སོག་ཡུལ་དུ་༧སྐྱབས་རྗེ་བྱ་དོ་རིན་པོ་ཆེ་མཆོག་གིས་དུས་རབས་ ༢༡ པའི་གཞོན་སྐྱེས་རྣམས་ལ་༧གོང་ས་རྒྱལ་བ་རིན་པོ་ཆེ་མཆོག་ནས་བརྗོད་བྱ་ཟབ་ཅིང་གོ་བདེ་བའི་ཐོག་ནས་བཀའ་སློབ་བསྩལ་ཡོད་པ་ཉིན་རེ་བཞིན་ཉམས་ལེན་བྱ་རྒྱུ་གལ་ཆེན་ཡིན་སྐོར་བཀའ་སློབ་གནང་འདུག
སོག་ཡུལ་གྱི་རྒྱལ་ས་ཨུ་ལམ་བྷ་དར་གྱི་དགའ་ལྡན་ཐེག་ཆེན་གླིང་དུ། ཁ་སང་ཕྱི་ཚེས་ ༢༡ ཉིན་༧སྐྱབས་རྗེ་བྱ་དོ་རིན་པོ་ཆེ་མཆོག་གིས་དུས་འཁོར་དབང་ཆེན་བསྩལ་བ་ལེགས་པར་གྲུབ་ཡོད་པ་དང་། དེ་རིང་སོག་པོའི་དད་ལྡན་སེར་སྐྱ་མི་མང་གིས་༧སྐྱབས་རྗེ་བྱ་དོ་རིན་པ་ཆེ་མཆོག་ལ་བརྟན་བཞུགས་བསྟར་འབུལ་ཞུས་འདུག
བརྟན་བཞུགས་སྐབས་༧སྐྱབས་རྗེ་བྱ་དོ་རིན་པོ་ཆེ་མཆོག་གིས། ཚེ་དབང་ཟེར་བ་ནི་ང་ཚོའི་བར་ཆད་ཞི་བ་དང་། ཚེ་ཡི་བསོད་ནམས་རྒྱས་པའི་རྟེན་འབྲེལ་སྒྲིག་རྒྱུ་དེ་རེད། གཙོ་བོ་༧རྒྱལ་བ་ཡིད་བཞིན་ནོར་བུ་མཆོག་གི་དབུས་རིས་སུ་མ་ཆད་པའི་བསྟན་འཛིན་གྱི་སྐྱེས་བུ་རྣམས་ཀྱི་སྐུ་ཚེ་ཞབས་པད་བརྟན་པ་དང་མཛད་པ་འཕྲིན་ལས་རྒྱས་པའི་ལས་དོན་བྱས་ཡོད་བསམ་དགོས། དེ་རིང་གི་དུས་ཚོད་འདིར་ཨ་རིའི་ནེའུ་ཡོག་ཏུ་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུ་བཞིན་ཡོད་པའི་རྟེན་འབྲེལ་མ་སྒྲིག་རང་འགྲིག་ཆགས་ཡོད་པ་དང་བསྟུན་ཚང་མས་ཐུགས་སྨོན་རྒྱ་ཆེ་གནང་རོགས། ཞེས་གསུངས་སོང་།
རིན་པོ་ཆེ་མཆོག་གིས། ང་ཚོ་འདིར་བདུན་ཕྲག་གཉིས་ཙམ་རིང་མཉམ་འཛོམས་ཐོག་ཡང་ནས་ཡང་དུ་ནང་ཆོས་ཐོག་སྐད་ཆ་བཤད་པ་དང་ཉན་པའི་གོ་སྐབས་ཤིག་བྱུང་བ་རེད། ངས་གོང་དུ་བཤད་ཟིན་པའང་མདོར་བསྡུས་དང་ཉུང་ཉུང་ཞིག་རེད། གཙོ་བོ་བྱང་ཆུབ་ལམ་རིམ་ཆེན་མོས་དབུས་རྒྱ་གར་པཎ་གྲུབ་ཀྱི་གསུངས་དང་། བོད་གངས་ཅན་གྱི་པཎ་གྲུབ་རྣམས་ཀྱི་གསུངས། དེ་བཞིན་ཆེན་པོ་ཧོར་གྱི་པཎ་གྲུབ་ཀྱིས་བརྩམས་པའི་ཕྱག་དཔེ་སོགས་ལ་དོ་སྣང་ཡང་ཡང་བྱེད་དགོས། ལྷག་པར་དུ་དུས་རབས་ཉི་ཤུ་རྩ་གཅིག་པའི་ནང་གཞོན་སྐྱེས་རྣམས་ཀྱིས་གོ་བདེ་བ་དང་། འཇུག་བདེ་བ། བརྗོད་བྱ་ཟབ་ཅིང་གནད་བསྡུས་པའི་ཐོག་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་སློབ་མང་པོ་ཞིག་ཡོད། དེ་དག་ནི་སྒྲ་ལ་ཉན་རྒྱུ་ཡོད་པ་དང་། གཟུགས་བརྙན་ཐོག་མཇལ་རྒྱུ་ཡོད། ཕྱག་དེབ་ཐོག་ཀློག་རྒྱུ་ཡོད་པ་ཞིག་ཡིན་པར་བརྟེན། དེ་དག་ལ་ཉིན་རེ་བཞིན་ལྟ་ཀློག་བྱ་དགོས། རྒན་གཞོན་སུ་ཞིག་ཡིན་རུང་ཞོགས་པར་ཡར་ལངས་ཏེ་སྐྱབས་འགྲོ་དང་། སེམས་བསྐྱེད། ཡང་དག་པའི་ལྟ་བ་སོགས་རྒྱས་བསྡུས་ལ་མ་བལྟོས་པར་ཉམས་ལེན་བྱ་རྒྱུ་གལ་ཆེན་པོ་རེད། ཅེས་གསུངས་སོང་།
