ཕྱི་ལོ་ ༢༠༢༠ ལོར་རྒྱ་དཀར་ནག་གི་དམག་མིའི་བར་གདོང་ཐུག་བྱུང་སའི་ལ་དྭགས་ཀྱི་སྤང་གོང་མཚོ་ཁུལ་དུ་རྒྱ་ནག་གཞུང་གིས་ཟམ་ཆེན་གཉིས་པ་ཞིག་རྒྱག་བཞིན་པ་དེ་འགྲུབ་འདུག་ཟེར།
རྒྱ་གར་གྱི་བརྒྱུད་ལམ་ཁག་གིས་གནས་ཚུལ་སྤེལ་བ་ལྟར་ན། ཕྱི་ལོ་ ༢༠༢༢ ཟླ་ ༥ ཙམ་ལ་རྒྱ་ནག་གཞུང་གིས་རྒྱ་དཀར་ནག་གི་ས་མཚམས་སུ་ཁེལ་བའི་སྤང་གོང་མཚོ་ཐོག་ཏུ་ཟམ་ཆེན་གཉིས་པ་ཞིག་རྒྱག་མགོ་བརྩམས་ཟིན་ཞིང་། རྒྱ་གར་གྱིས་འཁོར་སྐར་བརྒྱུད་ཤེས་རྟོགས་བྱུང་བར་གཞིགས་ན། ད་ལྟའི་ཆར་ཟམ་ཆེན་གཉིས་པ་དེའི་འཛུགས་སྐྲུན་ཡོངས་རྫོགས་འགྲུབ་ཟིན་པ་དང་། ཟམ་ཆེན་དེ་བརྒྱུད་རྒྱ་ནག་གིས་མཐའ་མཚམས་ཁུལ་གྱི་བཅིངས་གྲོལ་དམག་མིར་མེ་སྒྱོགས་ཀྱིས་མཚོན་པའི་དམག་གི་རླངས་འཁོར་ཆེ་གྲས་དང་གོ་མཚོན་སོགས་མགྱོགས་མྱུར་མཁོ་སྤྲོད་ཐུབ་པའི་ནུས་པ་ལྡན་ཡོད་སྐོར་བརྗོད་འདུག
དེ་འབྲེལ་འཁོར་སྐར་པར་རིས་ཞིབ་འཇུག་པ་ཌའེ་མེན་སེ་མོན་ (Damien Symon) གྱིས། རྒྱ་ནག་གཞུང་གིས་སྤང་གོང་མཚོའི་བྱང་ཕྱོགས་ནས་ལྷོ་ཕྱོགས་བར་མཐུད་པའི་ཟམ་ཆེན་ཡོངས་སུ་གྲུབ་ཡོད་ཅིང་མི་འགྱངས་བར་བཀོལ་སྤྱོད་བྱ་རྒྱུ་ཡིན་སྐོར་བརྗོད་འདུག་ལ། རྒྱ་གར་གཞུང་གིས་ཟམ་པ་རྒྱག་ཡུལ་གྱི་མཚོ་ཁུལ་དེ་ནི་ཕྱི་ལོ་ ༡༩༥༩ ལོར་རྒྱ་ནག་གཞུང་གིས་བཙན་བཟུང་བྱས་པར་ངོས་འཛིན་བྱེད་ཀྱིན་ཡོད་པ་མ་ཟད། རྒྱ་ནག་གིས་ཟམ་ཆེན་འཛུགས་སྐྲུན་བྱས་པ་བརྒྱུད་ནས། རྒྱ་དཀར་ནག་བར་དམིགས་བསལ་ས་མཚམས་དང་འབྲེལ་ཞིང་ཕན་ཚུན་བར་རྩོད་རྙོག་ནམ་བྱུང་སྐབས་རྒྱ་གར་ལ་གདོང་ལེན་བྱེད་སླད་ཡིན་པ་རྒྱ་གར་གྱི་དབྱེ་ཞིབ་པ་དག་གིས་རྗོད་ཀྱིན་འདུག
