་གཞིའི་ཉམས་རྒུད་ཅིག་ཡིན་པ་ལས། དགོས་མཁོ་སྐོང་བར་སྐུལ་སློང་ངམ་ཡིད་ཆེས་གོང་འཕེལ་གཏོང་བའི་ཐབས་ལམ་གཞན་བརྒྱུད་ནས་གདོང་ལེན་བྱེད་རུང་བའི་འཁོར་རྒྱུག་གི་ཞན་ཆ་ཞིག་མིན་པར་གསུངས།
གལ་སྲིད་པེ་ཅིང་གིས་དངུལ་བུན་གཏོང་བའི་ཐབས་ལམ་རྙིང་པ་དེ་བེད་སྤྱོད་བྱས་ན། དེས་ད་དུང་ཕྱི་ལོ ༢༠༢༤ ལོའི་དཔལ་འབྱོར་འཕེལ་རྒྱས་ལ་སྐུལ་འདེད་གཏོང་ཐུབ། འོན་ཀྱང་། སི་ཁིར་སོ་སི་ཡིས་བཤད་པ་ལྟར་ན། དེ་ནི་དཔལ་འབྱོར་གྱི་ན་ཟུག་འཇོམས་བྱེད་ཙམ་ལས་ནད་གཞི་གསོ་བྱེད་ཅིག་མིན།
མ་ཡིག་གི་འབྲེལ་ཐག https://edition.cnn.com/2023/12/27/economy/china-economy-challenges-2024-intl-hnk/index.html
