ཨུ་རུ་སུའི་ཁྲིམས་ཁང་ཞིག་གིས་གྷུ་གྷལ་ལ་ཨ་སྒོར་དབང་པོ་ཉི་ཤུའི་དངུལ་ཆད་བཅད།

ཡུ་ཊུབ་ནང་ཨུ་རུ་སུའི་གཞུང་འབྲེལ་བརྙན་འཕྲིན་ཁང་དང་གསར་འགྱུར་བརྒྱུད་ལམ་ཁག་ ༡༧ བཀག་སྡོམ་བྱས་པར་ཨུ་རུ་སུས་གྷུ་གྷལ་ལ་ཨ་སྒོར་དབང་པོ་ ༢༠ ཡི་ཉེས་ཆད་བཅད།

དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར། ཡུ་ཊུབ་ (Youtube) ནང་ཨུ་རུ་སུའི་གཞུང་འབྲེལ་གྱི་གསར་འགྱུར་བརྒྱུད་ལམ་ཁག་ ༡༧ བཀག་སྡོམ་བྱས་པར་བརྟེན། ཨུ་རུ་སུའི་ཁྲིམས་ཁང་ཞིག་གིས་གྷུ་གྷལ་ (Google) ཚོང་ལས་ཁང་ནས་ཨ་སྒོར་དབང་པོ་ཉི་ཤུའི་ (decillion) ཉེས་ཆད་སྤྲོད་དགོས་པའི་ཐག་གཅོད་བྱས་ཡོད་འདུག

རྒྱལ་སྤྱིའི་དངུལ་གྱི་ཐེབས་རྩ་ (International Monetary Fund) ཡིས་ཚོད་དཔག་བྱས་པ་ལྟར་ན། ད་ལན་ཨུ་རུ་སུའི་ཁྲིམས་ཁང་གིས་གྷུ་གྷལ་ཚོང་ལས་ཁང་ལ་ཨ་སྒོར་དབང་པོ་ ༢༠ (decillion) ཡི་ཉེས་ཆད་འགེལ་བ་དེ་ནི། གྷུ་གྷལ་གྱི་ད་ལྟའི་ཁྲོམ་རའི་མ་གནས་ཁྲག་ཁྲིག་ཆེན་མོ་ (trillion) ༢ ལྷག་ཙམ་དང་། འཛམ་གླིང་ཧྲིལ་པོའི་ཐོན་སྐྱེད་སྤྱི་འབོར་ (GDP) ཨ་སྒོར་ཁྲག་ཁྲིག་ཆེན་མོ་ ༡༡༠ ལས་བརྒལ་བའི་ཉེས་ཆད་ཅིག་ཡིན་འདུག

ཕྱི་ཟླ་ ༡༠ ཚེས་ ༢༨ ཉིན་ཨུ་རུ་སུའི་ཁྲིམས་ཁང་ཞིག་གིས་ཡུ་ཊུབ་ནང་ཨུ་རུ་སུའི་རྒྱལ་ཡོངས་བརྙན་འཕྲིན་ཁང་ (Zvezda) དང་། ཨུ་རུ་སུའི་མི་མང་བརྙན་འཕྲིན་ཁང་ (Public Television of Russia)། ཨུ་རུ་སུའི་རྒྱལ་ཡོངས་རྩེད་རིགས་བརྙན་འཕྲིན་ཁང་ (National Sports TV Channel)། གྲོས་ཚོགས་ཀྱི་བརྙན་འཕྲིན་ (Parliamentary Television) དེ་བཞིན་རྒྱུ་ལམ་གཅིག་ (Channel One)། དང་སྒྱུ་རྩལ་དོ་ར་ (GPM Entertainment Television) བརྙན་འཕྲིན་སོགས་གཞུང་འབྲེལ་གསར་འགྱུར་བརྒྱུད་ལམ་དང་བརྙན་འཕྲིན་ཁང་ཁག་ ༡༧ བཀག་སྡོམ་བྱས་པའི་ཉེས་མིང་གཡོགས་ཏེ། ཨ་སྒོར་དབང་པོ་ ༢༠ ཡི་ཉེས་ཆད་ཁྲིམས་ཐག་བཅད་འདུག

དེ་འབྲེལ་ཨུ་རུ་སུའི་གསར་ཁང་ (TASS) གིས་གནས་ཚུལ་སྤེལ་བའི་ནང་། གྷུ་གྷལ་གྱིས་དུས་ཡུན་ཟླ་དགུ་ནང་ཚུད་དུ་ཉེས་ཆད་མ་སྤྲད་ཚེ།  ཉིན་རེར་ཨ་སྒོར་ ༡༠༢༥ འཕར་གྱི་ཡོད་ཅིང་། དེ་བཞིན་བདུན་ཕྲག་རེར་དངུལ་འབོར་དེ་གཉིས་ལྡབ་འཕར་གྱི་ཡོད་སྐོར་སོགས་གསལ་འདུག་ལ། ཨུ་རུ་སུར་ཡོད་པའི་ (RBC) གསར་ཁང་དུ་གནས་ཚུལ་ཐོན་པའི་ནང་། དེ་སྔ་ཡུ་ཊུབ་ནང་ཨུ་རུ་སུའི་གཞུང་འབྲེལ་བརྙན་འཕྲིན་ཁང་དང་གསར་འགྱུར་བརྒྱུད་ལམ་ཁག་ཅིག་བཀག་སྡོམ་བྱེད་མཚམས་འཇོག་དགོས་པའི་དགོས་འདུན་བཏོན་ཡང་། གྷུ་གྷལ་ཚོང་ལས་ཁང་གིས་ཨུ་རུ་སུའི་གསར་འགྱུར་བརྒྱུད་ལམ་ཁག་མུ་མཐུད་བཀག་སྡོམ་བྱས་རྐྱེན། ད་རེས་ཉེས་ཆད་བཏང་བ་ཞིག་ཡིན་སྐོར་བརྗོད་འདུག

