བོད་དོན་ལས་འགུལ་བས་ཧང་གྷ་རིའི་ནང་ཞི་ལ་ངོ་རྒོལ་བྱས་འདུག

ཞི་ཅིན་ཕིང་གིས་ཧང་གྷ་རིའི་སྲིད་བློན་སོགས་དང་ཐུག་འཕྲད་བྱས་ཏེ་ཡུལ་དེས་ཉམས་དམས་སུ་འགྲོ་བཞིན་པའི་རྒྱ་ནག་དང་ཡུ་རོབ་ཀྱི་འབྲེལ་ལམ་ཡར་རྒྱས་གཏོང་བར་སྐུལ་འདེད་གནང་དགོས་སྐོར་བརྗོད་ཡོད་འདུག

Chinese President Xi Jinping attends a welcome ceremony jointly held by Hungarian President Tamas Sulyok and Prime Minister Viktor Orban in Budapest, Hungary, on May 9, 2024 Photo: Xinhua

འདི་ལོའི་ཕྱི་ཟླ་ ༥ ཚེས་ ༥ ནས་ ༡༠ བར་རྒྱ་ནག་གི་མགོ་ཁྲིད་ཞི་ཅིན་ཕིང་གིས་ཧྥ་རན་སི་དང་། སི་བྷི་ཡ། དེ་བཞིན་ཧང་གྷ་རི་བཅས་ཀྱི་ནང་གཞུང་འབྲེལ་སྐོར་སྐྱོད་བྱས་ཡོད་པ་ལྟར། ཁ་སང་ཞི་ཅིན་ཕིང་ཡུ་རོབ་ཀྱི་ཧང་གྷ་རི་རྒྱལ་ཁབ་ཏུ་འབྱོར་ནས་ཡུལ་དེའི་སྲིད་འཛིན་དང་སྲིད་བློན་སོགས་ལ་ཐུག་འཕྲད་བྱས་ཏེ། ཡུལ་གཉིས་བར་ཚོང་དོན་དོན་ཚན་ ༡༨ ཐོག་མཉམ་འབྲེལ་གྲོས་ཆོད་བཞག་ཡོད་ཀྱང་ཡོངས་གྲགས་ཀྱི་ཐོག་ནས་གསལ་བསྒྲགས་བྱས་མེད་པ་རེད།

ཁ་སང་ཞི་ཅིན་ཕིང་རྒྱལ་ཁབ་དེའི་ནང་འབྱོར་སྐབས་བོད་རང་བཙན་སློབ་ཕྲུག་ཚོགས་པ་དང་། ཡུ་རོབ་རྒྱལ་ཁབ་ཁུལ་གྱི་བོད་དོན་དང་བླངས་ཞུ་གཏུག་ལས་འགུལ་ཚོགས་པའི་ལས་འགུལ་བ་ཁག་ཅིག་གིས་མཉམ་འབྲེལ་གྱིས། ཞི་ཅིན་ཕིང་ལ་ཁྱོ་གང་དུ་ཕྱིན་པ་དང་། ག་རེ་བྱེད་ཀྱི་ཡོད་ནའང་། བོད་མི་རྣམས་ནམ་ཡང་ཁུ་སིམ་མེར་སྡོད་ཀྱི་མིན་ཞེས་པའི་འབོད་ཚིག་བསྒྲགས་ཏེ་ངོ་རྒོལ་བྱས་འདུག

གནད་དོན་དེའི་ཐད་ཧང་གྷ་རི་ཡི་སྲིད་བློན་ཝིག་ཌོར་ཨར་བྷན་(Viktor Orbán)ལགས་ཀྱིས། ཧང་གྷ་རི་རྒྱལ་ཁབ་ཀྱིས་རྒྱ་ནག་གཞུང་གི་ཚོང་ཟོག་ཁང་སོགས་ཀྱིས་མ་འཇོག་བྱེད་པར་མཐུན་རྐྱེན་སྦྱོར་གྱི་ཡིན་ལ། ང་ཚོས་དེང་རབས་ཅན་གྱི་ནུབ་ཕྱོགས་རྒྱལ་ཁབ་དང་ཤར་ཕྱོགས་ཀྱི་འཕྲུལ་རིག་མང་པོ་ཞིག་གི་ཐོག་ལ་མཉམ་ལས་བྱ་རྒྱུ་མོས་མཐུན་བྱུང་ཡོད་ལུགས་སོགས་བརྗོད་ཡོད་འདུག

རྒྱ་ནག་གི་མགོ་ཁྲིད་ཞི་ཅིན་ཕིང་གིས། རྒྱ་ནག་གི་རྒྱུད་གཅིག་ལམ་གཅིག་གི་སྲིད་ཇུས་ཟེར་བ་དེས་ཧང་གྷ་རིས་ཤར་ཕྱོགས་སུ་བཟུང་བའི་ཚོང་དོན་སྲིད་ཇུས་དང་ཧ་ཅང་འཚམ་པོ་ཡོད་པའི་མོས་མཐུན་བྱུང་ཡོད་ལུགས་དང་། ཧང་གྷ་རིས་ཡུ་རོབ་མཐུན་ཚོགས་སུ་རྒྱ་ནག་དང་ཡུ་རོབ་ཀྱི་འབྲེལ་ལམ་ཡར་རྒྱས་གཏང་རྒྱུར་རྒྱབ་སྐྱོར་བྱ་རྒྱུ་ཡིན་ལུགས་སོགས་བརྗོད་འདུག

