འཛམ་གླིང་རྒྱལ་ཁབ་ ༡༥ ཡིས་བོད་དོན་ཐོག་བསྒྲགས་གཏམ་སྤེལ་བར་བཀའ་དྲིན་ཞུས།

འཛམ་གླིང་རྒྱལ་ཁབ་ ༡༥ ཡིས་རྒྱལ་ཚོགས་ཀྱི་གླེང་སྟེགས་སྐབས་ ༧༩ སྟེང་བོད་དོན་ཐོག་མཉམ་འབྲེལ་བསྒྲགས་གཏམ་སྤེལ་བར་བོད་མིའི་སྒྲིག་འཛུགས་ཀྱིས་བཀའ་དྲིན་ཞུས།

དེ་རིང་བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་ཀྱིས།  བོད་དང་ཤར་ཊུར་ཀི་སི་ཐན་ནང་གི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནད་དོན་ཐད་མཉམ་འབྲེལ་རྒྱལ་ཚོགས་ཀྱི་ཚོགས་མི་རྒྱལ་ཁབ་ ༡༥ ཡིས་སེམས་འཚབ་ཡོད་པའི་མཉམ་འབྲེལ་བསྒྲགས་གཏམ་སྤེལ་བར་བཀའ་དྲིན་ཆེ་ཞུས་འདུག་ཅིང་། བཀའ་དྲིན་ཞུ་ཡུལ་གྱི་རྒྱལ་ཁབ་དག་ནི། ཨོ་གླིང་དང་ཁེ་ན་ཌ། ཌན་མག ཧྥི་ལན་ཌི། ཧྥ་རན་སི། འཇར་མན། ཨ་སུ་ལན་ཌི། ཉི་ཧོང་། ལི་ཐོ་ནེ་ཡ། ནེ་ཐི་ལན་ཌི། ནེའུ་རྫི་ལན་ཌི། ནོར་ཝེ། སུད་ཝི་ཌན། དབྱིན་ཇི་དང་ཨ་རི་བཅས་ཡིན་པ་རེད།

དེ་འབྲེལ་་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས། ངས་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་དང་བོད་ཕྱི་ནང་གཉིས་ཀྱི་བོད་མི་ཚང་མའི་ཚབ་ཞུས་ཏེ། ཨོ་གླིང་གི་སྣེ་ཁྲིད་འོག་འཛམ་གླིང་རྒྱལ་ཁབ་ ༡༥ ཡིས་རྒྱལ་ཚོགས་ཀྱི་གླེང་སྟེགས་སྐབས་ ༧༩ སྟེང་། བོད་ནང་གི་ཛ་དྲག་གནས་སྟངས་གླེང་སློང་གནང་བར་ཡི་རངས་སྔགས་བརྗོད་དང་སྦྲགས་ཐུགས་རྗེ་ཆེ་ཞུ་རྒྱུ་ཡིན། རྒྱབ་སྐྱོར་འདི་ནི་ང་ཚོར་མཚོན་ན་རིན་ཐང་ལྡན་པ་ཞིག་ཡིན་པ་མ་ཟད། ད་དུང་ཡང་རྒྱ་ནག་གི་བཙན་འཛུལ་དྲག་གནོན་བོད་མིའི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བཞིན་པའི་དཀའ་ངལ་མུ་མཐུད་གླེང་སློང་གནང་རྒྱུ་གལ་ཆེན་ཡིན། ཁྱེད་ཅག་གི་མཉམ་འབྲེལ་རྒྱབ་སྐྱོར་ནི་ཧ་ཅང་གལ་གནད་ཆེ་ཞིང་། རྒྱལ་སྤྱིའི་གདུང་སེམས་མཉམ་སྐྱེད་དང་རྣམ་འགྱུར་མཚོན་གྱི་ཡོད་སྟབས། ང་ཚོས་ཐུན་མོང་གི་འབད་བརྩོན་ལ་བརྟེན་ནས་མཐར་ཐུག་གི་ཞི་བདེ་དང་དྲང་བདེན་འཚོལ་བར་རེ་ལྟོས་བྱེད་ཀྱི་ཡོད། ཅེས་བརྗོད་འདུག

