ནེའུ་ཡོག་ཏུ་མང་ཚོགས་ལ་བདེ་སྐྱིད་ཀྱི་ཤེས་རབ་གཟིགས་འབུལ་ཞུས།

དེ་འབྲེལ་འདི་གའི་གསར་འགོད་པར་ནེའུ་ཡོག་དང་ནེའུ་ཇར་སི་བོད་རིགས་སྤྱི་མཐུན་ཚོགས་པའི་གསར་འགོད་གསལ་བསྒྲགས་ཤིག་འབྱོར་བའི་ནང་། ཁ་སང་ས་གནས་ཀྱི་ཆུ་ཚོད་ ༣ ཐོག་བོད་མི་རྣམས་གློག་བརྙན་གཟིགས་འབུལ་ཞུ་ཡུལ་དུ་འཛོམས་ཏེ། ཕྱི་དྲོའི་ཆུ་ཚོད་ ༦ བར་དུ་གཞས་སྣ་འཁྲབ་སྟོན་གྱི་ལམ་ནས། བདེ་སྐྱིད་ཀྱི་ཤེས་རབ་ཨ་རིའི་མང་ཚོགས་ཁྲོད་གཟིགས་འབུལ་ཞུས་པར་དགའ་བསུ་དང་། གློག་བརྙན་འཁྲབ་ཁྲིད་པ་བྷར་བྷ་རཱ་མི་ལིར་ལགས (Barbara Miller) ལགས་དང་། ཧྥི་ལི་ཕི་ཌེ་ལཱ་ཁི་སི་(Philip Delaquis) ལགས།  གློག་བརྙན་འཁྲབ་སྟོན་པ་གྲགས་ཅན་བོད་དོན་རྒྱབ་སྐྱོར་བ་རི་ཆར་ཌི་གྷར་(Richard Gere) ལགས།  འཁྲབ་གཞུང་རྩོམ་པ་པོ་དང་གློག་བརྙན་བཟོ་བསྐྲུན་པ་ཨོ་རེན་མོ་ཝར་མན་ (Oren Moverman) ལགས་བཅས་སུ་ཐུགས་རྗེ་ཆེ་ཞུས་ཡོད་པ་མ་ཟད། ༧གོང་ས་མཆོག་གི་བཀའ་སློབ་ལམ་སྟོན་འཁོད་པའི་དངོས་བྱུང་གློག་བརྙན་དེར་ལྟ་མཁན་ནེའུ་ཡོག་དང་ནེའུ་ཇར་སི་ཙམ་མ་ཡིན་པར། ཨ་རིའི་གྲོང་ཁྱེར་གཞན་ནས་ཀྱང་བོད་མི་མང་པོ་འབྱོར་ཡོད་ཅིང་། གློག་བརྙན་དེར་ལྟ་མཁན་མང་པོ་ཡོད་པའི་རྐྱེན་གྱིས་བོད་མི་ ༤༠ ཙམ་ཚོགས་ཁང་གི་ཕྱི་རོལ་ཏུ་སྡོད་དགོས་བྱུང་ཡོད་འདུག

ཉེ་ལམ་ཟླ་འདིའི་ཕྱི་ཚེས་ ༣ ནས་ ༡༣ ཉིན་གྲངས་ ༡༡ རིང་སུད་སི་གྲོང་ཁྱེར་ཛུ་རིག་ཏུ། ཕྱི་ལོ་ ༢༠༢༤ ལོའི་ཛུ་རིག་གློག་བརྙན་དུས་སྟོན་འཚོགས་ཡོད་པའི་སྟེང་། འཛམ་གླིང་གི་རྒྱལ་ཁབ་འདྲ་མིན་གྱི་གློག་བརྙན་མི་འདྲ་བ་ ༡༠༠ ལྷག་མཉམ་ཞུགས་བྱས་པའི་ཁྲོད། ཕྱི་ཚེས་ ༨ ཉིན་བདེ་སྐྱིད་ཀྱི་ཤེས་རབ་ཐོག་མར་གཟིགས་འབུལ་ཞུས་ཏེ་དབུ་འབྱེད་གནང་ཡོད་ལ། སྐབས་དེའི་མཛད་སྒོའི་ཐོག་ཨ་རིའི་ཧོ་ལི་ཝིར་ཌི་གློག་བརྙན་འཁྲབ་སྟོན་པ་གྲགས་ཅན་བོད་དོན་རྒྱབ་སྐྱོར་བ་རི་ཆར་ཌི་གྷར་(Richard Gere) ལགས་དང་། སུད་སིའི་གློག་བརྙན་འཁྲབ་ཁྲིད་པ་བྷར་བྷ་རཱ་མི་ལིར་( Barbara Miller)ལགས། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག ༧སྐུའི་གཅུང་མོ་ཨ་མ་རྗེ་བཙུན་པདྨ་མཆོག་སོགས་མཉམ་ཞུགས་གནང་ཡོད་འདུག

བདེ་སྐྱིད་ཀྱི་ཤེས་རབ་ཞེས་པའི་དངོས་བྱུང་གློག་བརྙན་དེའི་ནང་དུ་ད་ལྟ་བར་བོད་གཞུང་ནས་པར་སྐྲུན་བྱས་མེད་པའི་ཡིག་ཆ་དང་གསར་དུ་ཉར་ཚགས་བྱས་པའི་ཡིག་ཚགས་བཀོད་དེ། ༸གོང་ས་རྒྱལ་བ་རིན་པོ་ཆེ་སྐུ་ཕྲེང་བཅུ་བཞི་པ་བསྟན་འཛིན་རྒྱ་མཚོ་མཆོག་གི་ཆོས་སྲིད་གཉིས་ཀྱི་མཛད་རྣམ་ཕབ་སྐྲུན་བྱས་པའི་དངོས་བྱུང་གློག་བརྙན་ཞིག་ཡིན་པ་རེད།

གསར་འགོད་པ། སྐལ་བཟང་སྦྱིན་པ།