དབུས་བོད་ཀྱི་བུད་མེད་ལྷན་ཚོགས་ཀྱི་རྒྱུན་ལས་ལས་བྱེད་བདུན་གྱི་བོད་དོན་དྲིལ་བསྒྲགས།

དབུས་བོད་ཀྱི་བུད་མེད་ལྷན་ཚོགས་ཀྱི་རྒྱུན་ལས་དང་ལས་བྱེད་བདུན་གྱིས་བཞུགས་སྒར་དྷ་རམ་ས་ལ་ནས་ལྡི་ལི་བར་བོད་ནང་གི་བོད་ཕྲུག་དང་ཁོར་ཡུག་ལ་འཇིགས་སྣང་སྐྱེད་པའི་གནས་སྟངས་ཞེས་པའི་སྐོར་སྐྱོད་ལས་འགུལ་ཞིག་སྤེལ་བཞིན་འདུག

དེ་རིང་རྒྱ་གར་རྒྱལ་ཡོངས་བྱིས་པའི་ཉིན་མོ་དང་བསྟུན། དབུས་བོད་ཀྱི་བུད་མེད་ལྷན་ཚོགས་ཀྱིས་ཉིན་གྲངས་བདུན་རིང་བཞུགས་སྒར་དྷ་རམ་ས་ལ་ནས་རྒྱ་གར་གྱི་རྒྱལ་ས་ལྡི་ལི་བར་བོད་ནང་གི་བོད་ཕྲུག་དང་ཁོར་ཡུག་ལ་འཇིགས་སྣང་སྐྱེད་པའི་གནས་སྟངས་ཞེས་པའི་བོད་དོན་དྲིལ་བསྒྲགས་ཀྱི་སྐོར་སྐྱོད་ཞིག་མགོ་བཙུགས་ཡོད་ཅིང་། ཐེངས་འདིའི་སྐོར་སྐྱོད་ནང་དབུས་བོད་ཀྱི་བུད་མེད་ལྷན་ཚོགས་ཀྱི་རྒྱུན་ལས་ལྔ་དང་ལས་བྱེད་གཉིས་བཅས་ཁྱོོན་བུད་མེད་བདུན་འདུག ཁོང་ཚོས་རྒྱ་གར་གྱི་ཨོ་ན་དང་། ཅན་དྷི་སྒར། ཨམ་བྷ་ལ། པ་ནི་པ་ཌི་སོགས་ཀྱི་ས་གནས་སུ་སྐོར་སྐྱོད་གནང་རྒྱུ་ཡིན་འདུག་ལ། སྦག་སྦག་གིས་སྐོར་སྐྱོད་ཐུབ་ཚོད་ཅིག་ལ་སོང་རྗེས་རླངས་འཁོར་ནང་དུ་འགྲོ་རྒྱུ་ཡིན་སྐོར་འགྲེལ་བརྗོད་གནང་བྱུང་།

ཐེངས་འདིའི་བོད་དོན་དྲིལ་བསྒྲགས་སྐོར་ལ་དབུས་བུད་མེད་ལྷན་ཚོགས་ཀྱི་ཚོགས་གཙོ་ཚེ་རིང་སྒྲོལ་མ་ལགས་ཀྱིས་འདི་གའི་གསར་འགོད་པར། བོད་ནང་གི་བོད་ཕྲུག་ཚོར་དཀའ་ངལ་འཕྲད་བཞིན་ཡོད་པ་མ་ཟད། རྒྱ་གཞུང་གིས་ཆུ་རགས་འཛུགས་སྐྲུན་གྱིས་བོད་ཀྱི་གཙང་བོ་ཁ་བསྒྱུར་བྱེད་པ་དང་། གནམ་གཤིས་འགྱུར་ལྡོག་གི་རྐྱེན་གྱིས་ཆུ་ལོག་གི་དཀའ་ངལ་སྤྲོད་བཞིན་ཡོད། ཅེས་དང་།  ཐེངས་འདིར་བོད་དོན་སྐོར་སྐྱོད་ཀྱི་ཞུ་གཏུགས་བྱེད་ས་གཙོ་བོ་རྒྱ་གར་གཞུང་ཆགས་ཡོད་ཅིང་། རྒྱ་གར་གྱི་སྲིད་བློན་མཆོག་གིས་རྒྱ་ནག་གི་སྲིད་འཛིན་ཞིས་ཅིན་ཕིན་དང་མཇལ་འཕྲད་ཡང་ཡང་གནང་ཡོད་ཀྱང་། བོད་དོན་ཐོག་བཀའ་མོལ་ཅི་ཡང་གནང་གི་མེད་པས། སྲིད་བློན་གྱི་གོ་གནས་སུ་ཡང་བསྐྱར་ཕེབས་པ་དང་བསྟུན་རྒྱ་ནག་གི་སྲིད་འཛིན་ཞིས་ཅིན་ཕིན་དང་མཉམ་དུ་བོད་དོན་བཀའ་མོལ་གནང་དགོས་པའི་འབོད་སྐུལ་ཞུ་བཞིན་ཡོད། དེ་བཞིན་ང་ཚོ་རྒྱ་གར་གྱི་སྤྱི་ཚོགས་ནང་དུ་ཞུགས་ཏེ་རྒྱ་གར་མི་མང་ལ་དེང་རབས་ཀྱི་དྲ་ལམ་སོགས་ཀྱི་ཐོག་ནས་རྒྱ་གར་གྲོས་ཚོགས་འཐུས་མི་དང་རྫོང་དཔོན་སོགས་ལ་བོད་དོན་ཐོག་རྒྱབ་སྐྱོར་བྱེད་དགོས་པའི་འབོད་སྐུལ་དང་གོ་རྟོགས་སྤེལ་བཞིན་ཡོད། ཅེས་འགྲེལ་བརྗོད་གནང་བྱུང།

