རྒྱ་ནག་གཞུང་གིས་བོད་ཀྱི་རིག་གཞུང་དང་བཅས་རྩ་མེད་དུ་གཏོང་ཐབས་བྱེད་ཀྱི་ཡོད་པའི་སྙན་ཐོ་བཏོན།

རྒྱའི་བཙན་བཟུང་འོག་ཡོད་པའི་བོད་དང་ལྷོ་སོག ཤར་ཏུར་ཀི་སི་ཐན་སོགས་སུ་སྐད་ཡིག་རིག་གཞུང་རྩ་མེད་དུ་གཏོང་བའི་སྲིད་ཇུས་ལག་བསྟར་བྱེད་བཞིན་པ་དང་ཆོས་ལུགས་བྱེད་སྒོ་སྤེལ་ཡུལ་དུ་དམ་དྲག་ཆེན་པོ་བྱེད་ཀྱི་ཡོད་པའི་སྙན་ཐོ་བཏོན་འདུག

ཟླ་འདིའི་ཕྱི་ཚེས་ ༡༡ ཉིན་ཨ་རིའི་གྲོས་ཚོགས་ཀྱི་རྒྱ་ནག་ལས་དོན་ཚོགས་ཆུང་གིས་ཕྱི་ལོ་༢༠༢༣ ལོའི་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་གྱི་ལོ་འཁོར་སྙན་ཐོ་ (CONGRESSIONAL-EXECUTIVE COMMISSION ON CHINA ANNUAL REPORT ) ཤོག་ངོས་ ༣༧༣ ཅན་ཞིག་བཏོན་པའི་ནང་། རྒྱ་གཞུང་གིས་བོད་ནང་དུ་ཆོས་དད་རང་མོས་སོགས་ཀྱི་ཐད་ལ་དམ་དྲག་དང་། བོད་མི་གཙོས་རྒྱ་ནག་གཞུང་གི་བཙན་གནོན་འོག་ཏུ་ཡོད་པའི་གྲངས་ཉུང་མི་རིགས་རྣམས་ལ་དྲག་གནོན་བྱེད་ཀྱིན་ཡོད་པའི་གནད་དོན་སོགས་གསལ་འདུག

དེ་ཡང་སྙན་ཐོའི་ནང་། རྒྱ་ནག་གཞུང་གིས་འདས་པའི་མི་ལོ་ཁ་ཤས་ཀྱི་སྔོན་ནས་རྒྱ་ནག་དམར་ཤོག་རིང་ལུགས་ཀྱི་ལྟ་བ་དྲིལ་བསྒྲགས་དང་མི་རིགས་རིང་ལུགས་ཀྱི་འདུ་ཤེས་ཟེར་བ་གོང་མཐོར་བཏང་སྟེ། གྲངས་ཉུང་མི་རིགས་མང་པོ་ཞིག་བཙན་གྱིས་རྒྱ་མི་རིགས་དང་གཉེན་སྒྲིག་སོགས་བྱེད་དུ་འཇུག་གི་ཡོད་པ་མ་ཟད། བོད་དང་། ལྷོ་སོག ཤར་ཏུར་ཀི་སི་ཐན་སོགས་སུ་སྐད་ཡིག་སློབ་གསོའི་སྲིད་ཇུས་ཀྱི་འོག་ནས་བཅའ་སྡོད་སློབ་གྲྭ་མང་དག་ཅིག་གསར་འཛུགས་བྱས་ནས་གྲངས་ཉུང་མི་རིགས་ཚོའི་ངོ་བོ་དང་། སྐད་ཡིག་ཤུལ་མེད་དུ་བཟོ་ཐབས་ལ་འབད་བཞིན་ཡོད་པ་དང་། ལྷག་པར་དུ་བོད་ནང་གི་ས་གནས་མང་པོ་ཞིག་ཏུ་བོད་ཀྱི་སྐད་ཡིག་སྦྱོང་སྤྱོད་སྤེལ་གསུམ་བྱེད་པར་དམ་དྲག་ཤུགས་ཆེན་བྱེད་ཀྱིན་ཡོད་པའི་སྐོར། གྲངས་ཉུང་མི་རིགས་ཀྱི་ས་གནས་མང་པོ་ཞིག་ལ་ཆོས་ལུགས་དང་འབྲེལ་བའི་ལས་དོན་སྤེལ་བར་དམ་དྲག་ཤུགས་ཆེན་བྱེད་མུས་ཡིན་སྐོར་སོགས་གསལ་འདུག

