རྒྱལ་བའི་རྒྱལ་ཚབ་དྲུང་གཽ་ཤྲཱི་དཔལ་འབྱོར་དོན་གྲུབ་མཆོག་གི་རྗེས་དྲན་སྲུང་གཙི་ཞུས།

༧སྐྱབས་མགོན་རྒྱལ་བའི་རྒྱལ་ཚབ་དྲུང་༧གཽ་ཤྲཱི་དཔལ་འབྱོར་དོན་གྲུབ་མཆོག་སྐུ་འཁྲུངས་ཏེ་མི་ལོ་ ༦༠༠ འཁོར་བའི་དུས་དྲན་མཛད་སྒོའི་ཐོག་དྲ་ལམ་བརྒྱུད་༧དཔལ་རྒྱལ་དབང་ཀརྨ་པ་མཆོག་གིས་གསུང་འཕྲིན་བསྩལ།

དེ་རིང་ཕྱི་ཚེས་ ༡༧ ཉིན་རྒྱ་གར་འབྲས་ལྗོངས་ཀྱི་གདན་ས་༧དཔལ་ཆེན་ཆོས་གླིང་དུ། ༧རྗེ་དྲུག་པ་མཐོང་བ་དོན་ལྡན་གྱི་རྒྱལ་ཚབ་མངའ་གསོལ་བ་༧སྐྱབས་མགོན་རྒྱལ་བའི་རྒྱལ་ཚབ་དྲུང་༧གཽ་ཤྲཱི་དཔལ་འབྱོར་དོན་གྲུབ་མཆོག་སྐུ་འཁྲུངས་ཏེ་མི་ལོ་༦༠༠ འཁོར་བའི་རྗེས་དྲན་སྲུང་གཙི་ཞུས་ཡོད་ཅིང་། མཛད་སྒོའི་ཐོག་༧སྐྱབས་རྗེ་གར་དབང་རིན་པོ་མཆོག་དང་སྐྱབས་རྗེ་འབོ་དཀར་རིན་པོ་ཆེ་དབུས། སྐུ་མགྲོན་གཙོ་བོ་འབྲས་ལྗོངས་མངའ་སྡེའི་བློན་ཆེན་མཆོག་གི་སྐུ་ཚབ་ཚོགས་གཙོ་མིག་དམར་ཤར་པ་མཆོག་དང་། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམ་བསྟན་འཕེལ་མཆོག དགའ་ལྡན་ཕོ་བྲང་ཡིག་ཚང་གི་དྲུང་ཆེ་བློ་བཟང་སྦྱིན་པ་ལགས་སོགས་གཞུང་ཁོངས་དང་གཞུང་ཁོངས་མིན་པའི་ཚོགས་སྡེ་ཁག་གི་སྐུ་ཚབ། ཕྱོགས་མཐའ་ཁག་ནས་དགེ་འདུན་པ་དང་སེར་སྐྱ་མི་མང་བཅས་འཛོམས་ཡོད་འདུག

སྐབས་དེར་དྲ་ལམ་བརྒྱུད་༧རྒྱལ་དབང་ཀརྨ་བ་མཆོག་ནས། དེ་རིང་རྒྱལ་བའི་དབང་པོ་དཔལ་ཀརྨ་པ་སྐུ་ཕྲེང་དྲུག་པ་མཐོང་བ་དོན་ལྡན་གྱི་སྲས་ཀྱི་མཐུ་བོ་རྒྱལ་བ་ཐམས་ཅད་མཁྱེན་པ་༧གཽ་ཤྲཱི་ཆེན་པོ་བྱང་སེམས་དཔལ་འབྱོར་དོན་འགྲུབ་འཇིག་རྟེན་གྱི་ཁམས་འདིར་སྐུ་བལྟམས་ཏེ་བགྲང་བྱ་ ༦༠༠ ལྷག་འཁོར་བའི་དུས་ཆེན་ཁྱད་པར་ཆགས་ཡོད། དེ་འབྲེལ་གྱི་དུས་ཆེན་སྲུང་གཙི་གནང་ས་དེ་ཡང་རྒྱལ་བའི་རྒྱལ་ཚབ་གསང་བདག་རྡོ་རྗེ་འཆང་བ་བཅུ་གཉིས་པ་ཆེན་པོའི་གདན་ས་ར་ལང་དཔལ་ཆེན་ཆོས་གླིང་དུ་འཚོག་བཞིན་ཡོད། དེ་རིང་གི་གོ་སྐབས་འདི་དང་བསྟུན་ནས་མཛད་སྒོའི་ཚོགས་ཀྱི་གཙོ་བོ་བཞུགས་པ་དཔལ་ལྡན་བླ་མ་དམ་པ་དྲུང་༧གཽ་ཤྲཱི་ཆེན་པོ་མཆོག་ལ་སྒོ་གསུམ་གུས་ཕྱག་སྔོན་དུ་འགྲོ་བའི་སྒོ་ནས། སྐུ་མགྲོན་རྣམ་པ་དང་ཆོས་གྲོགས་རྣམ་པ་ལྷན་རྒྱས་ལ་བྱོན་པ་ལེགས་སོ་དང་། བཀྲ་ཤིས་བདེ་ལེགས་གྲངས་མེད་ཞུ་རྒྱུ་ཡིན། ཞེས་གསུངས་སོང་།

