༧སྐྱབས་རྗེ་ཀིརྟི་རིན་པོ་ཆེ་མཆོག་ལ་བཀའ་དྲིན་རྗེས་དྲན་གྱི་རྩོམ་རིག་གཟེངས་རྟགས་ཕུལ།

ཕྱི་སྡོད་པེན་བོད་ཀྱི་རྩོམ་པ་པོའི་མཐུན་ཚོགས་གསར་འཛུགས་བྱས་ནས་མི་ལོ་ཧྲིལ་པོ་ཉེར་ལྔ་འཁོར་བའི་དུས་དྲན་དང་བསྟུན་བཀའ་ཟུར་༧སྐྱབས་རྗེ་ཀིརྟི་རིན་པོ་ཆེ་མཆོག་ནས་བརྗོད་བྱ་སྣ་མང་ཅན་གྱི་ཕྱག་དེབ་ ༡༤༦ ལྷག་ལྗགས་རྩོམ་མཛད་ཡོད་པར་བཀའ་དྲིན་རྗེས་དྲན་གྱི་རྩོམ་རིག་གཟེངས་རྟགས་ཕུལ་སོང་།

དེ་རིང་ཞོགས་པའི་ཆུ་ཚོད་ ༩།༣༠ སྟེང་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་ཕྱི་སྡོད་པེན་བོད་ཀྱི་རྩོམ་པ་པོའི་མཐུན་ཚོགས་བཙུགས་ནས་མི་ལོ་ཧྲིལ་པོ་ཉེར་ལྔ་འཁོར་བའི་དུས་དྲན་སྲུང་གཙི་གནང་བ་དང་བསྟུན། རྒྱལ་སྤྱིའི་པེན་རྩོམ་པ་པོའི་མཐུན་ཚོགས་དང་ཕྱི་སྡོད་པེན་རྩོམ་པ་པོའི་མཐུན་ཚོགས་ཐུན་མོང་གི་ཐོག་ནས་བཀའ་ཟུར་༧སྐྱབས་རྗེ་ཀིརྟི་རིན་པོ་ཆེ་མཆོག་གིས་བརྗོད་བྱ་སྣ་མང་གི་ཕྱག་དེབ་ ༡༤༦ ལྷག་ལྗགས་རྩོམ་མཛད་པར་བཀའ་དྲིན་རྗེས་དྲན་གྱི་རྩོམ་རིག་གཟེངས་རྟགས་ཕུལ་སོང་ལ། ཉིན་རྒྱབ་བརྗོད་གཞི་འདྲ་མིན་ཐོག་བགྲོ་གླེང་ཞིག་འཚོགས་སོང་།

ཐོག་མར་ཕྱི་སྡོད་པེན་བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་གཙོ་སྤྱི་ཟུར་འབུམ་རམས་པ་བསོད་ནམས་རྒྱལ་མཚན་ལགས་ཀྱིས་ཕེབས་བསུའི་གསུང་བཤད་གནང་སྐབས་ཀིརྟི་རིན་པོ་ཆེ་མཆོག་ལ་བཀའ་དྲིན་རྗེས་དྲན་གྱི་གཟེགས་རྟགས་འབུལ་དགོས་དོན་སྐོར་ལ་ཁོང་གིས། ༧སྐྱབས་རྗེ་ཀིརྟི་རིན་པོ་ཆེ་མཆོག་གིས་རྩོམ་རིག་གི་ཐོག་ལ་མཛད་པ་ཆེ་ཤོས་སྐྱོང་མཁན་ཞིག་ཡིན་པ་དང་། ལོ་རྒྱུས་ཀྱི་ཐོག་ནས་ཨ་མདོའི་བླ་མ་ཞིག་ལ་༧སྐྱབས་མགོན་རྒྱལ་བ་ཡབ་སྲས་སྐུ་ཕྲེང་ན་རིམ་གྱི་རྣམ་ཐར་གསལ་བསྡད་པ་ཧ་ལམ་ཉུང་ཉུང་རེད། རིན་པོ་ཆེ་མཆོག་ལ་ཆ་མཚོན་པ་ཡིན་ན། ༧སྐྱབས་མགོན་རྒྱལ་བའི་དབང་པོ་ལྔ་པ་ཆེན་པོའི་རྣམ་ཐར་དུ་གུ་ལའི་གོས་བཟང་གི་ནང་ལ་ཡང་ཡང་མཚན་འདོན་གྱི་ཡོད་རེད། དེ་བཞིན་ཉེ་རབས་ཀྱི་ལོ་རྒྱུས་ནང་དུའང་༧སྐྱབས་རྗེ་ཀིརྟི་རིན་པོ་ཆེ་སྐུ་ཕྲེང་ན་རིམ་གྱི་མཛད་རྗེས་གཟེངས་སུ་བཏོན་ནས་བྲིས་ཡོད་པ་སོགས་ལོ་རྒྱུས་ཀྱི་གནས་བབ་དྲན་གསོ་བྱས་པའི་ཐོག་ནས་༧སྐྱབས་རྗེ་ཀིརྟི་རིན་པོ་ཆེ་མཆོག་ལ་རྒྱལ་སྤྱིའི་པེན་བོད་ཀྱི་རྩོམ་པ་པོའི་མཐུན་ཚོགས་ཀྱི་ངོས་ནས་བཀའ་དྲིན་རྗེས་དྲན་གྱི་རྩོམ་རིག་གཟེངས་རྟགས་ཕུལ་གྱི་ཡོད་སྐོར་སོགས་གསུངས་སོང་།

དེའི་རྗེས་པེན་ཕྱི་སྡོད་བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་མི་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་ཉམས་ཞིབ་པ་ཀླུ་མཚོ་སྐྱིད་ལགས་ཀྱིས་༧སྐྱབས་རྗེ་ཀིརྟི་རིན་པོ་ཆེ་མཆོག་གི་མཛད་རྣམ་སྙིང་བསྡུས་ངོ་སྤྲོད་གནང་རྗེས། མཛད་སྒོའི་དམིགས་བསལ་སྐུ་མགྲོན་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གིས། དེ་རིང་ཕྱི་སྡོད་པེན་བོད་ཀྱི་རྩོམ་པ་པོའི་མཐུན་ཚོགས་བཙུགས་ནས་མི་ལོ་ཧྲིལ་པོ་ཉེར་ལྔ་འཁོར་བའི་དུས་དྲན་ལ་བོད་མི་མང་སྤྱི་འཐུས་ལྷན་ཚོགས་དང་ང་རང་སྒེར་གྱི་ངོས་ནས་བཀྲ་ཤིས་བདེ་ལེགས་ཞུ་རྒྱུ་ཡིན། ༧སྐྱབས་རྗེ་ཀིརྟི་རིན་པོ་ཆེ་མཆོག་ལ་བཀའ་དྲིན་རྗེས་དྲན་གྱི་རྩོམ་རིག་གཟེངས་རྟགས་ཕུལ་བར་བསྔགས་བརྗོད་དང་ཐུགས་རྗེ་གནང་ཞུ་རྒྱུ་ཡིན། རྒྱུ་མཚན་ནི་༧སྐྱབས་རྗེ་ཀིརྟི་རིན་པོ་ཆེ་མཆོག་བོད་རང་དབང་ཡིན་པའི་སྐབས་ནས་བོད་ཀྱི་ཆོས་དང་རིག་གཞུང་འཕེལ་རྒྱས་ཀྱི་ཐོག་ལ་ཐུགས་བཞེས་ཡོད་པ་དང་། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