གཞི་རིམ་མི་མང་གིས་གྲོས་ཚོགས་ཚོགས་དུས་བརྒྱད་པའི་སྟེང་ཁྲིམས་ཞིབ་པ་ཆེ་བ་དང་གཞན་དང་འབྲེལ་བའི་བཅའ་ཁྲིམས་བསྐྱར་བཅོས་གནང་དགོས་པའི་རེ་སྐུལ་ཞུས་སོང་།
དེ་རིང་བཞུགས་སྒར་དྷ་སའི་ཞང་ཡ་རེ་ལོ་གསོལ་མགྲོན་ཁང་གི་ཚོགས་ཁང་དུ་གཞི་རིམ་མི་མང་རེ་འབོད་ལས་འགུལ་ཁང་གིས་བོད་མིའི་སྒྲིག་འཛུགས་སྲ་བརྟན་ཆེད་མི་མང་གི་ལས་འགུལ་ཞེས་པའི་བརྗོད་གཞིའི་ཐོག་གསར་འགོད་གསལ་བསྒྲགས་ཤིག་སྤེལ་ནས། བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བརྒྱད་པ་དང་བསྟུན། ཁྲིམས་ཞིབ་པ་འབྲེལ་བའི་བཅའ་ཁྲིམས་བསྐྱར་བཅོས་ཡོང་ཐུབ་པའི་རེ་སྐུལ་ཞུས་སོང་ལ། ད་ལན་གྱི་ལས་འགུལ་ཆེད་འཛམ་གླིང་ས་ཕྱོགས་ཁག་མི་འདྲ་བ་ ༢༨ ཙམ་ནས་ཉུང་མཐར་བོད་མི་གྲངས་གཅིག་སྟོང་ཙམ་གྱིས་མཉམ་ཞུགས་བྱ་རྒྱུ་ཡིན་འདུག
གཞི་རིམ་མི་མང་རེ་འབོད་ལས་འགུལ་ཚོགས་པས་གསར་འགོད་བསྒྲགས་གཏམ་ཞིག་སྤེལ་བའི་ནང་། གཞི་རིམ་མི་མང་རེ་འབོད་ཚོགས་པས་ཕྱི་ལོ་ ༢༠༢༡ ཕྱི་ཟླ་ ༡༠ ཚེས་ ༨ ནས་བཟུང་བཙན་བྱོལ་བོད་མིའི་མང་གཙོའི་སྒྲིག་འཛུགས་སྲུང་སྐྱོབ་དང་འབྲེལ་མང་གཙོ་ཚད་ལྡན་ཡོང་ཆེད་མི་ངོ་ཆེད་བཅར་གྱིས་སྙན་ཞུ་སྔ་རྗེས་ཕུལ་བར་རྩིས་མེད་རྡོག་རོལ་བཏང་རྐྱང་གནང་བར་སོང་། སྔ་ལོ་ཕྱི་ཟླ་ ༩ ནང་གྲོས་ཚོགས་ཚོགས་དུས་དྲུག་པའི་སྐབས་རྒྱ་བལ་གཉིས་ཀྱི་ས་གནས་འདྲ་མིན་དང་ཕྱི་རྒྱལ་ཡུལ་གྲུ་ཁག་བཅས་ནས་མི་གྲངས་སྟོང་ཕྲག་མ་ཟིན་ཙམ་དྷ་ས་བཞུགས་སྒར་དུ་འཛོམས་ནས་ཞུ་འབོད་ལས་འགུལ་སྤེལ་བ་ཡང་རང་བཞིན་མཚམས་འཇོག་བྱེད་དགོས་བྱུང་ཡོད། དེའི་རྗེས་ ༢༠༢༤ ཟླ་ ༣ གྲོས་ཚོགས་སྐབས་ཁྲིམས་སྒྲིག་བསྐྱར་ཞིབ་ཚོགས་ཆུང་གི་སྙན་ཐོ་དང་ཁྲིམས་སྒྲིག་བསྐྱར་བཅོས་རགས་ཟིན་བཅས་ཀྱི་ཐོག་བགྲོ་གླེང་གནང་གསལ་ལྟར་དེའི་ཐོག་ནས་ཁྲིམས་ཞིབ་པ་ཆེ་བ་དང་གཞན་གཉིས་བསྐོ་གཞག་ཐུབ་པའི་བསྐྱར་བཅོས་གནང་རྒྱུར་རེ་བ་ཆེན་པོ་བྱས་ནས་མང་ཚོགས་འདུ་འཛོམས་ཀྱི་ལས་འགུལ་སྤེལ་མེད། ཅེས་གསལ་འདུག