དབུས་བུད་མེད་ལྷན་ཚོགས་ཀྱི་དེ་འབྲེལ་བསྒྲགས་གཏམ་ནང་།   རྒྱ་གཞུང་གིས་བོད་ནང་གི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་བཏང་སྟེ་བོད་ཀྱི་ཆོས་དང་རིག་གཞུང་རྩ་གཏོར་གཏོང་ཐབས་ཀྱི་སྲིད་ཇུས་སྤེལ་བཞིན་ཡོད་སྐོར་དང་། བོད་ནང་གི་བྱིས་པ་ལོ་ ༡༨ མན་གྱི་གྲྭ་བཙུན་རྣམས་བཙན་གྱིས་དགོན་པ་ནས་ཕྱིར་ཕུད་བཏང་སྟེ་རྒྱ་གཞུང་གི་བཅའ་སྡོད་སློབ་གྲྭར་འཇུག་བཞིན་ཡོད་པ་མ་ཟད། བོད་ཀྱི་བྱིས་པ་བཞི་ལས་གསུམ་ཁྱིམ་མི་དང་ཁ་བྲལ་ཏེ་བཅའ་སྡོད་སློབ་གྲྭར་བཅུག་ཡོད་པ་སོགས་འཁོད་འདུག

དེ་བཞིན་རྒྱ་ནག་གིས་བོད་བཙན་བཟུང་མ་བྱས་གོང་ཧི་མ་ལ་ཡའི་རི་རྒྱུད་དུ་རྒྱ་ནག་གི་དྲག་ཆས་དམག་དཔུང་གཅིག་ཀྱང་འགྲེམས་འཇོག་བྱས་མྱོང་མེད་ཀྱང་།  ད་ལྟའི་ཆར་རྒྱ་གར་མཐའ་མཚམས་སུ་བར་སྟོང་མེད་པར་ཛ་དྲག་གི་གནས་སྟངས་ཆགས་ནས་དམག་འཁྲུག་འབྱུང་ཉེན་ཆེ་བ་དང་། རྒྱ་ནག་གཞུང་གིས་མཐའ་མཚམས་སུ་མྱུར་བགྲོད་གཞུང་ལམ་གསར་རྒྱག་དང་གངས་དཀར་ཏི་སིར་གནས་སྐོར་དུ་འགྲོ་བ་སོགས་བཀག་སྡོམ་བྱེད་བཞིན་ཡོད་པ་བཅས་ནི་སེམས་འཚབ་བྱེད་དགོས་པའི་གནས་སྟངས་ཤིག་ཆགས་ཡོད་སྐོར་སོགས་བཀོད་འདུག

ཐེངས་འདིའི་ལས་འགུལ་གྱི་འབོད་ཚིག་དོན་ཚན་གསུམ་ནི་རྒྱ་ནག་དམར་གཞུང་གིས་བོད་ནང་བཙན་རྒྱལ་རིང་ལུགས་ཀྱི་བཅའ་སྡོད་སློབ་གྲྭའི་ལམ་ལུགས་ཀྱི་གནད་དོན་ཐད་རྒྱ་གར་གཞུང་གིས་གླེང་མོལ་གནང་སྟེ་བོད་ཕྲུག་ལ་སྲུང་སྐྱོབ་དགོས་པ་དང་།  རྒྱ་གཞུང་གིས་བོད་ནང་འཕེལ་རྒྱས་ལ་ཁ་གཡར་བའི་ལས་གཞི་ཁག་ཅིག་གིས་བོད་ཀྱི་ཁོར་ཡུག་ཉམས་རྒུད་དུ་འགྲོ་བཞིན་ཡོད་པས་བོད་ནང་གི་གནོད་འཚེ་སེལ་དགོས། དེ་བཞིན་བོད་ནང་དུ་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བའི་བྱ་སྤྱོད་ལ་ཛ་དྲག་གི་ཐབས་ཤེས་འདོན་དགོས་པའི་འབོད་སྐུལ་བཅས་ཞུས་འདུག

གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།