འདི་ལོའི་ཁོ་པ་ཨ་མེ་རི་ཁའི་རྐང་སྤོལ་རྩེད་འགྲན་གྱི་རྒྱལ་ཁ་ཡང་མེ་སིས་སྣེ་འཁྲིད་པའི་ཨར་ཇིན་ཊི་ན་རུ་ཁག་ལ་འཐོབ་རྒྱུར་རེ་བ་ཆེན་པོ་བཅངས་འདུག
Copa América 2024 to be held in the United States from 20 July 2024
འདི་ལོའི་ཕྱི་ཟླ་ ༦ ཚེས་ ༢༠ ནས་ཟླ་ ༧ ཚེས ༡༤ བར་ཉིན་གྲངས་ ༢༤ རིང་རྒྱལ་སྤྱིའི་ཁོ་པ་ཨ་མེ་རི་ཁ་རྐང་རྩེད་སྤོ་ལོའི་འགྲན་ཚོགས་ (2024 Copa América) དེ་ཨ་རིར་བསྡུ་འཆར་ཡོད་ཅིང་།འདི་ལོའི་རྒྱལ་སྤྱིའི་ཁོ་པ་ཨ་མེ་རི་ཁ་རྐང་རྩེད་སྤོ་ལོའི་རྩེད་འགྲན་དེ་རྐང་སྤོལ་རྩེད་འགྲན་གྱི་ཁྲོད་ཀྱི་སྐར་ཆེན་དུ་འབོད་མུས་ཡིན་པའི་མི་སེ་ཡི་རྩེད་འགྲན་མཐའ་མར་གྱུར་ཉེན་ཡོད་པས། ལྷོ་བྱང་ཨ་མེ་རི་ཁའི་རྒྱལ་ཁབ་ཁག་དང་མེ་སི་ཡི་ཞེན་མི་དག་གིས་ཉིན་མོ་ལག་པར་བགྲངས་ནས་རྩེད་འགྲན་དེར་རེ་སྒུག་བྱེད་མུས་ཡིན་འདུག་ལ། འདི་ལོའི་རྩེད་འགྲན་ཁྲོད་རྒྱལ་ཁབ་ཁག་ནས་དྲག་འདེམས་བྱུང་བའི་རུ་ཁག་ ༡༦ ཡིས་མཉམ་ཞུགས་བྱ་རྒྱུ་ཡིན་འདུག
འདི་ལོར་ཨ་རིས་འགྲན་ཚོགས་ཆེད་ཨ་རིའི་ས་གནས་མི་འདྲ་བ་བཅུ་བཞིའི་ནང་རྐང་སྤོལ་རྩེད་ར་ ༡༤ གོ་སྒྲིག་བྱས་ཡོད་ཅིང་། འདི་ལོའི་རྟིང་རྩོད་ཀྱི་འགྲན་ཚོགས་སུ་ཕྱི་ཟླ་ ༧ ཚེས་ ༡༤ ཉིན་ཨ་རི་ལྷོ་ཤར་ཁུལ་དུ་ཆགས་པའི་ཧར་ཌི་རོག་རྩེད་ར་ (Hard Rock Stadium) རུ་བསྡུ་འཆར་ཡོད་ཅིང་། རྩེད་ར་དེའི་ནང་ལྟད་མོ་བ་མི་གྲངས་ ༦༤༧༦༧ ཤོང་གི་ཡོད་འདུག་ལ། རྩེད་ར་དེ་ནི་ཨ་རིའི་རྐང་སྤོལ་རྩེད་ར་ཆེས་ལེགས་ཤོས་གྲས་ཤིག་ཡིན་འདུག
ཟླ་འདིའི་ཕྱི་ཚེས་ ༡༣ ཉིན་འཛམ་གླིང་རྩེད་རིགས་དཔྱད་བརྗོད་སྤེལ་ས་ (sportskeeda ) ཟེར་བ་ཞིག་གིས་འདི་ལོའི་ཁོ་པ་ཨ་མེ་རི་ཁའི་རྐང་སྤོལ་ཐད་ལ་དཔྱད་བརྗོད་ཅིག་བྱས་པའི་ནང་། ཐོག་མའི་རྩེད་འགྲན་གྱི་རིམ་པ་དང་། རྩེད་འགྲན་པ་རྣམས་ཀྱི་ནུས་རྩལ་དང་དྲག་འདེམས་ཀྱི་རིམ་པ། རུ་ཁག་སྤྱི་ཡོངས་ཀྱི་རྩེད་འགྲན་པ་རྣམས་ལ་གཞིགས་ནས། འདི་ལོའི་རྩེད་འགྲན་དེ་རྒྱལ་ཁབ་དེ་ཐེངས་སྔ་མའི་རྩེད་འགྲན་དེའི་གསེར་འབུམ་བཀྱག་མཁན་ཨན་ཇིན་ཊི་ན་ (Argentina) དང་ཨང་གཉིས་པ་ཐོབ་མཁན་བྷི་ར་ཛིལ་(Brazil) དེ་བཞིན་ཡུ་རོ་གྷེ་(Uruguay )། ཁོ་ལོམ་བྷི་ཡ་(Colombia) ། ཨེ་ཁེ་ཌོ་(Ecuador) གང་རུང་ཞིག་འཐོབ་སྲིད་པའི་ཚོད་དཔག་བྱེད་ཀྱི་ཡོད་འདུག་ལ། འདི་ལོའི་ཆེས་རྣོ་ངར་ཆེ་བའི་རྩེད་འགྲན་ནམ་ Group of Death ནི་སྡེ་ཚན་ང་པ་སྟེ། བྷི་ར་ཛིལ་དང་། ཁོ་ལོམ་བྷི་ཡ། པ་ར་བྷེ་ཡ་བཅས་ཀྱི་རྩེད་འགྲན་དེ་ཡིན་པར་ངོས་འཛིན་བྱེད་ཀྱི་ཡོད་འདུག
སྤྱིར་རྐང་སྤོལ་གྱི་རིག་གཞུང་ཧ་ཅང་དར་ཁྱབ་ཆེ་བའི་ལྷོ་བྱང་ཨེ་མེ་རི་ཁའི་གླིང་ཕྲན་གྱི་རྩེད་འགྲན་དེ་འཚོགས་པར་ཉིན་ཤས་ལས་མེད་པས། རྐང་སྤོལ་དཔྱད་བརྗོད་པ་དང་རྩེད་རིགས་ལ་དགའ་མཁན་དག་གིས་དབྱེ་ཞིབ་བྱེད་མུས་ཡིན་ཡང་། སྐབས་ལན་རེར་དཔྱད་བརྗོད་པ་དག་གི་བློ་ཡུལ་ལ་ཤོང་དཀའ་བའི་གྲུབ་འབྲས་ཐོན་ཡོད་དེ། ཕྱི་ལོ་ ༢༠༢༢ ལོར་ཁ་ཌར་དུ་འཚོགས་པའི་རྒྱལ་སྤྱིའི་རྐང་སྤོལ་འགྲན་བསྡུར་ཁྲོད། འཛམ་གླིང་རྐང་སྤོལ་རྩེད་འགྲན་གྱི་སྐར་ཆེན་དུ་འབོད་པའི་མེ་སི་ཡིས་སྣེ་འཁྲིད་པའི་ཨར་ཇིན་ཊི་ན་རུ་ཁག་དང་དཀྱིལ་ཤར་ཨེ་ཤ་ཡའི་ཁ་ཌར་རྒྱལ་ཁབ་ཀྱི་རུ་ཁག་བར་རྩེད་འགྲན་བྱས་པའི་ཁྲོད། ཁ་ཌར་རུ་ཁག་གིས་སྤོ་ལོ་གཉིས་བླུགས་ནས་རྩེད་འགྲན་ལས་རྒྱལ་ཡོད་པས། དེ་ནི་འཛམ་གླིང་རྐང་སྤོལ་རྩེད་འགྲན་གྱི་ལོ་རྒྱུས་ཁྲོད་ལྟད་མོ་བ་རྣམས་ཀྱིས་ཆེས་ཡིད་ཆེས་བྱེད་པར་དཀའ་བའི་རྩེད་འགྲན་ཞིག་ཏུ་ངོས་འཛིན་བྱེད་ཀྱི་ཡོད།
སྤྱིར་མེ་སི་ཡི་ལོ་ཚད་ཀྱི་དབང་གིས་འདི་ལོའི་ཁོ་པ་ཨ་མེ་རི་ཁ་ནི་ཁོང་གི་རྒྱལ་སྤྱིའི་རང་བཞིན་ལྡན་པའི་རྩེད་འགྲན་མཐའ་མར་འགྱུར་སྲིད་པའི་ཚོད་དཔག་བྱེད་ཀྱི་ཡོད་ཀྱང་། ཟླ་འདིའི་ཕྱི་ཚེས་ ༡༣ ཉིན་ཧྥོག་སི་རྩེད་རིགས་ (Fox Sports) གསར་ཁང་གིས་གནས་ཚུལ་སྤེལ་བའི་ནང་། མེ་སི་ཡི་ད་ལྟའི་གཟུགས་པོའི་གནས་བབ་དང་། རྐང་སྤོལ་སྒྱུ་རྩལ། དེ་བཞིན་རྩེད་འགྲན་ཁག་གི་གནས་བབ་བཅས་དང་། ལྷག་པར་༢༠༢༦ ལོའི་རྒྱལ་སྤྱིའི་རྐང་སྤོལ་འགྲན་ཚོགས་སྐབས་ཁོང་ལོ་ ༣༩ ལས་མིན་པས། ཁོས་འདི་ལོའི་ཁོ་པ་ཨ་མེ་རི་ཁའི་རྩེད་འགྲན་ཙམ་དུ་མ་ཟད། ཕྱི་ལོ་ ༢༠༢༦ ལོར་མེག་སི་ཁོ་དང་། ཨ་རི། ཁེ་ན་ཌ་བཅས་ཀྱིས་མཉམ་རུབ་ཀྱིས་གོ་སྒྲིག་བྱ་རྒྱུའི་རྒྱལ་སྤྱིའི་སྐྱེས་པའི་རྐང་སྤོལ་རྩེད་འགྲན་ཁྲོད་དུའང་ཞུགས་རྒྱུ་ཡིན་པའི་ཚོད་དཔག་བྱས་ཡོད་འདུག
ཕྱི་ལོ་ ༡༩༡༦ ཙམ་ནས་ཁོ་པ་ཨ་མེ་རི་ཁའི་རྩེད་འགྲན་དེེ་ཐོག་མར་རྩེད་མགོ་བཙུགས་ཡོད་ཅིང་། དེ་ནས་བཟུང་ལོ་བཞི་རེའི་མཚམས་སུ་ལོ་ལྟར་རྩེད་འགྲན་དེ་བསྡུ་ཡི་ཡོད་ལ། རྩེད་འགྲན་དེའི་ཁྲོད་ཨར་ཇིན་ཌི་ན་དང་། ཡུ་རོ་གྷེ་གཉིས་ཀྱིས་ཐེངས་བཅོ་ལྔ་དང་། བྷི་ར་ཛིལ་ལ་ཐེངས་དགུ་ལ་རྟིང་རྩོད་འགྲན་ཚོགས་ལ་རྣམ་པར་རྒྱལ་ཡོད་ཅིང་། ཕྱི་ལོ་ ༢༠༢༨ ལོའི་རྩེད་འགྲན་དེ་པ་ན་མ་རྒྱལ་ཁབ་ཀྱིས་གོ་སྒྲིག་བྱ་རྒྱུ་ཡིན་འདུག
འདི་ལོའི་རྩེད་འགྲན་ཁྲོད་མི་སི་ནི་སྐར་ཆེན་ལྟ་བུའི་རྐང་སྤོལ་བ་དེ་ཡིན་ཞིང་། ཕྱི་ལོ་ ༢༠༢༡ ལོར་ཨ་མེ་རི་ཁའི་གླིང་ཕྲན་རྒྱལ་ཁབ་ཁག་གི་ཆེས་མཐོ་བའི་ཁོ་པ་ཨ་མེ་རི་ཁའི་རྩེད་འགྲན་ཁྲོད། མེ་སི་ཡིས་ཨར་ཇིན་ཊི་ནའི་རུ་དཔོན་གྱི་དཔུང་རྟགས་བཏགས་ནས་རྩེད་འགྲན་རིམ་པའི་བཞུད་ལམ་དུ་ཆས་མཐར། ཨར་ཇིན་ཊི་ན་དང་བྷར་ཛིལ་གཉིས་ཀྱིས་མཐའ་མའི་རྩེད་འགྲན་གྱི་རྒྱལ་ཕམ་བརྩད་དེ། ཨར་ཇིན་ཊི་ནར་སྤོ་ལོ་གཅིག་གིས་རྒྱལ་ཁ་ཐོབ་ཅིང་། ཕྱི་ལོ་ ༢༠༢༢ ལོར་ཁ་ཌར་དུ་འཚོགས་པའི་རྒྱལ་སྤྱིའི་རྐང་སྤོལ་འགྲན་ཚོགས་ལས་རྣམ་པར་རྒྱལ་ཡོད་པས། རྒྱལ་ཁ་དེ་གཉིས་ནི་མེ་སི་ཡི་ཆེས་མཐའ་མཇུག་གི་རྨི་ལམ་མངོན་གྱུར་བྱུང་བ་ལྟ་བུ་ཞིག་ཡིན་ཡང་། འདི་ལོར་ཁོང་གིས་སྣེ་འཁྲིད་པའི་ཨར་ཇིན་ཊི་ན་རུ་ཁག་ནི་རྩེད་རིགས་ཆེད་མཁས་པ་མང་མོས་རྒྱལ་ཁ་འཐོབ་རྒྱུར་རེ་བ་ཆེ་ཤོས་བཅངས་སའི་རུ་ཁག་དེ་ཡིན་པ་རེད།
གསར་འགོད་པ། དཔལ་ལྡན།
རྩོམ་སྒྲིག་བྱེད་མཁན། པདྨ་མཚོ།