ཡང་བསྒྲགས་གཏམ་ནང་། ཁྲིམས་ཞིབ་པ་ཆེ་བ་དང་གཞན་གཉིས་བསྐོ་གཞག་བྱེད་རྒྱུའི་བཅའ་ཁྲིམས་བསྐྱར་བཅོས་མ་གནང་བར་དེ་ལས་ལྡོག་སྟེ་རང་དབང་ཅན་གྱི་སྡེ་ཚན་གྱི་འགན་འཛིན་སོགས་དམ་བཅའ་འབུལ་ཡུལ་ཆ་བགོས་བྱས་ཏེ་ཁྲིམས་ཞིབ་པ་ཆེ་བ་དང་གཞན་གཉིས་བཅས་མེད་ཀྱང་ཁྱད་པར་མེད་པའི་བསྐྱར་བཅོས་བྱས་འདུག་པ་འདི་ནི་ཁས་ལེན་ཐུབ་ཐབས་རྩ་བ་ནས་མེད་པར་བརྟེན། གུས་ཚོ་གཞི་རིམ་མི་མང་རྣམས་ནས་རྩ་བའི་དེ་སྔོན་རེ་སྐུལ་དོན་ཚན་ཁག་རང་འཇགས་ཐོག་ད་ལྟའི་ཆར་གལ་ཆེན་ནང་གི་དོན་ཆེན་ནི་ཁྲིམས་ཞིབ་པ་ཆེ་བ་དང་གཞན་གཉིས་བསྐོ་གཞག་ཐུབ་པའི་བཅའ་ཁྲིམས་བསྐྱར་བཅོས་ད་ལན་ཚོགས་དུས་འདིའི་ཐོག་ནས་གནང་རོགས་ཞུ་རྒྱུ་མ་ཟད། ཁྲིམས་ཞིབ་ཁང་གི་སྐུ་དབང་སྔར་ཡོད་སླར་གསོ་ངེས་པར་དུ་གནང་བའི་ཞུ་སྐུལ་སླད་མི་མང་རྣམས་ངལ་གྲོན་ལ་མ་འཛེམས་པར་སྤྱི་འཐུས་ལྷན་ཁང་གི་སྒོ་འགྲམ་དུ་བཅར་དགོས་བྱུང་བ་ལྟར་སང་ཉིན་ནས་མགོ་འཛུགས་བྱེད་རྒྱུ་ཡིན། ཞེས་གསལ་འདུག
གསར་འགོད་གསལ་བསྒྲགས་སྐབས་གཞི་རིམ་མི་མང་རེ་འབོད་ཚོགས་པའི་ཚོགས་གཙོ་བསྟན་འཛིན་གཡང་དཀར་ལགས་ཀྱིས། སྤྱིར་འདས་པའི་ལོ་ཤས་གོང་ནས་བཙན་བྱོལ་བོད་མིའི་སྒྲིག་འཛུགས་ཀྱི་ཁྲིམས་ཞིབ་པ་ཆེ་བ་དང་ལས་ཚབ་སོགས་མེད་པའི་གནས་སྟངས་ཆགས་ཏེ། མང་གཙོའི་ཀ་བ་གསུམ་གྱི་ཀ་བ་གཅིག་ནུས་མེད་དུ་གྱུར་བའི་སྐབས་འདིར། བཙན་བྱོལ་བོད་མི་རྒན་གཞོན་བར་གསུམ་མང་པོ་ཞིག་གིས་རྒྱབ་སྐྱོར་ཡོད་པའི་ཐོག སྤྱི་འཐུས་ལྷན་ཚོགས་སུ་བོད་མིའི་སྒྲིག་འཛུགས་སྲ་བརྟན་དང་དམངས་གཙོའི་ཀ་བ་གཅིག་དེ་སླར་གསོ་གནང་རོགས་ཞེས་འབོད་སྐུལ་ཞུ་ཡི་ཡོད། ད་ལན་གྱི་ལས་འགུལ་ཆེད་རྒས་འཁོགས་མང་དག་ཅིག་ས་ཐག་རིང་ནས་ཕེབས་ཡོད་པས་ཁོང་ཅག་གི་གནས་བབ་སོགས་མཐོང་ཚེ། མཚན་ལ་གཉིད་དང་ཟས་ལ་བཅུད་མེད་པའི་གནས་སྟངས་སུ་འགྱུར་གྱི་འདུག་པས། ད་ལན་སྤྱི་འཐུས་རྣམས་ཀྱིས་བཅའ་ཁྲིམས་བསྐྱར་བཅོས་མ་བྱས་