༧སྐྱབས་རྗེ་གླིང་རིན་པོ་ཆེ་མཆོག་ནས་དབྱིན་ཡུལ་བོད་རིགས་རྣམས་ལ་བཀའ་སློབ་ལམ་སྟོན་གནང་།

༧སྐྱབས་རྗེ་གླིང་རིན་པོ་ཆེ་མཆོག་ནས་ཕྱི་རྒྱལ་གྱི་བོད་པའི་ཕ་མ་རྣམས་ཀྱིས་བྱིས་པ་གཟའ་འཇུག་སློབ་གྲྭར་བསྐྱལ་བ་ཙམ་མིན་པར་ནམ་རྒྱུན་བྱིས་པ་དང་མཉམ་དུ་བོད་སྐད་བཤད་རྒྱུ་གལ་ཆེན་པོ་ཡིན་སྐོར་གསུངས་སོང་།

ཉེ་ལམ་དབྱིན་ཡུལ་གྱི་རྒྱལ་ས་ལོན་ཌོན་དུ། དབྱིན་ཡུལ་ས་གནས་བོད་རིགས་ཚོགས་པས་ཇི་ལྟར་གསོལ་བ་བཏབ་པ་ལྟར། ༧སྐྱབས་རྗེ་གླིང་རིན་པོ་ཆེ་མཆོག་ནས་བྱང་ཆུབ་སེམས་དང་སྟོང་ཉིད་ཀྱི་ལྟ་བའི་སྐོར་བཀའ་སློབ་སྩལ་ཡོད་ཅིང་། སྐབས་དེར་དབྱིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་ཀྱི་གཙོས་ས་གནས་བོད་རིགས་སེར་སྐྱ་མི་མང་དང་། ཕྱི་རྒྱལ་གྱི་དད་ལྡན་པ་སོགས་འཛོམས་ཡོད་འདུག

༧སྐྱབས་རྗེ་གླིང་རིན་པོ་ཆེ་མཆོག་ནས། ཕྱི་ལོ་ ༢༠༡༩ ལོར་ང་རང་འདིར་བཅར་བ་ཡིན། བོད་རིགས་རྣམས་དང་ལྷན་དུ་ཐེངས་ཁ་ཤས་འཛོམས་པའི་གོ་སྐབས་བྱུང་། བོད་རིགས་རྣམས་དང་མཉམ་དུ་མཇལ་འཛོམས་བྱུང་ཐུབ་པར་ཧ་ཅང་དགའ་བོ་བྱུང་། བོད་རིགས་རྣམས་རྒྱལ་ཁབ་འདྲ་མིན་དང་ས་ཁུལ་འདྲ་མིན་དུ་གནས་སྡོད་བྱེད་བཞིན་ཡོད་ཀྱང་། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དྲིན་ལ་བརྟེན་ནས་དེང་དུས་ཤེས་ཡོན་གྱི་གོ་སྐབས་དང་། ལས་ཀ  འཕྲོད་བསྟེན་སོགས་ཀྱི་མཐུན་རྐྱེན་འཛོམས་པོ་ཆགས་ཡོད། བོད་པ་རྣམས་ལུང་པ་དང་ས་གནས་འདྲ་མིན་དུ་གནས་ཡོད་ན་ཡང་།  གཙོ་བོ་བོད་པ་ཡིན་པའི་འདུ་ཤེས་མ་དོར་བ་བྱ་རྒྱུ་གལ་ཆེན་པོ་རེད། ཚེ་སྔོན་མའི་ལས་དང་བསོད་ནམས་ཀྱིས་བོད་མི་རིགས་ཀྱི་སྐྱེ་བ་ཞིག་བླངས་བ་རེད། དེ་ལ་བརྟེན་ནས་སངས་རྒྱས་ཀྱི་ཆོས་དྲི་མ་མེད་པ་མཇལ་བའི་གོ་སྐབས་བྱུང་ཡོད། དེ་བཞིན་༧གོང་ས་རྒྱལ་བ་རིན་པོ་ཆེ་མཆོག་ལྟ་བུའི་བླ་ན་མེད་པའི་དབུ་ཁྲིད་ཞིག་གི་ལམ་སྟོན་འོག་གནས་རྒྱུ་བྱུང་བ་རེད། དེ་ནི་ཧ་ཅང་གི་གོ་སྐབས་བཟང་པོ་དང་སྐལ་བ་བཟང་པོ་ཆགས་ཡོད། དེ་དག་ངོ་འཕྲོད་པའི་ཐོག་བོད་པ་ཡིན་པའི་འདུ་ཤེས་བརྟེན་པོ་ངོས་འཛིན་བྱ་རྒྱུ་གལ་ཆེན་པོ་རེད། ཅེས་གསུངས་སོང་།

ཡང་༧སྐྱབས་རྗེ་གླིང་རིན་པོ་ཆེ་མཆོག་ནས། ༧གོང་ས་རྒྱལ་བ་རིན་པོ་ཆེ་མཆོག་ནས་དུས་རྒྱུན་དུ་བཀའ་སློབ་ཕེབས་ཀྱི་ཡོད་པ་བཞིན། ང་ཚོ་བོད་པ་རྣམས་བཙན་བྱོལ་དུ་ཡོང་དོན་ནི་བོད་པའི་ནང་ཁུལ་མ་འཆམ་པར་ཡོང་བ་ཞིག་མ་རེད་ལ། བོད་ནང་དུ་ང་ཚོ་མུ་གེ་ཐེབས་ཏེ་ཟ་རྒྱུ་འཐུང་རྒྱུ་མེད་པའང་མ་རེད། ང་ཚོ་བཙན་བྱོལ་དུ་ཡོང་བའི་དམིགས་ཡུལ་ནི་རང་ཉིད་ཀྱི་རྒྱལ་ཁབ་ནང་དུ་ཆོས་དང་རིག་གཞུང་རྒྱུད་འཛིན་བྱེད་པའི་རང་དབང་མེད་པ་དང་། གནས་མི་ཐུབ་པའི་གནས་སྟངས་ཤིག་ཆགས་པའི་རྐྱེན་གྱིས་རེད། དེར་བརྟེན་ང་ཚོའི་ཐོག་མའི་དམིགས་ཡུལ་བཞིན་ཆོས་དང་། རིག་གཞུང་། སྐད་ཡིག་བཅས་མི་ཉམས་རྒྱུད་འཛིན་བྱ་རྒྱུ་ལས་འགན་གཙོ་བོ་ཞིག་ཆགས་ཡོད། མི་སྒེར་གྱི་འཚོ་བ་དང་གནས་སྟངས་འགྲིག་པ་ཙམ་གྱིས་འདོད་པ་ཚིམས་ནས་མ་བསྡད་པར་རང་གི་མི་རིགས་ལ་ལ་རྒྱ་ཞིག་ཡོད་པའི་ཐོག་རིག་གཞུང་སོགས་རྒྱུད་འཛིན་གྱི་ལས་འགན་འཁུར་དགོས། བཙན་བྱོལ་བོད་པ་འདྲ་འདྲ་ནང་ནས་མི་འདྲ་བ་ཞིག་ཡིན་ཟེར་གྱི་ཡོད་པ་ལྟར། རིག་གཞུང་ལྟེ་གནས་ཁང་རྣམས་ཀྱང་ཚགས་ཚུད་ཡག་པོ་བྱུང་ཡོད། ཅེས་གསུངས་སོང་།

