ཤེས་རིག་བཀའ་བློན་མཆོག་གིས་བོད་པའི་སྤྱི་ཚོགས་ནང་དུ་སྔོན་འགྲོ་དང་དམའ་རིམ་གྱི་དགེ་རྒན་རྣམས་ལ་བསྔགས་བརྗོད་དང་དམིགས་བསལ་དགོས་མཁོ་ཅན་གྱི་ཕྲུ་གུ་རྣམས་ལ་ལྟ་སྐྱོང་བྱ་རྒྱུ་གལ་ཆེན་ཡིན་སྐོར་གསུངས་སོང་།
དེ་རིང་གངས་སྐྱིད་མེས་དབོན་གཙུག་ལག་དཔེ་སྟོན་སློབ་གྲྭ་དབུ་བརྙེས་ནས་ལོ་ ༡༩ འཁོར་བའི་དུས་དྲན་སྲུང་གཙིའི་མཛད་སྒོ་ཞིག་འཚོགས་སོང་། མཛད་སྒོའི་ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་གི་དབུས་པའི་གངས་སྐྱིད་མེས་དབོན་གཙུག་ལག་དཔེ་སྟོན་སློབ་གྲྭའི་དགེ་ཆེ་བསྟན་འཛིན་ཆོས་སྒྲོན་ལགས་དང་དགེ་ལས་ཡོངས། དྷ་སའི་སློབ་ཕྲུག་ཕ་མ་ཚོགས་ཆུང་གི་སྐུ་ཚབ་དང་ཕ་མ་སོགས་དྷ་ས་ཁུལ་གྱི་སེར་སྐྱ་མི་མང་རྣམས་འདུ་འཛོམས་བྱུང་འདུག
སྐབས་དེར་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་ནས། མེས་དབོན་གཙུག་ལག་དཔེ་སྟོན་སློབ་གྲྭ་ནི་༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་དགོངས་བཞིན་སྐྱབས་རྗེ་ཟམ་གདོང་རིན་པོ་ཆེ་མཆོག་གིས་ཤེས་ཡོན་སྲིད་ཇུས་གོང་འཕེལ་སླད་དུ་བཙུགས་པར་ཧ་ལས་པ་ཞིག་རེད། སློབ་གྲྭ་གསར་དུ་བཙུགས་དུས་སྲི་ཞུའི་ལས་བྱེད་ཁ་ཤས་ཀྱི་ཕྲུ་གུ་མ་གཏོགས་མངགས་ཀྱི་མེད་པ་གོ་ཐོས་བྱུང་། རིམ་བཞིན་སློབ་ཕྲུག་མང་དུ་ཕྱིན་ནས་ད་ལྟའི་ཆར་སློབ་གྲྭ་ཆུང་ཆུང་འདིའི་ནང་སློབ་ཕྲུག་གྲངས་ ༢༧༠ ལྷག་ཡོད་པ་རེད། དེང་སྐབས་ཕ་མ་རྣམས་ཀྱིས་དཔེ་སྟོན་སློབ་གྲྭའི་ནང་ཤེས་ཡོན་སྲིད་ཇུས་ཀྱི་སློབ་སྦྱོང་སྤྲོད་བཞིན་པའི་དགོངས་དོན་དེ་རྩ་ཆེན་དང་གལ་ཆེན་ཡིན་པའི་ཚོར་བ་གསལ་བོ་ཆགས་འདུག