༧གོང་ས་རྒྱལ་བ་རིན་པོ་ཆེ་མཆོག་གིས་སྐུ་ཞབས་ཨེ་ལེག་ཛེན་ཊིར་ལགས་ཧྥིན་ལེན་ཌིའི་སྲིད་འཛིན་དུ་འདེམས་ཐོན་བྱུང་བར་འཚམས་འདྲི་མཛད།
ཕྱི་ལོ་ ༢༠༢༤ ལོའི་ཧྥིན་ལེན་ཌི་རྒྱལ་ཁབ་ཀྱི་སྲིད་འཛིན་གྱི་འོས་བསྡུ་ཆེན་པོའི་རྒྱལ་ཁ་དེ་སྐུ་ཞབས་ཨེ་ལེག་ཛེན་ཊིར་(Alexander Stubb) ལགས་སུ་ཐོབ་ཡོད་པ་ལྟར། ཁ་སང་རེས་གཟའ་མིག་དམར་ཉིན་༧གོང་ས་རྒྱལ་བ་རིན་པོ་ཆེ་མཆོག་གིས་ཁོང་གི་མཚན་ཐོག་ཏུ་འཚམས་འདྲིའི་གསུང་འཕྲིན་ཞིག་སྩལ་ཏེ། ཁོང་གི་མ་འོངས་པའི་ལས་དོན་ལམ་ལྷོངས་ཡོང་བར་ཐུགས་སྨོན་མཛད་འདུག
༧གོང་ས་རྒྱལ་བ་རིན་པོ་ཆེ་མཆོག་གི་གསུང་འཕྲིན་ནང་། འདས་པའི་ལོ་ཟླའི་ནང་ངོས་རང་ཁྱེད་ཀྱི་ཆེས་མཛེས་སྡུག་ལྡན་པའི་ཧྥིན་ལེན་ཌི་རྒྱལ་ཁབ་ཏུ་ཐེངས་འགར་བསྐྱོད་མྱོང་ཡོད་ཅིང་། ངོས་རང་གིས་བྱམས་སྙིང་རྗེ་གོང་མཐོར་དང་། གཅིག་གྱུར་གྱི་འདུ་ཤེས་ཡར་སྐྱེད། དེ་བཞིན་ཆོས་ལུགས་མཐུན་འབྲེལ་གྱི་སྐོར་བཤད་པར། ཧྥིན་ལེན་ཌི་མི་མང་གིས་དོ་དབྱིངས་ཆེན་པོ་གནང་བར་ཡི་རངས་བསྔགས་བརྗོད་བྱེད་ཀྱི་ཡོད། ཅེས་གསུངས་འདུག
ཡང་གསུང་འཕྲིན་ནང་། དེང་གི་ཆར་འཛམ་གླིང་གི་ས་ཁུལ་མང་པོ་ཞིག་གི་མི་མང་རྣམས་ཀྱིས་དྲག་སྤྱོད་ཀྱི་དབང་གིས་དཀའ་སྡུག་མྱོང་མུས་ཡིན་པ་ནི་ཆེས་ཡིད་སེམས་སྨྲེང་དགོས་པ་ཞིག་ཡིན། རྒྱལ་སྤྱིའི་ཚོགས་སྡེ་ཁག་གིས་གྲོས་མོལ་དང་འགྲིག་མཐུན་བརྒྱུད་དྲག་སྤྱོད་དང་གོ་མཚོན་རིགས་མེད་པར་བཟོ་ཐབས་བྱས་ནས། ཞི་བདེ་དང་བྱམས་བརྩེ་ལྡན་པའི་འཛམ་གླིང་ཞིག་བསྐྲུན་པར་ཞབས་འདེགས་གནང་རྒྱུ་ནི་ངོས་ཀྱི་རེ་བ་ཉག་ཅིག་ཡིན། ཞེས་དང་། ངོས་ཀྱིས་ཁྱེད་ཀྱི་མདུན་དུ་ལྷག་པའི་འགྲན་རྩོད་སོགས་ལས་རྣམ་པར་རྒྱལ་བ་དང་། ཧྥིན་ལེན་ཌི་མི་མང་གི་རེ་བ་དང་མངོན་འདོད་འགྲུབ་ཐུབ་པའི་སྨོན་འདུན་ཞུ་ཡི་ཡོད། ཅེས་གསུངས་འདུག
ད་ལྟ་རང་ལོ་ ༥༦ ཡིན་པའི་སྐུ་ཞབས་ཨེ་ལེག་ཛེན་ཊིར་(Alexander Stubb) ལགས་ནི་ཕྱི་ལོ ༡༩༦༨ ལོར་ཧྥིན་ལེན་ཌིའི་རྒྱལ་ས་ཧལ་སན་ཀི་རུ་སྐྱེས། ཁོང་ནི་ཡུ་རོབ་མཐུན་ཚོགས་ཀྱི་ཕྱི་འབྲེལ་ལས་དོན་གྱི་ཆེད་མཁས་པ་ཞིག་ཡིན་ཞིང་། ཕྱི་ལོ ༢༠༠༤ ལོར་ཡུ་རོབ་གྲོས་ཚོགས་ཀྱི་ཚོགས་མིར་བདམས། ཕྱི་ལོ ༢༠༠༨ ལོར་ཧྥིན་ལེན་ཌི་རྒྱལ་ཁབ་ཀྱི་ཕྱི་འབྲེལ་བློན་ཆེན་དང་། ཕྱི་ལོ་ ༢༠༡༤ ནས་ ༢༠༡༥ བར་སྲིད་བློན་དུ་འདེམས་ཐོན་བྱུང་།
གསར་འགོད་པ། དཔལ་ལྡན།
