ཤེས་རིག་ལས་ཁུངས་ཀྱི་ལས་བསྡོམས་ཐོག་སྤྱི་ཡོངས་བགྲོ་གླེང་གནང་སྐབས་ཤེས་རིག་ཁྱབ་ཁོངས་ཀྱི་སློབ་གྲྭ་མང་དག་ཅིག་ཟླ་སྒྲིལ་ཟིན་པ་དང་འགའ་ཤས་ཤིག་ཟླ་སྒྲིལ་གཏོང་མུས་ཡིན་འདུག
ཁ་སང་ལས་ཉིན་གསུམ་པའི་ཉིན་རྒྱབ་ནས་དབུས་བོད་མིའི་སྒྲིག་འཛུགས་ཤེས་རིག་ལས་ཁུངས་ལས་ཁུངས་མ་ལག་དང་བཅས་པའི་རྩིས་ལོ་ ༢༠༢༣ དང་ ༢༠༢༤ ལོའི་ལས་བསྡོམས་སྙན་སྒྲོན་དང་བགྲོ་གླེང་གསལ་བཤད་སྐབས། ཕྱི་ལོ་ ༢༠༢༣ ལོར་རྒྱ་གར་ནང་རྟེན་གཞི་བྱས་པའི་བོད་མིའི་སློབ་གྲྭ་ཁག་གི་འཛིན་རིམ་བཅུ་གཉིས་དང་བཅུ་པའི་གྲུབ་འབྲས་གཡུར་ཟ་བྱུང་བར་བསྔགས་བརྗོད་གནང་བ་དང་སྦྲགས། ཕྱི་རྒྱལ་གཟའ་མཇུག་སློབ་གྲྭ་ཁག་གི་གལ་གནད་དང་བཙན་བྱོལ་བོད་མིའི་སློབ་གྲྭ་ཁག་ཟླ་སྒྲིལ་གྱི་ལས་དོན་ཐད་སོགས་ལ་གླེང་སློང་གནང་སོང་།
ཤེས་རིག་གི་ལས་ཁུངས་ཀྱི་ལས་བསྡོམས་སྙན་སྒྲོན་དང་འབྲེལ་ནས་སྤྱི་འཐུས་དཔོན་ཚང་བློ་བཟང་ཐུབ་བསྟན་ལགས་དང་། རྡོ་རིང་བསྟན་འཛིན་ཕུན་ཚོགས་ལགས། ཚ་ཁོ་ཚང་ཐུབ་བསྟན་རྒྱ་མཚོ་ལགས། སྨོན་ལམ་མཐར་ཕྱིན་ལགས་སོགས་སྤྱི་འཐུས་ཁག་ཅིག་གིས་ཕྱིའི་རྒྱལ་ཁབ་ཁག་ཏུ་བོད་རིགས་ཚོགས་པ་ཁག་གིས་གཉེར་མུས་ཡིན་པའི་གཟའ་མཇུག་སློབ་གྲྭ་ཁག་གིས། ཕྱི་རྒྱལ་ཁག་ཏུ་སྐྱེས་འཚར་བྱེད་མུས་ཡིན་པའི་བོད་ཀྱི་བྱིས་པ་རྣམས་ལ་བོད་ཀྱི་སྐད་ཡིག་གཙོས། བོད་ཀྱི་ཆོས་རིག་སྦྱོང་སྤྲོད་བྱེད་སའི་ཤེས་ཡོན་གྱི་ཁོར་ཡུག་བསྐྲུན་མུས་ཡིན་པ་དེར། དབུས་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱིས་ཕྱོགས་ཡོངས་ནས་མཐུན་འགྱུར་རོགས་རམ་དང་། ལྷག་པར་ལྷན་ཁང་གིས་བོད་རིགས་སྤྱི་མཐུན་ཚོགས་པ་ཁག་བརྒྱུད། གཟའ་མཇུག་སློབ་གྲྭ་ཡོངས་ལ་སྤྱི་སྙོམས་ཀྱི་བསླབ་གཞི་གཏན་འབེབས་བྱུང་ཚེ་དགེ་མཚན་ཆེན་པོ་ཡོད་པ་མ་ཟད། མུ་མཐུད་བོད་ཀྱི་བྱིས་པ་རྣམས་ཀྱི་ཤེས་ཚད་དང་བསམ་བློ་ལ་གཞིགས་ནས། བོད་ཀྱི་ཐུན་མོང་མ་ཡིན་པའི་ཆོས་རིག་སོགས་དང་འབྲེལ་བའི་བྱིས་སྒྲུང་དང་། འགུལ་རིས། དཔེ་དེབ་སོགས་དཔར་སྐྲུན་བྱས་ཏེ། སྦྲགས་གླའི་རིན་བབ་ལ་མ་ལྟོས་པར་གཟའ་མཇུག་སློབ་གྲྭ་ཁག་ལ་ཀློག་དེབ་ཀྱི་མཐུན་རྐྱེན་གང་མང་ཞིག་སྦྱོར་སྤྲོད་བྱ་དགོས་པའི་སྐོར། སེར་བྱེས་གྲྭ་ཚང་གི་དྲ་ཐོག་སློབ་གྲྭ་དང་ས་སྐྱ་བརྩེ་ཆེན་དྲ་ཐོག་སློབ་གྲྭ་གཙོས། ཕྱི་རྒྱལ་གཟའ་མཇུག་སློབ་གྲྭ་ཁག་ཏུ་བོད་མི་མང་དག་ཅིག་གིས་དང་བླངས་ཐོག་ནས་བོད་ཕྲུག་རྣམས་ལ་སློབ་ཁྲིད་གནང་མུས་ཡིན་པར་ཡི་རངས་བསྔགས་བརྗོད་བཅས་གནང་སོང་།
དེ་བཞིན་སྤྱི་འཐུས་དབུ་དཀར་ཚང་གཡུ་སྒྲོན་ལགས་ཀྱིས་བཙན་བྱོལ་གྱི་སློབ་གྲྭ་ཁག་ཏུ་འཛུལ་མཁན་གྱི་སློབ་མའི་གྲངས་ཚད་ཇེ་ཉུང་དུ་འགྲོ་མུས་ཡིན་པ་དང་བསྟུན་བཙན་བྱོལ་སློབ་གྲྭ་ཁག་ཟླ་སྒྲིལ་གཏང་རྒྱུའི་གནས་བབ་གང་འདྲ་ཆགས་ཡོད་མེད་ཀྱི་ཐད་ལ་བཀའ་འདྲི་ཞུས་པ་དང་འབྲེལ། དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། ཤེས་རིག་ལས་ཁུངས་ཁྱབ་ཁོངས་ཀྱི་སམ་བྷོ་ཊ་སློབ་གྲྭ་རྣམས་ལ་སློབ་ཕྲུག་གྲངས་ ༡༥ ཡོད་ཚེ་ས་གནས་དེ་གར་རང་འཇགས་བཞག་ཡོད། སློབ་ཕྲུག་གྲངས་ ༡༥ འོག་ལས་མེད་པ་རྣམས་ཟླ་སྒྲིལ་གཏོང་དགོས་ཚེ་འགྲོ་སོང་ཆེན་པོ་འདུག ཤེས་ཡོན་སྲིད་ཇུས་ཀྱི་ཐོག་ནས་རྒྱ་གར་བྱང་ཤར་ཁུལ་གྱི་སམ་བྷོ་ཊ་སློབ་གྲྭའི་ཁྱབ་ཁོངས་སུ་ཏེ་ཛུ་འཛིན་རིམ་ ༥ ནས་ ༨ བར་མེའོ་སློབ་གྲྭར་འགྲོ་བཅུག་ཡོད། སོ་ན་ཊར་འཛིན་རིམ་ ༡༠ བར་དུ་ཡོད་ཀྱང་། བོད་པའི་སློབ་ཕྲུག་གྲངས་ ༢༥ ཙམ་ལས་གཞན་རྣམས་ཧི་མ་ཡ་ལའི་རི་རྒྱུད་ཀྱི་སློབ་མ་ཡིན་པས། འཛིན་རིམ་ ༥ བའི་བར་དེ་གའི་གནས་སྟངས་ཐོག་བཞག་ཡོད། དེ་བཞིན་ཨོ་ཌི་ཤ་རུ་གཞི་རིམ་སློབ་གྲྭ་གཉིས་ཡོད་པ་གཅིག་ཏུ་ཟླ་སྒྲིལ་བཏང་ཡོད། མ་སུ་རི་ཁྱིམ་སྡེ་ཁྱབ་ཁོངས་ཀྱི་ཧ་རི་བ་རུ་གྷོ་རེ་མ་ཧྥེ་སློབ་གྲྭའི་སློབ་ཕྲུག་ཉུང་དུ་ཕྱིན་སྟེ། དེ་གའི་ས་ཆ་ཤེས་ཡོན་དང་འབྲེལ་བའི་ཚོང་བསྒྱུར་བྱེད་མུས་དང་། བདེ་སྐྱིད་གླིང་དང་ར་ཇི་པུར་སློབ་གྲྭར་རང་འཇགས་བཞག་ཡོད། དེ་བཞིན་བོད་ཕྲུག་ཁྱིམ་སྡེ་དེ་གའི་ཁྱབ་ཁོངས་ནས་ཟླ་སྒྲིལ་དང་འབྲེལ་བའི་ལས་གཞི་ཞིག་སྒྲིག་མུས་ཡིན་པ་རེད། མ་འོངས་བར་སམ་བྷོ་ཊ་དང་། བོད་ཕྲུག་ཁྱིམ་སྡེ། མ་སུ་རི་བོད་ཁྱིམ་སློབ་གྲྭའི་ཁྱབ་ཁོངས་གསུམ་ཀ་མཉམ་དུ་འཛོམས་ཏེ་སྤྱི་ཡོངས་ཀྱི་གནས་སྟངས་ཐོག་བགྲོ་གླེང་བྱས་ཏེ་ཟླ་སྒྲིལ་གཏོང་བར་བསམ་བློ་གཏོང་བཞིན་ཡོད། ཅེས་དང་། ཡང་ཌལ་ཧོར་གཏན་སློབ་དང་འབྲེལ་ནས། ཌ་ལ་ཧོ་སི་ནང་སྔོན་མ་སློབ་ཕྲུག་གྲངས་བརྒྱད་ཡོད་ཅིང་། ད་ལྟ་སློབ་ཕྲུག་གྲངས་དྲུག་ཆགས་ཡོད་པ་དང་། འཛིན་གྲྭ་ཡང་སྔོན་མའི་ས་གནས་སུ་འཚོག་གི་མེད་པས། སློབ་གྲྭའི་ས་ཆ་དེ་ཤེས་ཡོན་ཐོག་བེད་སྤྱོད་གཏོང་བར་གཏོང་ལེན་སློབ་གྲྭ་དང་། ས་རཱ་མཐོ་སློབ་བཅས་སུ་མཁོ་སྤྲོད་བྱེད་བསམ་ཡོད་ཀྱང་། ཚད་ལྡན་གྱི་གྲོས་ཐག་ཆོད་པ་ཅི་ཡང་བྱུང་མེད་སྐོར་སོགས་གསུངས་སོང་།
འདས་ལོའི་བཙན་བྱོལ་བོད་མིའི་སློབ་གྲྭ་ཁག་གི་ཡིག་རྒྱུགས་ཀྱི་གྲུབ་འབྲས་དང་འབྲེལ། ཤེས་རིག་ལས་ཁུངས་ཀྱི་ལོ་འཁོར་ལས་བསྡོམས་ཁྲོད། ཕྱི་ལོ་ ༢༠༢༣ ལོར་རྒྱ་གར་ནང་རྟེན་གཞི་བྱས་པའི་བོད་མིའི་སློབ་གྲྭ་ཁག་གི་གྲུབ་འབྲས་ལས་འཛིན་རིམ་བཅུ་གཉིས་པའི་རྒྱུགས་འཕྲོད་བརྒྱ་ཆ་ ༩༨་༣༩ དང༌། ཆ་སྙོམས་བརྒྱ་ཆ་ ༧༣་༣༡ སོན་ཡོད་པ་དང་། འཛིན་རིམ་བཅུ་པའི་རྒྱུགས་འཕྲོད་བརྒྱ་ཆ་ ༩༥་༧༨ དང༌། ཆ་སྙོམས་བརྒྱ་ཆ་ ༦༡་༧༤ སོན་ཡོད། ཕྱི་ལོ་ ༢༠༢༤ ལོའི་གྲུབ་འབྲས་ཟླ་ ༥ ཚེས་ ༡༣ ཉིན་གསལ་བསྒྲགས་སྤེལ་ཡོད་ཅིང་། འཛིན་རིམ་བཅུ་གཉིས་པའི་རྒྱུགས་འཕྲོད་བརྒྱ་ཆ་ ༩༩་༦༩ དང་། ཆ་སྙོམས་བརྒྱ་ཆ་ ༧༥་༠༡ སོན་ཡོད་པ་དང་། འཛིན་རིམ་བཅུ་པའི་རྒྱུགས་འཕྲོད་བརྒྱ་ཆ་ ༩༧་༡༢ དང༌། ཆ་སྙོམས་བརྒྱ་ཆ་ ༦༣་༣༠ སོན་ཡོད། འདི་ལོའི་ཡིག་རྒྱུགས་གྲུབ་འབྲས་སྔར་ལས་ལེགས་པར་སོན་ཡོད་པ་མ་ཟད། བོད་སློབ་འཛིན་ཚོགས་ནས་རྩིས་ལེན་ཞུས་རྗེས་བོད་མིའི་སློབ་གྲྭ་ཁག་གི་འཛིན་རིམ་བཅུ་གཉིས་ཀྱི་ཡིག་རྒྱུགས་གྲུབ་འབྲས་རྒྱ་གར་གཞུང་གི་སློབ་གྲྭའི་སྡེ་ཁག་ཀེ་ཝི་ཨེས་ (KVS) དང་རྗེ་ཨན་ཝི་ (JNV) ལས་གྲུབ་འབྲས་འབུར་དུ་ཐོན་ཡོད་པ་གསར་འགྱུར་བརྒྱུད་ལམ་འདྲ་མིན་ནང་ཐོན་ཡོད་པ་ལྟར་ཡིན་པས། གོ་སྐབས་འདི་བརྒྱུད་སློབ་གྲྭའི་འཛིན་སྐྱོང་དང་། དགེ་ལས་རྣམ་པ། དོ་བདག་སློབ་ཕྲུག་བཅས་ལ་འཚམས་འདྲི་དང་ཐུགས་རྗེ་ཆེ་ཞུ་རྒྱུ་ཡིན། ཞེས་གསལ་འདུག
ཕྱི་ལོ་ ༢༠༡༣ ལོ་ནས་བོད་སློབ་འཛིན་ཚོགས་ཀྱི་ཁྱབ་ཁོངས་སློབ་གྲྭ་ཁག་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་ཁྱབ་ཁོངས་སུ་རྩིས་ལེན་དབུ་འཛུགས་གནང་ཡོད་པ་ལྟར། ཕྱི་ལོ་ ༢༠༢༡ ལོའི་ཕྱི་ཟླ་ ༡༢ ནང་དབུས་བོད་སློབ་འཛིན་ཚོགས་ཁྱབ་ཁོངས་ཀྱི་མ་སུ་རི་གཏན་སློབ་དང་། སིམ་ལ་གཏན་སློབ། ཌལ་ཧོར་གཏན་སློབ། རྡོར་གླིང་གཏན་སློབ། ཀ་སྦུག་གཏན་སློབ། ཧར་པུར་ཉིན་སློབ་བཅས་ཤེས་རིག་ལས་ཁུངས་ཀྱིས་རྩིས་བླངས་ཏེ། དབུས་བོད་སློབ་ཁྱབ་ཁོངས་ཀྱི་སློབ་གྲྭ་ཚང་མ་ཤེས་རིག་ལས་ཁུངས་ཁྱབ་ཡོངས་སུ་བླངས་ཟིན་པ་རེད།
གསར་འགོད་པ། བསྟན་འཛིན་ཕུར་བུ། བྱམས་པ་ཚེ་རིང་། རྩོམ་སྒྲིག་པ། སྐལ་བཟང་སྦྱིན་པ།
