ཨ་རིའི་མི་ནི་སོ་ཌ་མངའ་སྡེའི་བློན་ཆེན་དང་བོད་དོན་རྒྱབ་སྐྱོར་བ་སྐུ་ཞབས་ཊིམ་ཝལ་ཛི་ལགས་ཨ་རིའི་སྲིད་འཛིན་གཞོན་པའི་འོས་མིར་བདམས་ཡོད་འདུག
ཟླ་འདིའི་ཕྱི་ཚེས་ ༦ ཉིན་ཨ་རིའི་ལས་ཐོག་སྲིད་འཛིན་གཞོན་པ་དང་དམངས་གཙོ་ཚོགས་པའི་སྲིད་འཛིན་འོས་མི་ལྕམ་ཀཱ་མཱ་ལཱ་ཧེ་རི་སི་(Kamala Harris) མཆོག་གིས་ཨ་རིའི་མི་ནི་སོ་ཌ་མངའ་སྡེའི་བློན་ཆེན་སྐུ་ཞབས་ཊིམ་ཝལ་ཛི་ (Tim Walz) ལགས་ཨ་རིའི་སྲིད་འཛིན་གཞོན་པའི་འོས་མིར་བདམས་ཡོད་པའི་གསལ་བསྒྲགས་གནང་ཡོད་འདུག
ལྕམ་ཀཱ་མཱ་ལཱ་ཧེ་རི་སི་མཆོག་གི་གཞུང་འབྲེལ་གསལ་བསྒྲགས་ཤིག་སྤེལ་བའི་ནང་དུ། མི་ནི་སོ་ཌ་མངའ་སྡེའི་བློན་ཆེན་སྐུ་ཞབས་ཊིམ་ཝལ་ཛི་ལགས་ཨ་རིའི་སྲིད་འཛིན་གཞོན་པའི་འོས་མིར་ལངས་རྒྱུ་སྤོབས་པ་ཆེན་པོའི་གསལ་བསྒྲགས་ཞུ་འདོད་བྱུང་། ཁོང་ནི་ཨ་རིའི་རྒྱལ་ཁབ་ཀྱི་བདེ་སྲུང་ཆེད་དུ་ལོ་ངོ་ ༢༤ རིང་དམག་མིའི་བྱ་བ་བསྒྲུབ་པ་དང་། མཐོ་རིམ་སློབ་གྲྭར་དགེ་རྒན་གྱི་བྱ་གཞག་གཉེར་བ། མངའ་སྡེའི་བློན་ཆེན་སོགས་ཨ་རིའི་རྒྱལ་ཁབ་ཀྱི་ལས་དོན་ཐོག་ཉམས་མྱོང་ཕུན་སུམ་ཚོགས་པའི་དབུ་ཁྲིད་ཡིན་པ་མ་ཟད། ཨ་རིའི་སྤྱི་ཚོགས་ཁྲོད་ཀྱི་ཁྱིམ་ཚང་གི་དཀའ་ངལ་མང་པོར་ལྟ་སྐྱོང་ཐུབ་པའི་མཛད་རྗེས་ཡོད་པའི་མི་སྣ་མཆོག་ཏུ་གྱུར་བ་ཞིག་ཡིན་པས། ཁོང་ལྟ་བུའི་མི་སྣ་ཞིག་དམངས་གཙོ་སྲིད་དོན་ཚོགས་པའི་ནང་དུ་བཞུགས་པ་ཧ་ཅང་དགའ་འོས་པ་ཞིག་རེད། ང་ཚོ་མཉམ་འབྲེལ་ཐོག་ནས་རྒྱལ་ཁབ་ཀྱི་ལས་དོན་བྱེད་ཕྱོགས་མགོ་ཚུགས་ཡོད། ཅེས་གསུངས་འདུག
ཨ་རིའི་མི་ནི་སོ་ཊ་མངའ་སྡེའི་བློན་ཆེན་ཊིམ་ཝལ་ཛི་ལགས་ཀྱིས། འདས་བའི་ལོ་ངོ་འདི་དག་གི་རིང་མི་ནི་སོ་ཊ་མངའ་སྡེ་ནང་གི་ལས་དོན་ཐམས་ཅད་ཚགས་ཚུད་ཡོང་ཡོད། དེ་ནི་མི་ནི་སོ་ཊི་མི་མང་ཡོངས་ཀྱིས་མཐུན་སྒྲིལ་ཐོག་མཉམ་ལས་བྱས་པའི་གྲུབ་འབྲས་ཤིག་རེད། ང་ཚོས་ཁྱད་དུ་འཕགས་པའི་འདས་པའི་ཕྱག་རྗེས་ལ་དཔེར་བལྟས་ཏེ་མ་འོངས་བའི་བྱ་གཞག་གི་ཆེད་དུ་མུ་མཐུད་ཧུར་བརྩོན་བྱེད་དགོས། ཞེས་དང་། ངས་ཁྱིམ་ཚང་དང་སློབ་ཕྲུག་གི་གནས་བབ་ཐོག་འབད་བརྩོན་བྱས་པའི་གྲུབ་འབྲས་མངའ་སྡེའི་གྲོས་ཚོགས་སུ་བསྐྱལ་ཡོད་ལ། སྲིད་འཛིན་གཞོན་པ་ཧེ་རི་སི་དང་མཉམ་ལས་བྱས་པའི་གྲུབ་འབྲས་ཕོ་བྲང་དཀར་པོའི་བསྐྱལ་རྒྱུ་ཡིན། ཞེས་བརྗོད་འདུག
སྐུ་ཞབས་ཊིམ་ཝལ་ཛི་ལགས་ནི་ད་ལྟའི་ཨ་རིའི་མི་ནི་སོ་ཊ་མངའ་སྡེའི་བློན་ཆེན་དང་བོད་དོན་ཐོག་རྒྱབ་སྐྱོར་ཤུགས་ཆེན་གནང་མཁན་ཞིག་ཡིན་ཞིང་། ཕྱི་ལོ་ ༢༠༡༥ ལོར་ལྕམ་ནན་སི་པི་ལོ་སི་མཆོག་གིས་སྣེ་ཁྲིད་པའི་ཨ་རིའི་གྲོས་ཚོགས་ཀྱི་ཆེས་མཐོའི་སྐུ་ཚབ་ཚོགས་ཆུང་ནང་ཁོང་ཡང་བོད་དང་རྒྱ་ནག་ནང་གཟིགས་སྐོར་ཕེབས་ཡོད་འདུག ཕྱི་ལོ་ ༢༠༡༡ ལོར་ཨ་རིའི་གྲོས་ཚོགས་ཀྱི་རྒྱ་ནག་ལས་དོན་ཐད་ཀྱི་ཆེས་མཐོའི་ལྷན་ཚོགས་ཀྱི་ལོ་འཁོར་སྙན་ཐོ་བཏོན་སྐབས། སྐུ་ཞབས་ཊིམ་ཝལ་ཛི་ལགས་ཀྱིས་རྒྱ་གཞུང་གིས་བོད་དང་ཡུ་གུར་སོགས་གྲངས་ཉུང་མི་རིགས་ཁྲོད་དུ་དྲག་གནོན་ཤུགས་ཆེན་བྱེད་བཞིན་ཡོད་ཀྱང་། ཁོང་ཚོས་རང་ཉིད་ཀྱི་ཆོས་དང་རིག་གཞུང་སྲུང་སྐྱོབ་བྱས་ཏེ། རྒྱ་གཞུང་ལ་མུ་མཐུད་འཐབ་རྩོད་བྱེད་བཞིན་ཡོད་པ་མ་ཟད། རྒྱ་ནག་གཞུང་གི་དཔོན་རིགས་ཚོས་༧གོང་ས་རྒྱལ་བ་རིན་པོ་ཆེ་མཆོག་ཆོས་ཕྱོགས་ཀྱི་དབུ་ཁྲིད་དུ་བརྩི་བཀུར་བྱེད་ཀྱི་མེད། ཅེས་བརྗོད་འདུག དེ་བཞིན་ཕྱི་ལོ་ ༢༠༡༦ ལོར་ཨ་རིའི་སོ་ཊའི་མངའ་སྡེའི་ནང་༸གོང་ས་རྒྱལ་བ་རིན་པོ་ཆེ་མཆོག་ཆིབས་བསྒྱུར་བསྐྱངས་སྐབས་མཇལ་འཕྲད་ཞུས་པ་མ་ཟད། སྐབས་དེར་༸གོང་ས་མཆོག་གི་སྐུ་པར་དྲྭ་ལམ་དུ་སྤེལ་སྟེ། ༸གོང་ས་མཆོག་དང་མཉམ་དུ་འགྲོ་བ་མིའི་བཟང་སྤྱོད་དང་བྱམས་སྙིང་རྗེའི་སྐོར་གླེང་རྒྱུ་བྱུང་བ་ནི་ཁོང་གིས་ཉིན་རེའི་འཚོ་བའི་ཁྲོད་དུ་རིན་ཐང་ཆེ་བའི་ལམ་སྟོན་དེ་དག་ལག་བསྟར་ཡོང་ཐབས་བྱེད་བཞིན་ཡོད་ཅེས་བཀོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། སྐལ་བཟང་སྦྱིན་པ།