་བོད་ལ་བཙན་འཛུལ་བྱེད་པའི་སྐབས་རྒྱ་ནག་གིས་བོད་ནང་དྲག་གནོན་བྱས་པ་སོགས་ཀྱི་མྱོང་བ་ཡོད་པ། བཙན་བྱོལ་དུ་འབྱོར་ནས་བཙན་བྱོལ་ནང་དུ་རང་མི་རིགས་ཀྱི་རིག་གནས་གཅེས་ཉར་དང་། དམངས་གཙོའི་འཕེལ་རིམ་གྱི་བྱ་གཞག་ནང་མཉམ་ཞུགས་ཀྱི་ཐོག་ནས་སྐུ་ལས་བསྐྱོན་ཡོད་པ་མ་ཟད། རིན་པོ་ཆེ་མཆོག་ལ་གསུང་རྩོམ་ ༡༤༠ ལྷག་ཡོད་པ་སོགས་བོད་ཀྱི་རིག་གནས་ཀྱི་ཐོག་ལ་ཧ་ཅང་ཐུགས་ཁུར་བཞེས་པ་ཡིན་པའི་ཆ་ནས་གཟེངས་རྟགས་ཕུལ་བར་ལེགས་གསོལ་བསྔགས་བརྗོད་དང་བཀའ་དྲིན་རྗེས་དྲན་ཞུ་རྒྱུ་ཡིན། ཞེས་དང་། ཆུང་བྱིས་པའི་དུས་ནས་དཔེ་དེབ་ཀློག་རྒྱུའི་གོམས་འདྲིས་དང་སྤྲོ་བ་ཇི་ལྟར་སྤྲོད་དགོས་ཀྱི་ཡོད་པ་དེ་ལ་ཕ་མ་དང་དགེ་རྒན་རྣམས་ནས་ངེས་པར་དུ་དགོངས་པ་བཞེས་དགོས་པ་ཞིག་ཆགས་ཀྱི་འདུག དེ་དང་ཕྱོགས་མཚུངས་ན་གཞོན་ཚོའི་ནང་ལོགས་ལ་རྩོམ་རིག་དང་འབྲེལ་བའི་བགྲོ་གླེང་སོགས་བྱ་རྒྱུའི་མཐུན་རྐྱེན་བསྐྲུན་ཐུབ་ན་ཡག་པོ་འདུག རང་མི་རིགས་ཀྱི་རིག་གནས་ལ་དབྱིངས་དང་དོ་སྣང་། ད་ལྟའི་དུས་ཚོད་ལ་བོད་ཀྱི་ཆག་འཇིག་གི་གནས་སྟངས་ལ་བསམ་ཐུབ་མཁན་གྱི་མི་རབས་ཤིག་དགོས་ཀྱི་ཡོད་སྐོར་དང་། སྤྱི་ཚོགས་འདིའི་ནང་ལ་རྩོམ་པ་པོ་བོད་རིག་པའི་གནས་ལ་དོ་དབྱིངས་གང་མང་ཡོང་བའི་རེ་བ་བྱེད་ཀྱི་ཡོད་ལ། རང་མི་རིགས་ཀྱི་རིག་གནས་སྲུང་སྐྱོབ་ངེས་པར་དུ་བྱ་དགོས་ཀྱི་ཡོད་སྐོར་སོགས་གསུངས་སོང་།

དེ་ནས་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། ༧སྐྱབས་རྗེ་ཀིརྟི་རིན་པོ་ཆེ་མཆོག་གིས་དེབ་ ༢༠༠ ཙམ་བརྩམས་པའི་ཐོག་ནས་རྩོམ་རིག་གི་ཐོག་ལ་མཛད་རྗེས་ཕུལ་དུ་བྱུང་བ་གནང་བའི་མཛད་རྗེས་རྗེས་སུ་དྲན་པའི་མཛད་སྒོ་འཚོགས་པ་ཞིག་དང་། ང་རང་མཛད་སྒོ་འདིར་བཅར་ཐུབ་པ་དང་སྐད་ཆ་ཚིག་ཁ་ཤས་བཤད་རྒྱུའི་གོ་སྐབས་བྱུང་བར་སྐལ་བ་བཟང་པོ་ཞིག་ལ་ངོས་འཛིན་བྱེད་ཀྱི་ཡོད། ཕྱི་སྡོད་པེན་བོད་ཀྱི་རྩོམ་པ་པོའི་མཐུན་ཚོགས་ཀྱི་ངོས་ནས་འདས་པའི་ལོ་ཉེར་ལྔའི་ནང་རྒྱལ་སྤྱིའི་སྟེང་བོད་ཀྱི་རིག་གཞུང་དང་། སྐད་ཡིག་སོགས་ཀྱི་སྐོར་ལ་ངོ་སྤྲོད་གནང་བ་དང་། དུས་ཚོད་གཉན་འཕྲང་ཅན་དེ་འདྲའི་སྐབས་སུ་ཤེས་ཡོན་གྱི་སྒྲིག་འཛུགས་སོགས་བཙུགས་ཏེ་ཚོགས་པ་ཁག་གཞན་དང་འབྲེལ་བ་བཙུགས་ཏེ། ད་ལྟ་བར་དུ་རྒྱུན་གནས་ཐུབ་པར་ཚོགས་མི་ཡོངས་ལ་བསྔགས་བརྗོད་ཞུ་རྒྱུ་ཡིན། ཞེས་དང་། དེ་རིང་༧སྐྱབས་རྗེ་ཀིརྟི་རིན་པོ་ཆེ་མཆོག་ལ་ཆེ་བསྟོད་ཀྱི་གཟེངས་རྟགས་ཕུལ་ཐུབ་པ་དང་། ཐོག་མར་དེ་འདྲའི་ཀུན་སློང་འཁུར་བར་ཡག་པོ་ཞེ་དྲགས་བྱུང་འདུག སྤྱི་ཚོགས་ནང་ཕྱག་ལས་གནང་མཁན་ཡོང་གི་ཡོད་པ་རེད། དེ་ལ་ངོས་འཛིན་བྱེད་ཐུབ་དགོས་པ་དེ་གལ་ཆེན་པོ་ཆགས་ཀྱི་ཡོད་པ་རེད། ༧སྐྱབས་རྗེ་ཀིརྟི་རིན་པོ་ཆེ་མཆོག་གི་བརྩམས་ཆོས་དེ་དག་མི་འདྲ་བ་ཞིག་དང་ཐུགས་ཕན་གསོ་བའི་རེ་བ་དང་ཡིད་ཆེས་བྱེད་ཀྱི་ཡོད། རིན་པོ་ཆེ་མཆོག་གིས་བོད་ཀྱི་སྐད་ཡིག་དང་། རིག་གཞུང་། ལོ་རྒྱུས་སོགས་ཀྱི་ཐོག་ལ་ཕྱག་རྗེས་ཆེན་པོ་བཞག་ཐུབ་པ་ཞིག་ལ་ངོས་འཛིན་བྱེད་ཀྱི་ཡོད། བོད་ཀྱི་རིག་གནས་དང་རིག་གཞུང་། ནང་ཆོས་ཀྱི་ཐོག་ལ་ཕྱག་ལས་འབུར་དུ་ཐོན་པ་གནང་ཡོད་པ་དང་། རིན་པོ་ཆེ་མཆོག་གིས་བསྟན་པ་དང་འགྲོ་བའི་དོན་དུ་ཕྱག་ལས་རིམ་པ་གནང་ཡོད་སྐོར་སོགས་གསུངས་སོང་།

