རྒྱལ་ཡུམ་ཆེན་མོ་རྗེས་དྲན་རྐང་སྤོལ་འགྲན་ཚོགས་ཐེངས་ ༢༩ པ་དེ་རྒྱ་གར་ལྷོ་ཕྱོགས་ཧོན་སུར་བོད་མིའི་གཞིས་སྒར་དུ་འཚོགས་མགོ་བཙུགས་སོང་།
དེ་རིང་ཕྱི་ཚེས་ ༡༥ ཉིན་སྐུ་མགྲོན་གཙོ་བོ་རྒྱ་གར་ལྷོ་ཕྱོགས་ཀར་ན་ཊ་ཀ་མངའ་སྡེའི་རྒྱ་གར་གྲོས་ཚོགས་འཐུས་མི་ཟུར་པ་སྐུ་ཞབས་ཧཱ་ནུ་མན་ཐ་པ་ (H. Hanumanthappa) མཆོག་དང་། ལྷོ་སྤྱི་འཇིགས་མེད་ཚུལ་ཁྲིམས་ལགས་གཙོས། ཧོན་སུར་རབ་རྒྱས་གླིང་གི་སྤྱི་མི་དང་བརྒྱ་དཔོན། ས་གནས་འདྲ་མིན་ནས་ཡོང་བའི་ལྟད་མོ་བ་རྣམས་ཀྱི་ཀི་སྒྲ་དང་ལག་ཟུང་གི་ཐལ་སྒྲའི་ཁྲོད་ནས། འདི་ལོའི་རྒྱལ་ཡུམ་ཆེན་མོ་རྗེས་དྲན་གསེར་གྱི་གཟེངས་རྟགས་རྐང་སྤོལ་འགྲན་ཚོགས་ཐེངས་ ༢༩ པ་དེ་མགོ་འཛུགས་བྱས་ཏེ། འདི་ལོའི་རྩེད་འགྲན་ཁྲོད་རྒྱ་བལ་དང་། ཨོ་གླིང་བཅས་ནས་རུ་ཁག་བཅུ་དྲུག་གིས་མཉམ་ཞུགས་བྱས་འདུག
དེའི་ཐད་བོད་རྒྱལ་ཡོངས་རྩེད་རིགས་ཚོགས་པའི་ཚོགས་གཙོ་བསྟན་འཛིན་བྱང་ཆུབ་ལགས་ཀྱིས་ཁ་པར་བརྒྱུད་འདི་གའི་གསར་འགོད་པར། འདི་ལོའི་རྒྱལ་ཡུམ་ཆེན་མོའི་རྐང་རྩེད་སྤོ་ལོའི་རྩེད་འགྲན་ཁྲོད་རྒྱ་བལ་གཉིས་ཀྱི་བཙན་བྱོལ་བོད་མིའི་གཞིས་ཆགས་ཁག་སོགས་ནས་རུ་ཁག་བཅོ་ལྔ་དང་། ཨོ་གླིང་རུ་ཁག་གཅིག་བཅས་རུ་ཁག་བཅུ་དྲུག་གིས་མཉམ་ཞུགས་གནང་གི་ཡོད་པའི་ཁར། འདི་ལོར་བོད་རྒྱལ་ཡོངས་རྩེད་རིགས་ཚོགས་པ་སོགས་ཀྱིས་གོ་སྒྲིག་གང་ཡག་ཡག་ཅིག་བྱས་ཡོད་པས། ད་ལན་གྱི་རྩེད་འགྲན་དེ་གང་ཡག་འགྲོ་རྒྱུ་དང་གྲུབ་འབྲས་ཡག་པོ་ཞིག་འཐོན་རྒྱུའི་རེ་བ་བྱེད་མུས་ཡིན་པའི་སྐོར་དང་། སྤྱིར་འདས་པའི་རྒྱལ་ཡུམ་ཆེན་མོའི་རྗེས་དྲན་རྐང་སྤོལ་འགྲན་ཚོགས་དེ། ཐོག་མའི་རྩེད་འགྲན་གྱི་རིམ་པ་ལ་གཞིགས་ན་འདས་པའི་ལོ་ཤས་གོང་ནས་བོད་པའི་རྐང་སྤོལ་རྩེད་སྟངས་དང་། དེ་བཞིན་རྩེད་རིགས་ཐབས་ཇུས་སོགས་ཕྱོགས་མང་པོ་ཞིག་ནས་ཡར་རྒྱས་འགྲོ་མུས་ཡིན་སྐོར་སོགས་བརྗོད་བྱུང་།
