རྒྱ་ནག་གཞུང་གིས་ཨ་རིའི་གྲོས་ཚོགས་འཐུས་མི་བོད་དོན་རྒྱབ་སྐྱོར་བ་སྐུ་ཞབས་ཇིམ་མེག་གྷོ་ཝན་མཆོག་དང་ཁོང་གི་ཁྱིམ་མི་བུ་ཕྲུག་རྣམས་རྒྱ་ནག་ནང་འགྲོ་བསྐྱོད་བཀག་སྡོམ་བྱས་ཡོད་ཚུལ་བསྒྲགས་འདུག
ཁ་སང་ཕྱི་ཟླ་ ༧ ཚེས་ ༣༡ ཉིན་རྒྱ་ནག་གཞུང་གིས་ཨ་རིའི་གྲོས་ཚོགས་འཐུས་མི་བོད་དོན་རྒྱབ་སྐྱོར་བ་སྐུ་ཞབས་ཇིམ་མེག་གྷོ་ཝན་ (Jim McGovern) མཆོག་གིས་ཡིག་ངག་གཉིས་ཀྱི་ཐོག་ནས་རྒྱ་ནག་གི་ནང་སྲིད་ལ་ཐེ་གཏོགས་བྱས་པའི་སྐྱོན་འཛུགས་བྱས་ཏེ། རྒྱ་ནག་ནང་ཡོད་པའི་ཁོང་གི་རྒྱུ་དངོས་དང་དཔལ་འབྱོར་འཁོར་སྐྱོད་བྱེད་མི་ཐུབ་པར་བཟོས་ཡོད་པ་མ་ཟད། ཁོང་དང་ཁོང་གི་ནང་མི་བུ་ཕྲུག་རྣམས་རྒྱ་ནག་ནང་འགྲོ་བསྐྱོད་བྱ་རྒྱུ་བཀག་སྡོམ་བྱས་ཡོད་ཚུལ་བསྒྲགས་འདུག་ནའང་། སྐུ་ཞབས་ཇིམ་མེག་གྷོ་ཝན་མཆོག་ལ་རྒྱ་ནག་ནང་རྒྱུ་དངོས་དང་ཚོང་འབྲེལ་གང་ཡང་མེད་པ་རེད་འདུག་པས། ཁོང་ལ་ཉེས་ཆད་བསྒྲགས་པ་ནི་མཚོན་དོན་ཙམ་ཞིག་ཡིན་པ་ལས་ཤུགས་རྐྱེན་གང་ཡང་ཐེབས་ཀྱི་མེད་པ་ཨེ་པེ་(AP)གསར་ཁང་གིས་བསྒྲགས་འདུག
དེ་འབྲེལ་རྒྱ་ནག་ཕྱི་སྲིད་ལྷན་ཁང་གི་བཀའ་ཁྱབ་ཨང་ ༡༡ པ་ཟེར་བ་ཞིག་སྤེལ་ཡོད་པའི་ནང་། ཉེ་བའི་ལོ་འགའི་རིང་གྲོས་ཚོགས་འཐུས་མི་ཇིམ་མེག་གྷོ་ཝན་ལགས་ཀྱིས་ཡིག་ངག་གཉིས་ཀྱི་ཐོག་ནས་རྒྱ་ནག་གི་ནང་སྲིད་ལ་ཐེ་གཏོགས་བྱས་ཡོད་པ་མ་ཟད། རྒྱལ་ཁབ་ཀྱི་བདག་དབང་དང་། བདེ་འཇགས། འཕེལ་རྒྱས་བཅས་ཀྱི་ཁེ་ཕན་ལ་ཁྱད་གསོད་བཏང་ཡོད་པས། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཕྱི་རྒྱལ་ལ་ངོ་རྒོལ་ཉེས་ཆད་བཅའ་ཁྲིམས་ཀྱི་དོན་ཚན་གསུམ་པ། བཞི་པ། ལྔ་པ། དྲུག་པ། དགུ་པ། བཅོ་ལྔ་བའི་ནང་གསལ་གྱི་སྒྲིག་གཞི་གཞིར་བཟུང་ལྟར། ཇིམ་མེག་གྷོ་ཝན་ལ་གཤམ་གསལ་