དེ་རིང་མཛད་སྒོའི་སྐབས་སུ་སློབ་ཕྲུག་རྣམས་ཀྱིས་གཞས་སྣ་འདྲ་མིན་ཧ་ཅང་ཡག་པོ་འཁྲབ་སོང་། སློབ་གྲྭའི་དགེ་ཆེ་ལགས་ཀྱིས་སློབ་ཕྲུག་ཚང་མ་མཉམ་ཞུགས་བྱེད་བཞིན་ཡོད་པ་བརྗོད་སོང་། དེ་ནི་ཧ་ཅང་གི་གལ་གནད་ཆེན་པོ་ཞིག་རེད། ཕ་མ་རྣམས་ཀྱིས་རང་ཉིད་ཀྱི་ཕྲུ་གུ་ཚོས་སྡིངས་ཆའི་ཐོག་ཞབས་བྲོ་འཁྲབ་སོང་བསམ་པའི་དགའ་ཚོར་ཆེན་པོ་བྱུང་གི་ཡོད་པའི་ངོས་འཛིན་བྱེད་ཀྱི་ཡོད། ཅེས་གསུངས་སོང་།
བཀའ་བློན་མཆོག་ནས། མི་མང་པོ་ཞིག་ལ་མེས་དབོན་གཙུག་ལག་དཔེ་སྟོན་སློབ་གྲྭའི་ནང་སློབ་སྦྱོང་བྱས་ཏེ་མཐའ་མར་གྲུབ་འབྲས་ག་འདྲ་ཡོད་པའི་དྲི་བ་ཞིག་ཡོད། ཕྱི་ལོ་ ༢༠༡༩ ལོར་རྒྱ་གར་གྱི་མཁས་དབང་དང་བོད་མི་ཉམས་མྱོང་ཅན་ཁ་ཤས་སློབ་གྲྭ་མང་པོའི་ནང་སྐོར་སྐྱོད་བྱེད་སྐབས། དཔེ་སྟོན་སློབ་གྲྭ་ནས་འཛིན་རིམ་བརྒྱད་པ་ཐོན་ཏེ་བཅུ་གཉིས་བར་དུ་འགྲིམས་བཞིན་པའི་སློབ་ཕྲུག་རྣམས་ཀྱི་སྤྱོད་པ་དང་། བསམ་བློ། སློབ་སྦྱོང་བྱེད་སྟངས་སོགས་སློབ་གྲྭ་གཞན་དང་ཁྱོན་ནས་འདྲ་བོ་མི་འདུག་ཅེས་སློབ་གྲྭའི་ལས་བསྡོམས་ཕུལ་འདུག དཔེ་སྟོན་སློབ་གྲྭར་ཤེས་ཡོན་སྲིད་ཇུས་ཀྱི་དགོངས་དོན་བཞིན་སློབ་སྦྱོང་སྤྲོད་བཞིན་པ་ཧ་ཅང་ཕན་ཐོགས་ཆེན་པོ་ཞིག་རེད་ཅེས་བརྗོད་འདོད་བྱུང་། སྤྱི་ཚོགས་ནང་དུ་སྔོན་འགྲོ་དང་དམའ་རིམ་གྱི་དགེ་རྒན་རྣམས་ལ་མཐོང་ཆུང་བ་ཞིག་འདུག དངོས་གནས་དྲང་གནས་བཤད་ན་སྔོན་འགྲོ་དང་དམའ་རིམ་གྱི་དགེ་རྒན་རྣམས་ཀྱི་ལས་ཀ་དཀའ་ལས་ཁག་པོ་རེད། ཁོང་ཚོས་བྱིས་པ་རྣམས་ལ་སྡོད་སྟངས་ནས་མགོ་བཙུགས་ཏེ་སློབ་ཁྲིད་ཀྱི་དུས་ཚོད་དང་ནུས་པ་མང་པོ་ཞིག་གཏོང་དགོས་ཀྱི་ཡོད། ཕ་མ་ཚོས་སྔོན་འགྲོ་དང་དམའ་རིམ་གྱི་དགེ་རྒན་རྣམ་པར་བསྔགས་བརྗོད་དང་རྗེས་སུ་ཡི་རངས་བྱ་རྒྱུ་ཧ་ཅང་གལ་ཆེན་པོ་རེད། ཅེས་གསུངས་སོང་།
