རྒྱ་ནག་གཞུང་གིས་རྒྱ་ནག་ནང་བསྟན་མཐུན་ཚོགས་བེད་སྤྱད་ཀྱིས་བོད་བརྒྱུད་ནང་བསྟན་རྒྱ་ནག་ཅན་དུ་བསྒྱུར་བཞིན་ཡོད་འདུག
རྒྱལ་སྤྱིའི་བོད་དོན་ལས་འགུལ་ཁང་གིས་བོད་བརྒྱུད་ནང་བསྟན་དང་འབྲེལ་བའི་སྙན་ཐོ་ཞིག་བཏོན་པའི་ནང་། ཞི་ཅིན་ཕིན་རྒྱ་ནག་གི་སྲིད་འཛིན་ཆགས་པ་ནས་བོད་བརྒྱུད་ནང་བསྟན་ཀྲུང་གོ་ཅན་ནམ་རྒྱ་ནག་ཅན་དུ་བསྒྱུར་ཐབས་ཀྱི་སྲིད་ཇུས་བཏིང་དང་འདིང་མུས་ཡིན་པ་ལྟར། ད་ལྟའི་ཆར་རྒྱ་ནག་གཞུང་གིས་རྒྱ་ནག་ནང་བསྟན་མཐུན་ཚོགས་བེད་སྤྱད་ཀྱིས། བོད་བརྒྱུད་ནང་བསྟན་རྒྱ་ནག་ཅན་དུ་བསྒྱུར་ཐབས་ཀྱི་སྲིད་ཇུས་དྲིལ་བསྒྲགས་མང་པོ་ལག་བསྟར་བྱེད་བཞིན་ཡོད་སྐོར་བརྗོད་འདུག
དེ་འབྲེལ་གྱི་སྙན་ཐོར་གཞིགས་ན། རྒྱ་ནག་ནང་བསྟན་མཐུན་ཚོགས་ནི་ཆབ་སྲིད་དང་འབྲེལ་བ་མེད་ཅིང་གཞུང་ཁོངས་མིན་པའི་ཚོགས་སྡེ་ཞིག་ཡིན་ཡང་། ད་ལྟ་དོན་དངོས་ཐོག་རྒྱ་ནག་དམར་ཤོག་ཚོགས་པས་རྒྱ་ནག་ནང་བསྟན་མཐུན་ཚོགས་དེ་བོད་བརྒྱུད་ནང་བསྟན་རྒྱ་ནག་ཅན་དུ་བསྒྱུར་ཐབས་ཀྱི་ལག་ཆར་བེད་སྤྱོད་ཤུགས་ཆེན་གཏོང་གི་ཡོད་པ་མངོན་གསལ་ཆགས་ཡོད་པ་དང་། དམིགས་བསལ་གྱིས་བོད་བརྒྱུད་ནང་བསྟན་གྱི་སྤྲུལ་སྐུའི་ལམ་ལུགས་ལས་སྤྲུལ་སྐུའི་ཡང་སྲིད་རྩད་གཅོད་དང་ངོས་འཛིན་བྱེད་ཕྱོགས་སོགས་ཀྱི་ཐོག་ཤུགས་རྐྱེན་སྤྲོད་ཐབས་བྱེད་བཞིན་ཡོད་པ་མ་ཟད། རྒྱ་ནག་ནང་བསྟན་མཐུན་ཚོགས་ལ་བོད་ཀྱི་དགོན་སྡེ་ཁག་ཏུ་དམར་ཤོག་ཚོགས་པའི་བཀོད་ཁྱབ་ལག་བསྟར་བྱེད་ཕྱོགས་དང་འབྲེལ་ལྟ་རྟོག་བྱེད་མཁན་གྱི་ལས་དོན་ཚོགས་ཆུང་དམིགས་བསལ་ཞིག་ཀྱང་ཡོད་པ་རེད།
སྙན་ཐོ་དེའི་ནང་། ཕྱི་ལོ་ ༢༠༢༠ ལོར་རྒྱ་ནག་གཞུང་གིས། རྒྱ་ནག་ནང་བསྟན་མཐུན་ཚོགས་དེ་གཞུང་གི་སྲིད་ཇུས་ནང་འཁྲིད་ཡོང་སྟེ། ཞི་ཅིན་ཕིན་གྱི་དུས་སྐབས་གསར་བའི་སྤྱི་ཚོགས་རིང་ལུགས་ཀྱི་དགོངས་པ་ཟེར་བའི་འོག་ནས་དམར་ཤོག་ཚོགས་པའི་ལས་དོན་ལ་རྒྱབ་སྐྱོར་བྱས་ཏེ། རྒྱ་ནག་ནང་ཡོད་པའི་ནང་བསྟན་ཆོས་ལུགས་རྒྱ་ནག་ཅན་དུ་བསྒྱུར་བར་སྐུལ་འདེད་དང་འགན་འཁུར་དགོས་པའི་གཏན་འབེབ་བྱས་ཡོད་པ་རེད།
