སློབ་དཔོན་ཟམ་གདོང་རིན་པོ་ཆེ་མཆོག་གིས་མོན་ཡུལ་གྱི་མི་མང་ལ་ཆོས་འགྲེལ་བསྩལ།

སློབ་དཔོན་ཟམ་གདོང་རིན་པོ་ཆེ་མཆོག་གིས་བྱང་ཆུབ་སེམས་སྒྲུབ་པའི་ལམ་མྱུར་ཤོས་ནི་བླ་མའི་རྣལ་འབྱོར་དང་ཡི་དམ་གྱི་ལྷའི་རྗེས་སུ་འབྲངས་ནས་ཉམས་ལེན་བྱེད་དགོས་སྐོར་གསུངས་སོང་།

དེ་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་སློབ་དཔོན་ཟམ་གདོང་རིན་པོ་ཆེ་མཆོག་གིས་མོན་ཡུལ་གྱི་དད་ལྡན་མི་མང་ལ་སྤྱན་རས་གཟིགས་ཀྱི་བླ་མའི་རྣལ་འབྱོར་གྱི་ཆོས་འགྲེལ་བསྩལ་གནང་སོང་བ་དང་། སྐབས་དེར་སློབ་དཔོན་ཟམ་གདོང་རིན་པོ་ཆེ་མཆོག་གིས། ང་རང་ཚོར་རྙེད་པར་དཀའ་བའི་མི་ལུས་རྣམ་པར་དག་པ་ཐོབ། མཇལ་དཀའ་བའི་སངས་རྒྱས་བསྟན་པ་རིན་པོ་ཆེ་དང་མཇལ། འཕྲད་པར་དཀའ་བའི་ཐེག་པ་ཆེན་པོའི་དགེ་བའི་བཤེས་གཉེན་དང་འཕྲད། རང་གི་ངོས་ནས་ཀྱང་བླང་དོར་གྱི་གནད་འཇལ་བའི་ཆོས་རབ་ཏུ་རྣམ་འབྱེད་ཀྱི་ཤེས་རབ་ཕྲན་བུ་ཡོད་པའི་སྐབས་འདི་ལ། རབ་ཏུ་བྱུང་ན་སྐྱེ་བ་གཏན་གྱི་འདོད་མོས་འགྲུབ་པ་ཞིག་དང་། དེ་ལྟ་བུ་མ་བྱུང་བ་ཡིན་ནའང་། སྐྱེ་བ་ཕྱི་མའི་འདོད་མོས་འགྲུབ་པ་ཞིག་ངེས་པར་དུ་མ་བྱས་པ་ཡིན་ན། ཡིད་བཞིན་ནོར་བུ་ལས་ལྷག་པའི་ལུས་རྟེན་འདི་དོན་མེད་ཆུད་ཟོས་སུ་ཕྱིན་པ་ཡིན་པར་བརྟེན་ཕངས་པོ་ཞེ་དྲགས་རེད། ཅེས་གསུངས་སོང་།

ད་རེས་མི་ལུས་ལན་གཅིག་དེ་ཚེ་སྔོན་མས་བསགས་པའི་འབྲས་བུ་ལ་བརྟེན་ནས་ཐོབ་ཟིན་པས། ཏན་ཏན་ནུས་པ་རྙེད་པ་ཞིག་མ་འབྱུང་བ་ཡིན་ན། ཡང་ཡང་རྙེད་ཀྱི་རེད་བསམ་པ་དེ་ནོར་འཁྲུལ་ཡིན་པ་དང་རྙེད་དཀའ་བ་རེད། རྙེད་དཀའ་བ་མ་ཟད་ད་ལྟ་ཡོད་པ་དེའང་མི་རྟག་པའི་རང་བཞིན་ཡིན་པར་བརྟེན། སྙིང་པོ་ལེན་ཚུལ་དེ་ད་ལྟ་ཉིད་ནས་མ་བླངས་པ་ཡིན་ན། སང་ཉིན་གནངས་ཉིན་གྱི་ངང་ནས་ལས་པ་ཡིན་ན་ཡོང་རྒྱུ་མེད་པ་རེད། ཆོས་ད་ལྟ་ཉིད་ནས་འགྲུབ་དགོས་པ་དང་། ཆོས་དེའང་མཚང་ལ་མ་ནོར་བའི་ལམ་ནས་སྒྲུབ་དགོས་ཀྱི་ཡོད་པ་དང་། ཆོས་ཟེར་བ་དེ་སེམས་ལ་འགྱུར་བ་འགྲོ་བའི་ཐབས་ཤིག་ཡིན་པར་བརྟེན། རང་གི་སེམས་རྒྱུད་ལམ་གྱི་རིམ་པ་ལ་རིམ་བཞིན་བསླབ་ནས་སེམས་རྒྱུད་གོང་ནས་གོང་དུ་འགྲོ་རྒྱུའི་ཐབས་ཤེས་མ་བྱས་པ་གཏན་ནས་མེད་པ་རེད། དེ་ལྟ་བུ་བྱེད་པར་བླ་མའི་དྲུང་ནས་ཚད་མའི་ལུང་ནས་གསུངས་པའི་སངས་རྒྱས་ཀྱི་བསླབ་པ་གསུམ་དང་སྐྱེས་བུ་གསུམ་གྱི་ལམ་གྱི་རིམ་པ་ཆ་ཚང་བ་མ་ནོར་བ་ཞིག་ཉམས་ལེན་བྱ་དགོས་པ་ནི་མེད་དུ་མི་རུང་བ་རེད། ཅེས་སོགས་གསུངས་སོང་།

ཡང་རིན་པོ་ཆེ་མཆོག་གིས། དེ་རིང་འཕགས་པ་སྤྱན་རས་གཟིགས་དང་༧གོང་ས་རྒྱལ་བ་རིན་པོ་ཆེ་མཆོག་དབྱེར་མེད་དུ་བླ་མའི་རྣལ་འབྱོར་ཉམས་སུ་ལེན་ཚུལ་གྱི་བཤད་ལུང་མདོར་བསྡུས་ཙམ་ཆོས་འབྲེལ་བྱེད་ཀྱི་ཡོད་སྐོར་དང་། བྱང་ཆུབ་ཀྱི་གོ་འཕང་དང་ཐར་བའི་གོ་འཕང་འགྲུབ་པ། སྐྱེ་བ་ཕྱི་མའི་འདོད་མོས་འགྲུབ་པར་སྐྱེས་བུ་གསུམ་གྱི་ལམ་གྱི་རིམ་པ་ཉམས་ལེན་བྱེད་པ་ཡིན་ན། བླ་མའི་རྣལ་འབྱོར་ལ་མ་བརྟེན་པ་དང་། དགེ་བའི་བཤེས་གཉེན་བསྟེན་ཚུལ་ཚུལ་བཞིན་མ་བརྟེན་པའི་ལམ་གང་ཡང་མེད། བླ་མའི་རྣལ་འབྱོར་དང་ཡི་དམ་སངས་རྒྱས་ཀྱི་རྗེས་སུ་འབྲངས་ནས་ཉམས་ལེན་བྱས་པ་ཡིན་ན། ཐམས་ཅད་མཁྱེན་པའི་གོང་འཕང་ཐོབ་པར་དེ་ལས་མྱུར་བའི་ཐབས་ལམ་ཞིག་མེད་སྐོར་དང་། བླ་མའི་རྣལ་འབྱོར་ཉམས་སུ་ལེན་པའི་སྐབས། རང་རང་གི་ལས་དང་སྨོན་ལམ་གྱི་འབྲེལ་བ་ཡོད་པའི་ཡི་དམ་གྱི་ལྷ་གང་ཡང་རུང་བ་ཞིག་དང་འབྲེལ་ནས་ཉམས་སུ་ལེན་རྒྱུ་དང་། རང་གི་ཡི་དམ་གྱི་ལྷ་གང་ཡིན་པ་དེ་དམིགས་ཀྱིས་བཀར་ནས་དེ་དང་བླ་མ་དང་དབྱེར་མེད་དུ་དགོངས་ནས་ཉམས་སུ་ལེན་ཚུལ་ཡོད་སྐོར་དང་། བོད་ཅེས་པ་འདི་ཆབ་སྲིད་ཀྱི་ཐོག་ནས་བལྟས་ན། ལུང་པ་ཏོག་ཙམ་ཆུང་ཆུང་ཆགས་ཀྱི་ཡོད་ཀྱང་། གངས་ཅན་གྱི་ལྗོངས་ཟེར་བ་དེ་ད་ལྟའི་གནས་སྐབས་སུ་རྒྱ་གར་དང་། འབར་མ། པ་ཀི་སི་ཐན། ཨབ་གྷན། བལ་ཡུལ་བཅས་རྒྱལ་ཁབ་ལྔའི་ནང་ཁྱབ་བསྡད་ཡོད་ཅིང་། དབྱངས་བཞི་དང་གསལ་བྱེད་སུམ་ཅུའི་བཀོལ་སྤྱོད་བྱེད་མཁན་གྱི་མི་རིགས་ཚང་མ་གངས་ཅན་གྱི་ལྗོངས་ཀྱི་ཁོངས་སུ་གཏོགས་ཤིང་། སྤྱན་རས་གཟིགས་ཀྱི་གདུལ་ཞིང་ཡིན་སྐོར་སོགས་གསུངས་སོང་།

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་པ། སྐལ་བཟང་སྦྱིན་པ།