པ་ཡིན་ན། ཁོང་ཅག་ལ་སྤྱི་འཐུས་ཀྱི་འོས་ཆོས་དང་བོད་མི་ཚད་ལྡན་ཞིག་མིན་པ་བརྒྱ་ཆ་བརྒྱ་མཚོན་ཐུབ་ཀྱི་འདུག་པས། ད་ལན་བཅའ་ཁྲིམས་བསྐྱར་བཅོས་གནང་མི་ཐུབ་པའི་གནས་བབ་ཅིག་གཏན་ནས་མེད་པས། ངེས་པར་དུ་ཁྲིམས་ཞིབ་པ་ཆེ་བ་དང་འབྲེལ་བའི་བཅའ་ཁྲིམས་བསྐྱར་བཅོས་གནང་རོགས་གནང་། ཞེས་རེ་སྐུལ་ཞུས་སོང་།
གཞི་རིམ་མི་མང་རེ་འབོད་ཚོགས་པའི་རྒྱུན་ལས་ཚེ་རིང་སྲི་བརྟན་ལགས་ཀྱིས། གཞི་རིམ་མི་མང་རེ་འབོད་ཚོགས་པས་བོད་མིའི་སྒྲིག་འཛུགས་སྲ་བརྟན་ཆེད་མི་མང་གི་ལས་འགུལ་གྱི་གསར་འགོད་གསལ་བསྒྲགས་སྤེལ་ཚར་རྗེས། བོད་མི་མང་སྤྱི་ཚོགས་གཙོ་སྦྲེལ་པོའི་དྲུང་དུ་བཅར་ནས་རེ་འབོད་སྙན་ཞུ་ཞིག་འབུལ་རྒྱུ་ཡིན་ཞིང་། བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བརྒྱད་པའི་སྟེང་ཁྲིམས་ཞིབ་པ་ཆེ་བ་དང་གཞན་དང་འབྲེལ་བའི་བཅའ་ཁྲིམས་བསྐྱར་བཅོས་གནང་མ་ཐུབ་ཚེ། དུས་ཡུན་གང་ཙམ་རིང་ཟས་བཅད་ངོ་རྒོལ་དང་༧གོང་ས་རྒྱལ་བ་རིན་པོ་ཆེ་མཆོག་ལ་བཅའ་ཁྲིམས་དོན་ཚན་དང་པོའི་དགོངས་དོན་བཞིན་ཆ་ཤས་བླང་རྒྱུའི་སྐྱབས་འཇུག་ཞུ་རྒྱུ་ཡིན་སྐོར་སོགས་བརྗོད་སོང་ལ། གཞི་རིམ་མི་མང་རེ་འབོད་ཚོགས་པའི་གོ་སྒྲིག་འོག་སང་ཉིན་ཕྱི་ཚེས་ ༡༡ ཉིན་དྷ་ས་ལག་རྩེད་སྤོ་ལོ་རྩེད་ཐང་དུ་དངོས་སུ་ལས་འགུལ་བརྩམ་རྒྱུ་ཡིན་ཞིང་། གཞི་རིམ་མི་མང་རེ་འབོད་ཚོགས་པའི་གྲོས་གཞི་གྲོས་ཆོད་ཁྲོད། གྲོས་ཚོགས་ཚོགས་དུས་བརྒྱད་པའི་ཐོག་ཁྲིམས་ཞིབ་པ་བསྐོ་གཞག་ཐུབ་པའི་བཅའ་ཁྲིམས་བསྐྱར་བཅོས་མ་གནང་ཚེ། ཀ༽ སྤྱི་འཐུས་ཚང་མ་དགོངས་པ་ཞུ་དགོས། ཁ༽ཟས་བཅད་ངོ་རྒོལ་གྱི་ལས་འགུལ་སྤེལ་རྒྱུ། ག༽སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བཅའ་ཁྲིམས་དོན་ཚན་དང་པོའི་ནང་དོན་གྱི་སྐུ་དབང་དགོངས་དོན་མཚན་འཁོད་སྙན་ཞུ་འབུལ་རྒྱུ། ཡིན་ཞེས་གསལ་འདུག
གསར་འགོད་པ། དཔལ་ལྡན། བྱམས་པ་ཚེ་རིང་། རྩོམ་སྒྲིག་པ། སྐལ་བཟང་སྦྱིན་པ།
