བོད་མིའི་སྒྲིག་འཛུགས་ཀྱི་སྐུ་ཚབ་ཚོགས་ཆུང་ཞིག་ཐའེ་ཝན་སྲིད་འཛིན་གྱི་དམ་འབུལ་མཛད་སྒོར་ཕེབས་པ།

བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་དང་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་རྣམ་གཉིས་ཀྱིས་སྣེ་ཁྲིད་པའི་བཀའ་སྤྱི་གཉིས་ཀྱི་སྐུ་ཚབ་ཚོགས་ཆུང་ཞིག་ཐའེ་ཝན་གྱི་སྲིད་འཛིན་སྐུ་ཞབས་ལེ་ཆིན་ཏི་མཆོག་གི་དམ་འབུལ་མཛད་སྒོར་ཆེད་དུ་ཕེབས་འདུག

ཁ་སང་ཕྱི་ཚེས་ ༡༩ ཉིན་བོད་མིའི་སྒྲིག་འཛུགས་ཀྱི་སྐུ་ཚབ་ཚོགས་ཆུང་ཞིག་གིས་ཐའེ་ཝན་གྱི་སྲིད་འཛིན་གཞོན་པ་ལྕམ་བྷི་ཀིམ་ (Hsiao Bi-Khim) མཆོག་ལ་མཇལ་འཕྲད་གནང་སྟེ་བོད་དོན་གླེང་སློང་གནང་ཡོད་པ་མ་ཟད། དེ་རིང་རེས་གཟའ་ཟླ་བའི་ཉིན་ཐའེ་ཝན་གྱི་སྲིད་འཛིན་གསར་པ་སྐུ་ཞབས་ལེ་ཆིན་ཏི་(賴清德) མཆོག་ནས་སྲིད་འཛིན་གྱི་ལས་ཁུར་ཞུ་བའི་དམ་འབུལ་མཛད་སྒོར་མཉམ་ཞུགས་གནང་ཡོད་འདུག་ལ། དེ་བཞིན་ཟླ་འདིའི་ཕྱི་ཚེས་ ༡༧  ཉིན་བཀའ་སྤྱི་གཉིས་ཀྱི་སྐུ་ཚབ་ཚོགས་ཆུང་གིས་ཀུན་གཟིགས་༧པཎ་ཆེན་སྐུ་ཕྲེང་བཅུ་གཅིག་པ་མཆོག་གར་སོང་ཆ་མེད་དུ་གྱུར་ནས་མི་ལོ་ ༢༩ འཁོར་བའི་གསར་འགོད་གསལ་བསྒྲགས་ཀྱི་མཛད་སྒོར་མཉམ་ཞུགས་གནང་ཡོད་པ་དང་བསྟུན། ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་དང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་སྒྲོལ་མ་ཚེ་རིང་མཆོག་རྣམ་གཉིས་ཀྱིས་གསུང་བཤད་གནང་ཡོད་འདུག གཞན་སྐུ་ཚབ་ཚོགས་ཆུང་ནས་ཐའེ་ཝན་གྱི་གཞུང་འབྲེལ་གནད་ཡོད་མི་སྣ་སོགས་དང་མཇལ་འཕྲད་ཀྱིས་བོད་དོན་གླེང་སློང་གནང་ཡོད་འདུག  

དམ་འབུལ་མཛད་སྒོའི་ཐོག་སྲིད་འཛིན་མཆོག་གིས། ངས་ཐའེ་ཝན་དང་རྒྱ་ནག་གཉིས་ཀྱིས་ཁུལ་འདིར་ཞི་བདེ་དང་བརྟན་བརླིང་ཡོང་བར་འགན་ཁུར་དགོས་པ་དང་། རྒྱ་ནག་གིས་གོ་ལ་འདི་འཇིགས་སྐྲག་དང་དམག་འཁྲུག་མེད་པའི་ངེས་ཤེས་ཤིག་སྐྱེ་འཇུག་དགོས་པའི་ནན་སྐུལ་བྱེད་ཀྱི་ཡོད། ཅེས་དང་། རྒྱ་ནག་གཞུང་གི་གནོན་ཤུགས་ཀྱིས་ཐའེ་ཝན་ཡམ་ཡོམ་དུ་གཏོང་མི་ཐུབ་པས། རྒྱ་ནག་གིས་ཐའེ་ཝན་ལ་དམག་དོན་དང་ཆབ་སྲིད་ཀྱི་ཐོག་ནས་ཐེ་ཇུས་བྱེད་མཚམས་གཞག་དགོས་སྐོར་སོགས་གསུངས་འདུག

