བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་བོད་ཅེས་པ་དེ་བོད་རང་སྐྱོང་ལྗོངས་ལ་མི་གོ་བར་མདོ་དབུས་ཁམས་གསུམ་ཆ་ཚང་ལ་གོ་དགོས་ཞེས་གསུངས།
ཟླ་འདིའི་ཕྱི་ཚེས་ ༢ ནས་ ༡༡ བར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་རྒྱ་གར་བྱང་ཤར་བསྟན་འཛིན་སྒང་བོད་མིའི་གཞིས་ཆགས་དང་། འབུམ་སྡེ་ལ། རྟ་དབང་། དྷི་མ་པུར་ (Dimapur) ཤིས་ལོང་། སྒང་ཏོག་བཅས་སུ་གཞུང་འབྲེལ་ཕྱོགས་ཕེབས་གནང་གཏན་ཁེལ་བ་ལྟར། ཁ་སང་ཕྱི་ཚེས་ ༤ ཉིན་གྱི་ཞོགས་པར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་འབུམ་ལ་དགོན་ཐུབ་མཆོག་དགའ་ཚལ་གླིང་གི་འདུ་ཁང་གསར་པའི་དབུ་འབྱེད་མཛད་སྒོར་ཕེབས་ཞུགས་གནང་ཡོད་འདུག་ལ། སྐབས་དེར་སྲིད་སྐྱོང་སྤེན་པ་ཚེ་རིང་མཆོག་གིས། ཐུབ་མཆོག་དགའ་ཚལ་གླིང་གི་ངོ་དེབ་བརྒྱུད་དགོན་པའི་འདུ་ཁང་གསར་བཞེས་ཐོག་ཉེ་འཁོར་གྱི་གྲོང་སྡེ་དང་ཚོགས་པ། སློབ་མ་མང་པོ་ཞིག་གིས་དང་བླངས་ཀྱིས་ཕྱར་གྲུ་མཉམ་འདེགས་ཐོག་རོགས་རམ་ཞུ་བཞིན་པ་མཐོང་བས། མོན་ཡུལ་འདིར་ནང་པའི་བྱམས་བརྩེའི་རིག་གཞུང་རྨང་མཐུག་པོ་ཞིག་ཡོད་པ་ཚོར་གྱི་ཡོད་པ་མ་ཟད། ༧གོང་ས་རྒྱལ་བ་རིན་པོ་ཆེ་མཆོག་གིས་འདུ་ཁང་འདིའི་རྨང་རྡོ་འཇོག་གནང་མཛད་པས། བྱིན་རླབས་ཀྱི་ཚན་ཁ་རབ་ཏུ་འབར་བ་སྨོས་མ་དགོས་ལ། བཤད་སྒྲུབ་ཀྱི་བསྟན་པ་དར་ཞིང་རྒྱས་པའི་སྨོན་འདུན་ཞུ་ཡི་ཡོད། ཅེས་སོགས་གསུངས་སོང་།
ཉིན་དེའི་ཉིན་རྒྱབ་ཏུ་སྲིད་སྐྱོང་སྤེན་པ་ཚེ་རིང་མཆོག་གིས་འབུམ་སྡེ་ལར་ཆགས་པའི་འབུམ་ལ་བསྟན་འཛིན་སྒང་ས་གནས་མགོ་འཛིན་ཁྱབ་ཁོངས་ཁ་འཐོར་ས་གནས་འབུམ་སྡེ་ལ་དང་། དགའ་འཆམ། རྡི་རང་། རྟ་དབང་བཅས་ཀྱི་ས་གནས་མགོ་འཛིན་ལས་ཁུངས་གཅིག་ལྕོགས་སུ་ཆེད་ཕེབས་གནང་བ་དང་། སྲིད་སྐྱོང་མཆོག་གིས། ངས་རྒྱུན་དུ་ནས་བོད་པའི་ས་གནས་ཁག་ཏུ་ཐེངས་གཉིས་རེ་བཅར་རྒྱུའི་འབད་བརྩོན་ཞུ་ཡི་ཡིན་ཞེས་བརྗོད་པ་ལྟར། ༢༠༢༢ ལོར་ས་གནས་འདི་ལ་ཐེངས་དང་པོ་བཅར་ཡོད་ལ། ད་རེས་འབུམ་སྡེ་ལར་གུ་རུ་རིན་པོ་ཆེའི་དགོན་པའི་འདུ་ཁང་གི་དབུ་འབྱེད་དང་བསྟུན། བསྟན་འཛིན་སྒང་དང་འབུམ་སྡེ་ལ་སོགས་སུ་ཐེངས་གཉིས་པ་བཅར་རྒྱུའི་གོ་སྐབས་བྱུང་། རྒྱ་གར་ནང་དུ་བཙན་བྱོལ་བོད་མིའི་ས་གནས་ཁག་ ༣༧ ཡོད་པའི་ཐོག ཕྱི་རྒྱལ་དང་ལྷག་པར་ཨ་རི་ལྟ་བུར་མཚོན་ན། བོད་མི་གནས་སྡོད་བྱ་ཡུལ་གྱི་མངའ་སྡེ་ ༢༩ ཙམ་ཡོད་པའི་ས་གནས་དེ་དག་ལ་སྐོར་སྐྱོད་བྱེད་མུས་ཡིན་ཡང་། བོད་མི་རྣམས་དང་ཐུག་འཕྲད་བྱེད་པ་ཙམ་མིན་པར་ཕྱིའི་མི་སྣ་མང་དག་ཅིག་དང་ཐུག་འཕྲད་ཀྱིས་བོད་དོན་ཞུ་གཏུག་བྱེད་དགོས་ཀྱི་ཡོད་པ་རེད། ཅེས་གསུངས།
ཡང་སྲིད་སྐྱོང་སྤེན་པ་ཚེ་རིང་མཆོག་གིས། ཁྱེད་རྣམ་པས་རེ་བ་ཞིག་བཅངས་ནས་ངར་སྲིད་སྐྱོང་དུ་བཀོད་ཡོད་པས། ཁྱེད་ཚོའི་རེ་འདོད་དང་། གཙོ་བོ་༧གོང་ས་རྒྱལ་བ་རིན་པོ་ཆེ་མཆོག་གི་ཆབ་སྲིད་དང་སྤྱི་ཚོགས་བདེ་དོན་ཐོག་ནས་དགོངས་གཞི་གང་ཡོད་ལྟར་ང་ཚོས་སྒྲུབ་དགོས་ཀྱི་ཡོད་པ་རེད། ངས་བོད་མིའི་གཞིས་ཆགས་ཁག་ཏུ་སྐོར་སྐྱོད་ཕྱིན་པ་རྣམས་མི་མང་དང་འབྲེལ་བ་དམ་གཟབ་ཡོང་སླད་ཡིན་པས། མི་མང་རྣམས་ནས་ཀྱང་མཉམ་རུབ་བྱ་རྒྱུ་དང་། ལྷག་པར་བོད་པའི་སྤྱི་ཚོགས་དང་འབྲེལ་བའི་གནས་ཚུལ་སོགས་སྤྱི་ཚོགས་དྲ་རྒྱའི་ཐོག་ནས་ལྟ་ཀློག་དང་གོ་རྟོགས་དགོས་རྒྱུ་གལ་འགངས་ཤིན་ཏུ་ཆེན་པོ་རེད། ཅེས་དང་། བཀའ་ཤག་སྐབས་བཅུ་དྲུག་པའི་ངོས་ནས་ཕུགས་རྒྱང་རིང་པོའི་བསམ་བློའི་ཐོག་ནས་འབྱུང་འགྱུར་སྤྱི་ཚོགས་གང་འདྲ་ཞིག་ཆགས་ཀྱི་ཡོད་མེད་ཐད་ལ་ལས་འཆར་དང་འཆར་གཞི་བཀོད་སྒྲིག་བྱེད་མུས་ཡིན་པ་མ་ཟད། འཛམ་གླིང་འདིའི་སྟེང་དུའང་རྒྱུ་མཚན་དང་ལྡན་པའི་ཐོག་ནས་བོད་དོན་སྐོར་འགྲེལ་བརྗོད་རྒྱག་བཞིན་ཡོད་ལ། བོད་རྒྱའི་དཀའ་རྙོག་སེལ་ཐབས་སུ་དབུ་མའི་ལམ་གྱི་ཐབས་ལམ་ལས་ཐབས་ལམ་གཞན་མེད་པའི་སྐོར་དང་། རྒྱ་ནག་གིས་བོད་ནང་དུ་སྲིད་ཇུས་འདྲ་མིན་ལག་བསྟར་བྱས་ཏེ་བོད་པའི་ངོ་བོ་དང་རིག་གཞུང་། སྐད་ཡིག་སོགས་རྩ་མེད་གཏོང་ཐུབས་སུ་རྒྱ་སྒྱུར་སློབ་གསོ་སྤྲོད་མུས་ཡིན་པ་སོགས་བོད་ནང་གི་ཛ་དྲག་གི་གནས་སྟངས་ཐེར་འདོན་བྱས་ཏེ། རྒྱལ་སྤྱིའི་ཚོགས་སྡེ་ཁག་ལ་ཞུ་གཏུག་བྱས་དང་བྱེད་མུས་ཡིན་སྐོར་སོགས་གསུངས་ཡོད་འདུག
