བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱིས་རྗེས་འབྱོར་བོད་མི་རྣམས་ལ་ས་ཁང་སྦྱོར་སྤྲོད་དང་གཞིས་ཆགས་ཁག་ཏུ་སྡོད་ཁང་གསར་རྒྱག་གི་ལས་དོན་གཉེར་མུས་ཡིན་འདུག
ཁ་སང་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བརྒྱད་པའི་ལས་ཉིན་དང་པོའི་ཚོགས་དུས་བཞི་པ་ནས་དེ་རིང་ཕྱི་ཚེས་ ༡༢ ཀྱི་ཉིན་རྒྱབ་ཆུ་ཚོད་ ༤།༤༡ བར་བོད་མིའི་སྒྲིག་འཛུགས་ནང་སྲིད་ལས་ཁུངས་ལས་ཁུངས་མ་ལག་དང་བཅས་པའི་རྩིས་ལོ་ ༢༠༢༣ དང་ ༢༠༢༤ ལོའི་ལས་བསྡོམས་སྙན་སྒྲོན་ཞུས་པར། སྤྱི་འཐུས་རྣམ་པས་དོགས་འདྲི་དགོངས་འཆར་དང་བཀའ་ཤག་ནས་ལན་འདེབས་གསལ་བཤད་གནང་སྐབས། སྤྱི་འཐུས་མི་ཉུང་བ་ཞིག་གིས་ནང་སྲིད་ལས་ཁུངས་ཀྱི་ལས་བསྡོམས་སྤྱི་ཡོངས་ནས་ཡག་པོ་བྱུང་འདུག་པས། ཁ་ཞེ་གཉིས་མེད་ཀྱིས་ཡི་རང་བསྔགས་བརྗོད་ཡོད་སྐོར་གསུངས་སོང་བ་དང་། དེ་རིང་ནང་སྲིད་དང་འབྲེལ་ནས་རྗེས་འབྱོར་ཁ་འཐོར་བོད་མི་རྣམས་ཀྱི་གཞིས་སྤོར་ལས་གཞི་དང་། དྷ་སའི་ས་ཁང་གི་གནད་དོན། དེ་བཞིན་ལ་དྭགས་སུ་སྡོད་ཁང་གསར་རྒྱག་གི་ལས་གཞི་སྤེལ་མུས་ཡིན་པ། གཞིས་སྤོར་ལས་གཞི་དང་འབྲེལ་ནས་ནང་སྲིད་ལས་ཁུངས་ཀྱི་བར་བརྒལ་བཀའ་འཁྲོལ་ལ་སྤྱི་འཐུས་རྒྱུན་ལས་ནས་བཀའ་འཁྲོལ་གནང་མེད་པ་སོགས་ཀྱི་ཐོག་གླེང་སློང་ཤུགས་ཆེན་གནང་སོང་།
དེའི་ཐད་ནང་སྲིད་ཁུངས་ཀྱི་ལས་སྡོམ་ཁྲོད། ༢༠༢༣།༡༢།༢༥ ཉིན་ཕྱོགས་བསྡོམས་ཞུས་ཁོངས་རྗེས་འབྱོར་བོད་མི་ཁྱིམ་ཚང་གྲངས་ ༡༠༢༦ དང་ཁ་འཐོར་བོད་མི་ཁྱིམ་ཚང་གྲངས་ ༧༩༦ བཅས་ཁྱོན་བསྡོམས་ཁྱིམ་ཚང་ ༡༨༢༢ ཐོ་འགོད་བྱུང་ཡོད། དེའི་ཁོངས་ནས་ལྷོ་ཕྱོགས་དང་དབུས་གཞིས་ཆགས་ཁག་ཏུ་ཆ་རྐྱེན་ལྟར་འགྲོ་འདོད་ཡོད་པ་ཁྱིམ་ཚང་ ༧༩༥ དང་། རང་གནས་ས་ཁུལ་བདམས་པ་ཁྱིམ་ཚང་ ༨༨༠ ། ས་གནས་འདམ་ག་མ་བྱས་པ་ཁྱིམ་ཚང་ ༡༤༧ བཅས་ཀྱི་གནས་སྟངས་ཆགས་ཡོད་ཅིང་། ཕྱི་ལོ་ ༢༠༢༣།༦།༦ ཉིན་ནང་སྲིད་དྲུང་ཆེ་དང་དྲུང་འཕར་གཉིས་ནས་ལུགས་བདེ་གཉིས་དང་། མོན་གྷོ། ཀོ་ལི་གྷལ། ཧུན་སུར་བཅས་སུ་ལྟ་སྐོར་གྱིས་གནས་སྟངས་ཞིབ་འཇུག་ལྟ་སྐོར་དང་སྦྲགས་ལུགས་བདེ་གཉིས་ལ་ཞིང་ས་མཁོ་སྒྲུབ་ཞུ་མཁན་ཚོགས་མི་བཞི་ལས་གྲུབ་པའི་ཚོགས་ཆུང་ཞིག་གསར་འཛུགས་ཞུས། དྲུང་ཆེ་དང་དྲུང་འཕར་དྷ་སར་འབྱོར་རྗེས་ ༢༠༢༣།༦།༣༠ ལྷོ་ཕྱོགས་གཞིས་ཆགས་ལྔ་ནས་གཞིས་སྤོ་ལས་གཞིའི་ཆེད་ཞིང་ས་བཤུག་མཁན་ཡོད་ཚེ་གཏན་འབེབས་ལྟར་ལེགས་སྐྱེས་དོད་འབུལ་རྒྱུའི་གསལ་བསྒྲགས་ཞུས་ཏེ་ཁྱོན་བསྡོམས་ཞིང་ས་ཨེ་ཀར་ ༥༧༡་༢༦ འབུལ་འདོད་ཡོད་པའི་ཐོ་གཞུང་འབྱོར་ཁོངས་ནས་རྩིས་ལོའི་ནང་ཞིང་ས་ཨེ་ཀར་ ༢༤༣་༣༦ ལ་ལེགས་སྐྱེས་དོད་ཕུལ་ཏེ་མཁོ་སྒྲུབ་ཞུས་ཡོད། ཅེས་གསལ་འདུག
ནང་སྲིད་ཀྱི་ལས་ཁུངས་ཀྱི་ལས་སྡོམ་བགྲོ་གླེང་སྐབས། སྤྱི་འཐུས་མཁན་པོ་ཀ་བྲག་དངོས་སྒྲུབ་བསོད་ནམས་ལགས་དང་། བློ་བཟང་ཐུབ་བསྟན་ལགས། ཆོས་འཕེལ་ཐུབ་བསྟན་ལགས་སོགས་ཀྱིས་རྗེས་འབྱོར་བོད་མིའི་གཞིས་སྤོར་ལས་གཞིའི་ཐད་ལ་གླེང་སློང་གནང་སྐབས། བོད་མིའི་སྒྲིག་འཛུགས་ཀྱི་སྲིད་སྐྱོང་དང་ནང་སྲིད་བཀའ་བློན་སྤེན་པ་ཚེ་རིང་མཆོག་གིས་རྗེས་འབྱོར་བོད་མིའི་སྡོད་ཁང་གསར་རྒྱག་གི་ལས་གཞི་དང་འབྲེལ་ནས། སྤྱི་འཐུས་ཁག་ཅིག་གིས་སྦེལ་ཀོབ་ལ་རྗེས་འབྱོར་བའི་ས་ཆ་མཁོ་སྒྲུབ་བྱེད་པ་དང་སྤྲད་ཚར་ཡོད་ཚུལ་དང་། འགའ་ཤས་ལ་འབུམ་ ༨ དང་ ༤། ཡང་ན་འབུམ་ ༡༥ སྤྲད་པ་རེད་ཟེར་ནས་གོ་ཡི་འདུག་གསུངས་སོང་། གྲོས་ཚོགས་འདིའི་ནང་ལས་གཞི་འདི་དང་འབྲེལ་ནས་གསལ་བཤད་ཐེངས་མང་ཞུས་པ་ཡིན། ལས་བསྡོམས་དུ་འཁོད་པ་བཞིན་ཟླ་དུས་ཚེས་གྲངས་ག་དུས་ལ་ལས་གཞི་སྤེལ་ཡོད་མེད་དང་། ས་གནས་ལ་ཕྱོགས་སྐྱོད་ག་པར་བྱས་པ་དང་། ས་གནས་ལ་ཚོགས་ཆུང་ག་རེ་བཙུགས་ཡོད་མེད་སོགས་གསལ་ཡོད། ད་ལྟའི་གནས་སྟངས་ལ་ནང་སྲིད་ལས་ཁུངས་ཀྱིས་བར་བརྒལ་བཀའ་ཁྲོལ་བཏང་ཡོད་པ་དེ་ལ་སྤྱི་འཐུས་རྒྱུན་ལས་རྣམ་པ་ཚོས་གོ་བསྡུར་གནང་ནས་ཐག་མ་ཆོད་པའི་གནས་སྟངས་ཐོག་ལྷག་ཡོད་པ་རེད། ཅེས་གསུངས་སོང་།