ཡང་ཁོང་གིས། ཁོང་གི་སྲིད་འཛིན་དུས་ཡུན་རིང་། ཐའེ་ཝན་གཞུང་གིས་ཨ་རི་དང་ཐའེ་ཝན་གཉིས་ཀྱི་འབྲེལ་ལམ་སྲ་བརྟན་དང་། ཁུལ་དེའི་ཚོང་ལས་ཁེ་གཉེར་ཁང་ཁག་ཏུ་མ་འཇོག་བྱས་ཏེ་ཐའེ་ཝན་ཕྱོགས་ཀྱི་ཚོང་དོན་གྱི་གནས་བབ་གོང་མཐོར་གཏང་རྒྱུ་དང་། ལས་མེད་དུ་གྱུར་བའི་ཐའེ་ཝན་གྱི་ན་གཞོན་མང་དག་ཅིག་ལ་ལས་གནས་མཁོ་སྤྲོད། དེ་བཞིན་རྒྱ་ནག་གཞུང་གིས་འཇིགས་སྐུལ་སོགས་ལ་གདོང་ལེན་བྱ་རྒྱུ་ཡིན་སྐོར་སོགས་གསུངས་འདུག

རྒྱ་ནག་གོ་ལའི་དུས་བབ་ཀྱིས་ཐའེ་ཝན་གྱི་སྲིད་འཛིན་གསར་པ་སྐུ་ཞབས་ལེ་ཆིན་ཏི་ཡིས་ཕྱོགས་གཉིས་ཀྱི་མི་མང་གི་ཁྲོད་དུ་འགལ་ཟླ་བཟོ་ཡི་ཡོད་ལུགས་ཀྱི་སྐྱོན་བརྗོད་བྱས་འདུག་ལ།  ཟླ་འདིའི་ཕྱི་ཚེས་ ༡༧ ཉིན་དབྱིན་ཡུལ་གྱི་རྒྱ་ནག་གཞུང་ཚབ་པ་ཡང་ཞོ་ཀང་(Yang Xiaoguang) ཟེར་བ་དེས་གསར་འགོད་གསལ་བསྒྲགས་ཤིག་གི་སྟེང་། སྐུ་ཞབས་ལེ་ཆིན་ཏི་ཡིས་ཐའེ་ཝན་མི་མང་གི་གནད་དོན་ལ་སེམས་ཁུར་བླངས་ཏེ་དོ་ནན་ཙམ་གནང་དགོས་ལུགས་དང་། དབྱིན་ཡུལ་གཞུང་གིས་སྲིད་འཛིན་དམ་འབུལ་མཛད་སྒོར་སྐུ་ཚབ་ཚོགས་ཆུང་གཏོང་མི་རུང་བ་སོགས་བཤད་འདུག དེ་བཞིན་བདུན་ཕྲག་སྔ་མའི་གཟའ་མཇུག་ཏུ་རྒྱ་ནག་བཅིངས་གྲོལ་དམག་མི་ཟེར་བས་ཉུང་མཐར་མཁའ་དམག་གནམ་གྲུ་ ༡༤ ལྷག་གིས་ཐའེ་ཝན་གྱི་མཁའ་དབྱིངས་སུ་འཕུར་སྐྱོད་ཀྱིས་འཇིགས་སྐུལ་བྱས་ཡོད་འདུག