ངོ་རྒོལ་གྱི་ཐབས་ལམ་ཁག་ལག་བསྟར་བྱེད་པའི་ཐག་གཅོད་བྱས་པ་ཡིན། དང་པོ། རྒྱ་ནག་ནང་ཡོད་པའི་རྒྱུ་དངོས་དང་། དཔལ་འབྱོར་འཁོར་བསྐྱོད་རིགས་བཀག་སྡོམ་བྱ་རྒྱུ། གཉིས་པ། རྒྱ་ནག་ནང་གི་ཚོགས་སྡེ་ཁག་དང་མི་སྒེར་བར་ཚོང་འབྲེལ་དང་མཉམ་ལས་སོགས་བཀག་སྡོམ་བྱ་རྒྱུ། གསུམ། ཁོང་དང་ཁོང་གི་བཟའ་ཟླ་བུ་ཕྲུག་ལ་རྒྱ་ནག་གི་མཐོང་ཆེན་ལག་འཁྱེར་བཀག་སྡོམ་བྱ་རྒྱུ། ཕྱི་ཟླ་ ༧ ཚེས་ ༣༡ ནས་བཟུང་ཉེས་ཆད་འདི་ལག་བསྟར་བྱ་རྒྱུ་ཡིན། ཞེས་འཁོད་འདུག
བོད་དོན་རྒྱབ་སྐྱོར་བ་དང་ཡུན་རིང་གི་བོད་ཀྱི་གྲོགས་པོ་སྐུ་ཞབས་ཇིམ་མེག་གྷོ་ཝན་ (Jim McGovern) མཆོག་གིས་སྒེར་གྱི་ཨེག་སི་སྤྱི་ཚོགས་དྲ་ལམ་དུ། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་མགོ་ཁྲིད་ཚོས་རྒྱ་ནག་གི་འཇིགས་སུ་རུང་བའི་འགྲོ་བ་མིའི་ཐོབ་ཐང་གི་གནས་སྟངས་ཐོག་མི་མང་གིས་སྐྱོན་བརྗོད་བྱས་པར་དགའ་བོ་མེད་ཚེ། རྒྱ་གཞུང་གིས་ལག་བསྟར་བྱེད་བཞིན་པའི་འགྲོ་བ་མིའི་ཐོབ་ཐང་གི་གནས་སྟངས་སྐྱོ་བོ་དེ་ཡར་རྒྱས་གཏོང་དགོས་པ་མ་ཟད། བོད་ནང་གི་བོད་མི་རྣམས་ལ་དྲག་གནོན་བྱེད་པ་དང་། ཤིན་ཅང་ནང་མི་རིགས་རྩ་མེད་གཏོང་བ། ཧོང་ཀོང་གི་དམངས་གཙོར་དྲག་གནོན་བཅས་མཚམས་འཇོག་བྱས་ཏེ། མི་མང་གི་གནས་སྟངས་ཡར་རྒྱས་གཏོང་མགོ་རྩོམ་ཐུབ་དགོས། ཞེས་བརྗོད་འདུག
ཡང་ཁོང་གིས། ང་ལ་རྒྱ་ནག་གིས་ཁུངས་ལུང་མེད་པའི་ཉེས་ཆད་བཀལ་བ་དེས་རྒྱ་ནག་གི་མགོ་ཁྲིད་ཚོ་རང་དབང་དང་གུ་ཡངས་ཀྱི་བགྲོ་གླེང་བྱེད་པར་ཞེད་སྣང་བྱེད་བཞིན་ཡོད་པ་བསྟན་ཡོད་པའི་ཁར། ཁོ་ཚོས་རང་ཉིད་ཀྱི་ལྟ་ཚུལ་ལ་ངོས་ལེན་མི་བྱེད་མཁན་ཚོར་ཉེས་ཆད་འགེལ་བ་དང་གྲགས་འགུལ་མེད་པར་བཟོ་ཐབས་བྱེད་ཀྱིན་ཡོད། འོན་ཀྱང་འཛམ་གླིང་ཡོངས་