ཐའེ་ཝན་ནང་ཡོད་པའི་བོད་ཀྱི་ཆོས་བརྒྱུད་རིས་མེད་ཀྱི་བླ་སྤྲུལ་མཁན་པོ་དང་དགེ་བཤེས་སོགས་དགེ་འདུན་པ་ ༤༠ ལྷག་ཐའེ་ཝན་གྱི་ས་ཡོམ་གོད་ཆག་བྱུང་ཡུལ་དུ་དངོས་སུ་ཕེབས་ཏེ་བསྔོ་སྨོན་གནང་འདུག
ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པས་འདི་གར་གནས་ཚུལ་མཁོ་གཏོང་གནང་བ་ལྟར་ན། མི་ལོ་ ༢༥ རྗེས་སུ་ཐའེ་ཝན་གྱི་ཧྭ་ལིན་གྲོང་ཁྱེར་དུ་ས་ཡོམ་གྱིས་མི་རྒྱུ་གཉིས་ལ་གནོད་སྐྱོན་ཆེ་ཤོས་ཐེབས་ཡོད་པར་བརྟེན། ཟླ་འདིའི་ཕྱི་ཚེས་ ༡༥ ཉིན་ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པའི་གོ་སྒྲིག་འོག ཞིབ་འཇུག་ཚོགས་པའི་ཚོགས་གཙོ་མཁན་པོ་ཚེ་དབང་རིག་འཛིན་ལགས་དང་། ཚོགས་གཞོན་མཁན་པོ་ངག་དབང་མཁས་གྲུབ་ལགས། ཚོགས་གཞོན་དགེ་བཤེས་སྣང་སྣང་ལགས། དགེ་བཤེས་ཐུབ་བསྟན་ནོར་བུ་ལགས་སོགས་བོད་ཀྱི་ཆོས་བརྒྱུད་རིས་མེད་ཀྱི་བླ་སྤྲུལ་མཁན་པོ་དང་དགེ་བཤེས། དགེ་འདུན་པ་བཞི་བཅུ་ལྷག་གནོད་ཐེབས་ས་གནས་སུ་ཆེད་ཕེབས་ཀྱིས་གདུང་སེམས་མཉམ་བསྐྱེད་དང་། དཀོན་མཆོག་རྗེས་དྲན། སྒྲོལ་མ། སྨན་བླའི་གཟུངས། བཟང་སྤྱོད་སྨོན་ལམ་སོགས་བསྔོ་སྨོན་ཟབ་རྒྱས་གསུང་གནང་ཡོད་འདུག
ཟླ་འདིའི་ཕྱི་ཚེས་ ༣ ཉིན་ཐའེ་ཝན་མཚོ་ཁུལ་གྱི་ཧྭ་ལིན་ (Hualien) གྲོང་ཁྱེར་སོགས་སུ་ཚད་རིམ་ ༧།༤ ཅན་གྱི་ས་ཡོམ་བརྒྱབ་སྟེ། ད་བར་ཉུང་མཐར་མི་གྲངས་ ༡༦ རྐྱེན་འདས་དང་། མི་གྲངས་ ༡༡༥༥ ལྷག་ལ་རྨས་སྐྱོན་ཕོག་པ། སྡོད་ཁང་དང་གཞུང་ལམ་ལ་རྡིབ་སྐྱོན་བྱུང་བ་སོགས་མི་ལོ ༢༥ ཙམ་གྱི་རྗེས་སུ་ཐའེ་ཝན་ནང་བྱུང་བའི་ས་ཡོམ་ཤུགས་ཚད་ཆེ་ཤོས་དེ་ཆགས་ཡོད་འདུག
ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པ་ནི་ཐའེ་ཝན་དུ་ཡོད་པའི་བོད་བརྒྱུད་ནང་བསྟན་གྱི་རིས་མེད་དགེ་འདུན་པ་ཐུན་མོང་གིས་གྲུབ་པའི་ཚོགས་པ་གལ་ཆེན་ཞིག་ཡིན་པ་དང་། ས་གནས་ཀྱི་བོད་བརྒྱུད་དགེ་འདུན་པ་ཡོངས་ཀྱིས་ཚད་མཐོའི་མཉམ་ཞུགས་དང་ངོས་ལེན་ཞུ་ཡུལ་གྱི་ཚོགས་པ་ཞིག་རེད་འདུག ཚོགས་པ་འདིས་ལོ་རེ་བཞིན་ནང་བསྟན་བརྒྱུད་པ་གསུམ་གྱི་ཚོགས་འདུ་དང་། བོད་བརྒྱུད་ནང་བསྟན་ཆོས་བརྒྱུད་ཁག་གི་ནང་བསྟན་དར་སྤེལ་བགྲོ་གླེང་ཚོགས་འདུ། དེ་བཞིན་ཐའེ་ཝན་ས་གནས་ལ་རང་བྱུང་དང་མིའི་བཟོས་གོད་ཆག་རིགས་བྱུང་སྐབས་ཆོས་མཐུན་གྱིས་གདུང་སེམས་མཉམ་བསྐྱེད་དང་རོགས་སྐྱོར་སོགས་ཞུ་བཞིན་པ་དང་། ཐའེ་སྡོད་བོད་མིའི་ཆོས་དང་རིག་གཞུང་། སྐད་ཡིག་སོགས་དང་འབྲེལ་བའི་ལས་དོན་བཅས་ཀྱི་ཐོག་ཏུ་ཕྱག་ལས་གང་མང་གནངས་དང་གནང་མུས་ཡིན་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
ཡག་པོ་རེད། ཡི་རངས་ཡོད། ད་དུང་དེང་གི་དུས་སུ་བོད་པའི་དགེ་འདུན་བཙུན་མ་ཚོས་ཕྱི་ཡི་རྒྱལ་ཁབ་ནང་སྨོན་ལམ་དང་ཞབས་བརྟན། དབང་དང་ཆོ་ག་རྐྱང་རྐྱང་གནང་བ་དང་། ཁྲ་ཁྲ་སིག་སིག་གི་དཀྱིལ་འཁོར་རྐྱང་རྐྱང་བཞེངས་གནང་ནས་ཚུར་ལ་འབུལ་བ་ཤ་སྟག་བསྡུ་ཨེ་ཐུབ་མི་ལྟ་བར། ཕར་ལ་ཡང་རང་གིས་བསགས་བཞག་པའི་ལོངས་སྤྱོད་དེ་དག་བརྒྱུད། ས་གནས་ས་ཐོག་གི་མི་དམངས་ལ་དཀའ་སྡུག་འཕྲད་སྐབས་དངུལ་དང་དངོས་པོའི་སྦྱིན་པ་གཏོང་བའི་ལས་དང་ལག་ལེན་དངོས་སུ་གནང་མཁན་མང་ཙམ་ཐོན་ཐུབ་པ་བྱུང་ན་དེ་ལས་ཀྱང་དཔེ་བཟང་ཡག་ས་རེད། ༧རྒྱལ་བ་རིན་པོ་ཆེ་ལ་འབུལ་བ་བྱུང་ཚད་སྤྱི་དོན་སླད་གཏོང་རྐྱང་གནང་གིན་ཡོད་པ་ལ་གཟིགས་རོགས་གནང་། དེང་སང་ Engaging Buddhism/Buddhists ཁ་ཡོད་ལག་ཡོད་ཀྱི་ནང་ཆོས་དང་ནང་ཆོས་ཉམས་ལེན་པ་ཟེར་བའི་མི་རབས་གསར་པའི་སྲོལ་བཟང་ཞིག་ལ་མི་མང་པོས་མོས་པོ་གནང་གིན་འདུག རང་རེ་བོད་པའི་དགེ་འདུན་པའི་ནང་ནས་དུས་རབས་ཉེར་གཅིག་གི་དགེ་འདུན་པ་ཆོས་པ་དེ་འདྲ་ད་དུང་མང་ཙམ་ཐོན་དགོས་པ་འདུག ད་ཤུགས་བརྒྱག་ཤོག །