ཡང་ཁོང་གིས། སྤྱིར་ལོ་ལྟར་རྒྱལ་ཡུམ་རྐང་སྤོལ་འགྲན་ཚོགས་སྐབས། རྩེད་མོ་བ་རྣམས་ལ་རྩེད་ཐང་གི་མཐུན་རྐྱེན་གྱི་ཐད་ནས་བསམ་འཆར་ཡོང་གིན་ཡོད་ཀྱང་། འདི་ལོར་ཧོན་སུར་རབ་རྒྱས་གླིང་གཞིས་ཆགས་ཀྱིས་རྩེད་ཐང་དུ་བྱེ་མ་དཀར་པོ་སོགས་བཏིང་ནས་གང་ཡག་ཡག་ཅིག་བཟོས་ཡོད་པས། ཕྱོགས་ཡོངས་ནས་རྩེད་འགྲན་ཡག་པོ་ཡོང་རྒྱུའི་རེ་བ་བྱེད་ཀྱི་ཡོད་སྐོར་བརྗོད་བྱུང་།
རྐང་སྤོལ། ཆེས་ཡིད་དུ་འོང་བའི་རྩེད་རིགས་ཤིག་ <<Football The Beautiful Game>> ཅེས་པའི་དཔེ་དེབ་ཀྱི་རྩོམ་པ་པོ་དང་བལ་ཡུལ་ལྟག་འཚེར་རུ་ཁག་གི་སློབ་སྟོན་པ་ཟུར་པ་རྐང་སྤོལ་རྩེད་རིགས་དཔྱད་བརྗོད་པ་ཊོ་ནི (Tony) འམ་ངག་དབང་ཆོས་དར་ལགས་ཀྱིས། སིམ་ལ་རུ་ཁག་ལོ་གཅིག་ཙམ་བཀག་སྡོམ་བྱས་ཏེ། ད་ལན་སླར་ཡང་རྩེད་འགྲན་གྱི་ཁྲོད་དུ་ཞུགས་ཀྱིན་ཡོད་པས། རྩེད་འགྲན་པ་རྣམས་ལ་སྔར་མེད་ཀྱི་ངར་ཤུགས་ཡོད་སྐོར་དང་། དེ་བཞིན་བལ་ཡུལ་གྱི་ཌང་མན་ཌུ་རུ་ཁག་གི་རྩེད་འགྲན་པ་མང་ཆེ་བ་རྒྱལ་ཡུམ་ཆེན་མོའི་རྩེད་འགྲན་ནང་ཞུགས་མྱོང་ཡོད་ལ། སྦྱོང་བརྡར་གྱི་ཚུལ་དུ་བལ་ཡུལ་རྒྱལ་ཡོངས་རིམ་པའི་རུ་ཁག་དང་རྩེད་འགྲན་བྱས་པའི་བརྒྱུད་རིམ་སོགས་ལ་བལྟས་ན། རྩེད་འགྲན་པ་མང་ཆེ་བ་ཡག་པོ་ཡོད་སྐོར་དང་། ” ངས་འདི་ལོའི་རྒྱལ་ཡུམ་ཆེན་མོའི་གསེར་གྱི་གཟེངས་རྟགས་དེ་སིམ་ལ་དང་བལ་ཡུལ་ཌང་མན་ཌུ་ (Dunkmandu) རུ་ཁག་གང་རུང་ལ་ཐོབ་པའི་རེ་བ་བྱེད་ཀྱི་ཡོད། གང་ཡིན་ཟེར་ན། རུ་ཁག་དེ་གཉིས་ཀྱིས་ཐོག་མའི་རྩེད་འགྲན་གྱི་རིམ་པའི་ནང་དུའང་། རུ་ཁག་བཟང་བ་དག་དང་རྩེད་འགྲན་བྱ་དགོས་ཀྱི་མེད་པས། ཕྱེད་མཐའ་ (Quarter final) དང་བཞི་མཐའ་ (Semi final) ཡི་རྩེད་འགྲན་སླ་བ་ཡོད། ” ཅེས་བརྗོད་བྱུང་།