ཡང་རིན་པོ་ཆེ་མཆོག་གིས། ཉིན་འདི་དག་རིང་ང་ཚོས་མཉམ་དུ་ཆོ་ག་འདོན་པའི་སྐབས་ཚོར་བ་ཆེན་པོ་བྱུང་། ང་རང་སྒེར་ལ་ཆ་བཞག་ན་གཏོར་མ་འདི་འདྲའི་རྒྱ་ཆེན་པོ་ཞིག་བཞེངས་ཐུབ་པའི་ཆ་རྐྱེན་ཡོད་ཀྱི་མ་རེད། ཞལ་འདོན་རྒྱ་ཆེན་འདོན་པའི་དུས་ཚོད་ཧ་ཅང་ཁག་པོ་རེད། མི་གཅིག་གིས་གླགས་ཁེལ་བ་ཞིག་རྩ་བ་ཉིད་ནས་མ་རེད། ༧རྒྱལ་མཆོག་བསྐལ་བཟང་རྒྱ་མཚོའི་སྐབས་ནས་རྣམ་པར་རྒྱལ་བའི་ཕན་བདེ་ལེགས་བཤད་གླིང་གི་གྲྭ་ཚང་ལ་ཐུན་མོང་མིན་པའི་དུས་འཁོར་ཐོག་ཕྱག་ལེན་ཡོད་བསྡད་པ་རེད། ད་ལན་འདིར་རྣམ་རྒྱལ་གྲྭ་ཚང་གི་སློབ་དཔོན་ཟུར་པ་དང་དབུ་འཛིན་སོགས་ཀྱིས་ཆོ་ག་ཉིན་རེ་བཞིན་གསུངས་དུས། དུས་འཁོར་གྱི་སྐུ་གསུང་ཐུགས་ཡོངས་སུ་རྫོགས་པའི་ཆོ་ག་ལེགས་པར་གྲུབ་པའི་ཚོར་བ་བྱུང་། མི་མང་ཚོས་ཀྱང་ཞོགས་པ་ནས་ཉན་ཏེ་ལམ་སེང་ཤེས་ཐུབ་ཀྱི་མེད་ཀྱང་ཐོས་པའི་བག་ཆགས་ཡོད་པ་རེད། དེ་རིང་སྐལ་བ་བཟང་པོའི་ཉིན་འདི་ནས་ཚར་བ་རེད་མི་བསམ་པར། ཉིན་རེ་བཞིན་སྐྱབས་འགྲོ་དང་། བྱང་ཆུབ་ཀྱི་སེམས། ཡང་དག་པའི་ལྟ་བ་སོགས་ཉམས་ལེན་བྱ་དགོས། ཞེས་གསུངས་སོང་།
༸སྐྱབས་རྗེ་བྱ་དོ་སྤྲུལ་སྐུ་བསྟན་འཛིན་འབྱུང་གནས་རིན་པོ་ཆེ་མཆོག་ནི་རྒྱ་གར་ལྷོ་ཕྱོགས་ཀྱི་སེར་བྱེས་མཁས་སྙན་གྲྭ་ཚང་དུ་ཆོས་ཞུགས་ཀྱིས་དགེ་བཤེས་ལྷ་རམས་པའི་མཚན་གནས་བཞེས་ཡོད་ཅིང་། ཕྱི་ལོ་ ༢༠༡༣ ལོ་ནས་དཔལ་ལྡན་རྒྱུད་སྟོད་གྲྭ་ཚང་གི་བླ་མ་དབུ་མཛད་དང་མཁན་རིན་པོ་ཆེའི་མཛད་འཁུར་རིམ་པར་བཞེས་ཡོད་འདུག དེའི་རྗེས་༧གོང་ས་རྒྱལ་བ་རིན་པོ་ཆེ་མཆོག་ནས་བཀའ་ཕེབས་པ་ལྟར་སྐུ་བཅར་རྣམ་རྒྱལ་གྲྭ་ཚང་ཕན་བདེ་ལེགས་བཤད་གླིང་གི་མཁན་རབས་ལྔ་པར་བསྐོ་གཞག་གནང་འདུག དེ་བཞིན་ལོ་མང་རིང་སོག་ཡུལ་གཙོས་དད་ལྡན་སེར་སྐྱ་མི་མང་ལ་གསུང་ཆོས་དང་དབང་ལུང་གནང་བའི་བསྟན་པའི་ཞབས་འདེགས་རྒྱ་ཆེ་ཞུས་ཡོད་སྟབས། ཕྱི་ལོ་ ༢༠༡༩ ཟླ་ ༧ ནང་བྷུར་ཡ་ཐི་གཞུང་གིས་༧སྐྱབས་རྗེ་བྱ་དོ་རིན་པོ་ཆེ་མཆོག་ལ་བྷུར་ཡ་ཐའི་གཟེངས་བསྟོད་དང་། ཌི་ཛ་ཡའི་ནང་པའི་ཆེས་མཐོའི་གཙུག་ལག་སློབ་གཉེར་ཁང་གིས་འབུམ་རམས་པའི་མཚན་གནས་ཕུལ་ཡོད་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་བྱེད་མཁན། པདྨ་མཚོ།
