དེ་རིང་གྲོས་ཚོགས་ཀྱི་ལས་ཉིན་མཐའ་མར་གྲོས་ཚོགས་ནང་འོས་བསྡུ་བྱས་པ་བརྒྱུད་སྐབས་བཅུ་དྲུག་པའི་བོད་མི་མང་སྤྱི་ཟུར་བློ་བཟང་ཡེ་ཤེས་ལགས་དབུས་འོས་བསྡུ་ལྷན་ཁང་གི་སྤྱི་ཁྱབ་འགན་འཛིན་དུ་བསྐོ་གཞག་བྱུང་སོང་།
དེ་རིང་བོད་མི་མང་སྤྱི་འཐུས་སྐབས་བཅུ་བདུན་པའི་གྲོས་ཚོགས་ཚོགས་དུས་བརྒྱད་པའི་ལས་ཉིན་བརྒྱད་པའི་ཚོགས་ཐུན་དང་པོའི་སྟེང་། དབུས་འོས་བསྡུ་ལྷན་ཁང་གི་སྤྱི་ཁྱབ་འགན་འཛིན་གྱི་འོས་མིར་གྲོས་ཚོགས་ནང་འོས་བསྡུ་བྱས་པའི་ཁྲོད། འོས་མི་སྤྱི་ཟུར་བློ་བཟང་ཡེ་ཤེས་ལགས་སུ་འོས་གྲངས་ ༢༩ དང་། འོས་མི་ལྷ་ལུང་རྒྱལ་ལ་འོས་གྲངས་ ༡༢ ། རྩིས་མེད་འོས་གྲངས་ ༣ བཅས་ཀྱི་མཐའ་བསྡོམས་འོས་གྲངས་ཐོག སྤྱི་ཟུར་བློ་བཟང་ཡེ་ཤེས་ལགས་དབུས་འོས་བསྡུ་ལྷན་ཁང་གི་འགན་འཛིན་དུ་བདམས་ཐོན་བྱུང་སོང་།
སྤྱི་ཟུར་བློ་བཟང་ཡེ་ཤེས་ནི་ཕྱི་ལོ་ ༡༩༨༨ ལོར་ཧར་པ་སྤུར་གཏན་སློབ་ནས་གཞི་རིམ་སློབ་གྲྭ་ཐོན་ཏེ་སློབ་མ་རྩེ་ཕུད་ཀྱི་གཟེངས་རྟགས་ཐོབ། ཕྱི་ལོ་ ༡༩༩༢ ལོར་ཅན་རྡི་རྒར་མཐོ་སློབ་ནས་སྲིད་དོན་ཚན་རིག་ཐོག BA དང་དགེ་རྒན་འོས་སྦྱོང་B.Ed ཐོན། སློབ་གཉེར་རིང་ཅན་རྡི་སྒར་ས་གནས་རང་བདེན་ཚོགས་ཆུང་གི་དྲུང་ཆེ་དང་ས་གནས་གཞོན་ལྷན་གྱི་ཚོགས་གཙོ། དེ་བཞིན་ཕྱི་རྒྱལ་སློབ་ཚོགས་ཀྱི་ཚོགས་གཞོན་བྱས། དེ་རྗེས་སྤོན་ཊ་སློབ་གྲྭའི་སློབ་དགེ་གནང༌། ཕྱི་ལོ་ ༡༩༩༤ ལོར་ལྡི་ལིར་བོད་གནས་ཉམས་ཞིབ་ཁང་དུ་ཉམས་ཞིབ་དང་དབྱིན་བསྒྱུར་གྱི་ལས་འཁུར་ལོ་ ༦ རིང་ཞུས། ཕྱི་ལོ་ ༡༩༩༩ ལོར་སྦེལ་ཀོབ་སེར་བྱེས་སློབ་གྲྭར་དགེ་རྒན་ལོ་ ༦ རིང་བྱས།
དེ་རྗེས་ཕྱི་ལོ་ ༢༠༠༡ ནས་༢༠༠༧ བར་བོད་ཀྱི་གཞོན་ནུ་ལྷན་ཚོགས་ཀྱི་དབུས་རྒྱུན་སྒྲིག་འཛུགས་འགན་འཛིན་དང་ཚོགས་གཞོན་གྱི་ལས་འཁུར་ཞུས། སྐབས་དེར་བོད་དོན་དང་འབྲེལ་བའི་ཆབ་སྲིད་ཀྱི་ལས་འགུལ་ཁག་དང༌། ཟབ་སྦྱོང༌། བོད་གནས་ཁྱབ་སྤེལ་དང་ཞུ་གཏུགས་ཀྱི་ལས་འགུལ། སྤྱི་ཚོགས་ཞབས་ཞུ་སོགས་གང་མང་སྤེལ། དེ་བཞིན་བོད་མིའི་གཞིས་སྒར་དང༌། སློབ་གྲྭ། མཐོ་སློབ་ཕལ་མོ་ཆེར་ཆེད་བསྐྱོད་ཀྱིས་རྒྱལ་ཞེན་སློབ་གསོ་དང་ཆབ་སྲིད་གོ་རྟོགས་བཅས་སྤེལ། ལྷག་པར་དུ་གཞོན་ནུའི་ནང་ལས་ཡུན་རིང་རྒྱ་ནག་གཞུང་གི་འཁྱོག་བཤད་གྱི་ཡིག་ཆ་རྒྱབ་ཤ་དཀར་པོ་ཁག་ལ་དབྱིན་ཡིག་ཐོག་ཉམས་ཞིབ་གྱིས་ལན་འདེབས་མཐིལ་ཕྱིན་བྱས། ཕྱི་ལོ་ ༢༠༠༢ ལོ་དང་ ༢༠༠༥ ལོའི་དུས་འཁོར་དབང་ཆེན་སྐབས་གཞོན་ནུའི་སྤྱི་ཚོགས་ཞབས་ཞུའི་ལས་འགུལ་གྱི་འགན་ཁུར་སྣེ་ཁྲིད་ཞུས། ཕྱི་ལོ་ ༢༠༠༧ ལོར་གཉན་ནད་རེག་དུག་ནད་གཞི་འགོག་ཐབས་ཆེད་འདམ་ག་ཚོགས་པ་གསར་འཛུགས་ཀྱིས་ནད་གཞི་འགོག་ཐབས་ཐོག་གོ་རྟོགས་དང་ནད་པར་ལྟ་སྐྱོང་བཅས་ལོ་ ༦ རིང་ཞབས་འདེགས་ཞུས། ཕྱི་ལོ་ ༢༠༠༨ ལོར་རྒྱ་ནག་ཨོ་ལིམ་པིག་རྩེ་འགྲན་ཆེ་མོའི་སྐབས་གཞུང་འབྲེལ་མིན་པའི་ཚོགས་པ་ལྔའི་མི་མང་སྒེར་ལངས་ཆེན་མོའི་ལས་འགུལ་བོད་བར་གོམ་བགྲོད་ནང་འབྲེལ་འཐུད་པའི་འགན་ཁུར་སྣེ་ཁྲིད་བྱས། ཕྱི་ལོ་ ༢༠༡༡ དང་ཕྱི་ལོ་ ༢༠༡༦ སྐབས་གཉིས་རིང་བོད་མི་མང་མདོ་སྟོད་སྤྱི་འཐུས་སུ་འདེམས་ཐོན་བྱུང་རྗེས། སྤྱི་འཐུས་རྒྱུན་ལས་རྒྱུན་དང་མང་གཙོ་རྩིས་ཁྲ་ཚོགས་ཆུང་སོགས་ནང་འགན་འཁུར་བཞེས།
གྲོས་ཚོགས་ཀྱི་བགྲོ་གླེང་ནང་ལྷག་བསམ་བཟོད་མེད་ཀྱི་འགན་ཁུར་ཆ་ཤས་གང་ནུས་བླངས་དང་ས་བགོས་སོགས་ལ་གཞུང་འབྲེལ་ཕྱོགས་བསྐྱོད། ལྷག་པར་དུ་སྤྱི་ལྷན་ནས་གོ་སྒྲིག་ཞུ་པའི་བོད་དོན་ལས་འགུལ་ཁག་དཔེར་ན་བདེན་པའི་མེ་ལྕེ་དང་རྒྱ་གར་རྒྱལ་ཡོངས་ཞུ་གཏུགས་ལས་འགུལ་སོགས་ནང་འགན་འཁུར་རྐང་ལེན་བཞེས། མདོར་ན་དུས་རྒྱུན་བོད་དོན་ལས་འགུལ་ནང་མཉམ་ཞུགས། སྤྱི་ཚོགས་ཞབས་ཞུ། ཚོགས་པ་ཁག་གིས་གོ་སྒྲིག་ཞུས་པའི་ཟབ་སྦྱོང་སོགས་ནང་གཏམ་བཤད། དེ་བཞིན་རྒྱ་བོད་གནད་དོན་ཐོག་ཉམས་ཞིབ་ཀྱིས་རྩོམ་རིགས་སོགས་སྤེལ་ཡོད་འདུག
གསར་འགོད་པ། བྱམས་པ་ཚེ་རིང་། བསྟན་འཛིན་ཕུར་བུ། རྩོམ་སྒྲིག་པ། སྐལ་བཟང་སྦྱིན་པ།