ཡང་༧རྒྱལ་དབང་ཀརྨ་པ་མཆོག་ནས། དེ་རིང་མཛད་སྒོ་འདིའི་གནད་འགག་དང་དོན་གནད་ལ་བསམ་བློ་བཏང་བ་ཡིན་ན། འདི་ནི་རྒྱལ་ཚབ་སྐུ་ཕྲེང་གཅིག་ཙམ་གྱི་མཛད་འཕྲིན་མ་ཡིན་པར་སྒྲུབ་རྒྱུད་ཀརྨ་ཀམ་ཚང་གི་བསྟན་པ་གལ་གནད་ཆེན་པོ་ཞིག་ཆགས་ཡོད་པར་དྲན་གྱི་འདུག དེའི་རྒྱུ་མཚན་གང་རེད་ཟེར་ན་ཀརྨ་པ་སྐུ་ཕྲེང་དྲུག་པ་མཐོང་བ་དོན་ལྡན་གྱི་སྐབས་སུ་བཀའ་རྒྱུད་ཀྱི་བསྟན་པ་དེ་ཕྱོགས་གཅིག་ནས་ཅུང་ཙམ་ཉག་ཕྲ་བོ་བྱུང་ས་རེད། ཆོས་རྒྱུད་གཞན་ཏུ་བསྒྱུར་མགོ་ཚུགས་འདུག རང་ཉིད་ཀྱི་གྲུབ་མཐའི་རྐང་ཚུགས་མ་ཐུབ་པའི་གནས་སྟངས་ཤིག་བྱུང་འདུག དེ་འདྲའི་གལ་ཆེ་བའི་དུས་ཚོད་ཞིག་གི་སྐབས་སུ། ༧ཀརྨ་པ་དྲུག་པ་མཐོང་བ་དོན་ལྡན་དང་༧གཽ་ཤྲཱི་དཔལ་འབྱོར་དོན་གྲུབ་བླ་སློབ་གཉིས་སྐུ་ན་གཞོན་ཡང་། ཀརྨ་ཀམ་ཚང་དང་ཀརྨའི་སྒར་ཆེན་གྱི་དབུ་ཁྲིད་གནང་སྟེ་བླ་སློབ་དཔུང་བ་མཉམ་གཤིབ་ཐོག་གདན་ས་ཁག་ཏུ་རང་ལུགས་ཀྱི་ཐུན་མོང་མིན་པའི་ཡིག་ཆ་དང་དབང་ལུང་ཁྲིད་གསུམ་སོགས་མ་ཉམས་གོང་འཕེལ་དང་ཉམས་པ་སོ་ཆུར་གནང་ཡོད། ཅེས་གསུངས་སོང་།

བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་ནས། སྐྱབས་མགོན་རྒྱལ་བའི་རྒྱལ་ཚབ་དྲུང་༧གཽ་ཤྲཱི་དཔལ་འབྱོར་དོན་གྲུབ་མཆོག་ནས་༧རྒྱལ་བ་ཀརྨ་སྐུ་ཕྲེང་དྲུག་པའི་བཀའ་བཞིན་༧རྒྱལ་བ་ཀརྨ་པ་སྐུ་ཕྲེང་བདུན་པར་ཚེ་དཔག་མེད་ཕྱི་ནང་གསང་གསུམ་དང་དཔལ་དུས་ཀྱི་འཁོར་ལོ་དབང་ཆེན་ཕུལ་གནང་བ་མ་ཟད། བསྟན་འགྲོ་རིས་སུ་མ་ཆད་པར་མཛད་པ་རྒྱ་ཆེར་བསྐྱངས་ཞིང་། མདོ་སྔགས་ཀྱི་བསྟན་འགྲོ་དབང་བསྒྱུར་ཤིང་ཚེ་གཅིག་ལུས་གཅིག་ལ་གསང་སྔགས་རྡོ་རྗེ་འཆང་ཆེན་པོའི་གོ་འཕངས་དབུ་བརྙེས་པ་ཞིག་ཡིན། ཅེས་གསུངས་སོང་།