ཡང་སྙན་ཐོའི་ནང་། ཕྱི་ལོ་ ༢༠༡༠ ལོའི་རྗེས་ནས་བོད་རྒྱ་གྲོས་མོལ་མཚམས་བཞག་ཡོད་ཀྱང་། རྒྱ་ནག་གཞུང་གིས་ད་ལྟའང་བོད་རྒྱ་གྲོས་མོལ་སླར་གསོ་ཡོང་ཐབས་ལ་དམིགས་པའི་ལས་དོན་གང་ཡང་སྤེལ་གྱི་མེད་སྐོར་དང་། འདས་པའི་ལོ་ཤས་རིང་བོད་ནང་དུ་ཆོས་ལུགས་དང་འབྲེལ་བའི་ལས་དོན་སྤེལ་བར་དམ་དྲག་དང་། བོད་ནང་གི་ས་གནས་མང་པོ་ཞིག་ཏུ་ཆོས་ལུགས་ཀྱི་ལས་དོན་སྤེལ་མི་ཆོག་པའི་བཀའ་རྒྱ་བསྒྲགས་ནས། དགོན་སྡེ་དང་མཆོད་རྟེན་སོགས་ཀྱི་དྲུང་དུ་ཆོས་ཕྱོགས་ཀྱི་ལས་དོན་སྤེལ་བར་སྡང་ཟུག་དང་སུན་གཙེར་ཡང་ཡང་བྱེད་མུས་ཡིན་པའི་སྐོར་དང་།  ཉེ་བའི་ཆར་རྒྱ་ནག་གཞུང་གིས་བོད་བརྒྱུད་ནང་བསྟན་གྱི་ལམ་ལུགས་མང་པོ་ཞིག་ལ་ལག་པ་བསྲིངས་ནས། ༧གོང་ས་རྒྱལ་བ་རིན་པོ་ཆེ་མཆོག་གི་ཡང་སྲིད་ཚུད་པའི་བོད་ཀྱི་བླ་ཆེན་རྣམ་པའི་ཡང་སྲིད་སོགས་ཀྱི་ཐད་ལ་ཐེ་ཇུས་བྱེད་མུས་དང་། རྒྱ་ནག་གཞུང་ལ་ངོ་རྒོལ་གྱིས་རང་ལུས་མེར་སྲེག་མཁན་རྣམས་ཀྱི་ནང་མི་ཚུད་པའི་འབྲེལ་ཡོད་རྣམས་ལ་དྲག་གནོན་བྱེད་མུས་ཡིན་པ་མ་ཟད། ཉེ་འབྲེལ་ཁག་ཅིག་ལ་བཙན་གཡེམ་སོགས་བྱས་ཡོད་པའི་གནས་ཚུལ་ཐོན་ཡོད་པའི་སྐོར། དེ་བཞིན་རྒྱ་ནག་གཞུང་གིས་བོད་རང་སྐྱོང་ལྗོངས་ཟེར་བ་དང་མཚོ་སྔོན་ཞིང་ཆེན་ཁུལ་གྱི་བོད་མི་རྣམས་ཀྱི་རིགས་རྫས་དང་མིག་གི་རིགས་རྫས་སོགས་ཚུད་པའི་མི་སྒེར་གྱི་གནས་ཚུལ་མང་པོ་ཞིག་བཙན་འཁྱེར་བྱེད་ཀྱིན་ཡོད་སྐོར་སོགས་གསལ་འདུག

སྙན་ཐོའི་ནང་། འདས་པའི་ལོ་ཤས་རིང་རྒྱ་ནག་གཞུང་གིས་བོད་རིགས་སློབ་ཆེན་སློབ་མ་ཚེ་དབྱངས་ལྷ་མོ་དང་། འཛམ་དཀར། བདེ་ཆེན། བདེ་ལྷ། དེ་བཞིན་སྐལ་བཟང་སྒྲོལ་མས་མཚོན་པའི་བུད་མེད་མང་པོ་ཞིག་འཛིན་བཟུང་བྱས་ཡོད་པ་དང་། བོད་ཀྱི་སྐད་ཡིག་སྦྱོང་སྤྱོད་བྱེད་མཁན་རྩོམ་པ་པོ་གངས་སྐྱེས་སྒྲུབ་པ་སྐྱབས་དང་། ཚེ་རིང་སྒྲོལ་མ། བསམ་སྒྲུབ། གངས་བུ་གཡུ་འབུམ། སྲས་རྣམ་སོགས་ལ་ལོ་བཞི་ནས་བཅུ་བཞི་བར་གྱི་བཙོན་འཇུག་ཁྲིམས་ཐག་བཅད་ཡོད་པ་མ་ཟད། བོད་ནང་གི་ས་གནས་མང་པོ་ཞིག་ནས་བོད་མི་རྣམས་དོན་མེད་འཛིན་བཟུང་དང་། ངལ་རྩོལ་སོགས་བྱེད་འཇུག་གི་ཡོད་པ་མ་ཟད། བོད་ཀྱི་ཆོས་རིག་དང་ངོ་བོ་སོགས་རྩ་མེད་གཏོང་ཐབས་ཀྱི་སྲིད་ཇུས་མང་པོ་ལག་བསྟར་བྱས་དང་བྱེད་མུས་ཡིན་སྐོར་སོགས་གསལ་འདུག

ཨ་རིའི་གཞུང་འབྲེལ་མི་སྣ་དང་རྒྱལ་སྤྱིའི་ཚོགས་པ་ཁག་ལ་ཕྱི་ལོ་ ༡༩༩༥ ལོར་༧གོང་ས་རྒྱལ་བ་རིན་པོ་ཆེ་མཆོག་ནས་ཡང་སྲིད་ངོས་འཛིན་མཛད་རྗེས་གར་སོང་ཆ་མེད་དུ་གྱུར་བའི་༧ཀུན་གཟིགས་པཎ་ཆེན་རིན་པོ་ཆེ་མཆོག་དང་སྐུ་འཁོར་རྣམས་ལ་མཇལ་འཕྲད་གནང་དུ་འཇུག་དགོས་པ་མ་ཟད། རྒྱ་ནག་གཞུང་གིས་འཛིན་བཟུང་བཙན་ཁྲིད་བྱས་པའི་བོད་ཀྱི་ཆབ་སྲིད་བཙོན་པ་རྣམས་གང་མགྱོགས་ཀློད་གྲོལ་དང་། རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་སྒྲིག་བཞིན་རྒྱ་ནག་གཞུང་གིས་བོད་ནང་གི་འགྲོ་བ་མིའི་ཐོབ་ཐང་གི་གནས་བབ་མཚོན་པའི་བོད་མིའི་གཞི་རྩའི་ཐོབ་ཐང་ལ་སྲུང་སྐྱོབ་བྱ་དགོས་པའི་རེ་སྐུལ་གནང་འདུག 

གསར་འགོད་པ། དཔལ་ལྡན།

རྩོམ་སྒྲིག་པ། པདྨ་མཚོ།