ས་གནས་མགོ་འཛིན་གྱི་ནུས་པ་གོང་སྤེལ་གཏོང་ཐབས་ཀྱི་ཟབ་སྦྱོང་ཞིག་འཚོག་བཞིན་འདུག

ས་གནས་མགོ་འཛིན་གྱི་ནུས་པ་གོང་སྤེལ་གཏོང་ཐབས་ཀྱི་ཟབ་སྦྱོང་སྐབས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་༧སྐུའི་ཡང་སྲིད་ཀྱི་ལས་དོན་བྱེད་ཕྱོགས་དང་གོ་སྟོན་སྲུང་གཙི་བྱེད་ཕྱོགས་སྐོར་ལ་ནན་བརྗོད་གནང་སོང་།

ཁ་སང་ཟླ་འདིའི་ཕྱི་ཚེས་ ༢༦ ནས་ ༢༨ བར་ཉིན་གྲངས་གསུམ་རིང་བཞུགས་སྒར་དྷ་རམ་ས་ལའི་ཉེ་འདབས་སུ་ཆགས་པའི་ཨེ་ཤ་ཡ་ཧེལ་ཐི་རི་སོར་ཊི་(Asia Health Resorts) གསོལ་མགྲོན་ཁང་དུ། བོད་མིའི་སྒྲིག་འཛུགས་ནང་སྲིད་ལས་ཁུངས་དང་ཨ་རིའི་རྒྱལ་ཡོངས་མང་གཙོ་ལྟེ་གནས་ཁང་གཉིས་ཀྱི་གོ་སྒྲིག་འོག བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ཁྱབ་ཁོངས་ས་གནས་མགོ་འཛིན་རྣམས་ཀྱི་ནུས་པ་གོང་སྤེལ་གཏོང་ཕྱོགས་ཀྱི་ཟབ་སྦྱོང་ཞིག་འཚོག་བཞིན་ཡོད་ཅིང་། དབུ་འབྱེད་མཛད་སྒོའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་དང་ནང་སྲིད་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་དང་། ནང་སྲིད་དྲུང་ཆེ་དཔལ་ལྡན་དོན་གྲུབ་ལགས། དྷ་སའི་ཨ་རིའི་རྒྱལ་ཡོངས་མང་གཙོ་ལྟེ་གནས་ཁང་གི་འགན་འཛིན་གཞོན་པ་དཔལ་ལྡན་ཕུན་ཚོགས་ལགས། བོད་མིའི་སྒྲིག་འཛུགས་ཀྱི་དྲུང་ཆེ་ཟུར་པ་ཚེ་རིང་སྟོབས་རྒྱལ་ལགས། ནང་སྲིད་དྲུང་འཕར་བསྟན་འཛིན་ནོར་བུ་ལགས། ནང་སྲིད་དྲུང་འཕར་བཀྲ་ཤིས་བདེ་སྐྱིད་ལགས། རྒྱ་བལ་འབྲུག་གསུམ་གྱི་ས་གནས་མགོ་འཛིན་དང་ལས་ཚབ་བཅས་ཁྱོན་ཚོགས་བཅར་བ་ ༤༠ ལྷག་མཉམ་ཞུགས་གནང་ཡོད་འདུག

ཐེངས་འདིའི་ཟབ་སྦྱོང་གི་སྐོར་ལ་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་ཀྱིས། ཕྱི་ལོ་ ༢༠༢༣ ལོའི་ཟླ་ ༡༡ ནང་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ས་གནས་མགོ་འཛིན་རྣམས་ཀྱི་འཛིན་སྐྱོང་ཚོགས་ཆེན་འཚོགས་པ་རེད། ཟླ་བ་ཁ་ཤས་ཀྱི་ནང་ས་གནས་མགོ་འཛིན་མང་པོ་བརྗེ་བོ་བརྒྱབ་ཡོད་པར་བརྟེན། ས་གནས་མགོ་འཛིན་གསར་བས་ཉིན་རེའི་ཕྱག་ལས་གནང་སྐབས་ཁྲིམས་དང་སྒྲིག་གཞི། ལས་དོན་བྱེད་ཕྱོགས། དགོངས་པ་བཞེས་སྟངས། རྩིས་ཁྲ་རྩིས་ལེན་བྱེད་ཕྱོགས། ས་ཆ་འདེམས་སྒྲིག་བྱེད་སྟངས། འཆར་གཞི་ལ་རྒྱབ་གཉེར་སྤྲོད་ཕྱོགས་ཐོག་བཀའ་ཤག་ནས་ཟབ་སྦྱོང་གནང་གལ་ཆེ་བའི་དགོངས་གཞིའི་ཐོག་འཚོགས་པ་ཞིག་རེད། ཅེས་དང་། ཕྱི་ལོ་ ༡༩༩༥ ནས་ཕྱི་ལོ་ ༢༠༠༡ བར་ས་གནས་མགོ་འཛིན་རྣམས་བོད་མིའི་སྒྲིག་འཛུགས་ཀྱི་སྒྲིག་གཞིར་ཐད་ཀར་འབྲེལ་བ་མེད་པ་རེད། ཕལ་ཆེར་རང་མགོ་རང་ཐོན་ལྟ་བུ་རེད། རང་ཉིད་ཀྱིས་དངུལ་འཚོལ་བ་ལས་རོགས་དངུལ་གྱི་ལས་གཞི་རིགས་མེད་པ་རེད། ཕྱི་ལོ་ ༢༠༠༡ ནས་བཟུང་བཀའ་ཤག་སྐབས་བཅུ་གཅིག་དང་བཅུ་གཉིས་སྐབས་བོད་མིའི་སྒྲིག་འཛུགས་ནང་སྲིད་ལས་ཁུངས་བརྒྱུད་ས་གནས་མགོ་འཛིན་ལ་སྒྲིག་གཞི་དང་འཆར་གཞི་ཁག་ལག་བསྟར་བྱས་པ་རེད། ས་གནས་མགོ་འཛིན་ལས་གནས་ལ་རྒྱུས་མངའ་ཡོད་མེད་ཀྱི་ཐོག་ལས་དོན་བྱེད་ཕྱོགས་ཁྱད་པར་ཏན་ཏན་འགྲོ་བཞིན་འདུག ཅེས་བརྗོད་སོང་།

