ཨེ་སི་ཊོ་ནི་ཡའི་གྲོས་ཚོགས་འཐུས་མི་ཚོས་རྒྱ་གཞུང་ལ་ངོ་རྒོལ་ཡོད་པའི་བསྒྲགས་གཏམ་སྤེལ།

ཨེ་སི་ཊོ་ནི་ཡའི་གྲོས་ཚོགས་འཐུས་མི་ཚོས་རྒྱ་ནག་གི་ངོ་རྒོལ་ལ་ལྟོས་མེད་ཀྱིས་བོད་མིའི་དམངས་གཙོ་དུས་ཆེན་གྱི་མཛད་སྒོར་མཉམ་ཞུགས་བྱས་ཏེ་བོད་དོན་ལ་མུ་མཐུད་རྒྱབ་སྐྱོར་དང་རྒྱ་གཞུང་ལ་ངོ་རྒོལ་ཡོད་པའི་བསྒྲགས་གཏམ་སྤེལ་ཡོད།

ཕྱི་ཟླ་ ༨ ཚེས་ ༣༠ ཉིན་ཨེ་སི་ཊོ་ནི་ཡར་ཡོད་པའི་རྒྱ་ནག་གཞུང་ཚབ་ཁང་གིས། ཡུལ་དེའི་བོད་དོན་རྒྱབ་སྐྱོར་ཚོགས་པའི་འབྲེལ་མཐུད་པ་རོ་ཡེ་སི་ཌི་རི་ཊར་(Mr Roy Strider) ལགས། གྲོས་ཚོགས་འཐུས་མི་ཀཱར་མེན་ཇོ་ལེར་(karmen Joller) ལགས་དང་། ཨེ་ས་ཌེར་ཨ་རུ་སེར་(Ester Aruser ) ལགས་སོགས་ཀྱིས། བོད་ཀྱི་དམངས་གཙོའི་དུས་ཆེན་ཐེངས་ ༦༤ པའི་གཞུང་འབྲེལ་མཛད་སྒོར་མཉམ་ཞུགས་བྱ་མི་ཆོག་པའི་ཉེན་བརྡ་བཏང་ཡོད་ཀྱང་། ཁ་སང་ཁོང་ཅག་གིས་གཞུང་འབྲེལ་མཛད་སྒོར་མཉམ་ཞུགས་གནང་སྟེ། བོད་མི་རྣམས་ཀྱིས་རང་དབང་འཐབ་རྩོད་བྱ་དགོས་པ་དང་། ཨི་སི་ཊོ་ནི་ཡས་བོད་དོན་ལ་མུ་མཐུད་རྒྱབ་སྐྱོར་བྱ་ངེས་ཡིན་པ་ནན་བཤད་གནང་ཡོད།

དེ་འབྲེལ་རྒྱ་ནག་གཞུང་ཚབ་ཁང་གིས་སྤེལ་བའི་ངོ་རྒོལ་བསྒྲགས་གཏམ་ནང་། བོད་ནི་གནའ་ནས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་མངའ་ཁོངས་ས་ཚིགས་ཤིག་ཡིན། བཙན་བྱོལ་བོད་མིའི་སྒྲིག་འཛུགས་ཟེར་བ་ནི་རྒྱ་ནག་གི་ཁྲིམས་སྒྲིག་ལ་གཏོར་བརླག་གཏོང་མཁན་གྱི་ཁྲིམས་མཐུན་མིན་པའི་ཆབ་སྲིད་ཚོགས་པ་ཞིག་ཡིན་པས། རྒྱལ་སྤྱིའི་ཐོག་བོད་དེ་རྒྱལ་ཁབ་ཅིག་ཡིན་པ་ངོས་འཛིན་བྱེད་ཀྱི་མེད། ཅེས་དང་། ཨེ་སི་ཊོ་ནི་ཡ་རྒྱལ་ཁབ་ཀྱིས་བོད་ནི་རྒྱ་ནག་གི་ཆ་ཤས་ཤིག་ཡིན་པས།  བོད་རང་བཙན་གྱི་སླད་དུ་ཞུ་གཏུགས་དང་ཁ་བྲལ་གྱི་བྱ་སྤྱོད་སྤེལ་མཁན་རྣམས་ལ་རྒྱབ་སྐྱོར་བྱ་རྒྱུ་མིན་པའི་ཁས་ལེན་བྱས་པ་བཞིན།  རྒྱལ་ཁབ་དེའི་གྲོས་ཚོགས་འཐུས་མིས་ཡུལ་དེའི་རྒྱ་ནག་ལ་ཁས་ལེན་བྱས་པ་རྣམས་ལག་བསྟར་ངེས་པར་དུ་བྱ་དགོས། བོད་དོན་རྒྱབ་སྐྱོར་ཚོགས་པའི་འབྲེལ་མཐུད་པ་བཙན་བྱོལ་བོད་མིའི་སྒྲིག་འཛུགས་སུ་ཕྱིན་པ་དེས། ཨེ་སི་ཊོ་ནི་ཡའི་ཁས་ལེན་ལ་རྒྱབ་འགལ་དང་། རྒྱ་ནག་གི་ནང་སྲིད་ལ་ཐེ་ཇུས་བྱས་པ་ཞིག་ཡིན་པས། རྒྱ་ནག་གིས་མཐའ་གཅིག་ཏུ་ངོ་རྒོལ་བྱེད་ཀྱི་ཡོད། ཅེས་གསལ་འདུག

