ཤར་རྩེ་ཆོས་རྗེ་རིན་པོ་ཆེ་རྗེ་བཙུན་བློ་བཟང་རྡོ་རྗེ་མཆོག་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་ ༡༠༥ པར་ཕྱག་རྟགས་སྩལ་གཏན་འཁེལ་ཡོད་འདུག
དགའ་ལྡན་ཁྲི་ཐོག་ཁང་གི་དྲུང་ཆེ་སྒོ་མང་མཁན་ཟུར་དགེ་བཤེས་བློ་བཟང་རྒྱལ་མཚན་ལགས་ནས་འདི་གའི་གསར་འགོད་པར་འགྲེལ་བརྗོད་གནང་བ་ལྟར་ན། འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་ ༡༠༤ པ་རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་གིས། ༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་ཏེ་དགོངས་འཁྲོལ་གསོལ་འདེབས་ཞུས་པ་བཞིན་དགོངས་འཁྲོལ་གནང་ཡོད་པར་བརྟེན། ཉེ་སྔོན་དགའ་ལྡན་ཁྲི་ཐོག་ཁང་གིས་༧གོང་ས་རྒྱལ་བ་རིན་པོ་ཆེ་མཆོག་ལ་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་ ༡༠༥ པའི་འོས་གཞིར། མཚུངས་མེད་ཤར་བྱང་ཆོས་རྗེ་རྣམ་གཉིས་ཀྱི་མཚན་གཞུང་ཕུལ་བ་ལྟར། ཆོས་རྗེ་སྐུ་བགྲེས་པ་ཤར་རྩེ་ཆོས་རྗེ་རིན་པོ་ཆེ་རྗེ་བཙུན་བློ་བཟང་རྡོ་རྗེ་མཆོག་ལ་ཕྱག་རྟགས་བསྩལ་གཏན་ཁེལ་ཡོད་འདུག ད་ལྟའི་ཆར་ཤར་རྩེ་ཆོས་རྗེ་རིན་པོ་ཆེ་མཆོག་བྷང་ལོར་ཏཱ་ལའི་བླ་མ་མཐོ་སློབ་ཏུ་བཞུགས་ཡོད་འདུག་ལ། ཕྱི་ཟླ་ ༡༡ ཚེས་ ༩ གཟའ་སྐར་འཕྲོད་སྦྱོར་དགེ་བའི་ཉིན་ཕྱག་རྟགས་དངོས་སུ་ཕེབས་རྒྱུ་ཡིན།
ཤར་རྩེ་ཆོས་རྗེ་རིན་པོ་ཆེ་རྗེ་བཙུན་བློ་བཟང་རྡོ་རྗེའམ་འཇམ་དཔལ་མཁས་བཙུན་དཔལ་བཟང་པོ་མཆོག་ནི། ༡༩༣༧ ལོར་མདོ་སྟོད་སྨར་ཁམས་ཚ་ལྷོ་རྫོང་དུ་ཡབ་མགོན་པོ་ཚེ་རིང་དང་ཡུམ་ཚེ་ལྷ་གཉིས་ཀྱི་སྲས་སུ་འཁྲུངས་ཤིང་། དགུང་གྲངས་ ༧ ཙམ་ནས་ཡི་གེ་འབྲི་ཀློག་སྦྱངས་ཏེ་བོད་ནང་འབྲས་སྤུངས་བློ་གསལ་གླིང་གྲྭ་ཚང་དུ་ཆོས་ཞུགས་གནང་། རྒྱ་ནག་དམར་པོས་བོད་ས་ཡོངས་རྫོགས་བཙན་བཟུང་བྱས་རྗེས། རྒྱ་གར་ནང་བཙན་བྱོལ་དུ་ཕེབས་ཏེ་སྦག་སར་མཁས་ཆེན་དུ་མའི་ཞབས་ལ་གཏུགས་ཏེ་གཞུང་ཆེན་བཀའ་པོད་ལྔ་ལ་གསན་བསམ་མཛད་དེ། བཀའ་རམས་དང་སློབ་དཔོན། ལྷ་རམས་བཅས་ཀྱི་རྒྱུགས་འབྲས་ཨང་དང་པོར་སོན། དེ་ནས་རྒྱུད་སྟོད་གྲྭ་ཚང་དུ་སྔགས་ལ་བསླབ་པ་སོན་ཏེ་དགེ་བསྐོས་དང་དབུ་མཛད། མཁན་པོ་བཅས་རིམ་པར་གནང་སྟེ། ཕྱི་ལོ་ ༢༠༡༦ ཟླ་ ༡༢ ཚེས་ ༡༧ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་ཤར་རྩེ་ཆོས་རྗེ་ལ་ཐུགས་གཏན་འཁེལ་བའི་ཕྱག་རྟགས་རིན་པོ་ཆེ་བསྩལ་གནང་སྟེ། ཕྱི་ལོ་ ༢༠༡༧ ཟླ་ ༠༢ ཚེས་ ༡༧ ཉིན་དགའ་ལྡན་ཕུ་ཁང་དང་། ཤར་རྩེ་གྲྭ་ཚང་། དགའ་ལྡན་ཚོགས་ཆེན་བཅས་སུ་ཁྲི་སྟོན་མཛད་ཡོད་པ་རེད། 
