༧གོང་ས་རྒྱལ་བ་རིན་པོ་ཆེ་མཆོག་གིས་ཨ་རིའི་སྲིད་འཛིན་ཟུར་བ་སྐུ་ཞབས་ཇིམ་མི་ཁར་ཊར་མཆོག་དགུང་གྲངས་བརྒྱར་ཕེབས་པའི་འཁྲུངས་སྐར་ལ་འཚམས་འདྲི་མཛད།
His Holiness the Dalai Lama and President Jimmy Carter together in 2002. Photo: OHHDL
ཁ་སང་ཕྱི་ཚེས་ ༢ ཉིན་བཞུགས་སྒར་རྒྱལ་བའི་ཕོ་བྲང་ནས་༧གོང་ས་རྒྱལ་བ་རིན་པོ་ཆེ་མཆོག་གིས་ཨ་རིའི་སྲིད་འཛིན་ཟུར་བ་སྐུ་ཞབས་ཇིམ་མི་ཁར་ཊར་(Jimmy Carter ) མཆོག་དགུང་གྲངས་ ༡༠༠ ཕེབས་པའི་འཁྲུངས་སྐར་ལ་འཚམས་འདྲིའི་གསུང་འཕྲིན་སྩལ་ཏེ། ཁོང་གི་དུས་རབས་གཅིག་གི་སྐུ་ཚེའི་བཞུད་ལམ་ནི་ཆེས་ཡིད་སྨོན་བྱ་འོས་པ་ཞིག་ཡིན་སྐོར་སོགས་གསུངས་འདུག
༧གོང་ས་རྒྱལ་བ་རིན་པོ་ཆེ་མཆོག་གི་འཚམས་འདྲིའི་གསུང་འཕྲིན་ནང་། ངོས་རང་གིས་ཁྱེད་ཀྱིས་ནང་མི་དང་ལྷན་སྤྲོ་སྣང་ལྡན་པའི་ཐོག་ནས་སྐྱེས་སྐར་སྲུང་གཙི་བྱེད་ཐུབ་པའི་རེ་བ་ཡོད། ཁྱེད་ཀྱི་སྐུ་ཚེའི་བཞུད་ལམ་ནི་ཆེས་དོན་སྙིང་ལྡན་པ་ཞིག་ཡིན་པའི་ཁར། ཁྱེད་ཀྱིས་ཤེས་གསལ་བཞིན་ངོས་རང་གིས་དུས་ཡུན་རིང་པོ་ནས་ཁྱེད་ཀྱི་རླབས་ཆེན་གྱི་མཛད་རྗེས་ལ་ཡིད་སྨོན་བྱེད་ཀྱི་ཡོད་ལ། རླབས་ཆེན་མཛད་རྗེས་དེ་དག་མུ་མཐུད་དུ་རྒྱུན་འཁྱོངས་མུས་ཡིན་པ་ནི་ཡིད་དུ་འོང་བ་ཞིག་རེད། དེ་བཞིན་ཁྱེད་ཀྱིས་གཞན་དོན་གྱི་སླད་དུ་ཐུགས་ཁུར་བྱེད་མུས་ཡིན་པ་ནི་ང་ཚོས་ཆེས་ཡིད་སྨོན་བྱ་དགོས་པ་ཞིག་ཡིན་པས། ངོས་རང་གིས་སྙིང་དབུས་ནས་ཁྱེད་ལ་ཐུགས་རྗེ་ཆེ་ཞུ་ན་འདོད། ཅེས་གསུངས་འདུག
ཕྱི་ལོ་ ༡༩༨༧ ལོར་ཨ་རིའི་སྲིད་འཛིན་ཟུར་བ་ཇིམ་མེ་ཁར་ཊར་མཆོག་གིས་༧གོང་ས་མཆོག་ལ་མཇལ་འཕྲད་ཞུས་ཡོད་ཅིང་། ལོ་དེར་ཁོང་རྒྱ་ནག་ནང་ཕེབས་ཏེ་ཕྱིར་ལོག་རྗེས། ལྷ་ས་ནས་བོད་མིའི་ཡར་ལངས་ཆེན་པོ་བྱུང་། སྐབས་དེར་ཁོང་གིས། དུས་རབས་ཉི་ཤུ་བའི་མཇུག་འདིར། མི་ཞིག་གིས་རང་ཉིད་ཀྱི་གཞི་རྩའི་འགྲོ་བ་མིའི་ཐོབ་ཐང་རྩོད་པར་བཙོན་འཇུག་བྱས་པ་ནི་བློ་ཡུལ་ལས་འདས་པ་ཞིག་རེད། ཅེས་རྒྱ་ནག་གཞུང་གིས་བོད་ནང་གང་བྱུང་འཛིན་བཟུང་དང་དྲག་གནོན་བྱས་པར་སྐྱོན་བརྗོད་བྱས་ཡོད། ཡང་ཁོང་གིས་ཕྱི་ལོ་ ༢༠༡༣ ལོར་རྒྱ་ནག་གིས་བལ་ཡུལ་གཞུང་ལ་གནོད་ཤུགས་སྤྲད་དེ་བལ་ཡུལ་བརྒྱུད་སྐྱབས་བཅོལ་དུ་ཡོང་མཁན་བོད་མི་ཚོར་དམ་དྲག་བྱེད་བཞིན་པའི་སྐོར་ལ་སྐྱོན་བརྗོད་གནང་ཡོད་པ་སོགས་བོད་དོན་ཐོག་རྒྱབ་སྐྱོར་གནང་མཁན་ཞིག་ཡིན་འདུག་ལ། ད་ལྟ་སྐུ་ཞབས་ཇིམ་མེ་ཁར་ཊར་མཆོག་ནི་དགུང་ལོ་ ༡༠༠ དང་ཁོང་གིས་ཕྱི་ལོ་ ༡༩༧༧ ནས་ ༡༩༨༡ བར་ཨ་རིའི་སྲིད་འཛིན་སྐབས་ ༣༩ པ་དེ་གནང་། ཕྱི་ལོ་ ༢༠༠༢ ལོར་ནོར་བྷེལ་ཞི་བདེ་གཟེངས་རྟགས་བཞེས།
གསར་འགོད་པ། དཔལ་ལྡན།