འདི་ལོའི་ཕྱི་ཟླ་ ༡ ཚེས་ ༡༣ ཉིན་ཐའེ་ཝན་འོས་བསྡུ་ལྷན་ཁང་ནས་སྲིད་འཛིན་འོས་བསྡུ་ཆེན་མོའི་གྲུབ་འབྲས་ཡོངས་ཁྱབ་གསལ་བསྒྲགས་བྱས་ཏེ།  འདས་ལོའི་ཐའེ་ཝན་གྱི་སྲིད་འཛིན་འོས་བསྡུར་འོས་འཕེན་ཐོ་འགོད་བྱེད་མཁན་ ༡༩,༥༤༨,༥༣༡ བྱུང་སྟེ་བརྒྱ་ཆ་ ༧༢ ཟིན་པའི་ཁྲོད། གོ་མིན་ཏང་སྲིད་དོན་ཚོགས་པའི་སྲིད་འཛིན་འོས་མི་ཧུའུ་ཡུག་ཡས་(侯友宜)ལགས་ལ་འོས་གྲངས་ ༤,༦༧༡,༠༢༡  སྟེ་འོས་ཀྱི་བརྒྱ་ཆ་ ༣༣། ༤༩ དང་།  ཐའེ་ཝན་མི་མང་སྲིད་དོན་ཚོགས་པའི་སྲིད་འཛིན་འོས་མི་ཁི་ཝན་ཌི (柯文哲) ལགས་ལ་འོས་གྲངས་ ༣,༦༩༠,༤༦༦ སྟེ་འོས་ཀྱི་བརྒྱ་ཆ་ ༢༦། ༤༦ དང་། དམངས་གཙོ་ཡར་ཐོན་སྲིད་དོན་ཚོགས་པའི་སྲིད་འཛིན་འོས་མི་ལེ་ཆིན་ཏི་(賴清德) ལགས་ལ་འོས་གྲངས་ ༥,༥༨༦,༠༡༩ དང་འོས་ཀྱི་བརྒྱ་ཆ་ ༤༠། ༠༥ ཐོབ་སྟེ་སྲིད་འཛིན་དུ་བདམས་ཐོན་བྱུང་འདུག

སྐུ་ཞབས་ལེ་ཆིན་ཏི་མཆོག་ནི་ཕྱི་ལོ་ ༡༩༥༩ ཟླ་ ༡༠ ཚེས་ ༦ ཉིན་ཐའེ་པའེ་རྫོང་གི་བྱང་ཁུལ་དུ་རྡོ་སོལ་སྔོག་འདོན་གྱི་བྱེད་མཁན་གྱི་ཁྱིམ་ཚང་ཕལ་བ་ཞིག་ཏུ་སྐྱེས་ཤིང་།  ཆུང་དུས་ཐའེ་པའེ་གྲོང་ཁྱེར་དུ་སློབ་གྲྭར་འགྲིམས་རྗེས། ཐའེ་ནན་ (Tainan) གྱི་རྒྱལ་ཡོངས་ཁྲིན་ཁུང་གཙུག་ལག་སློབ་ཆེན་(National Cheng Kung Univertsity) དུ་སློབ་སྦྱོང་གནང་། དེ་ནས་ཐའེ་པའེ་རུ་ཡོད་པའི་ཐའེ་ཝན་རྒྱལ་ཡོངས་མཐོ་རིམ་སློབ་གཉེར་ཁང་དུ་སློབ་སྦྱོང་གནང་རྗེས། ཧར་ཝར་ཌི་(Harvard) གཙུག་ལག་སློབ་ཆེན་དུ་མང་ཚོགས་ཀྱི་འཕྲོད་བསྟེན་ཐོག་ལ་གཙུག་ལག་རབ་འབྱམས་པའི་སློབ་སྦྱོང་གནང་། ཁོང་ནི་ཐའེ་ཝན་གྱི་སྲིད་དོན་པ་དང་། སྨན་པ་ཟུར་པ། དེ་བཞིན་ཐའེ་ཝན་གྱི་སྲིད་འཛིན་གཞོན་པ་ཟུར་བ་སོགས་ཡིན་པ་རེད།

གསར་འགོད་པ། དཔལ་ལྡན།

རྩོམ་སྒྲིག་བྱེད་མཁན། པདྨ་མཚོ།