བོད་རྒྱལ་ཡོངས་རྩེད་རིགས་ཚོགས་པས་གོ་སྒྲིག་གནང་བཞིན་པའི་རྒྱལ་ཡུམ་ཆེན་མོའི་དྲན་རྟེན་གསེར་གྱི་གཟེངས་རྟགས་རྐང་སྤོལ་འགྲན་སྡུར་ནི། ཕྱི་ལོ་ ༡༩༨༡ ལོར་བོད་ཕྲུག་ཁྱིམ་སྡེའི་རྩིས་དཔོན་ཟུར་པ་ཇོ་བོ་ཚེ་རིང་ལགས་ཀྱིས་གསར་འཛུགས་གནང་སྟེ། རྩེད་འགྲན་འདི་ལོ་ལྟར་འཚོག་གི་ཡོད་ཀྱང་། ཕྱི་ལོ་ ༢༠༢༠ ལོར་ཏོག་དབྱིབས་གཉན་རིམས་ཀྱི་རྐྱེན་གྱིས་རྒྱལ་ཡུམ་ཆེན་མོའི་དྲན་རྟེན་གསེར་གྱི་གཟེངས་རྟགས་རྐང་སྤོལ་འགྲན་སྡུར་འཚོགས་ཐུབ་མེད་པ་རེད། དེ་བཞིན་ཐེངས་འདིའི་རྟིང་རྩོད་འགྲན་བསྡུར་གྱི་ཨང་དང་པོར་ཧིན་སྒོར་འབུམ་གཉིས་དང་གཉིས་པར་འབུམ་གཅིག་དང་ཕྱེད་ཀ་དང་། སྒོ་སྲུང་བ་ཡག་ཤོས་དང་རྩེད་མོ་བ་ཡག་ཤོས་ཀྱི་བཅས་ཀྱི་བྱ་དགའ་སྤྲད་རྒྱུ་ཡིན་འདུག
རྒྱལ་ཡུམ་ཆེན་མོའི་རྩེད་འགྲན་དེ་ཕྱི་ལོ་ ༢༠༡༢ ལོར་དྷ་རམ་ས་ལ་དང་ ༢༠༡༣ ལོར་ཧོན་སུར་རབ་རྒྱས་གླིང་། ༢༠༡༤ ལོར་དོན་གྲུབ་གླིང་ (Clementown)། ༢༠༡༥ ལོར་དྷ་རམ་ས་ལ། ༢༠༡༦ ལོར་མོན་གྷོ། ༢༠༡༧ ལོར་ཀོ་ལི་གྷལ་དོན་ལྡན་གླིང་། ༢༠༡༨ ལོར་སྦེལ་ཀོབ་བདེ་སླར་གཞིས་ཆགས། ༢༠༡༩ ལོར་དྷ་རམ་ས་ལ། ༢༠༢༡ ལོར་དོན་གྲུབ་གླིང་དང་། ཕྱི་ལོ་ ༢༠༢༢ ལོར་སྤོན་ཊ་ཆོལ་གསུམ་གཞིས་ཆགས་སུ་འཚོགས་ཡོད་ཅིང་། འདས་ལོར་རྒྱལ་ཡུམ་ཆེན་མོའི་རྗེས་དྲན་གསེར་གྱི་རྟགས་མའི་རྩེད་འགྲན་དེ་དྷ་སར་འཚོགས་ཡོད་པ་རེད།
གསར་འགོད་པ། དཔལ་ལྡན།
རྩོམ་སྒྲིག་པ། པདྨ་མཚོ།