ཡང་བཀའ་བློན་མཆོག་ནས། ལོ་གསུམ་ཙམ་རིང་ངས་སློབ་གྲྭ་ཁག་བཞི་བཅུ་ཙམ་ནང་སྐོར་སྐྱོད་བྱས་ཡིན། དེང་སྐབས་དཀའ་ངལ་ཆེ་ཤོས་ཤིག་ནི་སློབ་ཕྲུག་ནང་དུ་སྐད་ཆ་ཡག་པོ་བཤད་མ་ཤེས་པ་དང་། ཀློག་པའི་ནུས་པ་མེད་པ། སེམས་ཁམས་ཐོག་སྐྱོན་ཡོད་པའི་གྲངས་མང་ནས་མང་དུ་འགྲོ་བཞིན་འདུག དེ་ནི་ཧ་ཅང་ཛ་དྲག་དང་སེམས་འཚབ་བྱ་དགོས་པའི་གནད་དོན་ཞིག་ཆགས་ཡོད། ཉེ་ཆར་ལྷོ་ཕྱོགས་སུ་སྐོར་སྐྱོད་ཕྱིན་སྐབས་སློབ་གྲྭའི་ནང་ཁྱོན་སློབ་ཕྲུག་གྲངས་ ༡༥༩༧ ཡོད་པའི་ཁྲོད། ཕྲུ་གུ་གྲངས་ ༣༧ ལ་གོང་གི་གནད་དོན་དེ་འདྲའི་རིགས་རེད་འདུག ང་ཚོའི་སློབ་ཕྲུག་གི་གྲངས་ཀ་ཉུང་ནས་ཉུང་དུ་འགྲོ་བཞིན་འདུག སྔོན་མ་སློབ་གྲྭའི་ནང་སློབ་ཕྲུག་གྲངས་ ༡༠༠༠ ཡོད་སར་དེང་སང་སློབ་ཕྲུག་གྲངས་ ༤༠༠ ཙམ་ལས་མི་འདུག སློབ་གྲྭ་ཁ་ཤས་ཀྱི་ནང་དུ་སློབ་ཕྲུག་གྲངས་ ༡༥ ནས་ ༢༥ བར་རེད། ཕྲུ་གུ་འདི་འདྲའི་ཉུང་ཉུང་དུ་གྱུར་བའི་དུས་ཚོད་ཞིག་ལ་སེམས་ཁམས་སོགས་ཀྱི་ཐོག་དཀའ་ངལ་ཡོད་པའི་ཕྲུ་གུའི་གྲངས་ཀ་མང་པོ་བྱུང་ཚེ། སེམས་འཚབ་ཡོང་བའི་གནས་སྟངས་ཤིག་ཆགས་ཀྱི་འདུག ཡིན་ནའང་། ཕ་མ་ཁ་ཤས་ཀྱིས་རྒྱུ་མཚན་གཞན་ཞིག་བཤད་དེ་ཕྲུ་གུ་དེའི་རིགས་ཀྱི་དཀའ་ངལ་ངོས་ལེན་བྱེད་ཀྱི་མེད་པ་སྐྱོན་ཆེན་པོ་ཞིག་རེད། རང་ཉིད་ཀྱི་ཕྲུ་གུའི་དཀའ་ངལ་ལ་སྨན་བཅོས་དང་། དགེ་རྒན་གྱི་ཐབས་ལམ། ཤེས་རིག་ལས་ཁུངས་ནས་མཐུན་རྐྱེན་སོགས་ཀྱི་གྲ་སྒྲིག་སྔ་ས་ནས་བྱ་དགོས་མ་གཏོགས། དེའི་རིགས་ལ་ཕ་མའི་ངོས་ལེན་མ་བྱས་ཚེ། མ་འོངས་བར་ཁྱིམ་ཚང་སྒེར་དང་སྤྱི་ཚོགས་སུ་དཀའ་ངལ་ཆེན་པོ་ཞིག་འཕྲད་རྒྱུ་རེད། བོད་ཀྱི་སྤྱི་ཚོགས་ནང་དུ་ཕ་མ་གཉིས་ཀྱིས་ཕྲུ་གུའི་འགྲམ་དུ་དོ་སྣང་མ་བྱས་པར་འཁྲུག་རྩོད་བྱུང་སྐབས། ཕྲུ་གུའི་སེམས་ཁམས་ལ་དཀའ་ངལ་འཕྲད་ཀྱི་ཡོད་པས། ཕ་མ་རྣམས་ཀྱིས་ཕྲུ་གུའི་འགྲམ་དུ་གང་ཐུབ་གཟབ་གཟབ་བྱ་དགོས། ཕ་མ་དང་དགེ་རྒན་རྣམས་ཀྱིས་སློབ་སྦྱོང་མཉམ་དུ་བཟང་སྤྱོད་སློབ་རྒྱུ་གལ་ཆེན་པོ་རེད། ཅེས་གསུངས་སོང་།
གསར་འགོད་པ། བྱམས་པ་ཚེ་རིང་།