༧གླིང་རིན་པོ་ཆེ་མཆོག་ནས། ཕྱི་རྒྱལ་རྒྱལ་ཁབ་ཁག་ཏུ་རྒྱ་གར་བཞིན་བཙན་བྱོལ་གྱི་ཤེས་ཡོན་སྡེ་ཚན་ཁང་ཟུར་དུ་མེད་པར་བརྟེན། བོད་ཀྱི་སྐད་ཡིག་དང་རིག་གཞུང་ཉམས་ཆག་འགྲོ་བའི་ཉེན་ཁ་ཞིག་ཆགས་ཀྱི་འདུག རྒྱ་གར་དང་ཕྱི་རྒྱལ་གྱི་བོད་ཕྲུག་རྣམས་ཀྱི་བསམ་བློ་འཁོར་སྟངས་མི་འདྲ་བ་ཆགས་ཡོད། ང་ཚོས་ཀྱང་གནས་སྟངས་དེའི་ཐོག་རིག་པ་གསར་བ་བཏང་སྟེ་རང་ཉིད་ཀྱི་སྐད་ཡིག་མི་ཉམས་རྒྱུད་འཛིན་བྱ་རྒྱུ་གལ་ཆེན་པོ་རེད། བོད་མི་རིགས་ཀྱི་སྐད་ཡིག་ཡག་པོ་གནས་པར་བོད་སྐད་བཤད་ཤེས་དགོས་ཀྱི་འདུག་པས། བྱིས་པ་ཆུང་ཆུང་ཡིན་དུས་ནས་བོད་སྐད་བསླབ་རྒྱུ་ཧ་ཅང་གལ་ཆེན་པོ་རེད། ཁྱིམ་ཚང་ནང་དུ་བྱིས་པ་དང་མཉམ་དུ་བོད་སྐད་ཐོག་ནས་རྒྱུན་ལྡན་སྐད་ཆ་བཤད་ཚེ། བྱིས་པ་རྣམས་ཀྱིས་ཀྱང་རང་བཞིན་གྱི་བོད་སྐད་བཤད་ཐུབ་པ་མ་གཏོགས། གཟའ་འཇུག་སློབ་གྲྭར་འགྲོ་རུ་བཅུག་ཀྱང་རྒྱུན་ལྡན་བོད་སྐད་བེད་སྤྱོད་མེད་ན་དཀའ་ངལ་ཞིག་ཆགས་ཡོད། ཕ་མ་ཚང་མས་བུ་ཕྲུག་ལ་ལོ་གཉིས་ནས་བཅོ་ལྔའི་བར་དུ་བོད་སྐད་ཤེས་པ་བྱ་དགོས། ང་ཚོས་དངོས་ཡོད་གནས་ཚུལ་ཤེས་པའི་ཐོག་ནས་ཕ་མ་རྣམས་ཀྱིས་བོད་སྐད་བསླབ་རྒྱུ་གལ་ཆེན་པོ་རེད། ཅེས་གསུངས་སོང་།

དེ་བཞིན་རིན་པོ་ཆེ་མཆོག་ནས། མ་འོངས་བར་བོད་མི་རིགས་མུ་མཐུད་གནས་དང་མི་གནས་ནི་གཙོ་བོ་མི་རབས་གཞོན་པར་འབྲེལ་བ་ཆགས་ཡོད། མི་རབས་རྒན་པ་རྣམས་འཇིག་རྟེན་ཆོས་ཉིད་ཀྱི་དབང་གིས་རྫོགས་འགྲོ་བཞིན་ཡོད་པས། མ་འོངས་བའི་ལོ་བཅུ་དང་བཅོ་ལྔའི་རྗེས་སུ་ད་ལྟའི་བྱིས་པ་ཆུང་ཆུང་རྣམས་ཀྱི་འགན་འཁུར་ཆགས་དུས། ཁོང་ཚོར་བོད་པའི་ཆོས་དང་། རིག་གཞུང་། སྐད་ཡིག་སོགས་ཀྱི་ཉམས་མྱོང་མེད་དུས་ཧ་ཅང་ཁག་པོ་ཆགས་ཀྱི་རེད། ཚང་མས་མཁྱེན་གསལ་ལྟར་རྒྱ་གཞུང་གིས་བོད་ནང་དུ་སོ་སོའི་སྐད་ཡིག་དང་རིག་གཞུང་ལ་དམ་དྲག་བྱེད་ཀྱི་ཡོད་ལ། རང་ཉིད་ཀྱི་བསམ་བློར་འཁོར་བའི་སྐད་ཆ་དེ་ཁ་ནས་བཤད་པའི་རང་དབང་མེད། བཙན་བྱོལ་ནང་གི་བོད་མི་ཚོས་ཁ་ཡོད་ལག་ཡོག་ཐོག་བོད་ནང་གི་བོད་མི་ཚོའི་ཐོག་ཕན་ཐོགས་བྱ་རྒྱུ་ཁག་པོ་རེད་དེ། བཙན་བྱོལ་ནང་གི་བོད་མི་ཚོས་བྱེད་ཐུབ་པ་ནི་རང་ཉིད་ཀྱི་སྐད་ཡིག་དང་རིག་གཞུང་རྒྱུན་འཛིན་བྱ་རྒྱུ་དེ་རེད། ཅེས་གསུངས་སོང་།

གསར་འགོད་པ། བྱམས་པ་ཚེ་རིང་།