ཨ་རུ་ན་ཅལ་གཞུང་གིས་ཁུལ་དེའི་བོད་མི་རྣམས་ཀྱི་བོད་དོན་འཐབ་རྩོད་དང་མིའི་གཞི་རྩའི་འཚོ་བ་སོགས་ཀྱི་ཐད་ལ་རོགས་འདེགས་གནང་རྒྱུ་ཡིན་སྐོར་བརྗོད་འདུག
President and Members of Tibet Support Group of Arunachal Pradesh Visit Tenzingang Tibetan Settlement Office
དེ་རིང་རྒྱ་གར་ཨ་རུ་ན་ཅལ་དུས་བབ་ཀྱིས་གནས་ཚུལ་སྤེལ་བའི་ནང་། ཁ་སང་ཕྱི་ཚེས་ ༢༤ ཉིན་རྒྱ་གར་བྱང་ཤར་ཨ་རུ་ན་ཅལ་མངའ་སྡེའི་བོད་དོན་རྒྱབ་སྐྱོར་ཚོགས་པ་དང་། ས་གནས་མགོ་འཛིན་ལས་ཁུངས་གཉིས་ཀྱི་གོ་སྒྲིག་འོག ནུབ་ཁ་མིང་(West Kameng) རྫོང་ཁོངས་སུ་བོད་དོན་རྒྱབ་སྐྱོར་ཚོགས་འདུ་ཞིག་སྐོང་འཚོག་གནང་ཡོད་ཅིང་། ལྷན་ཚོགས་དེར་རྒྱ་གར་གྱི་གྲོས་ཚོགས་འཐུས་མི་ཟུར་བ་དང་བོད་དོན་རྒྱབ་སྐྱོར་བ་སྐུ་ཞབས་ཨར་ཀི་ཁྲི་མེས་ལགས་དང་། བོད་དོན་རྒྱབ་སྐྱོར་ཚོགས་པའི་དྲུང་ཆེ་ཉི་མ་སེངྒེ་ལགས། བསྟན་འཛིན་སྒང་ས་གནས་མགོ་འཛིན་རབ་བརྟན་ཚེ་རིང་ལགས་སོགས་ཀྱིས་མཉམ་ཞུགས་གནང་འདུག
སྐབས་དེར་བོད་དོན་རྒྱབ་སྐྱོར་ཚོགས་པ་དེའི་ཚོགས་གཙོ་ཏག་ཏ་རག་ (Tarh Tarak) ལགས་ཀྱིས། ཉ་ེལམ་ཁོང་ཉིད་ཧིན་བོད་མཐའ་མཚམས་ཁུལ་དུ་བཅར་ནས། མཐའ་མཚམས་ཀྱི་མི་མང་རྣམས་དང་འབྲེལ་འདྲིས་བྱས་པ་བརྒྱུད། རང་ཉིད་ལ་བོད་དོན་རྒྱབ་སྐྱོར་བྱེད་པར་སྔར་མེད་ཀྱི་སྙིང་སྟོབས་ཤིག་སྦྱིན་ཡོད་པའི་སྐོར་དང་། བོད་དང་མོན་པའི་བར་གནའ་ནས་མཛའ་འབྲེལ་ཧ་ཅང་ཆེན་པོ་ཡོད་པ་མ་ཟད། ཨ་རུ་ན་ཅལ་གཞུང་གིས་ཁུལ་དེའི་བོད་མི་རྣམས་ཀྱི་བོད་དོན་འཐབ་རྩོད་དང་། མིའི་གཞི་རྩའི་འཚོ་བ་སོགས་ཀྱི་ཐད་ལ་རོགས་འདེགས་གནང་རྒྱུ་ཡིན་སྐོར་སོགས་བརྗོད་འདུག
ཡང་ཁོང་གིས། རྒྱ་ནག་གཞུང་གིས་བོད་ས་བཙན་འཛུལ་བྱས་པ་གཙོས། བོད་ཀྱི་གནད་དོན་རྣམས་འཛམ་གླིང་གི་གླེང་སྟེགས་འདྲ་མིན་དུ་གླེང་སློང་དང་གོ་རྟོགས་སྤེལ་བའི་ལས་འགུལ་མང་དག་ཅིག་གཉེར་དགོས་པ་དང་། བོད་ཀྱི་གཞོན་སྐྱེས་རྣམས་ལའང་བོད་དོན་ཐད་ནས་གོ་རྟོགས་གང་མང་སྤེལ་རྒྱུ་ཧ་ཅང་གལ་ཆེན་པོ་ཡིན་སྐོར་སོགས་བརྗོད་འདུག་ལ། དེ་བཞིན་ལྷན་ཚོགས་དེའི་ཐོག་བོད་དོན་རྒྱབ་སྐྱོར་ཚོགས་པའི་དྲུང་ཆེ་ཉི་མ་སེངྒེ་ལགས་དང་། ཚེ་རིང་དབང་མོ་ལགས་སོགས་ཀྱིས་གཏམ་བཤད་གནང་འདུག
སྤྱིར་འདས་པའི་ལོ་ཤས་རིང་བོད་ཧིན་མཐའ་མཚམས་སུ་རྒྱ་དཀར་ནག་གི་དམག་མིའི་བར་གདོང་ཐུག་ལན་མང་བྱུང་ནས་ཕྱོགས་གཉིས་ཀྱི་དམག་དོན་གྱི་འབྲེལ་ལམ་ཇེ་ཞན་དུ་འགྲོ་མུས་ཡིན་པའི་ཁར། ཕྱི་ལོ་ ༢༠༢༢ ལོའི་ཟླ་ ༡༢ ནང་རྒྱ་གར་གྱི་ཨ་རུ་ནཱ་ཅལ་མངའ་སྡེའི་ཤར་ཕྱོགས་ཡང་རྩེ་ས་ཁུལ་དུ། རྒྱ་དཀར་ནག་གཉིས་ཀྱི་དམག་མི་གདོང་ཐུག་བྱུང་བའི་ཁྲོད། རྒྱ་གར་གྱི་དམག་མི་ ༦ དང་རྒྱ་ནག་གི་དམག་མི་ ༩ ཙམ་ལ་རྨས་སྐྱོན་ཕོག་པའི་གནས་ཚུལ་ཐོན་ཡོད་པ་རེད། འདི་ལོ་རྒྱ་ནག་གཞུང་གིས་བོད་ལྷོ་རྒྱུད་ཁུལ་གྱི་ས་ཁུལ་ཁག་ཅིག་ལ་མིང་གསར་པ་བཏགས་ནས་ཁ་གསབ་བྱས་ཡོད་ལུགས་ཀྱི་ཐོ་གཞུང་ཞིག་ཕྱིར་བསྒྲགས་བྱས་ཏེ། རྒྱ་གར་ཨ་རུ་ནཱ་ཅལ་ཁུལ་གྱི་རི་ ༡༢ དང་། རྒྱུག་ཆུ་ ༤། མཚེའུ་ ༡། ལ་ཆུང་ ༡ དང་མི་མང་གནས་སྡོད་བྱ་ཡུལ་ ༡༡ བཅས་སུ་བོད་ཡིག་དང་རྒྱ་ཡིག་ཕིན་ཡེན་ཡོད་པའི་མིང་གསར་པ་བཏགས་ཡོད་པ་རེད།
གསར་འགོད་པ། དཔལ་ལྡན། རྩོམ་སྒྲིག་པ། སྐལ་བཟང་སྦྱིན་པ།