སྐབས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས། སྤྱིར་༧གོང་ས་རྒྱལ་བ་རིན་པོ་ཆེ་མཆོག་གིས་དགུང་ལོ་ ༡༡༣ བཞུགས་པའི་བཀའ་གནང་ཡོད་ཅིང་། ང་ཚོས་ཀྱང་བཀའ་ལུང་བཞིན་སྐུ་ཚེ་རིང་པོ་བཞུགས་པའི་སྨོན་ལམ་རྒྱག་དགོས། བླ་མ་སྐུ་ཚེ་རིང་པོ་བརྟན་མིན་བླ་སློབ་ཀྱི་དམ་ཚིག་འབྲེལ་བ་དམ་ཟབ་ཡོད་དགོས། བོད་མིའི་སྒྲིག་འཛུགས་ནས་༸གོང་ས་རྒྱལ་བ་རིན་པོ་ཆེ་མཆོག་གི་ཡང་སྲིད་གནད་དོན་དང་འབྲེལ་ཏེ་དོན་ཚན་དྲུག་ཅན་གྱི་ཡིག་ཆ་ཞིག་འགྲེམས་སྤེལ་ཞུས་ཡོད། དོན་ཚན་དྲུག་པ་དེ་ཡང་སྲིད་རྩད་གཅོད་དང་འབྲེལ་བ་རེད། ཡང་སྲིད་རྩད་གཅོད་དང་འབྲེལ་བ་དེ་དགའ་ལྡན་ཕོ་བྲང་ནས་ཐུགས་ཐག་གཅོད་རྒྱུ་མ་གཏོགས། རྒྱ་ནག་གཞུང་དང་ཕྱིའི་རྒྱལ་ཁབ་ཀྱི་ཐེ་ཇུས་བྱེད་མི་ཆོག་པ་མ་ཟད། བོད་མིའི་སྒྲིག་འཛུགས་ཀྱིས་ཀྱང་ཐེ་ཇུས་བྱེད་མི་ཆོག་ཅེས་གསལ་ཡོད། དེ་དག་དཔོན་རིགས་དང་མི་རིགས་གཞན་པ་ཚོར་མཇལ་སྐབས་བོད་མིའི་སྒྲིག་འཛུགས་ཀྱི་ལངས་ཕྱོགས་དོན་ཚན་དྲུག་ལས་གཞན་གང་ཡང་འགྲེལ་བརྗོད་ཞུ་དགོས་པའི་རྒྱུ་མཚན་མེད།  ད་ལྟའི་དུས་སུ་ཆབ་སྲིད་ཀྱི་གནད་འགག་ཐོག་ནས་བལྟས་པ་ཡིན་ན། ༧གོང་ས་རྒྱལ་བ་རིན་པོ་ཆེ་མཆོག་སྐུ་འཚོ་བཞུགས་སྐབས་སུ་རྒྱ་ནག་གཞུང་གིས་༧སྐུའི་ཡང་སྲིད་དང་འབྲེལ་བའི་ཐོག་གང་ཡང་བྱེད་མི་ཐུབ། ཁོ་ཚོས་ལོ་ཉི་ཤུ་ཙམ་གྱི་སྔོན་ནས་གྲ་སྒྲིག་བྱས་བསྡད་ཡོད་ཀྱང་། ད་ལྟའང་ལག་པ་འཆང་ས་གང་ཡང་རག་མེད། ཁོང་ཚོས་གྲ་སྒྲིག་ཨང་གསར་བྱས་བསྡད་པ་དེ་གཞུང་གཞན་པས་ང་ཚོར་ལབ་ཡོང་གི་ཡོད། ཅེས་གསུངས་སོང་།