བོད་མིའི་སྒྲིག་འཛུགས་སྲིད་སྐྱོང་སྤེན་པ་ཚེ་རིང་མཆོག་གིས། རྒྱལ་སྤྱིའི་པེན་རྩོམ་པ་པོའི་མཐུན་ཚོགས་བཙུགས་པའི་དགོས་དམིགས་ནི་རྩོམ་པ་པོ་ཕན་ཚུན་འབྲེལ་བ་བྱ་རྒྱུ་དང་། དཀའ་ངལ་འཕྲད་པའི་སྐབས་གདོང་ལེན་བྱ་དགོས་པ། རྩོམ་པ་པོའི་རང་དབང་རྩོད་ལེན་བྱ་རྒྱུ་སོགས་རེད། དེང་སང་རྒྱལ་སྤྱིའི་པེན་རྩོམ་པ་པོའི་མཐུན་ཚོགས་ཀྱི་ངོས་ནས་ཤུགས་ཆེ་ཆུང་ཇི་ཙམ་བྱེད་ཐུབ་ཀྱི་ཡོད་མེད་དེ་རྒྱལ་སྤྱིའི་གནས་ཚུལ་ནང་གོ་རྒྱུ་མེད་པར་བརྟེན། ཞུ་ཐུབ་ཀྱི་མི་འདུག་སྟེ། བྱས་པ་ཡིན་ན་དངོས་གནས་ནུས་པ་འདོན་ཐུབ་རྒྱུའི་སྒྲིག་འཛུགས་ཤིག་ཆགས་ཀྱི་ཡོད་པ་རེད། རྒྱུ་མཚན་ནི་དེའི་ནང་ལོགས་ལ་འཛམ་གླིང་གི་རྩོམ་རིག་མཁས་པ་མང་པོ་ཞིག་མཉམ་ཞུགས་བྱེད་ཀྱི་ཡོད་པ་རེད། བོད་པའི་སྤྱི་ཚོགས་ནང་ལོགས་ལ་རྩོམ་འབྲི་མཁན་མང་པོ་འདུག དེབ་བྲིས་ཀྱང་ཀློག་མཁན་དགོས་ཀྱི་ཡོད་པ་རེད། དེབ་མང་པོ་ཡོད་ཀྱང་ཀློག་མཁན་ཉུང་དྲགས་ཀྱི་ཡོད་པ་རེད། དེབ་བྲིས་པ་གཅིག་པུ་མིན་པར་སྤྱི་ཚོགས་ནང་ལོགས་ཀློག་རྒྱུའི་གོམས་གཤིས་ཡོད་ན་ཕན་ཐོགས་ཡོད་རེད་བསམ་གྱི་འདུག ༧སྐྱབས་རྗེ་ཀིརྟི་རིན་པོ་ཆེ་མཆོག་བོད་ནས་བཙན་བྱོལ་དུ་ཕེབས་པ་ནས་ད་ལྟ་བར་དུ་བརྗོད་གཞི་མི་འདྲ་བའི་ཐོག་ལ་དེབ་མང་པོ་བརྩམས་ཡོད་སྐོར་དང་། བོད་ནང་གི་བོད་མིའི་གནས་སྟངས་སྐོར་དང་། རྒྱ་ནག་གིས་བོད་ནང་དུ་དམ་དྲག་ཤུགས་ཆེན་བྱས་ཏེ་སློབ་གྲྭ་ཁག་མང་པོ་སྒོ་བརྒྱབ་པ། བོད་མི་རིགས་ཀྱི་ངོ་བོ་རྩ་མེད་གཏོང་རྒྱུའི་སྲིད་ཇུས་ལག་བསྟར་བྱེད་ཀྱི་ཡོད་པ་རེད། བོད་ནང་དུ་རང་གི་སྐད་ཡིག་བཀོལ་སྤྱོད་བྱེད་བཅུག་གི་མེད་པར་བརྟེན། བཙན་བྱོལ་དུ་ཡོད་པའི་བོད་མི་རྣམས་ཀྱིས་འགན་འཁུར་བའི་ཐོག་ནས་རང་གི་སྐད་ཡིག་དང་རིག་གཞུང་སོགས་མི་ཉམས་རྒྱུན་འཛིན་བྱ་རྒྱུ་གལ་ཆེན་ཡིན་སྐོར་སོགས་གསུངས་སོང་།

