བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་ཀྱིས་མ་འོངས་པར་བོད་པའི་གཞོན་སྐྱེས་ཚོས་སྒྱུ་རྩལ་གྱི་ལམ་ནས་འཐབ་རྩོད་ཀྱི་བརྒྱུད་རིམ་རྒྱུན་སྐྱོང་བྱེད་ཐུབ་ན་ནུས་པ་ཆེན་པོ་འདུག་གསུངས་སོང་།
ཁ་སང་ཕྱི་ཚེས་ ༡ ནས་ ༡༦ བར་དྷ་ས་མེག་གྷན་དུ་ཁ་དོག་མཐུན་ཚོགས་ (Khadhok) ཀྱི་གོ་སྒྲིག་འོག ངེས་མེད་ཅེས་པའི་བརྗོད་གཞིའི་ཐོག་ནས་རྒྱ་གར་དང་བལ་ཡུལ། ཕྱི་རྒྱལ་ཁག་ཏུ་ཡོད་པའི་བོད་པའི་རི་མོའི་སྒྱུ་རྩལ་བ་ ༢༠ ཡི་རི་མོའི་འགྲེམས་སྟོན་བྱེད་མགོ་བརྩམས་སོང་། ཁ་སང་ཕྱི་ཚེས་ ༡ ཉིན་གྱི་ཕྱི་དྲོའི་ཆུ་ཚོད་ ༦ པར་ངེས་མེད་ཅེས་པའི་རི་མོའི་འགྲེམས་སྟོན་དངོས་སུ་དབུ་འབྱེད་གནང་སྐབས། སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་དང་། གཞས་པ་ཁ་རག་སྤེན་པ་ལགས། ཁ་དོག་མཐུན་ཚོགས་ཀྱི་ཚོགས་མི། དེ་བཞིན་རི་མོའི་སྒྱུ་རྩལ་བ་ཁག་ཅིག་དང་མང་ཚོགས་བཅས་མཉམ་ཞུགས་གནང་སོང་།
ངེས་མེད་ (Unsettled) ཅེས་པའི་བརྗོད་གཞིའི་ཐོག་འགྲེམས་སྟོན་གོ་སྒྲིག་ཞུ་དགོས་པའི་དམིགས་ཡུལ་གཙོ་བོ་གང་ཡིན་སྐོར་ལ་ཁ་དོག་མཐུན་ཚོགས་ཀྱི་ (Co-Founder) མཉམ་འབྲེལ་དབུ་འཛུགས་མཁན་བཀྲ་ཤིས་ཉི་མ་ལགས་ཀྱིས། ང་ཚོ་བཙན་བྱོལ་གཞིས་ཆགས་སུ་སྐྱེས་འཚར་བྱུང་བའི་ཕྲུ་གུ་ཡིན་ཞིང་། གཞིས་ཆགས་ལ་དབྱིན་སྐད་དུ་ (Settlement) ཟེར་བ་དེ་གཏན་འཇགས་ཟེར་གྱི་ཡོད་ཀྱང་། དོན་དངོས་སུ་གཞིས་ཆགས་སུ་གནས་སྡོད་བྱེད་མཁན་གྱི་བོད་མི་རྣམས་གཏན་འཇགས་མ་རེད། དེར་བརྟེན་འགྲེམས་སྟོན་འདིའི་མིང་ལ་ངེས་མེད་ཅེས་བཏགས་པ་ཡིན། གཞན་ཡང་། ང་ཚོའི་གཟུགས་པོ་དེ་གཏན་འཇགས་ཆགས་ཡོད་སྲིད་ཀྱང་། མིའི་ངོ་བོ་དང་། དམིགས་ཡུལ། བསམ་བློ། སེམས་པ་སོགས་ཚོར་བ་འདྲ་མིན་ཡོད་པ་དེ་དག་ངེས་མེད་བརྒྱུད་ནས་སྟོན་ཐུབ་པ་དང་། བོད་མི་ཙམ་མིན་པར་མི་སུ་ཡིན་རུང་ངེས་མེད་ཀྱི་ཚོར་བ་ལ་བརྟེན་ནས་ཡར་རྒྱས་དང་ཉམས་རྒུད་འགྲོ་ཡི་ཡོད་ལ། ངེས་མེད་ཚོར་བ་ཡོད་པ་དེས་མིའི་མི་ཚེ་མུ་མཐུད་དུ་འགྲོ་ཐུབ་ཀྱི་འདུག་བསམས། ཞེས་བརྗོད་བྱུང་།
འགྲེམས་སྟོན་འདིས་ཕན་ཐོགས་ག་རེ་བྱུང་ཡོད་མེད་ཐད་བཀྲ་ཤིས་ཉི་མ་ལགས་ཀྱིས། ད་ལོའི་ངེས་མེད་ཅེས་པའི་རི་མོའི་འགྲེམས་སྟོན་འདིའི་ནང་ལ་སྒྱུ་རྩལ་བ་གང་མང་མང་ལ་སྡིངས་ཆ་སྤྲོད་རྒྱུ་དང་། དམིགས་བསལ་གྱིས་གཞོན་སྐྱེས་ཁག་ལ་སྡིངས་ཆ་སྤྲོད་ཐབས་བྱས་ཡིན། མི་མང་པོ་ཞིག་གིས་འགྲེམས་སྟོན་འདི་འདྲ་གོ་སྒྲིག་བྱས་པ་དེ་ཡག་པོ་འདུག་ཞུ་མཁན་བྱུང་བ་མ་ཟད། རྒྱབ་སྐྱོར་བྱེད་མཁན་ཡང་མང་པོ་བྱུང་སོང་ལ། སྒྱུ་རྩལ་བ་མང་པོ་ཞིག་གིས་ཚུར་འབྲེལ་བ་བྱས་ཏེ་ཁོ་ཚོའི་རི་མོ་འགྲེམས་སྟོན་ནང་སྟོན་འདོད་ཡོད་པའི་རྣམ་པ་སྟོན་པ་སོགས་ཀྱི་ཕན་ཐོགས་བྱུང་། ཞེས་བརྗོད་བྱུང་།
འདི་གའི་གསར་འགོད་པར་བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་ཀྱིས། དེ་རིང་ཁ་དོག་གིས་རི་མོའི་སྒྱུ་རྩལ་གྱི་འགྲེམས་སྟོན་ནང་དུ་གཞོན་སྐྱེས་ཀྱི་རི་མོའི་སྒྱུ་རྩལ་བ་ ༢༠ ལྷག་གིས་རི་མོའི་འགྲེམས་སྟོན་གནང་བ་དེ་ཧ་ཅང་ཡག་པོ་འདུག དེ་སྔ་ངས་ཞུས་པ་ལྟར་བོད་ཀྱི་རིག་གནས་དང་རིག་གཞུང་ལབ་དུས་ཡིན་ཅིག་མིན་ཅིག་གནའ་རབས་ཀྱི་རིག་གཞུང་མི་དགོས་པར། དེང་དུས་ཀྱི་རིག་གཞུང་དེ་ཚོ་སྟོན་ཐུབ་རྒྱུ་དང་། ལྷག་པར་དུ་ང་ཚོའི་བོད་ཀྱི་གནད་དོན་དེ་དག་ཕྱི་ལ་སྟོན་པར་རི་མོའི་སྒྱུ་རྩལ་ལམ་ནས་སྟོན་ཐུབ་ཚེ་ནུས་པ་ཆེན་པོ་ཡོད་པ་མཐོང་ཐུབ་ཀྱི་འདུག དེར་བརྟེན། དེ་རིང་འདིར་གཟིགས་མོ་བ་ཕལ་ཆེ་བ་གཞོན་སྐྱེས་ཡིན་པ་མ་ཟད། བོད་པ་ཙམ་མིན་པར་ཕྱི་རྒྱལ་བ་དང་། རྒྱ་གར་བ་མང་པོ་ཞིག་ཕེབས་ཡོད་དུས། འགྲེམས་སྟོན་དེ་ནུས་པ་ཆེན་པོ་ཡོད་པ་མངོན་གསལ་དོད་པོ་རེད་འདུག མ་འོངས་པར་བོད་པའི་གཞོན་སྐྱེས་ཚོས་སྒྱུ་རྩལ་གྱི་ལམ་ནས་ང་ཚོའི་འཐབ་རྩོད་ཀྱི་བརྒྱུད་རིམ་རྒྱུན་སྐྱོང་བྱེད་ཐུབ་རྒྱུའི་ནུས་པ་ཐོན་ཐུབ་པ་གསལ་པོ་རེད་འདུག ཅེས་གསུངས་སོང་།
ཐེངས་འདིའི་རི་མོའི་འགྲེམས་སྟོན་དེ་ཁ་དོག་མཐུན་ཚོགས་ཀྱི་འགྲེམས་སྟོན་ཐེངས་གཉིས་པ་ཡིན་ཞིང་། རི་མོའི་སྒྱུ་རྩལ་བ་ ༢༠ ཡི་རི་མོ་ ༥༠ ལྷག་བཏོན་ཡོད་འདུག་ལ། འགྲེམས་སྟོན་འདིའི་ནང་དུ་རི་མོའི་སྒྱུ་རྩལ་བ་ཁག་ཅིག་གིས་སྣུམ་ཚོན་དང་། འགྱིག་ཚོན། (textile art)། པར་རིས་སོགས་དེང་དུས་ཀྱི་སྒྱུ་རྩལ་སྣ་མང་བེད་སྤྱོད་བྱེད་པའི་རི་མོ་བསྟན་འདུག རི་མོའི་སྒྱུ་རྩལ་བ་རེ་རེས་སོ་སོའི་བསམ་བློ་དང་། སེམས་ཚོར། དེ་བཞིན་མི་རེ་ངོ་རེའི་ངོ་བོ་དང་རྨི་ལམ་སོགས་གང་ཡིན་པ་རྣམས་རི་མོའི་ལམ་ནས་རྣམ་འགྱུར་སྟོན་ཐབས་བྱས་ཡོད་འདུག་ལ། རི་མོ་ཁག་ཅིག་བོད་ནང་གི་ཛ་དྲག་གནས་སྟངས་དང་འབྲེལ་ནས་རྒྱ་ནག་གིས་བོད་མིར་སོ་ལྟ་ནན་པོ་བྱས་དང་བྱེད་མུས་ཡིན་པའི་གནད་དོན་མཚོན་པའི་རི་མོ་བསྟན་འདུག་པ་མ་ཟད། ཕྱི་ཚེས་ ༡ ནས་ ༡༦ བར་མེག་གྷན་དུ་ངེས་མེད་ཅེས་པའི་རི་མོའི་འགྲེམས་སྟོན་སྤེལ་བཞིན་པའི་ནང་རིན་མེད་ཐོག་མཉམ་ཞུགས་བྱེད་ཆོག་གི་འདུག
རི་མོའི་སྒྱུ་རྩལ་བ་དང་ཁ་དོག་མཐུན་ཚོགས་ཀྱི་ (Co-founder) བསྟན་འཛིན་སྨིན་ལེགས་ལགས་ཀྱིས། ངས་ཏོག་དབྱིབས་གཉན་རིམས་ཁྱབ་གདལ་ཕྱིན་པའི་སྐབས་ཞི་ཅིན་ཕིན་གྱི་རི་མོ་འདི་བྲིས་པ་ཡིན། སྤྱིར་རྒྱ་ནག་ནས་ཏོག་དབྱིབས་གཉན་རིམས་མཆེད་མགོ་བཙུགས་པར་བརྟེན། ང་རང་ཁོང་ཁྲོ་ཟ་བའི་རྣམ་འགྱུར་རྣམས་རི་མོའི་ལམ་ནས་བསྟན་ཡོད་ལ། རི་མོའི་སྟེང་ལ་ཤི་ཞེས་པའི་ཚིག་བེད་སྤྱོད་བྱས་ཏེ་ཞི་ཅིན་ཕིན་ཤི་གྲབས་ཡོད་པའི་རེ་བ་བྱས་ཏེ་རི་མོ་འདི་བྲིས་པ་ཡིན། གཞན་ཡང་། བོད་ནང་དུ་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་པར་ཉར་བར་བཀག་སྡོམ་བྱས་པ་སོགས་དམ་དྲག་ཤུགས་ཆེན་བྱེད་མུས་ཡིན་ཡང་། རྒྱ་ནག་གི་མགོ་ཁྲིད་ཞི་ཅིན་ཕིན་གྱི་པར་ཁང་པའི་ནང་ངེས་པར་དུ་ཉར་བཅུག་གི་ཡོད་པ་སོགས་ལ་བརྟེན་ནས་བོད་མི་རྣམས་ལ་རང་དབང་མེད་པ་གསལ་པོ་རེད། ང་ཚོ་རྒྱ་གར་རང་དབང་ལུང་པར་ཡོད་པར་བརྟེན། ཞི་ལ་ཁོང་ཁྲོ་ཟ་བའི་རྣམ་འགྱུར་ཆ་ཚང་རི་མོའི་ལམ་ནས་བསྟན་པ་ཡིན། ཞེས་བརྗོད་བྱུང།
རི་མོའི་སྒྱུ་རྩལ་བ་མངོན་ཤེས་ཆོས་སྒྲོན་ལགས་ཀྱིས་འདི་གའི་གསར་འགོད་པར། ངས་ད་ལན་གྱི་འགྲེམས་སྟོན་ནང་སྐྱེས་དམན་ཞིག་ཆུའི་སྟེང་ལ་གཞས་འཁྲབ་བཞིན་པའི་རི་མོ་ཞིག་བསྟན་ཡོད། རི་མོ་འདི་བྲིས་པའི་རྒྱུ་མཚན་ནི་ང་ཚོའི་སྤྱི་ཚོགས་ནང་ལ་བུ་མོའི་སྤྱོད་ལམ་དང་གཤིས་ཀ་ཚོད་འཛིན་བྱེད་སྲོལ་ཆེ་ཞིང་། སྐྱེས་དམན་ཞིག་ཡིན་ཚེ་འདི་ཤེས་དགོས་པ་དང་འདི་ཤེས་དགོས་མ་རེད་ཟེར་བ་སོགས་ཀྱིི་བསམ་བློ་འཛིན་ཕྱོགས་མང་པོ་ཡོད་པར་བརྟེན། ང་རང་བུད་མེད་ཅིག་ཡིན་པའི་ཆ་ནས། རི་མོ་འདི་བརྒྱུད་ནས་བུད་མེད་རྣམས་སྤྱི་ཚོགས་ཀྱི་གཏན་འབེབས་རིང་བཞིན་གྱི་མཐོང་ལམ་ནས་ཐར་བའི་ཚོར་བ་ཞིག་སྟོན་ཐབས་བྱས་ཏེ། སོ་སོ་རང་དབང་དང་སེམས་སྐྱིད་ངང་ནས་གཞས་འཁྲབ་བཞིན་པའི་རྣམ་འགྱུར་བསྟན་པ་ཡིན། ཞེས་བརྗོད་བྱུང་།
འདས་ལོར་དྷ་སར་ཁ་དོག་མཐུན་ཚོགས་ཀྱིས་རི་མོའི་འགྲེམས་སྟོན་གོ་སྒྲིག་བྱས་པའི་ནང་། རི་མོའི་སྒྱུ་རྩལ་བ་ ༡༥ ཙམ་གྱི་རི་མོ་ཡོད་པའི་ཁྲོད་ནས་རི་མོའི་སྒྱུ་རྩལ་བ་ ༡༡ གི་རི་མོ་དེ་དག་ཚོང་འགྲེམས་བྱ་རྒྱུར་དམིགས་ཡོད་འདུག
གསར་འགོད་པ། བསྟན་འཛིན་ཕུར་བུ།
