༸གོང་ས་མཆོག་གི་ཐུགས་རེ་མཛད་པ་བཞིན་བོད་པའི་སློབ་ཕྲུག་རྣམས་གནའ་དེང་ཟུང་འབྲེལ་གྱི་ཤེས་ཡོན་གང་ལེགས་ཐོག་ཡ་རབས་སྤྱོད་བཟང་ལྡན་པ་ཡོང་རྒྱུའི་རེ་འདུན་ཡོད་སྐོར་གསུངས།
དེ་རིང་ཕྱི་ཚེས་ ༥ ཉིན་རྒྱ་གར་རྒྱལ་ཡོངས་ཀྱི་དགེ་རྒན་ཉིན་མོའི་དུས་དྲན་སྲུང་གཙི་དང་བསྟུན། བོད་མིའི་སྒྲིག་འཛུགས་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་ནས་བོད་པའི་སློབ་གྲྭ་ཁག་གི་དགེ་ལས་ཚང་མར་འཚམས་འདྲིའི་གསུང་འཕྲིན་ཞིག་གནང་འདུག
ཤེས་རིག་བཀའ་བློན་མཆོག་གི་འཚམས་འཕྲིན་ནང་། རྒྱ་གར་གྱི་སྲིད་འཛིན་དམ་པ་ཨབ་དོལ་ཀ་ལཱམ་ (Dr. Abdul Kalam) མཆོག་གིས། དགེ་རྒན་གྱིས་སློབ་ཕྲུག་ཚོའི་གཤིས་རྒྱུད་དང་། འཇོན་ཐང་། མ་འོངས་མདུན་ལམ་བཅས་ལ་གང་ཅིའི་ཐོག་ནས་གསོ་སྐྱོང་བྱེད་ཀྱི་ཡོད་པས། དགེ་རྒན་གྱི་ཆེད་ལས་ནི་ལས་རིགས་བཟང་པོ་ཞིག་ཡིན། གལ་ཏེ་མི་མང་གིས་ང་ལ་དགེ་རྒན་ཡག་པོ་གཅིག་ཡིན་པར་དྲན་གསོ་བྱེད་ཀྱི་ཡོད་ཚེ། དེ་ནི་ཕྲན་ལ་ཆེ་བསྟོད་ཆེ་ཤོས་དེ་ཡིན། ཞེས་གསུངས་པ་ལ་གཞིགས་ན། ཁོང་གིས་སྲིད་འཛིན་གྱི་མཚན་གནས་ལས་དགེ་རྒན་གྱི་མཚན་གནས་རྩ་ཆེ་བར་བརྩིས་གནང་ཡོད། དེ་འདྲ་སོང་ཙང་དགེ་རྒན་རྣམ་པས་སོ་སོའི་ཆེད་ལས་ལ་དགའ་སྤོབས་སྐྱེ་འོས་པ་ཞིག་ཡིན་ལ། ཆེད་ལས་འདི་ཉིད་ལ་མུ་མཐུད་ཆེ་མཐོང་ཡོང་སླད་དགེ་རྒན་ཚང་མས་ལྷག་བསམ་རྣམ་དག་གིས་སོ་སོའི་རྣམ་དཔྱོད་དང་ཀུན་སྤྱོད་གཉིས་ཀ་བེད་སྤྱོད་ཚད་ལྡན་གཏོང་གལ་ཆེ། ཞེས་གསུངས་འདུག
བཀའ་བློན་མཆོག་ནས། ༸གོང་ས་རྒྱལ་བ་རིན་པོ་ཆེ་མཆོག་གིས་སྙིང་རྗེའི་ནུས་སྟོབས་ཞེས་པའི་ཕྱག་དེབ་ཏུ། ངའི་ཉམས་མྱོང་ལ་དགེ་རྒན་ཡག་པོ་ཙམ་མ་ཟད་བྱམས་བརྩེའི་ཐོག་ནས་སློབ་ཁྲིད་གནང་ཚེ་སློབ་ཚན་དེ་དག་ཀྱང་ཧ་ཅང་ཡག་པོ་ཤེས་ཀྱི་ཡོད། གང་ལྟར་སློབ་ཚན་ཡག་པོ་ཤེས་