ཨེ་ཤ་ཡའི་གངས་ཤུད་འགྲན་བསྡུར་ཁྲོད་བོད་ཀྱི་ལུས་རྩལ་པར་གསེར་གྱི་རྟགས་མ་བཞི་དང་། དངུལ་གྱི་རྟགས་མ་གསུམ། ཟངས་ཀྱི་རྟགས་མ་གཉིས་ཐོབ་ཡོད་འདུག
ཟླ་འདིའི་ཕྱི་ཚེས་ ༢ ནས་ ༦ བར་ཉིན་གྲངས་ལྔའི་རིང་རྒྱ་ནག་ཅིས་ལིས་སུང་ཧྭ་མཚེའུ་རུ། ཕྱི་ལོ་ ༢༠༢༤ ལོའི་ཨེ་ཤ་ཡའི་གངས་ཤུད་ལུས་རྩལ་འགྲན་བསྡུར་འཚོགས་ཡོད་ཅིང་། ཐེངས་འདིའི་འགྲན་བསྡུར་ནང་ཉི་ཧོང་དང་། ལྷོ་ཀོ་རི་ཡ། ཐའེ་ལན་ཌི། རྒྱ་ནག་བཅས་ཀྱི་རྒྱལ་ཁབ་བཞིའི་ལུས་རྩལ་པ་ ༦༦ མཉམ་ཞུགས་བྱས་ཏེ་གངས་ཤུད་འགྲན་བསྡུར་རིམ་པ་བདུན་བྱས་ཡོད་པའི་ཁྲོད། བོད་ཀྱི་ལུས་རྩལ་བ་ཚེ་བརྟན་གཡུ་སྒྲོན་ལགས་ལ་བུ་མོའི་ལམ་ཐག་ཐུང་བ་དང་། གྱེན་བསྡུར་མྱུར་ཚད། མི་སྒེར་གྱི་རྒྱང་བགྲོད། མཉམ་བསྲེས་མཐུད་རྒྱུག་གི་འགྲན་བསྡུར་བཅས་ལ་གསེར་གྱི་རྟགས་མ་བཞི་ཐོབ་ཡོད་འདུག
ཡང་བོད་ཀྱི་ལུས་རྩལ་བ་བཀྲ་ཤིས་བསྟན་སྒྲོལ་ལགས་ལ་ཐེངས་འདིའི་བུད་མེད་ཀྱི་གྱེན་བསྡུར་མྱུར་ཚད་འགྲན་བསྡུར་ཁྲོད་དངུལ་གྱི་རྟགས་མ་ཐོབ་ཡོད་ཅིང་། མི་སྒེར་གྱི་རྒྱང་བགྲོད་འགྲན་བསྡུར་ནང་ཟངས་ཀྱི་རྟགས་མ་དང་། མཉམ་བསྲེས་མཐུད་རྒྱུག་གི་ཨང་བཞི་པ་བཅས་ཐོབ་ཡོད་འདུག། གཞན་ལུས་རྩལ་བ་བུ་མོ་ཨ་ཉི་ལགས་ལ་མི་སྒེར་གྱི་རྒྱང་བགྲོད་འགྲན་བསྡུར་གྱི་དངུལ་གྱི་རྟགས་མ་དང་། གྱེན་བསྡུར་མྱུར་ཚད་འགྲན་བསྡུར་གྱི་ཨང་བཞི་པ་ཐོབ་འདུག དེ་བཞིན་ཐེངས་འདིའི་སྐྱེས་པའི་གངས་ཤུད་འགྲན་བསྡུར་ཁྲོད་བོད་ཀྱི་ལུས་རྩལ་བ་ཀུན་བཟང་རྣམ་རྒྱལ་ལགས་ལ་མི་སྒེར་གྱི་རྒྱང་བགྲོད་གྱི་ཨང་གསུམ་པ་ཐོབ་པ་སོགས་བོད་ཀྱི་ལུས་རྩལ་བ་ཁག་ཅིག་ལ་ཨང་རིམ་ཐོབ་ཡོད་འདུག
ཕྱི་ལོ་ ༢༠༢༣ ལོར་ཡུ་རོབ་རྒྱལ་ཁབ་ཨི་ཊ་ལི་རུ་འཚོགས་པའི་འཛམ་གླིང་བུམ་པ་རྟགས་མའི་ན་གཞོན་གངས་ཤུད་འགྲན་བསྡུར་ཁྲོད། བོད་རིགས་རྩེད་འགྲན་པ་ཚེ་བརྟན་གཡུ་སྒྲོན་ལགས་ལ་ལོ་ ༡༨ མན་གྱི་བུ་མོའི་རྩེད་འགྲན་ནང་ཨང་དང་པོ་ཐོབ་ཡོད་པ་དང་། ལོ་ ༡༦ མན་གྱི་སྐྱེས་པའི་རྩེད་འགྲན་ནང་བོད་རིགས་རྩེད་འགྲན་པ་ཀུན་བཟང་རྣམ་རྒྱལ་ལགས་ལ་གསེར་གྱི་རྟགས་མ་ཐོབ་ཡོད་འདུག
ཕྱི་ལོ་ ༢༠༢༡ ལོར་རྒྱ་ནག་གི་རི་ཁུལ་རྒྱང་རྒྱུག་འགྲན་སྡུར་བསྡུས་ཏེ་སྤྱི་ལེ་ ༤༢ དང་སྤྱི་ལེ་ ༢༡ གི་མི་སྒེར་གྱི་ལུས་རྩལ་འགྲན་སྡུར་ཁྲོད་བུ་མོ་ཚེ་བརྟན་གཡུ་སྒྲོན་ལགས་ཀྱིས་རྒྱང་རྒྱུག་གི་ཨང་དང་པོ་བླངས།
གངས་ཤུད་རྩེད་འགྲན་ནི་ཕྱི་ལོ་ ༢༠༢༡ ལོའི་ཟླ་ ༧ པར་ཨོ་རྩལ་ལྷན་ཚོགས་ཀྱིས་གཏན་འབེབ་བྱས་ཤིང་། ཕྱི་ལོ་ ༢༠༢༦ ལོའི་དགུན་ཁའི་ཨོ་རྩལ་འགྲན་ཚོགས་ཀྱི་ལས་གཞི་གསར་པ་ཞིག་ཡིན་འདུག ཉེ་ཆར་རྒྱ་ནག་རྒྱལ་ཡོངས་སྐབས་བཅུ་བཞི་པའི་དགུན་དུས་ལུས་རྩལ་འགྲན་ཚོགས་ཀྱི་གངས་ཤུད་འགྲན་བསྡུར་ཁྲོད། བོད་ཀྱི་ལུས་རྩལ་བར་གསེར་གྱི་གཟེངས་རྟགས་བཞི་དང་དངུལ་གྱི་རྟགས་མ་གཅིག་ཐོབ་པའི་ནང་། ཕོ་མོ་མཉམ་བསྲེས་ཀྱི་རྟིང་རྩོད་གངས་ཤུད་འགྲན་བསྡུར་ཁྲོད་བོད་ཀྱི་ལུས་རྩལ་བ་བཀྲ་ཤིས་བསྟན་སྒྲོལ་དང་ཀུན་བཟང་རྣམ་རྒྱལ། གཡུ་སྒྲོན་ལྷ་མོ་བཅས་ལ་གསེར་གྱི་གཟེངས་རྟགས་ཐོབ་ཡོད་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