ཡང་སྲིད་སྐྱོང་མཆོག་ནས། དེ་བཞིན་བོད་མིའི་སྤྱི་ཚོགས་ནང་ནས་ཀྱང་ད་ལྟའི་ཆར་སྐུའི་ཡང་སྲིད་དང་འབྲེལ་བའི་ཡིག་ཆ་གཅིག་ཡོད་པ་དེ་ཕྱི་ལོ་ ༢༠༡༡ ཟླ་བ་ ༠༩ ནང་གི་ཡིག་ཆ་དེ་རེད། དེ་ཚོར་ཆ་ཚང་གཟིགས་དགོས།  ༧སྐུའི་ཡང་སྲིད་དང་འབྲེལ་བའི་ཡིག་ཆ་དེ་མ་གཏོགས་མེད། གཞན་པ་ཚོས་ག་རེ་བྱེད་ཀྱི་ཡོད་ཀྱང་ང་ཚོར་འབྲེལ་བ་མེད་པ་རེད། ཕྱི་ལོ་ ༢༠༡༡ གི་ཡིག་ཆ་དེའི་ནང་དུ་༸གོང་ས་རྒྱལ་བ་རིན་པོ་ཆེ་མཆོག་དགུང་ལོ་ ༩༠ ཕེབས་པའི་སྐབས་སུ་ཡང་སྲིད་དང་འབྲེལ་བའི་བཀའ་མོལ་གནང་གི་རེད་ཅེས་གསལ་ཡོད། དེ་ཡིན་དུས་༸གོང་ས་རྒྱལ་བ་རིན་པོ་ཆེ་མཆོག་དགུང་ལོ་ ༩༠ མ་ཕེབས་པའི་སྔོན་ལ་ས་གནས་མགོ་འཛིན་སོ་སོའི་ཁྱབ་ཁོངས་དགོན་པ་དང་། སྒྲིག་འཛུགས་ཁག་ནས་མགོན་པོ་མཆོག་གི་ཡང་སྲིད་དང་འབྲེལ་བའི་གྲོས་ཆོད་གཏན་འབེབས་གནང་ན། བོད་བརྒྱུད་ནང་བསྟན་གྱི་རྗེས་འཇུག་པ་ཐུན་མོང་གི་ལངས་ཕྱོགས་གཅིག་གྱུར་ཡོང་ཐུབ་ལ། གྲོས་ཆོད་ཡིག་ཆ་དེ་དག་ཆོས་རིག་ལས་ཁུངས་ནས་ཕྱོགས་བསྒྲིགས་ཞུ་གི་རེད། ཅེས་གསལ་བཤད་དང་། དེ་ལྟར་རྒྱལ་སྤྱིའི་ནང་པའི་སྤྱི་ཚོགས་དང་། རྒྱལ་སྤྱིའི་སྲིད་གཞུང་ཁག་ནས་གྲོས་ཆོད་གཏན་འབེབས་གནང་ཐུབ་ན། ༸རྒྱལ་བའི་ཡང་སྲིད་ཐོག་བོད་མིའི་ཕྱོགས་ནས་ཐབས་ཇུས་ལྡན་པའི་ཐོག་ནས་གྲ་སྒྲིག་ཞུ་ཐུབ་རྒྱུ་རེད་ཅེས་ནན་བརྗོད་གནང་སོང་།

དེ་བཞིན་ཕྱི་ལོ་ ༢༠༢༥ ལོར་༸གོང་ས་མཆོག་ཕྱི་ལུགས་ལྟར་དགུང་ལོ་ ༩༠ ལ་ཕེབས་པའི་༸སྐུའི་གོ་སྟོན་གྱི་ལོར་སྲུང་གཙི་དང་བསྟུན།  བྱམས་བརྩེའི་ལོ་ཞེས་༸རྒྱལ་བའི་གསང་གསུམ་གྱི་མཛད་པ་འཕྲིན་ལས་དང་འབྲེལ་བའི་ལས་གཞི་སྣ་མང་སྤེལ་འཆར་ཡོད་པ་དང་། ས་གནས་སོ་སོའི་ངོས་ནས་ཀྱང་གོ་སྒྲིག་ཚོགས་ཆུང་བསྐོ་འཛུགས་ཐོག་༸སྐུའི་གོ་སྟོན་སྲུང་གཙི་ཞུ་ཕྱོགས་སྐོར་གསུངས་སོང་།

གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། སྐལ་བཟང་སྦྱིན་པ།