དང་མི་ཤེས་དེ་དགེ་རྒན་གྱི་བྱམས་བརྩེ་ལ་རག་ལུས་ཡོད། ཅེས་གསུངས་ཡོད། ༸གོང་ས་མཆོག་གི་བཀའ་དགོངས་བཞིན་དགེ་ལས་ཚང་མས་ད་བར་དུ་བོད་ཕྲུག་ཚོའི་ཤེས་ཡོན་ཆེད་དུ་སྐུ་ལས་ཧ་ཅང་བསྐྱོན་ཡོད། སྤྱི་ཚོགས་ལ་འཕྲལ་ཕུགས་གཉིས་ཀར་ཕན་ཐོགས་ཆེ་ཤོས་དང་། བོད་མིའི་འཐབ་རྩོད་ལའང་མེད་དུ་མི་རུང་བའི་དགོས་མཁོ་ཆེ་ཤོས་ནི་ཤེས་ཡོན་ཡིན་སྟབས། མ་འོངས་བོད་ཀྱི་སོན་རྩ་རྣམས་བོད་རིགས་ཚད་ལྡན་ཞིག་དང་། ཤེས་ཡོན་ལྡན་པ། བསམ་བློ་ཡག་པོ་གཏོང་ཤེས་པ། ལེགས་ཉེས་དབྱེ་འབྱེད་ཐུབ་པ། སོ་སོའི་ལུང་པ་ལ་ཤ་ཞེན་དང་བརྩེ་དུང་ཡོད་པ། ལྷག་པར་དུ་༧རྒྱལ་བ་རིན་པོ་ཆེའི་བཀའ་གསུང་ཅི་སྒྲུབ་ཞུ་མཁན་འབའ་ཞིག་གསོ་སྐྱོང་གནང་རྒྱུར་དགེ་རྒན་རྣམ་པར་འགན་ཡོད་པ་བཞིན། དེ་རིང་དགེ་རྒན་ཉིན་མོར་དམ་བཅའ་བཞེས་ནས་ལྷག་བསམ་རྣམ་དག་གིས་ཕྱག་ལས་གནང་རོགས་ཞུ་རྒྱུ་ཡིན། ཞེས་གསུངས་འདུག
དེ་བཞིན་བཀའ་བློན་མཆོག་ནས། འདི་ལོ་༧གོང་ས་མཆོག་བོད་ལུགས་ཐོག་དགུང་ལོ་ ༩༠ ཕེབས་ཡོད་པས། བཀའ་བཞིན་སྒྲུབ་པ་བླ་མའི་མཆོད་པ་ཡིན་སྟབས། ༧མགོན་པོ་མཆོག་གིས་ཐུགས་བསྐྱེད་དམ་བཅའ་བཞིའི་ཐོག་སྐུ་ཚེ་ཧྲིལ་པོ་ཐུགས་འགན་བཞེས་དང་བཞེས་མུས་ཡོད་ལ། ང་ཚོ་རྩམ་ཟན་པ་ཡོངས་དང་། ལྷག་པར་དུ་བོད་མི་རིགས་ཀྱི་སོན་རྩ་གསོ་སྐྱོང་གནང་མཁན་དགེ་རྒན་ལས་བྱེད་ཡོངས་ནས་ཐུགས་བསྐྱེད་དམ་བཅའ་དེ་དག་མཐིལ་ཕྱིན་པ་མཁྱེན་རྒྱུ་དང་། ངེས་པ་བརྙེད་པའི་ཐོག་ནས་ཉིན་རེའི་མི་ཚེ་ནང་ཕྱག་བསྟར་གང་ལེགས་གནང་རྗེས། སོ་སོའི་སློབ་ཕྲུག་དང་སློབ་ཕྲུག་གི་ཕ་མ་རྣམས་ལའང་དེ་ལྟར་བྱེད་དགོས་པའི་ལམ་སྟོན་དང་སྐུལ་མ་གནང་རྒྱུར་འབད་བརྩོན་གནང་རོགས། དེ་ལྟར་བྱུང་ཚེ་ ༧མགོན་པོ་མཆོག་གིས་འཛམ་གླིང་ཡོངས་ལ་གནད་དོན་འདི་དག་ཐོག་ལ་བཀའ་སློབ་ལམ་སྟོན་གང་སྩལ་བ་བཞིན། ང་ཚོ་བོད་རིགས་ཡོངས་ཀྱི་ངོས་ནས་ཀྱང་འཛམ་གླིང་གི་མི་མང་ལ་མིག་དཔེ་བཟང་པོ་ཞིག་སྟོན་ཐུབ་ངེས་རེད། དེ་ལྟར་གནང་ཚེ་རྩ་བའི་བླ་མའི་བཀའ་དྲིན་ཕྲན་བུ་འཇལ་ཐུབ། ཅེས་གསུངས་འདུག
