ཧོང་ཀོང་གི་དམངས་གཙོ་དོན་གཉེར་བར་ལོ་བཞི་ནས་བཅུ་བར་གྱི་ཁྲིམས་ཐག་བཅད།

ཧོང་ཀོང་ཁྲིམས་ཁང་གིས་ཧོང་ཀོང་གི་དམངས་གཙོ་དོན་གཉེར་བ་ ༤༥ ཡིས་རྒྱལ་ཁབ་ཀྱི་བདེ་འཇགས་ལ་གནོད་འཚེ་བཏང་བའི་ཉེས་མིང་གཡོགས་ཏེ་ལོ་བཞི་ནས་བཅུ་བར་གྱི་བཙོན་འཇུག་ཁྲིམས་ཐག་བཅད་འདུག

Pro-democracy leaders Benny Tai (left) and Joshua Wong (right) were among those sentenced for subversion on Tuesday. Photo:GETTY

རྒྱ་ནག་གཞུང་གིས་ཧོང་ཀོང་གི་དམངས་གཙོ་དོན་གཉེར་བ་མང་པོ་ཞིག་ལ་ཉེས་མིང་སྣ་ཚོགས་གཡོགས་ནས་གང་བྱུང་འཛིན་བཟུང་བཙོན་འཇུག་བྱས་ཡོད་པ་ལྟར། དེ་རིང་ཧོང་ཀོང་ཁྲིམས་ཁང་གིས་ཧོང་ཀོང་གི་བདེ་འཇགས་ལ་གནོད་འཚེ་བཟོས་ཡོད་པའི་ཉེས་མིང་འོག ཕྱི་ལོ་ ༢༠༡༤ ལོའི་ཧོང་ཀོང་དམངས་གཙོའི་ལས་འགུལ་གྱི་སྣེ་ཁྲིད་པ་ཧོང་ཀོང་གཙུག་ལག་སློབ་གཉེར་ཁང་གི་ཁྲིམས་ལུགས་སློབ་དཔོན་བྷིན་ནི་ཐའེ་ (Benny Tai) ལགས་དང་། དམངས་གཙོའི་ལས་འགུལ་གྱི་སྣེ་ཁྲིད་པ་ཇོ་ཧྲ་ཝང་ (Joshua Wong) གཉིས་ཀྱིས་གཙོས། ཧོང་ཀོང་གི་དམངས་གཙོ་དོན་གཉེར་བ་མི་གྲངས་ ༤༥ ལ་ལོ་བཞི་ནས་བཅུ་བར་གྱི་བཙོན་འཇུག་ཁྲིམས་ཐག་བཅད་ཡོད་འདུག

ཧོང་ཀོང་ཁྲིམས་ཁང་གིས་བཙོན་འཇུག་ཁྲིམས་ཐག་བཅད་པ་རྣམས་ནི་ཕྱི་ལོ་ ༢༠༢༠ ལོར་ཧོང་ཀོང་གི་སློབ་ཕྲུག་རྣམས་ཀྱིས་སྣེ་འཁྲིད་པའི་མི་མང་རང་བཞིན་གྱི་གཞི་རྒྱ་ཆེ་བའི་ངོ་རྒོལ་ལས་འགུལ་སྤེལ་སྐབས་རྒྱ་ནག་གཞུང་གིས་འཛིན་བཟུང་བཙན་ཁྲིད་བྱས་པ་རྐྱང་རྐྱང་ཡིན་པ་མ་ཟད། དེའི་ནང་ཧོང་ཀོང་གི་དམངས་གཙོ་དོན་གཉེར་བ་དང་། སློབ་མ། གསར་འགོད་པ། ཁྲིམས་རྩོད་པ་བཅས་ཡོད་པའི་ཁོངས། ཧོང་ཀོང་གཙུག་ལག་སློབ་གཉེར་ཁང་གི་ཁྲིམས་ལུགས་སློབ་དཔོན་བྷིན་ནི་ཐའེ་ (Benny Tai) ལགས་སུ་མི་ལོ་བཅུ་ཡི་བཙོན་འཇུག་ཁྲིམས་ཆད་དང་། ཧོང་ཀོང་གི་དམངས་གཙོ་དོན་གཉེར་བ་གྲགས་ཅན་གཞོན་ནུ་ཇོ་ཧྲ་ཝང་ལགས་སུ་ལོ་བཞི་དང་ཟླ་བརྒྱད། གསར་འགོད་པ་དང་ཕྱི་ལོ་ ༢༠༡༩ ལོར་ཧོང་ཀོང་ནང་ཡར་ལངས་རྒྱག་སྐབས་ཐད་གཏོང་མཁན་གྷན་ནེ་ཧོ་ (Gwyneth Ho) ལགས་སུ་ལོ་བདུན། ཧོང་ཀོང་སྤྱི་དམངས་ཐོབ་ཐང་ལས་འགུལ་བ་དང་གྲོས་ཚོགས་འཐུས་མི་ཟུར་པ་ལོ་ཁོ་ཧང་ (Leung Kwok-hung) ལགས་སུ་ལོ་དྲུག་དང་ཟླ་བ་དགུ་བཅས་ཀྱི་བཙོན་འཇུག་ཁྲིམས་ཐག་བཅད་འདུག