བཀའ་ཟུར་༧སྐྱབས་རྗེ་ཀིརྟི་རིན་པོ་ཆེ་མཆོག་གིས། དེ་རིང་ཕྱི་སྡོད་པེན་བོད་ཀྱི་རྩོམ་པ་པོའི་མཐུན་ཚོགས་བཙུགས་ནས་མི་ལོ་ཧྲིལ་པོ་ ༢༥ འཁོར་བར་བཀྲ་ཤིས་བདེ་ལེགས་ཞུ་རྒྱུ་ཡིན། ཕྱི་སྡོད་པེན་བོད་ཀྱི་རྩོམ་པ་པོའི་མཐུན་ཚོགས་དང་རྒྱལ་སྤྱིའི་པེན་རྩོམ་པ་པོའི་མཐུན་ཚོགས་ཀྱི་ངོས་ནས་ང་ལ་གཟེངས་རྟགས་ཤིག་གསོལ་རས་གནང་བར་དམིགས་བསལ་གྱིས་ཐུགས་རྗེ་ཆེ་ཞུ་ཡི་ཡིན། སྤྱིར་བཏང་ངའི་རྩོམ་ཡིག་ལ་བྱ་དགའ་གནང་འོས་པའི་རྩོམ་གྱི་སྒྱུ་རྩལ་དང་། རྩོམ་གྱི་རང་བཞིན་གསལ་སྟོན་གྱི་རྣམ་པ་དེ་འདྲ་གང་ཡང་མེད་པ་རེད། འོན་ཀྱང་། རིམ་པས་རྩོམ་ཡིག་སྣ་ཁ་མང་པོ་ཞིག་ཡོད་པ་དང་། དེས་བོད་ཕྱི་ནང་གཉིས་ཀ་ལ་ཕན་ཐོགས་ཆེན་པོ་བྱུང་བ་དེ་ལ་རྣམ་པ་ཚོས་ཆེ་མཐོང་གནང་བ་ཞིག་རེད་བསམ་གྱི་འདུག དེར་བརྟེན་ཐུགས་རྗེ་ཆེ་ཞུ་རྒྱུ་ཡིན། ཞེས་དང་། བོད་ཀྱི་རྩོམ་པ་པོ་ཉུང་ཉུང་མ་གཏོགས་མེད་ཀྱང་། རྣམ་པ་ཚོས་རྩོམ་པ་པོ་ཡོད་པ་དེ་དག་གི་འབོད་སྒྲ་ལ་གསན་གྱི་ཡོད་པ་དང་ཐུགས་སྣང་གནང་གི་ཡོད་པར་བརྟེན། བོད་ནང་གི་རྩོམ་པ་པོ་དང་དཀའ་ངལ་འོག་ལ་འཕྲད་བསྡད་པའི་རྩོམ་པ་པོ་དེ་དག་གི་ཚབ་ཞུས་ནས་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས་སོང་།

རྩོམ་ཡིག་གི་ནང་དོན་དང་འབྲེལ་ནས་རིན་པོ་ཆེ་མཆོག་གིས། ང་རང་སྐྱེས་ཐོབ་ཀྱི་དབང་གིས་ཀིརྟི་ཚང་གི་བླ་མ་ཞིག་གི་སྤྲུལ་སྐུ་ལ་སྐྱེས་པ་རེད། དེར་བརྟེན་ཀིརྟི་ཚང་གི་དགོན་མ་ལག་དང་། དེའི་སློབ་ཁྲིད་ལ་ལྟ་རྟོག་བྱ་དགོས་པ་དེ་ངའི་སྐྱེས་ཐོབ་ཀྱི་ལས་འགན་ཞིག་རེད། རྩོམ་ཡིག་ཁག་ཅིག་དེ་དང་འབྲེལ་བ་ཆགས་ཀྱི་ཡོད། བོད་མི་ཞིག་ཡིན་པའི་བོད་སྤྱི་པའི་ལས་འགན་འཁུར་བའི་ཐོག་ནས་ང་ཚོས་སྒྲུབ་དགོས་པའི་ལས་འགན་ག་རེ་ཡིན་པའི་སྐོར་ལ་རྩོམ་ཡིག་ཁག་ཅིག་ཡོད། རྩོམ་ཡིག་ཁག་ཅིག་དམངས་གཙོ་དང་འབྲེལ་བའི་སྐོར་ཆགས་ཀྱི་ཡོད། ཅེས་དང་། ངས་རྩོམ་ཡིག་འདི་བྲིས་