༧གོང་ས་རྒྱལ་བ་རིན་པོ་ཆེ་མཆོག་གིས་དཔལ་ནལེནྡྲ་ནས་བརྒྱུད་པའི་སེམས་ཀྱི་སྦྱོང་བརྡར་བྱེད་པར་ཤིན་ཏུ་ཞིབ་ཚགས་དང་སྤུས་དག་པོ་ཡོད་པས་ཆོས་དད་མེད་མཁན་ཚོས་ཆོས་རྨོངས་དད་རེད་ཟེར་བ་དེར་རྒྱུ་མཚན་ཅི་ཡང་མེད་སྐོར་གསུངས།
དེ་རིང་སྔ་དྲོར་དྷ་ས་བཞུགས་སྒར་རྒྱལ་བའི་ཕོ་བྲང་དུ། ༧གོང་ས་རྒྱལ་བ་རིན་པོ་ཆེ་མཆོག་ནས་ཀོ་རི་ཡ་དང་། ཐའེ་ཝན། མཱ་ལེ་ཞི་ཡ། ཝི་ཌི་ནམ། སོག་ཡུལ། ཨ་རི་སོགས་ནས་ཡོང་བའི་བལ་ཡུལ་དཱི་པངྐ་ར་ནང་པའི་ལྟེ་གནས་ཁང་(Dipankara Buddhist Center) གི་དབུ་འཁྲིད་ཁང་སེར་རིན་པོ་ཆེ་མཆོག་གི་དབུས་དད་ལྡན་དོན་གཉེར་ཅན་ ༤༠༠ ལྷག་ལ་མཇལ་ཁ་བསྩལ་སྐབས་སངས་རྒྱས་ཆོས་ཚོགས་མ་དང་། དམིགས་བརྩེ་མའི་ལྗགས་ལུང་བསྩལ་ཡོད་འདུག
༧གོང་ས་རྒྱལ་བ་རིན་པོ་ཆེ་མཆོག་ནས། སངས་རྒྱས་བཅོམ་ལྡན་འདས་སྐུ་མྱ་ངན་ལས་འདས་ནས་ལོ་སྟོང་ཕྲག་ཕྱིན་པ་རེད། སངས་རྒྱས་བཅོམ་ལྡན་འདས་ཀྱི་ཆོས་ང་ཚོར་འབྲེལ་བ་ཤིན་ཏུ་ཡོད་པ་ཞིག་རེད། ངོས་རང་ལ་ཆ་བཞག་པ་ཡིན་ན། ཞོགས་པ་གཉིད་སད་པ་དང་མཉམ་དུ་སྟོང་ཉིད་ལྟ་བ་དང་བྱང་ཆུབ་ཀྱི་སེམས་ལ་བསམ་བློ་གཏོང་བཞིན་ཡོད། སྟོན་པའི་བསླབ་བྱ་གཙོ་བོའང་དེ་དག་ཆགས་བསྡད་ཡོད། གང་ལྟར་སེམས་ཀྱི་ཞི་བདེ་ཡོང་རྒྱུ་དེ་རེད། སེམས་ཀྱི་ཞི་བདེ་ལ་བརྟེན་ནས་ལུས་བདེ་ཐང་ཡོང་བར་ཤིན་ཏུ་ཕན་ཐོགས་ཀྱི་ཡོད། སྟོན་པ་བཅོམ་ལྡན་གྱི་བསླབ་བྱ་དད་པ་གཅིག་པོ་མ་རེད། བསམ་བློ་གཏོང་སྟངས་ཀྱི་ཐོག་གལ་ཆེན་པོ་རེད། སྟོན་པའི་བསླབ་བྱ་ནལེནྡྲ་ནས་བརྒྱུད་པའི་སེམས་ཀྱི་སྦྱོང་བརྡར་བྱེད་པར་ཤིན་ཏུ་ཞིབ་ཚགས་དང་སྤུས་དག་པོ་འདུག དེ་དག་ཚན་རིག་དང་མཐུན་པར་རིག་པའི་ཐོག་བསམ་བློ་གཏོང་རྒྱུ་ཡོད་པ་ཞིག་རེད། གང་ལྟར་ནལེནྡྲའི་ཆོས་བརྒྱུད་ཀྱི་སེམས་ཀྱི་སྦྱོང་བརྡར་བྱེད་པ་ཤིན་ཏུ་ཕན་ཐོགས་འདུག