དེ་བཞིན། བོད་ནང་གི་བོད་མི་རྣམས་ལ་ཆབ་སྲིད་དང་འགྲིམས་འགྲུལ་སོགས་ཀྱི་རང་དབང་མེད་ཅིང་། ངལ་རྩོལ་བསྒྱུར་བཀོད་དང་ཕ་མ་བུ་ཕྲུག་ཁ་བྲལ་གྱིས་སྐད་ཡིག་དང་རིག་གཞུང་། སློབ་གསོ། ཆོས་དད་རང་དབང་སོགས་ཀྱི་ཐོབ་ཐང་འཕྲོག་དང་འཕྲོག་གིན་པའི་གནད་དོན་སོགས་ཀྱང་གླེང་སློང་གནང་འདུག

ཕྱི་ཟླ་ ༡༠ ཚེས་ ༢༢ ཉིན་རྒྱ་གཞུང་གིས་བོད་དང་ཤར་ཊུར་ཀི་སི་ཐན་གཙོས་པའི་གྲངས་ཉུང་མི་རིགས་རྣམས་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་། སྐད་ཡིག་ཐོག་དམ་དྲག་ཤུགས་ཆེན་བྱས་དང་བྱེད་མུས་ཡིན་ཞིང་། རྒྱ་ནག་གཞུང་གིས་བོད་པའི་བྱིས་པ་རྣམས་བཙན་གྱིས་བཅའ་སྡོད་སློབ་གྲྭར་བཅུག་སྟེ་རྒྱ་སྒྱུར་སློབ་གསོ་སྤྲད་པ་བརྒྱུད་བོད་མིའི་ངོ་བོ་རྩ་མེད་བཟོ་ཐབས་ཀྱི་སྲིད་ཇུས་འདྲ་མིན་ལག་བསྟར་བྱེད་བཞིན་པར་བློ་འཚབ་ཡོད་པ་གསལ་སྟོན་དང་། རྒྱ་ནག་གིས་རྒྱལ་སྤྱིའི་འགྲོ་བ་མིའི་ཐོབ་ཐང་གི་གྲོས་མཐུན་དང་རྩ་ཁྲིམས་ལ་བརྩི་བཀུར་དང་། མཉམ་འབྲེལ་རྒྱལ་ཚོགས་ཀྱི་རྟོག་ཞིབ་མི་སྣ་དབུས་པའི་ཨ་རི་དང་ནུབ་ཕྱོགས་རྒྱལ་ཁབ་ཁག་གི་རྟོག་ཞིབ་པ་དང་གསར་འགོད་པ་རྣམས་ལ་ཆ་རྐྱེན་གང་ཡང་མེད་པར་བོད་དང་ཤར་ཊུར་ཀི་སི་ཐན་ནང་དུ་བསྐྱོད་ཆོག་པའི་ཐོབ་ཐང་སྤྲོད་དགོས་ལ། རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གིས་བོད་དང་ཤར་ཊུར་ཀི་སི་ཐན་ནང་གི་གནས་སྟངས་དང་འབྲེལ་བའི་ལམ་སྟོན་རྣམས་ལག་བསྟར་བྱས་ཏེ། རྒྱ་ནག་གིས་ཁྲིམས་འགལ་ཐོག་འཛིན་བཟུང་བྱས་པའི་བོད་མི་དང་ཡུ་གུར་བ་རྣམས་འཕྲལ་དུ་ཀློད་གྲོལ་གཏོང་དགོས་པའི་དགོས་འདུན་བཏོན་འདུག

གསར་འགོད་པ། སྐལ་བཟང་སྦྱིན་པ།