ཀྱིས་ཁོ་ཚོའི་བྱ་སྤྱོད་ལ་ལྟ་ཞིབ་བྱེད་ཀྱི་ཡོད་ཅིང་། འགྲོ་བ་མིའི་ཐོབ་ཐང་རྩོད་ལེན་བྱེད་མཁན་ཚོ་ཁུ་སིམ་མེར་སྡོད་ཀྱི་མ་རེད། ངས་སྤོབས་པ་ཆེན་པོའི་ངང་ནས་ཉེས་ཆད་འདི་ཆེ་བསྟོད་ཀྱི་དཔུང་རྟགས་ཅིག་ལ་ངོས་འཛིན་བྱ་རྒྱུ་ཡིན། ཞེས་བརྗོད་འདུག
སྤྱིར་ཨ་རིའི་གྲོས་ཚོགས་འཐུས་མི་སྐུ་ཞབས་ཇིམ་མེག་གྷོ་ཝན་ (Jim McGovern) མཆོག་ནི། ཨ་རིའི་མཱ་སཱ་ཆུག་སེ་སི་མངའ་སྡེའི་དམངས་གཙོ་ཚོགས་པའི་གྲོས་ཚོགས་འཐུས་མི་དང་། ཨ་རིའི་གྲོས་ཚོགས་ཀྱི་དམངས་གཙོ་ཚོགས་པའི་ཁྲིམས་སྒྲིག་ཞིབ་དཔྱོད་རྒྱུན་ལས་ཀྱི་ཚོགས་གཙོ། ཨ་རིའི་གྲོས་ཚོགས་ཀྱི་རྒྱ་ནག་ལས་དོན་ཚོགས་ཆུང་གི་ཚོགས་གཙོ་བཅས་ཡིན་ཁར། ཨ་རིའི་གྲོས་ཚོགས་ནང་བོད་དོན་ཐོག་རྒྱབ་སྐྱོར་ཤུགས་ཆེན་མཁན་གྱི་མི་སྣ་ཞིག་ཡིན་སྟབས། ཐེངས་འདིར་རྒྱ་ནག་གིས་ཁོང་ལ་ཉེས་ཆད་བསྒྲགས་དོན་ནི། ཁོང་གིས་ཉེ་ལམ་ཨ་རིའི་ཁྲིམས་སུ་གྱུར་བའི་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་ཡིག་ལ་དངོས་ཤུགས་བརྒྱུད་གསུམ་ཐོག་ནས་རྒྱབ་སྐྱོར་གནང་བ་ལ་བརྟེན་ནས་བྱུང་བ་ཡིན་སྐོར་བརྗོད་འདུག
ཕྱི་ལོ་ ༢༠༢༢ ཟླ་ ༧ ཚེས་ ༡༣ ཉིན་གྲོས་ཚོགས་འོག་མའི་ནང་དུ་སྐུ་ཞབས་ཇིམ་མེག་གྷོ་ཝན་མཆོག་གི་ཐུགས་འགན་འཁུར་ཏེ་བོད་རྒྱའི་དཀའ་རྙོག་སེལ་བའི་ཁྲིམས་འཆར་ཐོག་མར་ངོ་སྤྲོད་གནང་ཡོད་པ་དང་། དེ་ནས་ཕྱི་ལོ་ ༢༠༢༣ ཟླ་ ༡ ཚེས་ ༣༠ ཉིན་གྲོས་ཚོགས་གོང་མའི་ནང་ངོ་སྤྲོད་གནང་། ཕྱི་ལོ་ ༢༠༢༤ ཟླ་བ་ ༢ ཚེས་ ༡༥ ཉིན་ཨ་རིའི་གྲོས་ཚོགས་འོག་མའི་ནང་ཚད་མཐོའི་མང་མོས་རྒྱབ་སྐྱོར་ཐོབ་ཡོད་པ་དང་། ཕྱི་ཟླ་ ༥ པའི་ཚེས་ ༢༣ བོད་ལུགས་ཀྱི་ས་ག་ཟླ་བའི་ཚེས་པ་ ༡༥ ཉིན། ཨ་རིའི་གྲོས་ཚོགས་གོང་མའི་ནང་སྤྱི་མོས་རྒྱབ་སྐྱོར་ཐོབ། ཕྱི་ཟླ་ ༦ ཚེས་ ༡༢ ཉིན་ཨ་རིའི་གྲོས་ཚོགས་འོག་མའི་ནང་ཁྲིམས་འཆར་གྱི་བསྐྱར་བཅོས་ཚིག་བརྗོད་ལ་དམངས་གཙོ་ཚོགས་པ་དང་སྤྱི་མཐུན་ཚོགས་པའི་འཐུས་མི་ ༣༩༡ གིས་རྒྱབ་སྐྱོར་གནང་སྟེ་གྲོས་ཚོགས་གོང་འོག་གཉིས་ནས་གཏན་འབེབ་གནང་བ་ལྟར། ཨ་རིའི་སྲིད་འཛིན་གཞོན་པ་ཀ་མ་ལ་ཧེ་རི་སི(Kamala Harris) མཆོག་དང་། གྲོས་ཚོགས་འོག་མའི་ཚོགས་གཙོ་མེག་ཇོན་སོན་ (Mike Johnson) མཆོག་རྣམ་གཉིས་ནས་མཚན་རྟགས་བསྐྱོན་གྲུབ་སྟེ། ཕྱི་ཟླ་ ༧ ཕྱི་ཚེས་ ༡༣ ཉིན་སྲིད་འཛིན་རྗོ་བྷའེ་ཌིན་མཆོག་གིས་དངོས་སུ་མཚན་རྟགས་བསྐྱོན་ཡོད་པ་རེད།
འདས་ལོའི་ཕྱི་ཟླ་ ༤ ནང་རྒྱ་ནག་ཕྱི་སྲིད་ལྷན་ཁང་གིས་གསར་འགོད་ལྷན་ཚོགས་ཤིག་གི་སྐབས་སུ། ཨ་རིའི་གྲོས་ཚོགས་ཀྱི་ཕྱི་སྲིད་ལས་དོན་ཚོགས་ཆུང་གི་ཚོགས་གཙོ་སྐུ་ཞབས་མཱ་ཡི་ཀེལ་མེག་ཁོལ་ (Michael McCaul) མཆོག་དང་། གྲོས་ཚོགས་རྒྱ་ནག་ལས་དོན་ཚོགས་ཆུང་གི་སྐུ་ཞབས་མཱ་ཡི་ཀེལ་གྷ་ལཱ་གྷར་( Michael Gallagher) རྣམ་གཉིས་ནས་བོད་རྒྱའི་དཀའ་རྙོག་སེལ་ཐབས་ཀྱི་རྒྱབ་སྐྱོར་ཁྲིམས་འཆར་ཨ་རིའི་གྲོས་ཚོགས་གོང་འོག་གཉིས་ཀྱི་ནང་ངོ་སྤྲོད་གནང་བ་དང་ཐའེ་ཝན་ལ་འཚམས་གཟིགས་སུ་ཕེབས་པ་སོགས་དང་འབྲེལ་ནས་ཉེས་ཆད་བསྒྲགས་ཡོད་ཅིང་། དེ་བཞིན། ཕྱི་ཟླ་ ༢༠༢༠ ཟླ་ ༧ ནང་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་མར་ཁོ་རུ་བྷིའོ་(Marco Rubio)་མཆོག་དང་། གྲོས་ཚོགས་གོང་མའི་འཐུས་མི་(Ted Cruz) མཆོག གྲོས་ཚོགས་འོག་མའི་འཐུས་མི་སྐུ་ཞབས་ཁི་རི་སི་སི་མི་ཐི་(Chris Smith) མཆོག་སོགས་ལ་ཉེས་ཆད་བཏང་བ་ཡོངས་བསྒྲགས་བྱས་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། སྐལ་བཟང་སྦྱིན་པ།