ཡུ་རོབ་ཀྱི་ཤར་ཕྱོགས་སུ་ཆགས་པའི་ཧང་གྷ་རི་རྒྱལ་ཁབ་ནི་རྒྱ་ནག་དང་ཚོང་དོན་གྱི་འབྲེལ་ལམ་བཟང་བའི་ཁར། ཕྱི་ལོ་ ༢༠༡༥ ལོ་ཙམ་ནས་རྒྱ་ནག་གི་རྒྱུད་གཅིག་ལམ་གཅིག་གི་སྲིད་ཇུས་ལག་བསྟར་སྐབས་མཉམ་ཞུགས་བྱེད་མཁན་གྱི་ཡུ་རོབ་རྒྱལ་ཁབ་ཆེ་གྲས་ཤིག་ཏུ་གྱུར་ནས། ལོ་དེར་རྒྱ་ནག་གཞུང་གིས་ཨ་སྒོར་ས་ཡ་ ༥༧༡ ལྷག་གི་མ་འཇོག་བྱས་ཡོད་ལ། རྒྱུད་གཅིག་ལམ་གཅིག་གི་སྲིད་ཇུས་འོག་ནས་ཡུ་རོབ་རྒྱལ་ཁབ་གཞན་དང་མཐུད་པའི་མེ་འཁོར་ལྕགས་ལམ་གསར་རྒྱག་བྱས་དང་བྱེད་མུས་ཡིན་འདུག དེ་བཞིན་འདས་པའི་ལོ་ཤས་རིང་རྒྱ་ནག་གིས་ཧང་གྷ་རིའི་ནང་ཉི་གློག་(EV battery plants) མང་པོ་བཟོ་བསྐྲུན་བྱེད་མུས་ཡིན་པ་མ་ཟད། རྒྱལ་ཁབ་དེ་ནི་རྒྱ་ནག་གི་ལི་ཐི་ཡིམ་( lithium) གློག་རྫས་བཟོ་སྐྲུན་བྱ་སའི་ལྟེ་གནས་ཆེ་ཤོས་ཤིག་ཀྱང་ཆགས་ཡོད་འདུག

དེ་རིང་རྒྱ་ནག་གོ་ལའི་དུས་བབ་ཀྱིས་གནས་ཚུལ་སྤེལ་བའི་ནང་། ཧང་གྷ་རི་རྒྱལ་ཁབ་དེ་ནི་རྒྱ་ནག་ལ་ཕྱི་འབྲེལ་འཛུགས་མཁན་གྱི་ཡུ་རོབ་རྒྱལ་ཁབ་ཐོག་མ་དེ་ཡིན་པས། འདི་ལོར་རྒྱལ་ཁབ་དེ་གཉིས་ཀྱིས་ཕྱི་སྲིད་དང་ཚོང་དོན་གྱི་འབྲེལ་ལམ་བཙུགས་ནས་མི་ལོ ༧༥ འཁོར་གྱི་ཡོད་སྐོར་དང་། གཉིས་ཕན་གྱི་ཐབས་ཇུས་ཟེར་བ་ཞིག་གི་འོག ཧང་གྷ་རི་ནི་ཕྱི་ལོ ༢༠༡༥ ལོར་རྒྱུད་གཅིག་ལམ་གཅིག་གི་ཚོང་འབྲེལ་སྲིད་ཇུས་ཁོངས་སུ་ཞུགས་མཁན་གྱི་ཡུ་རོབ་རྒྱལ་ཁབ་ཐོག་མ་དང་། ཕྱི་ལོ ༢༠༡༧ ལོ་ནས་མཉམ་འབྲེལ་གྱི་ནུས་པ་ལག་བསྟར་བྱེད་བཞིན་ཡོད་ཚུལ་བསྒྲགས་འདུག

ཡུ་རོབ་ཀྱི་ཤར་ཕྱོགས་སུ་ཡོད་པའི་ཧང་གྷ་རི་རྒྱལ་ཁབ་ནི་ཕྱི་ལོ་ ༢༠༠༤ ལོར་ཡོ་རུབ་མཐུན་ཚོགས་ཀྱི་ཁོངས་སུ་ཞུགས་ཡོད་པ་དང་། ཕྱི་ལོ་ ༡༩༧༥ ནས་ཡུ་རོབ་མཐུན་ཚོགས་དང་རྒྱ་ནག་བར་གྱི་མཉམ་འབྲེལ་ཚོང་ལས་མགོ་བརྩམས་ཤིང་། ཕྱི་ལོ་ ༢༠༡༣ ལོར་བཞག་པའི་ཡུ་རོབ་མཐུན་ཚོགས་དང་རྒྱ་ནག་གི་ཚོང་དོན་མ་འཛུགས་གྲོས་ཆོད་དེས་ཕྱོགས་གཉིས་ཀྱི་ཚོང་དོན་མ་འཛུགས་གོང་འཕེལ་བཏང་ཡོད་ཀྱང་། ཉེ་ལམ་ནས་འཛམ་གླིང་གི་ཚོང་ཤག་ཆེ་ཤོས་གཉིས་ཀྱི་ཚོང་འབྲེལ་ལའང་དོ་ཕོག་ཤུགས་ཆེན་འགྲོ་མུས་ཡིན་འདུག

གསར་འགོད་པ། དཔལ་ལྡན།

རྩོམ་སྒྲིག་བྱེད་མཁན། པདྨ་མཚོ།