ད་ལྟ་འགྲུབ་ཟིན་པའི་ཟམ་པ་གཉིས་པ་དེས་རྒྱ་ནག་གི་དམག་མི་རྣམས་རྩོད་རྙོག་ས་ཁུལ་དུ་བསྐྱོད་པར་ཆུ་ཚོད་ ༡༢ རིང་གི་ལམ་ཁ་ཇེ་མགྱོགས་སུ་བཏང་ཡོད་ཅིང་། ཟམ་པ་དེ་ནི་ཕྱི་ལོ་ ༢༠༢༢ ལོར་བརྒྱབ་ཟིན་པའི་ཟམ་པ་ལས་རྒྱ་ཆེ་བ་མ་ཟད། ཟམ་པ་དེས་རྒྱ་ནག་གི་དམག་མི་རྣམས་ལ་རྒྱ་གར་གྱི་ཁོངས་སུ་གཏོགས་པའི་རི་གཙང་ལ་འགྲམ་དུ་མེ་སྒྱོགས་དང་མཚོན་ཆ་སོགས་དབོར་འདྲེན་གྱིས་གྲ་སྒྲིག་བྱེད་པར་སྟབས་བདེར་བཏང་ཡོད་སྐོར་སོགས་བརྗོད་འདུག
ཕྱི་ལོ་ ༢༠༢༢ ཟླ་ ༤ ནང་སྤང་གོང་མཚོ་ཐོག་ཏུ། རྒྱ་ནག་གིས་(pre-fabricated structure) རྒྱུ་ཆ་ལྷུ་སྒྲིག་བྱས་ཏེ་འཛུགས་སྐྲུན་བྱས་པའི་ཟམ་པ་ཐོག་མ་དེ་གྲུབ་ཡོད་པ་དང་། ཟམ་པ་དང་པོ་གསར་རྒྱག་གྲུབ་རྗེས་ཟམ་པ་དེ་བོད་མངའ་རི་ཁུལ་གྱི་རུ་ཐོག་རྫོང་བར་མཐུད་ཆེད་གཞུང་ལམ་ཞིག་ཀྱང་གསར་རྒྱག་བྱས་ཏེ། སྤང་གོང་མཚོ་ཐོག་གི་ཟམ་པ་གཉིས་པོས་སྤང་གོང་མཚོའི་བྱང་ངོས་སུ་ཡོད་པའི་རྒྱ་ནག་བཅིངས་གྲོལ་དམག་དཔུང་སྡོད་ས་ནས་རུ་ཐོག་ཏུ་ཡོད་པའི་དམག་དཔུང་སྡོད་ས་བར་སྤྱི་ལེ་ ༡༥༠ ཙམ་གྱི་འགྲོ་སྐྱོད་ཐག་ཉེ་རུ་བཏང་ཡོད་པ་རེད།
ཕྱི་ལོ་ ༢༠༢༠ ཕྱི་ཟླ་ ༦ ཚེས་ ༡༥ ཉིན་བོད་དང་རྒྱ་གར་གྱི་ས་མཚམས་སུ་ཁེལ་བའི་གྷལ་ཝན་རི་་གཤོངས་ (Galwan Valley) སུ་རྒྱ་དཀར་ནག་གཉིས་ཀྱི་དམག་མིའི་བར་དྲག་པོའི་འཁྲུག་འཛིང་ཤོར་ཏེ། རྒྱ་གར་གྱི་མཐའ་སྲུང་དམག་མི་ ༢༠ དང་ཉུང་མཐར་རྒྱ་ནག་གི་མཐའ་སྲུང་དམག་མི་ ༤ ཡི་ཚེ་སྲོག་ཤོར་ཡོད་སྟབས། རྒྱ་དཀར་ནག་གཉིས་ཀྱིས་རང་རང་གི་མཐའ་མཚམས་ས་ཐིག་བར་གྱི་མངའ་ཁོངས་དག་སྲུང་སྐྱོབ་ནན་མོ་བྱས་ཏེ། སོ་སོའི་མཐའ་མཚམས་ཀྱི་བདེ་འཇགས་དང་སྲུང་སྐྱོབ་ཀྱི་ཆེད། ཧིན་བོད་མཐའ་མཚམས་སུ་རྒྱ་དཀར་ནག་གཉིས་ཀས་འཛུགས་སྐྲུན་དང་མཐའ་མཚམས་དམག་དོན་ལ་དོ་དབྱིངས་ཆེན་པོས་ཡར་རྒྱས་བཏང་དང་གཏོང་བཞིན་ཡོད་འདུག
གསར་འགོད་པ། སྐལ་བཟང་སྦྱིན་པ།
