སྐབས་བཅོ་ལྔ་པའི་སྤྱི་འཐུས་འཇིགས་མེད་འབྱུང་གནས་ལགས་ལྡི་ལིའི་སྐུ་ཚབ་དོན་གཅོད་དུ་བསྐོ་གཞག་གནང་འདུག
དེ་རིང་བོད་མིའི་སྒྲིག་འཛུགས་ཀྱི་གསར་འགྱུར་བརྒྱུད་ལམ་དུ་གནས་ཚུལ་ཐོན་པ་ལྟར་ན། ལས་བྱེད་འདེམས་བསྐོ་ལྷན་ཁང་གི་སྒྲིག་གཞི་དོན་ཚན་བཅུ་དགུ་པའི་ནང་གསེས་ ༡ པོའི་དགོངས་དོན། ཕྱི་རྒྱལ་སྐུ་ཚབ་དོན་གཅོད་རྣམས་སྲིད་སྐྱོང་དང་། བཀའ་བློན་ཚང་འཛོམས་ཞིབ་གྲོས་དྲག་འདེམས་ཀྱིས་བཀའ་ཤག་ནས་བསྐོ་འཛུགས་གནང་བར་༧གོང་ས་༧སྐྱབས་མགོན་ཆེན་པོ་མཆོག་གི་སྐུ་ཚབ་ཀྱི་མཚན་གནས་བསྩལ་རྒྱུ། ཞེས་གསལ་བ་ལྟར། སྐབས་བཅོ་ལྔ་པའི་དབུས་གཙང་སྤྱི་འཐུས་འཇིགས་མེད་འབྱུང་གནས་ལགས་ལྡི་ལིའི་སྐུ་ཚབ་དོན་གཅོད་དུ་བསྐོ་གཞག་གནང་འདུག
སྤྱི་ཟུར་འཇིགས་མེད་འབྱུང་གནས་ལགས་ནི་ཕྱི་ལོ་ ༡༩༦༢ ལོར་བོད་ནས་བྲོས་བྱོལ་གྱིས་ལ་དྭགས་སུ་འབྱོར་རྗེས་རང་གཞུང་ནས་སློབ་གྲྭར་འཇུག་བཞེས་ཀྱིས་མ་སུ་རི་དང་པན་ཇི་མ་རི་སློབ་གྲྭར་ཕེབས་ཡོད་པ་དང་། ༡༩༧༡ ལོར་སྦེལ་ཀོབ་བདེ་སླར་གཞིས་ཆགས་སུ་འབྱོར་ནས་གཞིས་གྲོང་གི་སྤྱི་མི། རང་བདེན་ཚོགས་ཆུང་དང་། མཉམ་འཐུས། ས་གནས་གཞོན་ནུའི་ཚོགས་གཙོ་བགྲེས་གཞོན། ཉིན་སློབ་ཀྱི་དགེ་རྒན། དགེ་ལུགས་མ་དགོན་གྱི་ལས་དྲུང། མཉམ་འབྲེལ་འཕྲུལ་རྨོས་འགན་འཛིན་བཅས་ཀྱི་ལས་འཁུར་ཞུས་ཤིང། ༡༩༨༣ ལོ་ནས་ཐོག་མར་ཀོ་ལི་གྷལ་མཉམ་འབྲེལ་དྲུང་ཆེ་དང། རིམ་པའི་ཧོན་སུར་ས་གནས་མགོ་འཛིན། སྦེང་ལོར་ལྷོ་ཕྱོགས་གཞིས་སྤྱི། ༡༩༩༥ ནས་ ༢༠༠༨ ཟླ་ ༨ ཚེས་ ༣༡ བར་ནང་སྲིད་ལས་ཁུངས་ཀྱི་དྲུང་ཆེ་ཆུང་དང་རྩིས་ཞིབ་དྲུང་ཆེ་བཅས་ཀྱི་ལས་འཁུར་ཞུས་མྱོང་ཡོད་འདུག
དེ་བཞིན་སྐབས་བཅོ་ལྔ་པའི་དབུས་གཙང་གི་སྤྱི་འཐུས་སུ་འདེམས་ཐོན་བྱུང་བ་སོགས་མི་ལོ་ ༣༧ རིང་རང་རེའི་སྤྱི་ཚོགས་ཁྲོད་ཞབས་འདེགས་ཞུས་ཡོད་འདུག་ལ། ལྷག་པར་དུས་ཡུན་དེའི་རིང་ཨི་ཛི་རེལ་ (Isreal) དང་རྡེ་ར་ལྡུན་ (Dehradun) མཉམ་འབྲེལ་སྦྱོང་བརྡར་ཁང་དུ་མཉམ་འབྲེལ་འཛིན་སྐྱོང་གི་དམིགས་བཀར་སྦྱོང་བརྡར་དང་། མ་སུ་རི་ LBSA ལྡི་ལི་དང་ཧི་མ་ཅལ་གཞུང་གི་རྒྱ་གར་མཐོ་རིམ་ལས་བྱེད་སྦྱོང་བརྡར་ཁང་བཅས་ཀྱི་ནང་མགོ་ཁྲིད་དང་འཛིན་སྐྱོང་གི་སྦྱོང་བརྡར་ནང་མཉམ་ཞུགས་གནང་ཡོད་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