ནང་པའི་གཞུང་ནས་གསུངས་ཡོད་པ་དག་དད་པ་གཅིག་པོའི་སྐད་ཆ་མ་རེད་ལ། རྨོངས་དད་མ་རེད། རིག་པའི་ཐོག་ནས་བསམ་བློའི་འགྲོ་སྟངས་ཤིན་ཏུ་ཟབ་མོ་རེད། ཚན་རིག་པ་དང་ཆོས་ལ་དད་པ་མེད་མཁན་སོགས་མི་མང་པོར་ཐུག་པའི་སྐབས། ང་ཚོ་བོད་ལ་ཡོད་བསྡད་པའི་དཔལ་ནལེནྡྲའི་ཆོས་བརྒྱུད་ཀྱི་འགྲོ་སྟངས་དེ་ཤིན་ཏུ་ཟབ་པོ་རེད། སྔོན་མ་མའོ་ཙེ་ཏུང་གིས་ངོས་རང་ལ་ཆོས་ཟེར་བ་དེ་དུག་རེད་ཅེས་བཤད་པ་རེད། ཆོས་ཟེར་བ་གང་ལ་བཤད་ཀྱི་ཡོད་མེད་ཁྱོན་ནས་ཤེས་ཀྱི་ཡོད་པ་མ་རེད། དཔལ་ནལེནྡྲ་ནས་བརྒྱུད་པའི་ཆོས་བརྒྱུད་དེ་རིག་པ་དང་ལྡན་པའི་བསམ་བློ་བཏང་ཡོད་པ་མ་ཟད། སེམས་ཁམས་རིག་པའི་ཐོག་ནས་ཧ་ཅང་ཟབ་པོ་རེད། དེང་སང་ཚན་རིག་པ་མང་པོ་ཞིག་ངོས་རང་ཐུག་ཏུ་ཡོང་སྟེ། སེམས་ཀྱི་ཞི་བདེ་ག་འདྲ་འགྲོ་ཡི་ཡོད་པ་དང་། སེམས་ཀྱི་ཞི་བདེ་ག་འདྲ་དཀྲུག་གི་ཡོད་པར་གོ་བསྡུར་བྱེད་པར་མང་པོ་ཡོང་གི་འདུག དཔལ་ནལེནྡྲའི་ཆོས་བརྒྱུད་ཀྱི་རིག་པ་བཏང་ནས་འགྲོ་རྒྱུ་ཡོད་པ་དེ་ཤིན་ཏུ་ཡག་པོ་རེད། ཅེས་གསུངས་སོང་།
ཡང་མགོན་པོ་གང་ཉིད་མཆོག་ནས། ངོས་རང་ལ་ཆ་བཞག་ན། ཆོས་ཚང་མར་གུས་ཞབས་བྱེད་ཀྱི་ཡོད། ཡིན་ནའང་ནལེནྡྲའི་ཆོས་དེ་སེམས་ཀྱི་སྦྱོང་བརྡར་བྱེད་རྒྱུ་ཡོད་པ་ཞིག་རེད། དཀོན་མཆོག་མཁྱེན་ཟེར་བ་མིན་པར་བསམ་བློར་སྦྱོང་བརྡར་བྱེད་རྒྱུ་དེ་ཤིན་ཏུ་གལ་ཆེན་པོ་རེད། དེང་སང་ཚན་རིག་པ་ཚོས་སེམས་ཀྱི་སྦྱོང་བརྡར་བྱེེད་པར་སེམས་གང་གིས་དཀྲུག་གི་ཡོད་པ་དང་། སེམས་ཀྱི་ཞི་བདེ་གང་འདྲ་དགོས་པ་སོགས་ལ་བརྟག་དཔྱད་བྱེད་ཀྱི་ཡོད། ཚན་རིག་པ་དང་ང་ཚོ་ནང་པའི་གཞུང་ནས་གསུངས་ཡོད་པ་གཉིས་འདྲ་བོ་ཆགས་ཡོང་གི་འདུག ཆོས་དད་མེད་མཁན་ཚོས་ཆོས་ནི་རྨོངས་དད་རེད་ཟེར་བ་དེ་ལ་རྒྱུ་མཚན་ཁྱོན་ནས་ཡོད་པ་མ་རེད། ཆོས་ལ་བསམ་བློའི་སྦྱོང་བརྡར་ཐོག་ནས་ཤིན་ཏུ་ཞིབ་ཚགས་པོ་རེད། ཅེས་གསུངས་སོང་།
གསར་འགོད་པ། བྱམས་པ་ཚེ་རིང་།
རྩོམ་སྒྲིག་བྱེད་མཁན། པདྨ་མཚོ།