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས། ཀརྨ་ཀམ་ཚང་གི་རྒྱལ་བ་ཡབ་སྲས་བདུན་གྱི་ཡ་གྱལ་དྲུང་པ་རྒྱལ་ཚབ་རིན་པོ་ཆེ་སྐུ་ཕྲེང་དང་པོ་ནས་བཅུ་གཉིས་བར་གྱི་མི་ལོ་ ༦༠༠ དུས་ཡུན་ནི་བསྟན་འགྲོ་དོན་རླབས་ཆེན་འགྲུབ་པའི་ལོ་རྒྱུས་ཀྱི་ཕྲེང་བ་བསྟར་ཆགས་སུ་བསྒྲིག་དང་སྒྲིག་བཞིན་པའི་རྣམ་ཐར་ཡིན་ཞིང་། རྒྱལ་ཚབ་སྐུ་ཕྲེང་དང་པོ་དྲུང་པ་བྱང་སེམས་དཔལ་འབྱོར་དོན་གྲུབ་མཆོག་གིས་མཁས་གྲུབ་གཉིས་ལྡན་གྱི་བླ་མ་མང་པོ་བསྟེན་ནས་གསར་རྙིང་གི་ཆོས་མ་ལུས་པར་གསན་སྦྱོང་མཛད་པའི་སྐབས་དེར། གངས་ཅན་གྱི་ལྗོངས་སུ་དོན་གྱི་ཆ་ནས་དབང་ལུང་མན་ངག་བདག་པོ་ཆགས་པའི་གྲགས་པ་འབར་ཞིང་། ཕྱི་ལོ་ ༡༤༥༢ ལོར་རྒྱལ་བ་ཀརྨ་པ་སྐུ་ཕྲེང་དྲུག་པ་མཐོང་བ་དོན་ལྡན་མཆོག་ཞི་བར་གཤེགས་ཁར་དྲུང་པ་རིན་པ་ཆེར་ཞལ་ཆེམས་བཀའ་རྒྱ་བཅུ་གསུམ་དང་བཅས་བསྩལ་ཏེ། རྒྱལ་ཚབ་དུ་བསྐོས་ཞིང་སྒར་གྱི་འཛིན་སྐྱོང་གནང་། སྐུ་གོང་མའི་ཞལ་ཆེམས་གཞི་བཟུང་༧རྒྱལ་བ་ཀརྨ་སྐུ་ཕྲེང་བདུན་པའི་ཡང་སྲིད་ངོས་འཛིན་གདན་ཞུ་དང་། ལས་ཀྱི་སློབ་དཔོན་མཛད་དེ་རབ་བྱུང་གི་སྡོམ་པ་འབོག་ཆོག་དང་མཚན་གསོལ་བ་ནས་རིམ་བཞིན་བསྙེན་པ་རྫོགས་ཞིང་། དགུང་ལོ་ ༣༡ མ་བཞེས་བར་དུ་༧ཀརྨ་པ་ཆོས་གྲགས་རྒྱ་མཚོ་མཆོག་ལ་ལུས་དང་གྲིབ་མ་བཞིན་འགྲོགས་ཏེ། དུས་དང་རྣམ་པ་ཀུན་ཏུ་གསུང་ཆོས་འབུལ་བར་མཛད་པའི་མཚོན། བསྟན་པ་འཛིན་པའི་བུ་སློབ་གྲགས་ཅན་བརྒྱ་ཕྲག་མང་པོ་བསྐྱངས་ཞིང་།  བཀའ་འབུམ་པོད་བཅོ་བརྒྱད་ཅན་ཞིག་བཞུགས་པ་སོགས་མཛད་འཕྲིན་རྒྱ་ཆེར་བསྐྱངས་ཡོད། ཅེས་གསུངས་སོང་།

གསར་འགོད་པ། བྱམས་པ་ཚེ་རིང་།