ནང་སྲིད་བཀའ་བློན་མཆོག་གིས། ལྷོ་སྤྱི་ཁག་ལྔ་ལ་མང་ཚོགས་ནང་གཏམ་བཤད་དང་གསལ་བསྒྲགས་སྤེལ་རྗེས། ནང་སྲིད་ལས་ཁུངས་ཀྱིས་བོད་ནས་ཕེབས་པའི་རྗེས་འབྱོར་བ་རྣམས་ལ་ས་ཁང་བདག་སྤྲོད་བྱ་རྒྱུའི་ཐད་ལ་ཤུགས་སྣོན་བརྒྱབ་ཡོད་ཀྱང་། ནང་སྲིད་ལས་ཁུངས་ལ་ས་ཆ་མེད་སྟབས་སོ་ནམ་འདེབས་ལས་ཀྱི་ས་ཁོངས་ནས་ད་ལྟ་གཞིས་གྲོང་བདུན་པའི་རྒྱབ་ཀྱི་ས་ཆ་དེ་ཉོ་ཐབས་བྱས་ཀྱང་། དངུལ་སྒོར་འབུམ་ལྔ་ནས་མར་གཅོག་གི་མེད་སྟབས། ས་ཆ་དེ་ཉོ་ཐུབ་མེད་ལ། ལུགས་བདེ་གཉིས་ནས་ཕྱི་རྒྱལ་དུ་ཡོད་མཁན་རྣམས་ཀྱིས་ས་ཆ་ཕྱིར་སློག་བྱས་མེད་པས་ཁུལ་དེ་ནས་ས་ཆ་བགོ་འགྲེམས་བྱེད་ཐུབ་མེད། འོན་ཀྱང་། སྦེལ་ཀོབ་གཞིས་ཆགས་ཀྱི་ཉེ་འགྲམ་དུ་ཆགས་པའི་ཅོ་ཀུར་གཞིས་ཆགས་ཁོངས་ནས་ས་ཆ་སྤྲོད་མཁན་རེ་ཟུང་འབྱུང་གི་ཡོད་སྐོར་དང་། དེ་བཞིན་བཙན་བྱོལ་བོད་མིའི་གཞིས་ཆགས་སྲ་བརྟན་སླད་སྡོད་ཁང་གསར་རྒྱག་གི་ལས་གཞིའི་ཐད། ད་ལྟ་འགྲོ་བཞིན་པའི་ལས་གཞིའི་ནང་མ་ཁྱུ་དང་ཆུ་ཤུལ་གྱི་གྲོང་པ་ ༤༢ ལ་ཁང་པ་རྒྱག་དགོས་པས། གྲོང་པ་རེ་རེའི་མི་ཚང་གི་གནས་སྟངས་ལ་ཞིབ་འཇུག་བྱས་ནས་མི་ཚང་རེ་རེའི་དཔལ་འབྱོར་གྱི་གནས་སྟངས་ལ་དཔག་པའི་བརྒྱ་ཆ་ ༡༠༠ དང་ ༧༥། བརྒྱ་ཆ་ ༥༠ དང་ ༢༥ བཅས་ནས་རྒྱབ་སྐྱོར་བྱེད་ཀྱི་ཡོད། ཁག་ཅིག་གི་དཔལ་འབྱོར་གྱི་གནས་སྟངས་ཡག་པོ་ཡོད་པས་རྒྱབ་སྐྱོར་བྱ་མི་དགོས་བའང་འདུག ད་ལོ་ཕྱི་ཟླ་ ༧ པའི་ནང་ལ་དྭགས་ལ་སྐོར་སྐྱོད་ཐེངས་གཉིས་པ་དེ་ཕྱིན་པའི་སྐབས། ཁང་པ་རྒྱག་བཞིན་པའི་ལས་གཞི་དེ་དག་ལ་ལྟ་རྟོག་བྱས་པ་ཡིན། ད་ལྟ་རྒྱག་བཞིན་པའི་ཁྱིམ་ཚང་ ༢༧ ཡོད་པའི་ཁྲོད། ཁྱིམ་ཚང་ ༢༦ གི་ཁང་པ་གསར་རྒྱག་ལ་ནང་སྲིད་ལས་ཁུངས་ཀྱིས་བརྒྱ་ཆ་ ༡༠༠ ཐམ་པ་རོགས་སྐྱོར་གྱིས་ཁྱིམ་མིའི་གྲངས་ཚད་ལ་དཔག་ནས་དངུལ་སྒོར་འབུམ་ ༦ དང་འབུམ་ ༨ འགྲོ་སོང་གཏོང་གི་ཡོད་ལ། ཁྱིམ་ཚང་གཅིག་ལ་བརྒྱ་ཆ་༢༥ ཡིས་རོགས་སྐྱོར་བྱས་ཡོད། ཅེས་དང་། རྗེས་འབྱོར་བོད་མི་རྣམས་ལ་ས་ཁང་སྦྱོར་སྤྲོད་ཀྱི་ལས་གཞིའི་ཁྲོད། ཨོ་ཌི་ཤ་ལ་འགྲོ་མཁན་རྣམས་ཀྱི་ཆེད་དུ་ས་གནས་དེར་ཁྲིད་ནས་ས་བགོས་བྱས་ཏེ་སྡོད་ཁང་གསར་རྒྱག་གི་ལས་དོན་དངོས་སུ་མགོ་འཛུགས་ཐུབ་པ་བྱུང་ཡོད་ཀྱང་། མན་སྤར་ལ་ལས་གཞི་དེ་ལག་བསྟར་བྱ་ཐུབ་མེད་དེ། མོན་གྷོ་རུ་གཞིས་སྤོར་བ་རྣམས་ལ་ས་བགོ་བྱ་རྒྱུ་ཡིན་པ་མ་ཟད། ས་ཆ་འཕར་མ་ཁ་ཤས་ཀྱང་བླངས་ཡོད། དྷ་རམ་ས་ལའི་ཁྱིམ་ཚང་ ༢༡༨ ཀྱི་གནས་སྟངས་གང་ལ་གང་འཚམ་སེལ་ཡོད། དེ་ཡང་མངའ་སྡེའི་གྲོང་སྡེ་ལས་ཁུངས་ཀྱིས་གཟིགས་རྟོག་མཐའ་མ་ཕེབས་རྗེས་དཀའ་ངལ་ཕལ་ཆེར་སེལ་ཚར་བ་ལྟ་བུ་ཡིན་སྐོར་སོགས་གསུངས་སོང་།
སྤྱིར་བཀའ་ཤག་སྐབས་བཅུ་དྲུག་པས་རྗེས་འབྱོར་བོད་མི་རྣམས་ལ་ས་ཁང་མཐུན་འགྱུར་དང་བཙན་བྱོལ་བོད་མིའི་གཞིས་ཆགས་ཁག་ཏུ་གནས་སྡོད་བྱེད་མཁན་ཇེ་ཉུང་དུ་འགྲོ་མུས་ཡིན་པའི་དཀའ་ངལ་སེལ་ཆེད། འདས་ལོ་ནས་ཁ་འཐོར་དང་རྗེས་འབྱོར་བོད་མི་རྣམས་ལ་གཞིས་ཆགས་སུ་སྡོང་ཁང་སྤྲད་རྒྱུའི་ལས་གཞི་ཞིག་བརྩམས་ཏེ། བདེ་སྐྱིད་གླིང་དགེ་འཕེལ་གླིང་དང་སྦེལ་ཀོབ་ཅོ་ཀུར། ཀོ་ལི་གྷལ་དང་ཧོན་སུར། མོན་གྷོ་གཞིས་ཆགས་སོགས་སུ་སྡོད་ཁང་སྤྲད་རྒྱུའི་ལས་གཞི་སྒྲིག་མུས་ཡིན་འདུག་ལ། དེ་བཞིན་ལ་བྱང་ཁུལ་གྱི་འབྲོག་པ་རྣམས་ལའང་སྡོད་ཁང་གསར་རྒྱག་གི་ལས་གཞི་ཞིག་སྤེལ་མུས་ཡིན་འདུག
དེ་རིང་གྲོས་ཚོགས་ཀྱི་ལས་ཉིན་ ༢ པའི་ཚོགས་ཐུན་བཞི་བའི་སྟེང་ནང་སྲིད་ལས་ཁུངས་ཀྱི་ལས་བསྡོམས་ཐོག་སྤྱི་ཡོངས་ནས་བགྲོ་གླེང་དང་ཞིབ་བཤེར་ལས་རིམ་གྲུབ་མཚམས། དཔལ་འབྱོར་བཀའ་བློན་སྤེན་པ་ཚེ་རིང་མཆོག་ནས་དཔལ་འབྱོར་ལས་ཁུངས་མ་ལག་དང་བཅས་པའི་རྩིས་ལོ་ ༢༠༢༣ དང་ ༢༠༢༤ ལོའི་ལས་བསྡོམས་སྙན་སྒྲོན་དང་སྤྱི་འཐུས་རྒྱུན་ལས་ཀྱིས་དཔལ་འབྱོར་ལས་ཁུངས་ཁྱབ་ཁོངས་དང་བཅས་པའི་ལས་བསྡོམས་རྒྱས་པར་ཞིབ་འཇུག་གནང་བའི་སྙན་ཐོ་སྙན་སྒྲོག་ཞུས་སོང་།
གསར་འགོད་པ། བསྟན་འཛིན་ཕུར་བུ། དཔལ་ལྡན། རྩོམ་སྒྲིག་པ། སྐལ་བཟང་སྦྱིན་པ།