པར་བརྟེན་རྒྱ་ནག་གཞུང་གིས་བཙོན་འཇུག་བྱས་པ་དང་། ངའི་རྩོམ་ཡིག་དེ་དག་བོད་ནང་ལ་པར་སྐྲུན་བྱེད་མི་ཆོག་པའི་བཙན་བཀའ་བཏང་བ། པར་སྐྲུན་བྱ་རྒྱུའི་དངུལ་པར་ཁང་ལ་སྤྲད་པ་གཞུང་བཞེས་བཏང་བ་སོགས་ཀྱི་དཀའ་ངལ་མང་པོ་འཕྲད་པ་རེད། ང་དང་འབྲེལ་བ་ཡོད་པའི་སློབ་གྲྭ་ཁག་ཡང་ནས་ཡང་དུ་སྒོ་བརྒྱབ་པ་དང་། གྲྭ་པ་མང་པོ་ཞིག་སྡོད་ས་བརྟེན་ས་མེད་པར་ལུས་པའི་དཀའ་ངལ་མང་པོ་འཕྲད་ཀྱི་ཡོད་པ་རེད། ད་ལྟ་བར་དུ་རྩོམ་ཡིག་མང་པོ་བྲིས་པ་དེ་དག་གིས་བོད་ཕྱི་ནང་གཉིས་ཀར་ཕན་ཐོགས་བྱུང་བར་བརྟེན་དགའ་པོ་བྱུང་། བོད་ཆོལ་ཁ་གསུམ་གྱི་རྩོམ་པ་པོས་བོད་ཀྱི་ཆོས་དང་རིག་གཞུང་ཉམས་པ་སླར་གསོ་དང་མི་ཉམས་རྒྱུན་འཛིན་བྱ་དགོས་པའི་ཐོག་ལ་འབད་བརྩོན་གནང་སྟེ་རྩོམ་ཡིག་ཡག་པོ་སྤེལ་གནང་འདུག གོ་སྐབས་འདི་བརྒྱུད་ནས་ཐུགས་རྗེ་ཆེ་ཞུ་རྒྱུ་ཡིན། མ་འོངས་པར་རྣམ་པ་ཚོས་ཤུགས་བསྐྱོན་རྒྱུ་དང་། དཀའ་ངལ་ལ་གདོང་ལེན་གནང་ནས་རྩོམ་གྱི་ཐོག་ནས་མི་མང་གི་སེམས་ནང་ལ་ལམ་སྟོན་གནང་རོགས་གནང་། བོད་ནང་དུ་རྩོམ་ཡིག་འབྲི་བ་དང་། རང་སྲོག་བློས་བཏང་བ། ཆབ་སྲིད་ཀྱི་དཀའ་ངལ་མང་པོ་འཕྲད་བཞིན་ཡོད་པ་དེ་དག་ལ་གདུང་སེམས་མཉམ་སྐྱེད་ཞུ་རྒྱུ་དང་ད། བཙོན་འོག་ཏུ་ཡོད་པ་རྣམས་མགྱོགས་ནས་མྱུར་དུ་ཀློད་གྲོལ་ཡོང་བ་དང་། བོད་ནང་དུ་རྩོམ་གྱི་རང་དབང་གང་མགྱོགས་འཐོབ་རྒྱུའི་སྨོན་ལམ་ཡོད། ཅེས་གསུངས་སོང་ལ། རྩོམ་པ་པོ་རྣམས་ཀྱི་བོད་ཆོལ་ཁ་གསུམ་འཆམ་མཐུན་དང་རྡོག་རྩ་གཅིག་ཏུ་སྒྲིལ་བར་རྩོམ་རིག་ལམ་ནས་ནུས་པ་འདོན་དགོས་པ་ལས་ནང་ཁུལ་ཚིག་མཚོན་གཡུག་རེས་བྱས་བསྡད་ན་ཕན་ཐོགས་མེད་སྐོར་སོགས་ཀྱི་བཀའ་སློབ་གནང་སོང་།

གསར་འགོད་པ། བསྟན་འཛིན་ཕུར་བུ།

རྩོམ་སྒྲིག་བྱེད་མཁན། པདྨ་མཚོ།