རྒྱ་ནག་གི་གནོན་ཤུགས་ལ་མ་ལྟོས་པར་ཨེ་སི་ཊོ་ན་ཡའི་གྲོས་ཚོགས་འཐུས་མི་རྣམས་ཀྱིས་བོད་ཀྱི་དམངས་གཙོའི་དུས་ཆེན་ཐེངས་ ༦༤ པའི་གཞུང་འབྲེལ་མཛད་སྒོར་མཉམ་ཞུགས་གནང་ཡོད་པ་མ་ཟད། ཨེ་སོ་ཊོ་ནི་ཡ་གྲོས་ཚོགས་འཐུས་མི་ཡུལ་ཇུ་ཀུ་ཀལ་ལེ་རེ་ཌི་(Juku Kalle Raid ) མཆོག་གིས། ཉེ་ཆར་རྒྱ་ནག་གཞུང་ཚབ་ཁང་གི་ཡི་གེ་ཞིག་བསྐུར་བའི་ནང་། ང་རང་གླེན་པ་རེད་ཅེས་གསལ་འདུག་པ་མ་ཟད། རྒྱ་ནག་གིས་བོད་བཅིངས་གྲོལ་བཏང་བ་ཡིན་ཞེས་རྫུན་གཏམ་བསྐྱར་བཤད་བྱས་འདུག རང་དབང་གི་ལས་འགུལ་དེ་མི་རེ་ངོ་རེ་ནས་མགོ་འཛུགས་དགོས། ང་ཚོས་ཁྱེད་རྣམ་པར་རྒྱབ་སྐྱོར་བྱ་ངེས་རེད། བྱས་ཙང་དེ་རིང་ང་ཚོ་འདིར་བཅར་བ་ཡིན། ཨེ་སི་ཊོ་ནི་ཡ་གྲོས་ཚོགས་ནས་གཞུང་འབྲེལ་ཐོག་བོད་ཀྱི་ཆོས་དང་རིག་གཞུང་། རང་དབང་ལ་རྒྱབ་སྐྱོར་བྱེད་པའི་རེ་བ་འཆང་གི་ཡོད། ཅེས་གསུངས་ཏེ། རྒྱ་ནག་གཞུང་གིས་ཚུལ་མཐུན་མིན་པའི་བྱ་སྤྱོད་ལ་མངོན་གསལ་དོད་པོའི་ཐོག་ནས་ངོ་རྒོལ་དང་རྒོལ་གཏམ་སྤེལ་ཡོད།

ཡང་རྒྱ་ནག་གི་བསྒྲགས་གཏམ་ནང་། ཨེ་སི་ཊོ་ན་ཡའི་བློན་ཆེན་ལས་ཁུངས་ནས་རྒྱ་ནག་དང་དེའི་མངའ་ཁོངས། བོད་དང་འབྲེལ་བའི་གནད་དོན་གྱི་ཐད་ལ་བླང་དོར་ཡག་པོ་བྱས་ཏེ། ཡུལ་དེའི་གྲོས་ཚོགས་འཐུས་མི་ཚོས་དབུས་བོད་མིའི་སྒྲིག་འཛུགས་ལ་འབྲེལ་ལམ་བྱེད་མཚམས་བཞག་དགོས་པའི་རེ་སྐུལ་ཞུ་དགོས། ཞེས་གསལ་འདུག

གསར་འགོད་པ། དཔལ་ལྡན། རྩོམ་སྒྲིག་པ། སྐལ་བཟང་སྦྱིན་པ།