མཇུག་ཏུ་༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་བསྐྱེད་དམ་བཅའ་བཞི་ངོ་སྤྲོད་དང་བསྟུན། ང་ཚོས་མ་འོངས་བོད་ཀྱི་སོན་རྩ་དེ་དག་༸གོང་ས་མཆོག་གི་རླབས་ཆེན་གྱི་མཛད་འཕྲིན་ཁག་ལག་བསྟར་བྱེད་ཐུབ་མཁན་ཞིག་ཏུ་གསོ་སྐྱོང་གནང་དགོས་པ་དང་། དེ་བཞིན་བཙན་བྱོལ་བོད་མིའི་གཞི་རིམ་གྱི་ཤེས་ཡོན་སྲིད་བྱུས་ཀྱི་དགོངས་དོན་བཞིན་སློབ་གྲྭའི་ནང་སྲོལ་རྒྱུན་གྱི་ཤེས་ཡོན་ལ་བརྩི་མཐོང་དང་། སྲོལ་རྒྱུན་གྱི་སློབ་ཚན་བོད་ཀྱི་སྐད་ཡིག་དང་། རིགས་ལམ། ནང་ཆོས། དེ་བཞིན་ཆོས་ལུགས་ལ་མ་བརྟེན་པའི་བཟང་སྤྱོད་བཅས་སློབ་ཁྲིད་གནང་གི་ཡོད་པ་དེ་དག་སྤུས་ཚད་ལྡན་པ་སློབ་རྒྱུ་དང་། དགེ་ལས་ཡོངས་ནས་སློབ་ཚན་འདི་དག་གལ་ཆེར་བརྩིས་པ་ཙམ་མ་ཟད་ངེས་ཤེས་བརྙེད་པའི་ཐོག་ནས་སློབ་ཁྲིད་གནང་རྒྱུ་གལ་ཆེན་པོ་ཡིན། མཐའ་དོན། ལྷར་བཅས་སྲིད་ཞིའི་གཙུག་རྒྱན་སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་རིས་མེད་སྐྱེས་ཆེན་དམ་པ་རྣམས་ཀྱི་སྐུ་ཚེ་ཞབས་པད་རྡོ་རྗེའི་ཁམས་སུ་བརྟན་ཅིང་། ཐུགས་ཀྱི་བཞེད་དགོངས་མཐའ་དག་ལྷུན་གྱིས་འགྲུབ་པ་དང་། མཛད་འཕྲིན་ཡར་ངོའི་ཟླ་ལྟར་རྒྱས་པའི་སྨོན་འདུན་ཤུགས་དྲག་དང་། དེ་བཞིན་༸གོང་ས་མཆོག་གིས་ཐུགས་རེ་མཛད་པ་བཞིན་བོད་པའི་སློབ་གྲྭ་ཁག་ནས་གསོ་སྐྱོང་བྱུང་བའི་སློབ་ཕྲུག་ཚང་མ་གནའ་དེང་ཟུང་འབྲེལ་གྱི་ཤེས་ཡོན་གང་ལེགས་ཐོག་ཡ་རབས་སྤྱོད་བཟང་ལྡན་པ་ཡོང་རྒྱུའི་རེ་བ་དང་སྨོན་འདུན་ཞུ། ཞེས་གསུངས་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། སྐལ་བཟང་སྦྱིན་པ།