ཨུ་རུ་སུའི་བརྙན་འཕྲིན་ཁང་ (Tsargrad TV) དང་། གསར་ལས་ཁང་ (RIA FAN) གཉིས་ཀྱིས་ཁྲིམས་དང་ཚོང་དོན་གྱི་སྒྲིག་གཞི་འགལ་བའི་རྐྱེན་གྱིས། གྷུ་གྷལ་གྱིས་ཡུ་ཊུབ་ནང་བཀག་སྡོམ་བྱས་ཡོད་པར་བརྟེན། ཕྱི་ལོ་ ༢༠༢༠ ཟླ་ ༨ པའི་ནང་ཨུ་རུ་སུའི་བརྙན་འཕྲིན་ཁང་ (Tsargrad) ཟེར་བས་མོ་སི་ཁོ་ཁྲིམས་ཁང་ (Moscow City Arbitration Court) དུ་གྷུ་གྷལ་ཚོང་ལས་ཁང་ཁྲིམས་གཏུགས་ཐོག་མར་བྱས་ཤིང་། ཡུ་ཊུབ་ནང་བཀག་སྡོམ་བྱས་པའི་ཐག་གཅོད་དེ་ཕྱིར་འཐེན་བྱེད་དགོས་པའི་རྩོད་གཞི་བཏོན་ཡོད་པ་རེད། ༢༠༢༡ ལོའི་མགོ་སྟོད་དུ་ཁྲིམས་ཁང་དེས་གྷུ་གྷལ་གྱིས་ ((Tsargrad) བརྙན་འཕྲིན་ཁང་གི་ཡུ་ཊུབ་མིང་བྱང་བཀག་སྡོམ་ཕྱིར་འཐེན་གྱི་ཐག་གཅོད་མ་བྱས་ཚེ། ཉེས་ཆད་གཅོད་རྒྱུ་ཡིན་པའི་ཉེན་བརྡ་བཏང་ཡོད་འདུག

འོན་ཀྱང་། ཕྱི་ལོ་ ༢༠༢༢ ཟླ་ ༢ པའི་ནང་ཨུ་རུ་སུས་ཡུ་ཁུ་རེན་ནང་བཙན་འཛུལ་བྱས་པ་ནས་བཟུང་། ཡུ་ཊུབ་ཀྱིས་ཨུ་རུ་སུའི་བརྙན་འཕྲིན་ཁང་ (Russia 24) དང་། ཨེན་ཊི་ཝི་ (NTV) སོགས་བཀག་སྡོམ་བྱས་པ་མ་ཟད། རིམ་པས་ཨུ་རུ་སུའི་གཞུང་འབྲེལ་གསར་འགྱུར་བརྒྱུད་ལམ་དང་བརྙན་འཕྲིན་ཁང་མང་པོ་ཞིག་བཀག་སྡོམ་བྱས་པར་བརྟེན། ཕྱི་ལོ་ ༢༠༢༢ ལོའི་ཟླ་ ༢ པའི་ནང་ཨུ་རུ་སུའི་རྒྱལ་ཡོངས་ཚོང་(Federal Antimonopoly Service) གིས། གྷུ་གྷལ་ཚོང་ལས་ཁང་གིས་དབང་ཆ་བཀོལ་སྤྱོད་བྱས་ཏེ། འགྲན་རྩོད་ཀྱི་ཁེ་དབང་སྲུང་སྐྱོབ་ཀྱི་ཁྲིམས་ལུགས་ལ་རྡོག་རོལ་བཏང་བའི་སྐྱོན་བརྗོད་དང་སྦྲགས།  གྷུ་གྷལ་ཚོང་ལས་ཁང་ལ་ཐོག་མར་ཨུ་སྒོར་ཐེར་འབུམ་ ༢ དང་ཕྱིས་སུ་ཉེས་ཆད་དུས་ཐོག་ཏུ་སྤྲད་མེད་པའི་རྐྱེན་གྱིས་ཨུ་སྒོར་ཐེར་འབུམ་ ༤ བར་སྤར་ཡོད་པ་ལྟར། ཟླ་གཅིག་གི་རྗེས་སུ་ཨུ་རུ་སུའི་བརྙན་འཕྲིན་ཁང་ (Tsargrad) ལ་གྷུ་གྷལ་ཚོང་ལས་ཁང་གིས་ཨུ་སྒོར་ཐེར་འབུམ་ ༡ སྤྲད་ཡོད་ཚུལ་ཨུ་རུ་སུའི་གསར་ལས་ཁང་དེས་བརྗོད་ཡོད་འདུག

གསར་འགོད་པ། བསྟན་འཛིན་ཕུར་བུ།