སློབ་དཔོན་བྷིན་ནི་ཐའེ་ལགས་ཕྱི་ལོ་ ༢༠༡༤ ལོའི་ཧོང་ཀོང་དམངས་གཙོའི་ལས་འགུལ་སྣེ་ཁྲིད་པ་གཙོ་གྲས་དང་། རྗེས་སུ་ཧོང་ཀོང་དམངས་གཙོའི་ལས་འགུལ་ལ་བརྟེན་ནས་ཆར་གདུགས་གསར་བརྗེའི་ལས་འགུལ་བྱུང་བ་མ་ཟད། དེ་དག་གི་ཤུགས་རྐྱེན་གྱིས་ཕྱི་ལོ་ ༢༠༡༩ ལོར་ཧོང་ཀོང་གཞུང་གི་ཉེས་ཅན་རྩིས་སྤྲོད་ཀྱི་ཁྲིམས་འཆར་ལ་ཞི་རྒོལ་བྱུང་། ལས་འགུལ་དེ་དག་ཚང་མའི་ནང་སློབ་དཔོན་ཁོང་གིས་རྒྱབ་སྐྱོར་དང་མཉམ་ཞུགས་གནང་ཡོད་པ་དང་། ཕྱི་ལོ་ ༢༠༡༧ ལོར་ཧོང་ཀོང་གི་ངོ་རྒོལ་ཁྲོམ་སྐོར་བཀོད་སྒྲིག་དང་སྐུལ་སློང་བྱས་པའི་ཉེས་མིང་འོག སྐབས་དེར་ཁོང་དང་དམངས་གཙོའི་ལས་འགུལ་བ་ཁག་ཅིག་ལ་འཛིན་བཟུང་ཁྲིམས་བཤེར་བྱས་ཡོད་པ་མ་ཟད། ཕྱི་ལོ་ ༢༠༡༨ ལོར་ཧོང་ཀོང་ཁྲིམས་ཁང་གིས་སློབ་དཔོན་ཁོང་གིས་མི་མང་ལ་ངན་སྐུལ་དང་སྤྱི་ཚོགས་ཟིང་འཁྲུག་བསླངས་བའི་ཉེས་མིང་འོག་ཟླ་ངོ་ ༡༦ རིང་བཙོན་འཇུག་ཁྲིམས་ཐག་བཅད་ཡོད་འདུག

ཇོ་ཧྲ་ཝང་ནི་དེ་སྔ་ཧོང་ཀོང་གི་ཌེ་མོ་སིས་ཊོ་ (Demosisto) ཞེས་པའི་ཧོང་ཀོང་གི་དམངས་གཙོ་དོན་གཉེར་གྱི་ཆབ་སྲིད་ཚོགས་པའི་སྤྱི་ཁྱབ་དྲུང་ཆེ་ཡིན་ཞིང་། ཁོང་ཧོང་ཀོང་གི་སློབ་མའི་ལས་འགུལ་ཁང་ (Scholarism) ཞེས་པ་གསར་འཛུགས་བྱེད་མཁན་གྱི་གྲས་ཤིག་ཡིན་འདུག ཕྱི་ལོ་ ༢༠༡༤ ལོར་ཧོང་ཀོང་གི་ཆར་གདུགས་ལས་འགུལ་གྱི་གཞོན་སྐྱེས་སྣེ་འཁྲིད་པ་ཞིག་ཏུ་གྱུར་ཏེ། རྒྱལ་སྤྱིའི་སྡིངས་ཆའི་ཐོག་གདེང་འཇོག་ཆེན་པོ་ཐོབ། ལོ་དེར་ཨ་རིར་རྟེན་གཞི་བྱས་པའི་དུས་བབ་དུས་དེབ་ (Times Magazine) ཀྱིས་ཕྱི་ལོ་ ༢༠༡༤ ལོའི་འཛམ་གླིང་གི་གཞོན་སྐྱེས་ཤུགས་རྐྱེན་ཆེ་ཤོས་གྲས་སུ་བདམས་ཡོད་པ་མ་ཟད། ལོ་དེའི་འཛམ་གླིང་གི་ཤུགས་རྐྱེན་ཆེ་ཤོས་ཀྱི་མི་སྣའི་འོས་མིར་ཡང་བདམས། ཕྱི་ལོ་ ༢༠༡༥ ལོར་ཨ་རིའི་ཧྥོར་ཅུན་དུས་དེབ་ (Fortune Magazine) ཀྱིས་ཁོང་འཛམ་གླིང་གི་རླབས་ཆེན་མགོ་ཁྲིད་ (World’s Grestest Leaders) གྲས་སུའང་བདམས། ཁོང་དམངས་གཙོའི་གཞུང་རྒོལ་ལས་འགུལ་ནང་ཞུགས་པའི་རྐྱེན་གྱིས། ཕྱི་ལོ་ ༢༠༡༧ དང་ ༢༠༡༨ ལོར་ཐེངས་གཉིས་བསྟུད་མར་བཙོན་འཇུག་ཁྲིམས་ཆད་ཕོག

