སྐུའི་གསུང་བསྒྱུར་བ་དགེ་བཤེས་བློ་བཟང་བསྟན་འཛིན་ནེ་གེ་ལགས་ལ་ཨ་རིའི་ཨེ་མོ་རིའི་རྗེ་ཧྥར་སན་གཟེངས་རྟགས་ཐོབ།
ཟླ་འདིའི་ཕྱི་ཚེས་ ༨ ཉིན་ཨ་རིའི་ཨེ་མོ་རི་གཙུག་ལག་སློབ་གཉེར་ཁང་གིས་ཤེས་ཡོན་དང་སྤྱི་དམངས་ཀྱི་འཚོ་བར་གཟེངས་སུ་ཐོན་པའི་རྗེ་ཧྥར་སན་གཟེངས་རྟགས་ (Jefferson Award) དེ་སྐུའི་གསུང་བསྒྱུར་བ་དགེ་བཤེས་བློ་བཟང་བསྟན་འཛིན་ལགས་སུ་ཕུལ་ཡོད་འདུག
སྐབས་དེར་དགེ་བཤེས་བློ་བཟང་བསྟན་འཛིན་ལགས་ཀྱིས། ཨེ་མོ་རིའི་ཤེས་ཡོན་གྱི་གཞི་རྩའི་ལྟ་གྲུབ་གཅིག་ནི་མིའི་རྣམ་དཔྱོད་འགྱུར་བ་བཏང་བ་ཙམ་མིན་པར་མིའི་གཤིས་ཀར་འགྱུར་བཅོས་གཏོང་གི་ཡོད་པ་རེད། དེར་བརྟེན་ཨེ་མོ་རིས་༧གོང་ས་རྒྱལ་བ་རིན་པོ་ཆེ་མཆོག་གི་སེམས་འགྱུར་བཅོས་གཏོང་བའི་སློབ་གསོའི་དགོངས་པ་བརྩོན་གྱི་ཡོད། ཅེས་གསུངས་ཡོད།
ཕྱི་ལོ་ ༡༩༦༠ ལོར་བློ་བཟང་བསྟན་འཛིན་ལགས་ཧི་མ་ལ་ཡའི་རི་རྒྱུད་ཀྱི་ཁུ་ནུའི་ནང་དུ་སྐྱེས་ཤིང་། གཞི་རིམ་དང་འབྲིང་རིམ་སློབ་གྲྭ་འགྲིམས་རྗེས་བཞུགས་སྒར་དྷ་རམ་ས་ལར་རྟེན་གཞི་བྱས་པའི་རིགས་ལམ་སློབ་གཉེར་ཁང་དུ་སྐད་ཡིག་དང་། བཅུ་ཕྲག་རིག་གནས་ཐོག་གསན་བསམ་གནང་། དེ་རྗེས་འབྲས་སྤུངས་བློ་གསལ་གླིང་དུ་འཛུལ་ཞུགས་ཀྱིས་གཞུང་ཆེན་ཀ་པོད་ལྔར་གསན་བསམ་སློབ་གཉེར་གྱིས་དགེ་བཤེས་ལྷ་རམས་པའི་མཚན་རྟགས་བཞེས། ཕྱི་ལོ་ ༡༩༨༧ ནས་ཨ་རི་སོགས་ཕྱི་རྒྱལ་ཡུལ་གྲུ་ཁག་ཏུ་ཆེད་བསྐྱོད་ཀྱིས་ནུབ་ཕྱོགས་དོན་གཉེར་ཅན་རྣམས་ལ་ནང་ཆོས་འཆད་ཁྲིད་དང་། བོད་ཀྱི་རིག་གཞུང་ངོ་སྤྲོད་གནང་།
ཕྱི་ལོ་ ༡༩༩༨ ལོར་༧གོང་ས་རྒྱལ་བ་རིནཔོ་ཆེ་མཆོག་དབུ་བཞུགས་ཐོག་ཨེ་མོ་རི་གཙུག་ལག་སློབ་གཉེར་ཁང་དང་། འབྲས་སྤུངས་བློ་གསལ་གླིང་ཕན་ཚུན་གན་རྒྱ་བཞག་སྟེ་ཨེ་མོ་རི་དང་བོད་ཀྱི་མཐུན་ཚོགས་ཞེས་པ་ཐོག་མར་དབུ་བརྙེས་པ་ནས་བཟུང་། འདས་པའི་ལོ་ངོ་ ༢༦ རིང་ཨེ་མོ་རི་གཙུག་ལག་སློབ་གཉེར་ཁང་གི་སྒོམ་སྒྲུབ་ཚན་རིག་དང་། སྙིང་རྗེ་གཞི་རྩར་བཟུང་བའི་ལྟེ་གནས་ཁང་གིས་སློབ་གསོའི་རང་བཞིན་ལྡན་པའི་ལས་གཞི་མང་དག་ཅིག་སྤེལ་དང་སྤེལ་མུས་ཡིན་པ་མ་ཟད། ཆོས་ལུགས་དང་མ་འབྲེལ་བའི་བཟང་སྤྱོད་ཀྱི་བསླབ་གཞི་སཱི་ཤེས་ཡོན་སློབ་གསོ་དང་། དཔྱད་སྒོམ་ལ་བརྟེན་པའི་སྙིང་རྗེ་སྒོམ་ཐབས་ཀྱི་ལས་གཞི། དེ་བཞིན་ཨེ་མོ་རི་དང་བོད་ཀྱི་ཚན་རིག་ལས་གཞི་དེ་དག་བརྒྱུད། འཛམ་གླིང་འདི་བྱམས་བརྩེ་དང་ཞི་བདེ་ལྡན་པ་ཞིག་བསྐྲུན་རྒྱུར་འབད་བརྩོན་མུ་མཐུད་གནང་བཞིན་ཡོད་པ་སོགས་གཟེངས་སུ་ཐོན་པའི་ཕྱག་ལས་མང་དག་ཅིག་གནང་བཞིན་ཡོད་ལ། ཁོང་གི་ཕྱག་ལས་དེར་༧གོང་ས་རྒྱལ་བ་རིན་པོ་ཆེ་མཆོག་གིས་ཐུགས་དགྱེས་པའི་བསྔགས་བརྗོད་ལན་མང་གནང་མྱོང་ཡོད་པ་རེད།
གསར་འགོད་པ། བསྟན་འཛིན་ཕུར་བུ།
