རྒྱ་ནག་གཞུང་གིས་སྡེ་དགེ་དབོན་པོ་སྟོད་ཁུལ་ནས་བོད་མི་བཅུ་ལྷག་འཛིན་བཟུང་བཙན་ཁྲིད་བྱས་ནས་གར་སོང་ཆ་མེད་དུ་གྱུར་ཡོད་པ་རེད།
རྒྱ་ནག་གཞུང་གིས་འབྲི་ཆུར་ཆུ་རགས་གསར་རྒྱག་དང་ཁུལ་དེའི་མི་མང་རྣམས་བཙན་གྱིས་ས་གནས་གཞན་དུ་གནས་སྤོར་བྱ་དགོས་པའི་བཙན་བཀའ་བཏང་དང་གཏོང་གིན་ཡོད་པ་ལྟར། འདི་ལོའི་ཕྱི་ཟླ་ ༢ ཚེས་ ༡༤ ཉིན་སྡེ་དགེ་ཁུལ་གྱི་བོད་མི་མང་དག་ཅིག་གིས་ཡིག་ངག་གཉིས་ཀྱི་ཐོག་ནས། རྒྱ་ནག་གཞུང་གིས་ཆུ་གློག་གི་ལས་གཞི་དང་བོད་མི་གནས་སྤོར་མཚམས་འཇོག་བྱེད་དགོས་པའི་རེ་སྐུལ་ཞུས་ཡོད་ཀྱང་། ཟླ་སྔོན་མར་རྒྱ་གཞུང་ཉེན་རྟོག་པས་བོད་མི་རིག་འཛིན་དང་། ཐུབ་ཕུར། བདེ་ཆེན་སྒྲོལ་མ། དབྱངས་སྐྱིད། ཚེ་སྒྲུབ་སོགས་ཚུད་པའི་བོད་མི་བཅུ་ལྷག་འཛིན་བཟུང་བཙན་ཁྲིད་བྱས་ནས། ད་ལྟའང་ཁོང་ཅག་གི་དངོས་ཡོད་གནས་སྟངས་གོ་ཐོས་ཅི་ཡང་མེད་པ་མ་ཟད། བོད་མི་ཁག་ཅིག་གི་མིང་སོགས་ཀྱང་ཤེས་རྟོགས་ཐུབ་ཀྱི་མི་འདུག
བོད་ནང་གི་འབྲེལ་ཡོད་ཅིག་གིས་འདི་གའི་གསར་འགོད་པར། རྒྱ་གཞུང་ཉེན་རྟོག་པས་བོད་མི་དེ་དག་འཛིན་བཟུང་བཙན་ཁྲིད་བྱས་རྗེས། ད་ལྟའང་ཁོང་ཅག་གི་གནས་སྟངས་ཅི་ཡང་གོ་ཐོས་མེད་ཅིང་། གར་སོང་ཆ་མེད་དུ་གྱུར་བའི་བོད་མི་དེ་དག་ཕལ་ཆེ་བ་སློབ་ཆེན་སློབ་མ་རྐྱང་ཡིན་པ་རེད། ཉེ་ལམ་རྒྱ་ནག་གཞུང་གིས་དབོན་པོ་སྟོད་ཁུལ་གྱི་ས་གནས་མང་དག་ཅིག་ཏུ་བོད་མིའི་འགྲིམ་འགྲུལ་ལ་དམ་དྲག་དང་སྔོག་གཤེར་བྱེད་ཀྱི་ཡོད་པ་མ་ཟད། ཟླ་རྗེས་མར་ཁུལ་དེར་རྒྱ་ནག་གཞུང་གི་ལས་བྱེད་མང་དག་ཅིག་ཆེད་མངགས་གཏོང་རྒྱུ་ཡིན་ལུགས་སོགས་འགྲེལ་བརྗོད་གནང་བྱུང་།
ཡང་འབྲེལ་ཡོད་བོད་མི་གཞན་ཞིག་གིས། ཉེ་ལམ་རྒྱ་ནག་གཞུང་གིས་སྡེ་དགེ་རྫོང་ཁོངས་སུ་དམག་མི་མང་པོ་ཞིག་འགྲེམས་འཇོག་དང་། ཁྲོམ་དང་ཡུལ་འཚོ་སོགས་སུའང་དམག་མིའི་སྡོད་གུར་རྒྱབ་ནས་སྐོར་གཡེང་དང་ལྟ་རྟོག་བྱེད་ཀྱི་ཡོད་པ་མ་ཟད། རྒྱ་ནག་གཞུང་གིས་ཟླ་གཅིག་ཙམ་གྱི་རིང་ཁུལ་དེར་དྲ་ལམ་བཀག་སྡོམ་བྱས་ཡོད་སྐོར་སོགས་འགྲེལ་བརྗོད་གནང་བྱུང་།
རྒྱ་ནག་གཞུང་གིས་སྐམ་ཐོག་ཆུ་གློག་ཁང་ཟེར་བ་འཛུགས་སྐྲུན་བྱེད་པར་ཁ་གཡར་ཏེ། སྡེ་དགེ་རྫོང་དབོན་པོ་སྟོད་ཀྱི་དབོན་སྟོད་དགོན་དང་ཡེ་ན་དགོན་སོགས་དགོན་པ་དྲུག་དང་གྲོང་ཚོ་གཉིས་ལྷག་གནས་སྤོར་དགོས་པའི་བཙན་བཀའ་བཏང་བར་བརྟེན། ས་གནས་སེར་སྐྱ་མི་མང་གིས་ཕྱི་ཟླ་ ༢ ཚེས་ ༢༡ དང་ ༢༢ ཉིན་ཞི་བའི་ཐོག་ནས་འབྲེལ་ཡོད་ལས་བྱེད་པར་རེ་སྐུལ་ངུ་འབོད་གནང་སྟེ་བཙན་བཀའ་ཟློག་ཐབས་གནང་སྐབས། གློ་བུར་དུ་ཉེན་རྟོག་པ་མང་པོ་བསླེབས་ནས་གང་བྱུང་གཅར་རྡུང་བཏང་སྟེ་མི་ཁག་ཅིག་སྡེ་དགེ་རྫོང་མི་མང་སྨན་ཁང་དུ་བསྐྱལ་ཡོད་པ་མ་ཟད། སེར་སྐྱ་མི་མང་མང་པོ་འཛིན་བཟུང་བཙན་འཁྲིད་བྱས་ཏེ། ས་གནས་མི་མང་གི་འགྲོ་འདུག་ལ་དམ་དྲག་ཤུགས་ཆེན་བྱས་ཡོད།
རྩོམ་སྒྲིག་པ། སྐལ་བཟང་སྦྱིན་པ།