དེང་སྐབས་རྒྱ་ནག་ནང་བསྟན་མཐུན་ཚོགས་ཀྱི་ཆབ་སྲིད་ཀྱི་སྐད་ངར་ཆེ་ཞིང་དམར་ཤོག་ཚོགས་པའི་ཆབ་སྲིད་ཀྱི་དྲིལ་བསྒྲགས་རིགས་འཛེམ་ཟོན་མེད་པར་སྒྲོག་གིན་ཡོད། དོན་དངོས་ཐོག་རྒྱ་ནག་ནང་བསྟན་ཚོགས་ནི་ཆོས་ལུགས་གཙོ་བཟུང་གི་སྒྲིག་འཛུགས་ཤིག་ཡིན་མོད། ད་ལྟ་ཚོགས་པ་དེ་དམར་ཤོག་ཚོགས་པའི་ཁོངས་གཏོགས་ཀྱི་ཚོགས་སྡེ་ཞིག་ཏུ་གྱུར་ཏེ། ཉེ་ལམ་ནས་ལོ་ལྔའི་འཆར་གཞི་དང་དགོན་སྡེ་ཁག་རྒྱ་ནག་ཅན་དུ་བསྒྱུར་བའི་དམར་ཤོག་ཚོགས་པའི་ཆབ་སྲིད་ཀྱི་དགོས་མཁོ་སྒྲུབ་བྱེད་བཞིན་ཡོད་སྐོར་བརྗོད་འདུག
སྙན་ཐོ་དང་འབྲེལ། དེ་སྔ་རྒྱ་ནག་གི་ཏའོ་ཆོས་ལུགས་དམར་ཤོག་ཚོགས་པའི་ལྟ་གྲུབ་ཅན་དུ་བསྒྱུར་ཏེ། ད་ལྟ་ཏའོ་ཆོས་ལུགས་ཀྱི་ཚོགས་སྡེ་ཁག་གིས་དམར་ཤོག་ཚོགས་པའི་ཆབ་སྲིད་དྲིལ་བསྒྲགས་བྱེད་པའི་སྣེ་འཁྲིད་ཀྱི་ཡོད་པས། རྒྱ་ནག་གིས་ནང་བསྟན་ཆོས་ལུགས་རྒྱ་ནག་ཅན་དུ་བསྒྱུར་བཞིན་པ་ཙམ་མ་ཡིན་པར། རྗེས་ཕྱོགས་དམར་ཤོག་ཚོགས་པའི་ཆབ་སྲིད་དང་སྲིད་ཇུས་ཀྱི་རིགས་དྲིལ་བསྒྲགས་བྱེད་མཁན་གྱི་ཚོགས་སྡེ་ཞིག་ཏུ་བསྒྱུར་རྒྱུ་ཡིན་སྐོར་ཡང་བརྗོད་འདུག
རྒྱ་ནག་གཞུང་གིས་བོད་བརྒྱུད་ནང་བསྟན་རྒྱ་ནག་ཅན་དུ་བསྒྱུར་བར་བོད་ཀྱི་དགོན་སྡེ་ཁག་གི་སྲོལ་རྒྱུན་གྱི་ལམ་སྲོལ་ལས་ལྷག་པའི་སྡེ་ཚན་གསར་འཛུགས་བྱས་ཏེ་རྒྱ་སྒྱུར་གཏོང་ཐབས་བྱེད་བཞིན་ཡོད་ཅིང་། དམིགས་བསལ་རྒྱ་ནག་ནང་བསྟན་མཐུན་ཚོགས་ལ་བོད་པའི་བླ་སྤྲུལ་འཚོལ་ཞིབ་དང་ངོས་འཛིན་བྱེད་ཕྱོགས་དང་འབྲེལ་བའི་སྦྱོང་བརྡར་རིགས་སྤྲད་ཡོད་སྟབས། ཕུགས་རྒྱང་རིང་བའི་སྲིད་ཇུས་འདིའི་འོག་ནས་༧གོང་ས་རྒྱལ་བ་རིན་པོ་ཆེ་མཆོག་གི་ཡང་སྲིད་ལའང་ཐེ་ཇུས་བྱེད་པའི་གྲ་སྒྲིག་བྱས་དང་བྱེད་མུས་ཡིན་པ་གཏལ་འཁེལ་ཡིན་པ་དང་། དེའི་དཔེ་མཚོན་གཅིག་ནི་ཕྱི་ལོ་ ༡༩༨༩ ལོར་པཎ་ཆེན་རིན་པོ་ཆེའི་ཡང་སྲིད་ལ་ཐེ་གཏོགས་བྱས་པ་དེས་མཚོན་གྱི་ཡོད་སྐོར་སོགས་བརྗོད་འདུག
གསར་འགོད་པ། སྐལ་བཟང་སྦྱིན་པ།