ཕྱི་ལོ་ ༡༩༩༧ ལོར་དབྱིན་གཞུང་གིས་ཧོང་ཀོང་རྒྱ་ནག་ལ་རྩིས་སྤྲོད་བྱེད་སྐབས་མི་ལོ་ ༥༠ རིང་ཧོང་ཀོང་གི་རང་སྐྱོང་གནས་བབ་ལ་འགྱུར་བ་གཏོང་རྒྱུ་མིན་པའི་ཆིངས་ཡིག་བཞག་སྟེ་རྒྱལ་ཁབ་གཅིག་ལ་ལམ་ལུགས་གཉིས་ཞེས་པའི་ལམ་ལུགས་ལག་བསྟར་བྱས་ཡོད་ཀྱང་། ཕྱི་ལོ་ ༢༠༢༠ ལོར་རྒྱ་ནག་གཞུང་གིས་ཧོང་ཀོང་བདེ་འཇགས་ཀྱི་ཁྲིམས་གཞི་བཏོན་ཏེ་ཡུལ་དེར་རྙོག་ཟིང་དང་དྲག་གནོན་ཤུགས་ཆེན་བྱས་པར་བརྟེན། ཧོང་ཀོང་གི་དམངས་གཙོ་དོན་གཉེར་བ་མང་པོ་དབྱིན་ཡུལ་དང་ཐའེ་ཝན་སོགས་སུ་སྐྱབས་བཅོལ་དུ་འགྲོ་དགོས་བྱུང་ཡོད་པ་མ་ཟད། ལོ་དེར་དབྱིན་ཡུལ་གྱི་སྲིད་བློན་བྷོ་རི་སི་རྗོན་སོན་མཆོག་གིས་རྒྱ་ནག་གིས་ཧོང་ཀོང་བདེ་འཇགས་ཀྱི་ཁྲིམས་ཡིག་གསར་པ་ཟེར་བ་ཕྱིར་འཐེན་མ་བྱས་ཚེ། ཧོང་ཀོང་མི་མང་ས་ཡ་ ༣ མ་ཟིན་ཙམ་དབྱིན་ཡུལ་དུ་བླངས་ཏེ་རིམ་གྱིས་མི་སེར་ཐོབ་ཐང་སྤྲོད་འཆར་ཡོད་སྐོར་བསྒྲགས་ཡོད་པ་རེད། དེ་མ་ཐག་རྒྱ་ནག་ཕྱི་འབྲེལ་མགྲིན་ཚབ་པས་བྱ་སྤྱོད་དེ་ནི་ཡུལ་གཉིས་བར་བཞག་པའི་ཆིངས་ཡིག་གི་ནང་དོན་ལ་འགལ་འཛོལ་ཆེན་པོ་ཕྱིན་པ་ཞིག་ཡིན་ལ། ཧོང་ཀོང་ནང་ཁྲིམས་ཡིག་ལག་བསྟར་བྱ་རྒྱུ་དེ་རྒྱ་ནག་གི་རྒྱལ་ནང་གནད་དོན་ཞིག་ཡིན་པས་ཐེ་གཏོགས་བྱ་རྒྱུ་མེད་པའི་ཉེན་བརྡ་བཏང་སྟེ་བཀག་འགོག་བྱས་ཡོད་པ་རེད།

གསར་འགོད་པ། དཔལ་ལྡན།

རྩོམ་སྒྲིག་བྱེད་མཁན། པདྨ་མཚོ།