ཟླ་འདིའི་ཕྱི་ཚེས་ ༢ ཉིན་སྲིད་སྐྱོང་སྤེན་པ་ཚེ་རིང་མཆོག་རྒྱ་གར་བྱང་ཤར་ཁུལ་དུ་གཞུང་འབྲེལ་ཕྱོགས་ཕེབས་གནང་མགོ་བཙུགས་ནས། ཕྱི་ཚེས་ ༣ ཉིན་གྱི་ཉིན་རྒྱབ་ཆུ་ཚོད་ ༣ པའི་སྟེང་བསྟན་འཛིན་སྒང་བོད་མིའི་གཞིས་ཆགས་སུ་ཕེབས་འབྱོར་བྱུང་སྟེ། ས་གནས་མགོ་འཛིན་རབ་བརྟན་ཚེ་རིང་ལགས་དང་། ས་འཐུས་ཚོགས་གཙོ་ཕུན་ཚོགས་ཚེ་རིང་ལགས་དང་ལྷན་དུ་གཞིས་ཆགས་དང་འབྲེལ་བའི་གནད་དོན་ཐོག་བཀའ་མོལ་གནང་གྲུབ་མཚམས། མི་མང་ཚོགས་ཁང་དུ་སྲིད་སྐྱོང་མཆོག་གིས། བོད་མིའི་སྒྲིག་འཛུགས་ཀྱི་བཀའ་ཤག་སྐབས་བཅུ་དྲུག་པའི་སྲིད་ཇུས་ངོ་སྤྲོད་དང་། ༧གོང་ས་རྒྱལ་བ་རིན་པོ་ཆེ་མཆོག་གིས་དགོངས་གཞི་དང་བཀའ་སློབ་ལམ་སྟོན་ལྟར་དབུ་མའི་ལམ་གྱི་སྲིད་ཇུས་གཞིར་བཟུང་ཕྱག་ལས་གནང་གི་ཡོད་སྐོར་དང་། འཛམ་གླིང་སྟེང་བོད་མཐོ་སྒང་གི་གལ་གནད་དང་། ས་ཁམས་ཆབ་སྲིད་སྐོར་ངོ་སྤྲོད་ཞིབ་ཕྲ་གནང་ཞིང་། ཉེ་ལམ་ཨ་རིིའི་སྲིད་གཞུང་ནས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་ཡིག་གཏན་འབེབས་གནང་བ་དེས་ཨ་རིའི་སྲིད་གཞུང་གིས་བོད་རྒྱའི་དཀའ་རྙོག་དེ་ད་ལྟ་སེལ་རྒྱུ་ཡིན་པ་ཞིག་ལ་ངོས་འཛིན་དང་། དཀའ་རྙོག་དེ་རྒྱལ་སྤྱིའི་ཁྲིམས་ཀྱི་ཐོག་ནས་སེལ་དགོས་སྐོར་དང་། བོད་དེ་གནའ་སྔ་མོ་ནས་རྒྱ་ནག་གི་ཆ་ཤས་ཡིན་ཟེར་བ་ངོས་ལེན་མེད་པ་མ་ཟད། བོད་ཅེས་པ་དེ་བོད་རང་སྐྱོང་ལྗོངས་ལ་མི་གོ་བར་མདོ་དབུས་ཁམས་གསུམ་ཆ་ཚང་ལ་གོ་དགོས་པའི་གནད་དོན་སོགས་གསལ་སྟོན་དང་། བོད་མི་རྣམས་ཀྱིས་རྒྱལ་སྤྱིའི་ཚོགས་སྡེ་ཁག་དང་མི་མང་ལ་བོད་དོན་གོ་རྟོགས་སྤེལ་དགོས་གལ་ཆེ་སྐོར། བསྟན་འཛིན་སྒང་གི་མི་འབོར་གྲངས་ཐོ་དང་སློབ་གྲྭའི་སློབ་ཕྲུག་གི་གྲངས་ཐོ་ཚད་ལྡན་ཞིག་དགོས་པའི་ནན་སྐུལ་གནང་འདུག
གསར་འགོད་པ། བསྟན་འཛིན་ཕུར་བུ།
